བློ་བཟང་རྒྱལ་མཚན་བོད་རང་སྐྱོང་ལྗོངས་ཟེར་བའི་འཐུས་མིའི་ཚོགས་ཆེན་གྱི་ཚོགས་གཙོ་དང་ཆེ་དགྲ་ལྷ་རང་སྐྱོང་ལྗོངས་ཀྱི་མགོ་ཁྲིད་(སྤྱི་ཁྱབ)དུ་བསྐོས་ཡོད་འདུག
ཁ་སང་བོད་རང་སྐྱོང་ལྗོངས་ཟེར་བའི་མི་དམངས་འཐུས་མིའི་ཚོགས་ཆེན་སྐབས་བཅུ་བའི་ཚོགས་འདུ་ཐེངས་ལྔ་པའི་སྟེང་། པད་མ་འཕྲིན་ལས་ཀྱིས་དགོངས་པ་ཞུས་པའི་ཚབ་ཏུ་བློ་བཟང་རྒྱལ་མཚན་རང་སྐྱོང་ལྗོངས་མི་དམངས་འཐུས་ཚོགས་ཀྱི་ཚོགས་གཙོ་དང་རྡོ་ཐོགས་ཚོགས་གཞོན་དུ་བསྐོས་ཡོད་འདུག ཆེ་དགྲ་ལྷ་ཟེར་བ་བློ་བཟང་རྒྱལ་མཚན་གྱི་ཚབ་ཏུ་བོད་རང་སྐྱོང་ལྗོངས་ཀྱི་མགོ་ཁྲིད་(སྤྱི་ཁྱབ་)དུ་བསྐོས་ཡོད་འདུག
རྒྱ་ནག་གཞུང་འབྲེལ་གསར་འགྱུར་ནང་། བློ་བཟང་རྒྱལ་མཚན་རང་སྐྱོང་ལྗོངས་མི་དམངས་འཐུས་མིའི་ཚོགས་གཙོར་བསྐོས་རྗེས། བོད་རང་སྐྱོང་ལྗོངས་དམར་ཤོག་ཚོགས་པའི་དྲུང་ཆེ་ཝུ་ཡེན་ཅེ་ (Wu Yingjie)ཡིས་གཏམ་བཤད་སྤེལ་ཏེ། དེ་སྔོན་པད་མ་འཕྲིན་ལས་ཀྱིས་ཆབ་སྲིད་ཀྱི་ལངས་ཕྱོགས་བརྟན་པོའི་ཐོག་ནས་ མི་རིགས་མཐུན་སྒྲིལ་སྲུང་སྐྱོབ་ཀྱི་དར་ཆ་གསལ་སྟོན་བྱས་ཏེ། ཏཱ་ལའི་རུ་ཚོགས་ཀྱི་ཁ་བྲལ་གཏོར་བཤིག་ལ་ངོ་རྒོལ་དང་། “ཁ་འབྲལ་ཐབས་མེད་པ་གསུམ”ཐོག་མཐའ་བར་གསུམ་དུ་མཐའ་འཁྱོངས་བྱས་ཡོད་ཚུལ་དང་། གསར་དུ་བསྐོས་པའི་བློ་བཟང་རྒྱལ་མཚན་གྱིས་ཀྱང་ཆབ་སྲིད་ལངས་ཕྱོགས་བརྟན་པོ་བཟུང་སྟེ། ཀྲུང་དབྱིང་དབུས་གཞུང་གིས་བཀོད་སྒྲིག་བྱས་པའི་བོད་རང་སྐྱོང་ལྗོངས་ཀྱི་ལས་དོན་ཁག་ཐུགས་ཐག་ཆོད་པོ་དང་བློ་བརྟན་འགྱུར་མེད་ཀྱིས་མེས་རྒྱལ་གཅིག་གྱུར་སྲུང་སྐྱོབ་ལ་བྱས་རྗེས་འཇོག་དགོས་ཚུལ་སོགས་བརྗོད་ཡོད་འདུག
སྐུ་ཞབས་ཆི་དགྲ་ལྷ་ནི་ཡུ་ནན་ཞིང་ཆེན་ནས་ཡིན་ཞིང་ད་ལྟ་རང་ལོ་ ༥༨ ཡིན་པ་དང་། དེ་སྔ་ཡུ་ནན་དུ་ལས་ཀ་བྱས་ཏེ། ༢༠༡༠ ལོར་ལྷ་སར་ལས་གནས་སྤོར་ཡོད་འདུག སྐུ་ཆབས་ཆི་དགྲ་ལྷ་དེ་སྔོན་ལྷ་སའི་དམར་ཤོག་ཚོགས་པའི་དྲུང་ཆེ་གཞོན་པ་དང་ལྷ་ས་སྲིད་གྲོས་ཀྱི་ཚོགས་གཙོ་ཡིན་འདུག
ཨ་རི་ནེའུ་ཡོག་གསར་ཁང་གི་གནས་ཚུལ་བཀོད་པ་ལྟར་ན། ༡༩༥༩ ལོར་རྒྱ་ནག་གིས་བོད་ལ་བཙན་འཛུལ་བྱས་རྗེས་ལྷ་སར། བོད་མི་ཚོས་ལོ་ངོ་བཅུ་ཕྲག་གི་རིང་ལ་མཚམས་མེད་པར་རྒྱ་གཞུང་ལ་ངོ་རྒོལ་སྣ་ཚོགས་བྱས་ཡོད། འོན་ཀྱང་། རྒྱ་ནག་གཞུང་གིས་འཛམ་གླིང་ལ། བོད་ལ་བདེ་འཇགས་དང་ཡར་རྒྱས་བཏང་སྟེ་མི་མང་ལ་བྲན་གཡོག་ལས་བཅིངས་གྲོལ་བྱས་ཡོད་སྐོར་རྗོད་ཡོད་ཡོད་པ་རེད། ཅེས་སོགས་བཀོད་འདུག
མ་འོངས་བོད་ཀྱི་གནས་སྟངས་ལ་ཐུགས་འཁུར་ཆེན་པོས་རྗེས་ཤུལ་འཇོག་གལ་ཆེ།