ཚའེ་ཡེན་ཝན་ཨ་རིའི་གྲོས་ཚོགས་འཐུས་མིར་མཇལ་འཕྲད་གནང་།

ཁ་སང་ཐའེ་ཝན་སྲིད་འཛིན་ལྕམ་ཚའེ་ཡེན་ཝན་ཨ་རིའི་གྲོས་ཚོགས་འཐུས་མིར་ཐུག་འཕྲད་གནང་བར་རྒྱ་ནག་གཞུང་ཁོང་ཁྲོ་ལངས་ཡོད་ཀྱང་ཨ་རིའི་གྲོས་ཚོགས་འཐུས་མིས་དེ་ནི་རྒྱལ་སྤྱིའི་ཕྱི་འབྲེལ་སྲིད་ཇུས་དང་མཐུན་ཟེར།

དེ་རིང་ཧྥ་རན་སིའི་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་རེས་གཟའ་ཉི་མའི་ཉིན། ཐའེ་ཝན་གྱི་སྲིད་འཛིན་ལྕམ་ཚའེ་ཡེན་ཝན་ཨ་མི་རི་ཁའི་དབུས་ཁུལ་རྒྱལ་ཁབ་ཁག་ཅིག་ནང་སྐོར་སྐྱོད་དུ་ཕེབས་བཞིན་པའི་ལམ་བར་དུ། ཨ་རིའི་མངའ་སྡེ་ཊཀ་སི་(Texas) ཡི་གྲོང་ཁྱེར་ཧུ་སི་ཊོན་ (Houston) ནང་། ཨ་རིའི་གྲོས་ཚོགས་འཐུས་མི་སྐུ་ཞབས་ཊི་ཌ་ཁ་རུ་རྫ་ (Ted Cruz) ལགས་དང་མཇལ་འཕྲད་བྱས་ཏེ། དྲག་ཆས་ཉོ་འཚོང་དང་ཕྱི་འབྲེལ་སྲིད་ཇུས། དཔལ་འབྱོར་མཉམ་འབྲེལ་སོགས་ཀྱི་སྐོར་ལ་གྲོས་བསྡུར་བྱས་ཡོད་འདུག

སྐུ་ཞབས་ཊི་ཌ་ཁ་རུ་རྫ་ལགས་ཀྱིས། ཐེངས་འདིའི་མཇལ་འཕྲད་སྐོར་ལ་གསལ་བསྒྲགས་ཤིག་སྤེལ་བའི་ནང་། ཕྱོགས་གཉིས་བར་གྱི་དཔལ་འབྱོར་མཉམ་ལས་ནི། རྒྱལ་ཁབ་གཉིས་ཀྱི་དཔལ་འབྱོར་འཚོལ་སྒྲུབ་ཀྱི་ལས་དོན་གལ་ཆེན་ཆགས་ཡོད་པ་དང་། ཐའེ་ཝན་མཚོ་འགག་གི་དཔལ་འབྱོར་ཁྲོམ་རྭར་འབྲེལ་ལམ་འཛུགས་རྒྱུ་ནི། ཊི་ཁི་སི་མངའ་སྡེའི་ཞང་ཕྱུགས་མང་ཚོགས་དང་དཔལ་འབྱོར་ལས་རིགས་ཁག་གི་ཁེ་ཕན་དང་འབྲེལ་བ་ཡོད། ཐའེ་ཝན་སྲིད་འཛིན་དང་ངེད་གཉིས་ཐུག་འཕྲད་མ་བྱུང་བའི་སྔོན་ཏག་ཏག་ལ། རྒྱ་ནག་གཞུང་གིས་ཧུ་སི་ཊོན་གྲོས་ཚོགས་ཀྱི་སྐུ་ཚབ་ཚོར་གློག་འཕྲིན་བཏང་སྟེ། ཨ་རིའི་རྒྱལ་གྲོས་ཚོགས་འཐུས་མི་ཚོས་རྒྱ་ནག་རྒྱལ་ཁབ་གཅིག་གི་སྲིད་ཇུས་རྒྱུན་འཁྱོངས་བྱས་ཏེ་ཐའེ་ཝན་སྲིད་འཛིན་ལྕམ་ཚའེ་ཡེན་ཝན་ལ་ཐུག་འཕྲད་བྱེད་མི་ཆོག་ཅེས་བརྗོད་ཡོད་པ་རེད། ཡིན་ནའང་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱིས། ཨ་རིའི་ནང་ང་ཚོ་རྒྱལ་ཁབ་གཞན་གྱི་ལྟ་སྐོར་བ་སུ་ཞིག་ལ་མཇལ་འཕྲད་བྱེད་མིན་དེ་ང་ཚོ་རང་ངོས་ནས་ཐག་གཅོད་དགོས་པ་ཤེས་དགོས། ང་ཚོ་མི་སྣ་སུ་ཞིག་ལ་ཐུག་འཕྲད་བྱེད་མིན་རྒྱ་ནག་གིས་བཙན་བཀའ་བཏང་མི་ཆོག མ་འོངས་པར་ང་ཚོ་མུ་མཐུད་དུ་ཐའེ་ཝན་མཚོ་འགག་ཚུད་པའི་རྒྱལ་ཁབ་གཞན་གྱི་མི་སྣ་ཚོར་ཐུག་འཕྲད་བྱ་རྒྱུ་ཡིན་ལ། དེ་ནི་རྒྱལ་སྤྱིའི་ཕྱི་འབྲེལ་སྲིད་ཇུས་དང་མཐུན་པར་ངོས་འཛིན་བྱེད་ཀྱིན་ཡོད། ཅེས་བརྗོད་འདུག

རྒྱ་ནག་གཞུང་འབྲེལ་གོ་ལའི་དུས་བབ་གསར་འགྱུར་ཁང་གིས་གནས་ཚུལ་སྤེལ་བའི་ནང་། གལ་ཏེ་ཊི་རུམ་ཕི་ཕོ་བྲང་དཀར་པོའི་ནང་བསླེབས་རྗེས། ཁོས་རྒྱ་ནག་གཅིག་གི་སྲིད་ཇུས་ལ་ངོས་ལེན་མ་བྱས་ཚེ། རྒྱ་ནག་མི་མང་གིས་ཊི་རུམ་ཕི་གཞུང་ལ་ཡ་ལན་བསློག་ངེས་ཡིན་ལ། ཨ་རི་དང་ཐའེ་ཝན་གཉིས་བར་ཉོ་འཚོང་གི་འབྲེལ་ལམ་བཟུང་མི་ཆོག སྐམ་ས་ཆེན་མོས་ཐའེ་ཝན་མཚོ་འགག་གི་ཕྱི་འབྲེལ་སྲིད་ཇུས་དང་དམག་དོན་ཐོག་སྔར་ལྷག་གནོན་ཤུགས་སྤྲོད་ངེས་ཡིན། ཚའེ་ཡེན་ཝན་གྱི་ཁོ་མོའི་ཕྱི་འབྲེལ་སྲིད་ཇུས་ཀྱི་མཇུག་འབྲས་ལ་འགན་འཁུར་དགོས། ཞེས་སོགས་བཀོད་འདུག

ཟླ་འདིའི་ཕྱི་ཚེ་ ༧ ཉིན་ལྕམ་ཚའེ་ཡེན་ཝན་གྱིས། ཐའེ་ཝན་མི་མང་གི་སེམས་ནང་ཨ་རིའི་རྒྱལ་ཁབ་ལ་གོ་གནས་གལ་ཆེན་བཟུང་ཡོད། ཕྱོགས་གཉིས་བར་གྱི་འབྲེལ་མོལ་ལ་བརྟེན་ནས། ཐའེ་ཝན་མཚོ་འགག་གིས་དངོས་ཟོག་དང་དྲག་ཆས་ཉོ་འཚོང་། དེ་བཞིན། མ་དངུལ་འཛུགས་སྐྲུན་སོགས་བརྒྱུད་ནས་ཨ་རིའི་ནང་ལས་རིགས་མི་འདྲ་བ་ ༣༢༠༠༠༠ ལྷག་མཁོ་འདོན་བྱ་རྒྱུ་ཡིན། ཞེས་བརྗོད་ཡོད་འདུག

གནས་ཚུལ་དེ་དང་འབྲེལ་ཏེ། པེ་ཅིན་ཕྱོགས་ནས། ཨ་རིའི་གཞུང་གིས་ལྕམ་ཚའེ་ཡེན་ཝན་ཨ་རིའི་ནང་གནས་སྡོད་བྱེད་དུ་བཅུག་མི་ཆོག་པ་དང་། རྒྱ་ནག་གཅིག་གི་སྲིད་ཇུས་ལམ་ལུགས་འོག ལྕམ་ཚའེ་ཡེན་ཝན་རྒྱལ་ཁབ་གཞན་གྱི་གཞུང་འབྲེལ་དཔོན་རིགས་སུ་ལའང་ཐུག་འཕྲད་བྱེད་པའི་ཐོབ་ཐང་མེད་ལུགས་བཤད་འདུག

སྐུ་ཞབས་ཊི་རུམ་ཕི་ཡིས། ཁོང་གིས་ཟླ་འདིའི་ཕྱི་ཚེས་ ༢༠ ཉིན་སྲིད་འཛིན་ལས་འཁུར་མ་ཞུས་སྔོན་ལ་རྒྱལ་ཁབ་གཞན་གྱི་དཔོན་རིགས་ཚོར་ཐུག་འཕྲད་བྱས་ན་སྟབས་བདེ་མིན་སྐོར་བརྗོད་ཡོད་འདུག

གསར་འགོད་པ། པདྨ་རྒྱལ།