ཞི་ཅིན་ཕིན་ལ་ངོ་རྒོལ་ལས་འགུལ་སྤེལ་རྒྱུ་རེད།

བདུན་ཕྲག་རྗེས་མའི་ནང་སུད་སིའི་ནང་རྒྱལ་སྤྱིའི་དཔལ་འབྱོར་ཚོགས་ཆེན་ཐེངས་ཞེ་བདུན་པ་ཚོགས་འཆར་ཡོད་པའི་སྟེང་རྒྱ་ནག་གི་སྲིད་འཛིན་ཞི་ཅིན་ཕིན་མཉམ་ཞུགས་བྱ་རྒྱུ་ཡིན་པར་སུད་སིའི་བོད་མི་ཚོས་ངོ་རྒོལ་ལས་འགུལ་སྤེལ་རྒྱུ་ཡིན་འདུག

དེ་རིང་རྒྱ་ནག་ཕྱི་འབྲེལ་བློན་ཆེན་གཞོན་པ་ལི་པོ་ཏུང་ (Li Baodong) གིས་གསར་འགོད་གསལ་བསྒྲགས་ཤིག་སྤེལ་ཏེ། ཟླ་འདིའི་ཕྱི་ཚེས་ ༡༧ ནས་ ༢༠ བར་ཕྱི་ལོ་ ༢༠༡༧ ལོའི་རྒྱལ་སྤྱིའི་དཔལ་འབྱོར་གྲོས་མོལ་ཚོགས་ཆེན་ (WEF) ཐེངས་ ༤༧ པ་དེ་སུད་སིའི་གྲོང་རྡལ་ཌ་ཝོ་སི་ (Davos) ཡི་ (Swiss Alpine Resort) གསོལ་མགྲོན་ཁང་དུ་འཚོགས་འཆར་ཡོད་པ་དང་། རྒྱ་ནག་གི་སྲིད་འཛིན་ཞི་ཅིན་ཕིན་ཚོགས་ཆེན་སྟེང་མཉམ་ཞུགས་བྱ་རྒྱུ་ཡིན་སྟབས། ཞི་ཅིན་ཕིན་གྱི་སྐུ་ཚབ་ཚོགས་པ་ཞིག་སྔོན་ལ་སོང་ནས་ཨ་རིའི་སྲིད་འཛིན་སྐུ་ཞབས་ཊི་རུམ་ཕི་ཡི་གཞུང་འབྲེལ་དཔོན་རིགས་ཚོར་ཐུག་འཕྲད་བྱ་བར་གྲ་སྒྲིག་བྱེད་རྒྱུ་ཡིན་ཚུལ་བཤད་འདུག

ཐེངས་འདིར་རྒྱ་ནག་གི་སྲིད་འཛིན་ཞི་ཅིན་ཕིན་སུད་སིར་སྐོར་སྐྱོད་དང་བསྟུན་ཏེ། སྲིད་སིའི་གཞུང་གིས་སྲུང་སྐྱོབ་ཧ་ཅང་དམ་པོ་བྱེད་ཀྱིན་ཡོད་མེད་ལ་མ་ལྟོས་པར། སུད་སིར་གནས་སྡོད་བོད་མི་དང་བོད་དོན་རྒྱབ་སྐྱོར་བ། དེ་བཞིན། རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་སྡེ་ཁག་བཅས་ཀྱིས་ངོ་རྒོལ་ལས་འགུལ་སྤེལ་འཆར་ཡོད་འདུག སུད་སི་བོད་རིགས་མི་མང་གི་ཚོགས་གཙོ་བསྟན་འཛིན་སྙིང་པོ་ལགས་ཀྱིས་གསལ་བསྒྲགས་གནང་བ་ལྟར་ན། ཟླ་འདིའི་ཚེས་ ༡༥ རེ་གཟའ་ཉི་མའི་སྔ་དྲོའི་ཆུ་ཚོད་ ༡༠ པའི་སྟེང་སུད་སིའི་རྒྱལ་ས་བྷན་དུ་ངོ་རྒོལ་ལས་འགུལ་གོ་སྒྲིག་ཞུ་རྒྱུ་ཡིན་པ་དང་། ཚེས་ ༡༨ ཉིན་ཇི་ནེ་ཝའི་མཉམ་འབྲེལ་རྒྱལ་ཚོགས་མདུན་དུ་ངོ་རྒོལ་ལས་འགུལ་སྤེལ་རྒྱུ་ཡིན་འདུག

ལི་པོ་ཏུང་གིས་བརྗོད་དོན། ཐེངས་འདིའི་རྒྱལ་སྤྱིའི་དཔལ་འབྱོར་ཚོགས་ཆེན་དང་བསྟུན་ནས། སྐུ་ཞབས་ཊི་རུམ་ཕི་ཡི་ཤོག་ཁག་དང་ཞི་ཅིན་ཕིན་གྱི་ཤོག་ཁག་གཉིས་བར་གྲོས་མོལ་གྱི་གོ་སྐབས་ཡོད་པ་དང་། ཕྱི་ཚེས་ ༡༧ ཉིན་ཞི་ཅིན་ཕིན་གྱི་ཚོགས་ཆེན་ཐོག་འཛམ་གླིང་རྒྱལ་ཁབ་ཐུན་མོང་གི་ཁེ་ལས་མཉམ་འབྲེལ་བྱེད་ཕྱོགས་ཐད་ལ་གཏམ་བཤད་སྤེལ་རྒྱུ་ཡིན་པ་དང་། རྒྱལ་ཁབ་མང་པོས་ཚོང་དོན་ཐོག་ནས་རྒྱ་ནག་ལ་ཉེས་འཛུགས་བྱེད་བཞིན་པ་དེ་དྲང་བདེན་མིན་སྟབས། པེ་ཅིན་གཞུང་གིས་གནད་དོན་དེའི་རིགས་ལ་མཐའ་གཅིག་ཏུ་ཡ་ལན་སློག་རྒྱུ་ཡིན་ལུགས་སོགས་བཤད་འདུག

ད་ལོའི་ཚོགས་ཆེན་ཐོག་འཛམ་གླིང་ཤར་ནུབ་རྒྱལ་ཁབ་ཁག་གི་གཞུང་དང་གཞུང་འབྲེལ་མ་ཡིན་པའི་ཁེ་ལས་སྡེ་ཁག་དང་རྒྱལ་སྤྱིའི་ཉོ་འཚོང་སྒྲིག་འཛུགས་ཁག བཟོ་ལས་དཔལ་འབྱོར་དང་གསར་འགྱུར་ལས་རིགས་བཅས་ཀྱི་དབུ་ཁྲིད་དང་སྐུ་ཚབ་སོགས་ཁྱོན་མི་གྲངས་ ༢༥༠༠ ལྷག་མཉམ་ཞུགས་བྱ་རྒྱུ་ཡིན་པ་དང་། ཚོགས་ཆེན་སྟེང་དབུ་ཁྲིད་ཀྱི་འགན་འཁུར་ (Responsive Leadership) ཞེས་པའི་བརྗོད་གཞིའི་ཐོག ཕྱི་ལོ་ ༢༠༡༧ ལོའི་རྒྱལ་སྤྱིའི་དཔལ་འབྱོར་འདུ་འགོད་ཐད་ཀྱི་དཀའ་རྙོག་ ༤ ཡི་ཐད་གྲོས་མོལ་བྱ་འཆར་ཡོད་པའི་དང་པོ་རྒྱལ་སྤྱིའི་དཔལ་འབྱོར་མཉམ་ལས་བྱེད་ཕྱོགས་དང་། གཉིས་པ་རྒྱལ་སྤྱིའི་དཔལ་འབྱོར་འཕེལ་རྒྱས་གཏོང་ཕྱོགས། གསུམ་པ་མ་རྩ་རིང་ལུགས་བཅོས་བསྒྱུར་གཏོང་ཕྱོགས། བཞི་བ་བཟོ་ལས་དཔལ་འབྱོར་གསར་བརྗེ་སྐབས་བཞི་བར་གྲ་སྒྲིག་བྱེད་ཕྱོགས་བཅས་ཡིན་པ་མ་ཟད། ད་དུང་ཚོགས་ཆེན་གྱི་ཟུར་དུ་བརྗོད་གཞི་མི་འདྲ་བ་གཞན་འགའི་ཐོག་ཏུའང་གྲོས་མོལ་ཚོགས་འདུ་ཆེ་ཆུང་ ༤༠༠ ཙམ་འཚོགས་འཆར་ཡོད་འདུག

རྒྱ་ནག་གཙོས་པའི་དེང་དུས་ཀྱི་དཔལ་འབྱོར་འཕེལ་རྒྱས་འགྲོ་བཞིན་པའི་རྒྱལ་ཁག་གིས། ད་ལོའི་རྒྱལ་སྤྱིའི་དཔལ་འབྱོར་ཚོགས་ཆེན་གྱི་གོ་སྐབས་དང་བརྟེན་ཏེ། ཚེས་ ༢༠ ཉིན་ཨ་རིའི་སྲིད་འཛིན་བདམས་ཐོན་པ་སྐུ་ཞབས་ཊི་རུམ་ཕི་ཡི་སྲིད་འཛིན་ལས་ཁུར་ལ་དོ་སྣང་ཤུགས་ཆེན་བྱེད་ཀྱིན་ཡོད་འདུག

ཟླ་འདིའི་ཕྱི་ཚེས་ ༡༥ ནས་ ༡༨ བར་རྒྱ་ནག་གི་སྲིད་འཛིན་ཞི་ཅིན་ཕིན་སུད་སིའི་ནང་སྐོར་སྐྱོད་བྱ་འཆར་ཡོད་པ་དང་། ཕྱི་ཚེས་ ༡༧ ནས་ ༢༠ བར་རྒྱལ་སྤྱིའི་དཔལ་འབྱོར་གྲོས་མོལ་ཚོགས་ཆེན་ཐོག་ཞུགས་རྒྱུ་ཡིན་འདུག

གསར་འགོད་པ། པདྨ་རྒྱལ།