ཊི་རུམ་ཕི་ཡི་གཞུང་དང་རྒྱ་ནག་གི་འབྲེལ་ལམ་ཇེ་སྡུག་ཏུ་འགྲོ་སྲིད།

རྒྱ་ནག་གི་ཆབ་སྲིད་དབྱེ་ཞིབ་པ་ཁག་ཅིག་གིས་ཨ་རི་དང་རྒྱ་ནག་གི་འབྲེལ་བ་དེ་ལྷོ་རྒྱུད་མཚོ་ཁུལ་རྩོད་རྙོག་ལས་ཀྱང་འགྲོ་བ་མིའི་ཐོབ་ཐང་དང་ཆོས་དད་རང་དབང་། ཐའེ་ཝན་དང་ཧོང་ཀོང་གི་གནད་དོན་ཡིན་སྐོར་བརྗོད་འདུག

ཁ་སང་རྒྱ་ནག་གི་རྒྱལ་ས་པེ་ཅིན་དུ་རྒྱལ་སྤྱིའི་འབྲེལ་ལམ་ལས་དོན་ཚོགས་འདུ་ཟེར་བ་ཞིག་ཚོགས་ཡོད་པ་དང་། དེར་རྒྱ་ནག་གི་སློབ་གྲྭ་ཆེན་མོ་ཁག་ཅིག་གི་སྲིད་དོན་ཉམས་ཞིབ་པ་ཚོས་གཏམ་བཤད་སྤེལ་སྐབས། མ་འོངས་པར་རྒྱ་ནག་དང་ཨ་རིའི་འབྲེལ་ལམ་གང་འདྲ་ཆགས་མིན་དང་། ཐའེ་ཝན་དང་ཧོང་ཀོང་གི་གནད་དོན། དེ་བཞིན། རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནད་དོན་སོགས་གླེང་འདུག

པེ་ཅིན་སློབ་ཆེན་གྱི་རྒྱལ་སྤྱིའི་འབྲེལ་ལམ་ལས་དོན་ཞིབ་འཇུག་ཚན་པའི་སློབ་སྟོན་པ་ཝང་ཅེ་ཚི་ (Wang Jisi)ཡིས། ཨ་རི་དང་རྒྱ་ནག་གཉིས་ཀྱི་གཞི་རྩའི་ཆབ་སྲིད་སྲིད་ལྟ་བ་མི་མཐུན་པར་བརྟེན་ཏེ། ཕྱོགས་གཉིས་བར་གྱི་འབྲེལ་ལམ་ལ་ལྡོག་ཕྱོགས་ཀྱི་ཤན་ཤུགས་ཐེབས་རྒྱུ་ཡིན་པ་དང་། ཨ་རིའི་སྲིད་འཛིན་འོས་ཐོབ་པ་སྐུ་ཞབས་ཊི་རུམ་ཕི་ཡི་སྲིད་གཞུང་སྐབས། ཕྱོགས་གཉིས་བར་གྱི་འབྲེལ་ལམ་ད་ལྟའི་གནས་སྟངས་ལས་སྡུག་ཏུ་འགྲོ་སྲིད་སྐོར་སོགས་བཤད་ཡོད་འདུག

ཝང་ཅེ་ཚི་ཡིས། ང་རང་གི་ལྟ་ཚུལ་ལྟར་ན་རྒྱ་ནག་གི་ལྷོ་རྒྱུད་མཚོ་ཁུལ་རྩོད་གླེང་ལས་ཀྱང་། རྒྱ་ནག་ནང་གི་འགྲོ་བ་མིའི་ཐོབ་ཐང་དང་ཆོས་ལུགས་རང་དབང་། ཐའེ་ཝན་དང་ཧོང་ཀོང་གི་གནད་དོན་བཅས་ལ་བརྟེན་ནས་ཨ་རི་དང་རྒྱ་ནག་གཉིས་བར་གྱི་འབྲེལ་ལམ་ལ་ལྡོག་ཕྱོགས་ཀྱི་ཤུགས་རྐྱེན་ཐེབས་རྒྱུ་ཡིན་པ་དང་། ང་ཚོར་མཚོན་ན། ཨ་རིས་བཟོས་པའི་འཇིགས་སྐུལ་ཆེ་ཤོས་དེ་དམག་དོན་དང་དཔལ་འབྱོར་འགྲན་རྩོད་མ་ཡིན་པར་ཆབ་སྲིད་ཡིན་པ་དང་། ཨ་རིའི་གཞུང་གིས་ནམ་རྒྱུན་རྒྱ་ནག་གི་ནང་སྲིད་ལ་ལག་པ་བརྐྱངས་ཏེ། རྒྱ་ནག་གི་སྲིད་དབང་འཛིན་པའི་དམར་ཤོག་ཚོགས་པ་མགོ་རྟིང་བསློག་འདོད་ཡོད་པར་མཐོང་གི་འདུག ཅེས་བརྗོད་འདུག

ཆིན་ཧྭ་སློབ་ཆེན་གྱི་དེང་དུས་རྒྱལ་སྤྱིའི་འབྲེལ་ལམ་ཞིབ་འཇུག་ཚན་པའི་འགན་འཛིན་ཡན་ཞི་ཐོང་ (Yan Xuetong)ལགས་ཀྱིས། ཐའེ་ཝན་གྱི་གནད་དོན་ནི་ཊི་རུམ་ཕི་ཡིས་རྒྱ་ནག་ལ་འགོག་རྒོལ་བྱེད་པའི་ལག་ཆ་གཙོ་བོ་དང་། རྒྱ་ནག་ཐོག་འཛིན་པའི་སྲིད་ཇུས་ཀྱི་དམིགས་འབེན་གལ་ཆེ་ཤོས་ཡིན་པ་དང་། དམིགས་འབེན་དེ་ལ་བརྟེན་ནས་ཊི་རུམ་ཕི་ཡིས་ལྷོ་ཨེ་ཤ་ཡའི་རྒྱལ་ཁབ་ཁག་གི་ཉོ་འཚོང་འབྲེལ་ལམ་རྡོག་རོལ་བཏང་སྟེ། ཤར་ཨེ་ཤ་ཡའི་རྒྱལ་ཁབ་ཁག་དང་ཉོ་འཚོང་མཉམ་འབྲེལ་བྱ་རྒྱུར་དམིགས་ཡོད་པ་དང་། དེ་སྔ་སྲིད་འཛིན་ཨོ་བྷ་མས་ལྷོ་ཨེ་ཤ་ཡའི་རྒྱལ་ཁབ་ཁག་ལ་ཉོ་འཚོང་འབྲེལ་ལམ་བཙུགས་ཏེ་ཨེ་ཤ་ཡའི་དཔལ་འབྱོར་འདུ་འགོད་སྙོམ་སྒྲིག་བྱས་ཡོད་ཀྱང་། སྐུ་ཞབས་ཊི་རུམ་ཕི་ཡིས་ཨོ་བྷ་མའི་ཉོ་འཚོང་སྲིད་བྱུས་དེ་གཏོར་བཤིག་བཏང་སྟེ་རྒྱ་ནག་དཀྱིལ་སྙིང་དུ་བཟུང་སྟེ། ཉི་ཧོང་དང་ལྷོ་ཀོ་རི་ཡ། རྒྱ་གར་དང་སིང་གྷ་ཕོར། ཐའེ་ལན་ཌི་དང་ཝ་ཋི་ནམ། ཨུ་རུ་སུ་སོགས་ལ་ཉོ་འཚོང་འབྲེལ་ལམ་འཛུགས་འདོད་ཡོད་པ་རེད། ཅེས་བརྗོད་འདུག

ཡན་ཞི་ཐོང་གིས་མུ་མཐུད་དུ། ཊི་རུམ་ཕི་ཡིས་ཨུ་རུ་སུར་བཟང་ཕྱོགས་ཀྱི་འབྲེལ་ལམ་འཛིན་དོན་ནི། ཨུ་རུ་སུའི་སྲིད་འཛིན་ཕུ་ཊེན་གྱིས་ཊི་རུམ་ཕི་ཡི་སྲིད་འཛིན་འོས་འགྲན་ཐད་རྒྱབ་སྐྱོར་བྱས་པ་གཅིག་པུ་མིན་པར། ཨུ་རུ་སུས་ཤར་ཨེ་ཤ་ཡའི་རྒྱལ་ཁབ་ཁག་ནང་ཆབ་སྲིད་ཀྱི་རྩེད་མོ་རྩེ་བཞིན་པ་དང་འབྲེལ་བ་ཆགས་ཡོད། དེར་བརྟེན། རྒྱ་ནག་གི་དཔོན་རིགས་ཚོས་ཊི་རུམ་ཕི་ཡི་སྐད་ཆ་རེ་རེ་བཞིན་ཉན་འཇོག་མི་བྱེད་པར། ཨ་རི་དང་རྒྱ་ནག་གཉིས་བར་གྱི་ཉོ་འཚོང་འབྲེལ་ལམ་ལ་བརྟེན་ནས། རྒྱ་ནག་གི་ཁེ་ཕན་ག་རེ་ཡིན་པ་དང་། ཁེ་ཕན་དེ་ཇི་ལྟར་འཐོབ་ཐབས་བྱེད་པའི་སྐོར་ལ་མནོ་བསམ་གཏོང་དགོས། ཞེས་བརྗོད་འདུག

གཞན། ཁ་སང་རྒྱ་ནག་ཕྱི་འབྲེལ་བློན་ཆེན་ཝང་ཡེས་ཁ་པར་སྐུད་ལམ་བརྒྱུད། ཨ་རིའི་རྒྱལ་དོན་དྲུང་ཆེ་རྗོན་ཀེ་རེ་ལ། རྒྱལ་ཁབ་གཉིས་བར་གྱི་འབྲེལ་ལམ་དེ་བཟང་ཕྱོགས་ནས་ཡར་རྒྱས་གཏོང་དགོས་ལུགས་བཤད་ཡོད་པ་དང་། སྐབས་དེར་ཨ་རིའི་རྒྱལ་དོན་དྲུང་ཆེ་རྗོན་ཀེ་རེ་ཡིས་ཀྱང་ཝང་ཡེ་ལ། ཨ་རིའི་གཞུང་གིས་རྒྱ་ནག་རྒྱལ་ཁབ་གཅིག་གི་སྲིད་ཇུས་རྒྱུན་འཁྱོངས་བྱེད་ཀྱིན་ཡོད་སྐོར་བརྗོད་འདུག

རྒྱ་ནག་ལྷོ་རྒྱུད་ཚགས་པར་ཁང་གིས་སྤེལ་བའི་གནས་ཚུལ་གཞན་ཞིག་གི་ནང་། ཐའེ་ཝན་མཚོ་འགག་དང་སྐམ་ས་ཆེན་མོ་གཉིས་བར་གྱི་ལས་དོན་འབྲེལ་མཐུད་པ་ཟུར་བ་ཝང་ཙི་ཞི་ (Wang Zaixi) ཟེར་བ་ཞིག་གིས། སྐུ་ཞབས་ཊི་རུམ་ཕི་ཟླ་འདིའི་ཕྱི་ཚེས་ ༢༠ ཉིན་ཨ་རིའི་སྲིད་འཛིན་ཆགས་རྗེས། ཐའེ་རྒྱ་གཉིས་བར་གྱི་འབྲེལ་ལམ་ད་ལྟའི་གནས་སྟངས་ལས་སྡུག་ཏུ་འགྲོ་སྲིད་པ་དང་། ཨ་རིའི་རྒྱབ་རོགས་ལ་བརྟེན་ནས་ཐའེ་ཝན་རང་བཙན་གྱི་དཔུང་ཤུགས་ཇེ་ཆེར་འགྲོ་བཞིན་ཡོད་སྟབས། རྒྱ་ནག་སྐམ་ས་ཆེན་མོས་དྲག་ཤུགས་ལ་བརྟེན་ཏེ་ཐའེ་ཝན་རང་བཙན་གྱི་རྩོད་གླེང་བཀག་བསྡོམས་བྱེད་དགོས་པ་དང་། ཐའེ་ཝན་གྱི་རྩོད་རྙོག་སེལ་ཐབས་གཙོ་བོ་དེ་ཆབ་སྲིད་དང་དཔལ་འབྱོར། དམག་དོན་དང་གསར་འགྱུར་བརྒྱུད་ལམ། ཕྱི་འབྲེལ་སྲིད་ཇུས་སོགས་ཡིན་ཚུལ་བཤད་འདུག

ཐའེ་ཝན་རྒྱལ་ཡོངས་གཙུག་ལག་སློབ་ཆེན་གྱི་སྲིད་དོན་དབྱེ་ཞིབ་པ་ཁྲང་ཡ་ཁྲུང་ (Chang Yachung)ལགས་ཀྱིས ལྕམ་ཚའེ་ཡེན་ཝན་གཞུང་གིས། ཕྱི་ལོ་ ༡༩༩༢ ལོར་བཞག་པའི་རྒྱ་ནག་རྒྱལ་ཁབ་གཅིག་གི་སྲིད་ཇུས་ལ་ངོས་ལེན་བྱེད་ཀྱིན་མེད་སྟབས། ཐའེ་པེ་དང་པེ་ཅིན་བར་གཞི་རྩའི་འབྲེལ་མོལ་འབྱུང་ཐབས་མེད་པ་དང་། ལྕམ་ཚའེ་ཡེན་ཝན་གྱིས་རྒྱ་ནག་གཞུང་གི་གནོན་ཤུགས་ལ་མུ་མཐུད་གདོང་ལེན་བྱེད་ཀྱིན་ཡོད་པ་དང་། གནས་སྟངས་དེ་ལ་བརྟེན་ཏེ་ཐའེ་ཝན་གཞོན་སྐྱེས་ཁྲོད་རྒྱལ་ཞེན་ཤུགས་ཆེ་རུ་འགྲོ་གི་ཡོད་ཅིང་། གནས་སྟངས་དེ་པེ་ཅིན་གཞུང་གིས་མཐོང་འདོད་མེད་སྐོར་སོགས་བརྗོད་འདུག

གསར་འགོད་པ། པདྨ་རྒྱལ།