རྒྱ་ནག་ཕྱི་འབྲེལ་ལྷན་ཁང་གི་མགྲིན་ཚབ་པས་ཨ་རིའི་སྲིད་འཛིན་གསར་བའི་ལས་འཁུར་མཛད་སྒོར་ཐའེ་ཝན་ཞུགས་མི་ཆོག་སྐོར་བཤད་ཡོད་པ་དང་། ཨ་རིའི་ནང་ཊི་རུམ་ཕི་ཡི་སྲིད་འཛིན་ལས་འཁུར་ལ་འདོད་པ་མེད་པའི་རྣམ་འགྱུར་སྣ་ཚོགས་འཐོན་བཞིན་ཡོད་འདུག
རྒྱ་ནག་ཕྱི་འབྲེལ་ལྷན་ཁང་གི་མགྲིན་ཚབ་པ་ཧྭ་ཁྲུན་ཡེན་ (Hua Chunying) གྱིས་གསར་འགོད་གསལ་བསྒྲགས་ཐོག ཟླ་འདིའི་ཚེས་ ༢༠ ཉིན་ཨ་རིའི་སྲིད་འཛིན་གསར་པའི་དམ་འབུལ་མཛད་སྒོ་འཚོགས་འཆར་ཡོད་པ་སྟེང་། ཐའེ་ཝན་མཚོ་འགག་གི་སྐུ་ཚབ་མཉམ་ཞུགས་བྱེད་དུ་བཅུག་མི་ཆོག་ཅེས་བཤད་ཡོད་འདུག
གཞན། ཝ་ཤིན་ཊོན་ཆ་འཕྲིན་གྱིས་གནས་ཚུལ་སྤེལ་བའི་ནང་། ཨ་རིའི་དམངས་གཙོ་ཚོགས་པའི་གྲོས་ཚོགས་འཐུས་མི་ ༦༠ ཙམ་གྱིས་གསལ་བསྒྲགས་སྤེལ་ཏེ། ཁོ་ཚོ་ཊི་རུམ་ཕི་ཡི་སྲིད་འཛིན་དམ་འབུལ་མཛད་སྒོར་མཉམ་ཞུགས་བྱེད་རྒྱུ་མིན་པ་དང་། ཊི་རུམ་ཕི་ཡི་སྲིད་འཛིན་ལས་འཁུར་དམ་འབུལ་ལ་ངོས་ལེན་མེད་སྐོར་བརྗོད་ཡོད་འདུག
དེ་བཞིན། དེ་རིང་ཨ་རིའི་ཨེ་བྷེ་སེ་ (abc) གསར་ཁང་གིས་གནས་ཚུལ་སྤེལ་བ་ལྟར་ན། མདང་དགོང་ཨ་རི་བ་ཞིག་གིས་རྒྱལ་ས་ཝ་ཤིན་ཊོན་ཌེ་སེ་ནང་ཡོད་པའི་ཊི་རུམ་ཕི་ཡི་རྒྱལ་སྤྱིའི་གསོལ་མགྲོན་ཁང་ཁི་སྒོ་ཁར། བདམས་ཐོན་སྲིད་འཛིན་ཊི་རུམ་ཕི་ཡིས་ཨ་རིའི་རྩ་ཁྲིམས་ལ་བརྩི་བཀུར་བྱས་མེད་སྐོར་བརྗོད་དེ་རང་ལུས་མེར་བསྲེགས་བཏང་ཡོད་པ་དང་། དེ་མ་ཐག་མེ་གསོད་རུ་ཁག་བསླེབས་ཏེ་མི་དེ་སྨན་ཁང་དུ་མྱུར་སྐྱོབ་བྱེད་པར་ཁྱེར་ཡོད་འདུག གནས་ཚུལ་དེར་རང་ལུས་མེར་བསྲེགས་གཏོང་མཁན་དེ་ཨ་རིའི་མངའ་སྡེ་ཁ་ལེ་ཧྥོར་ནེ་ཡ་ནས་ཡིན་པ་ཙམ་ལས་ཁོའི་མིང་དང་ལོ་རྒྱུས་སོགས་ད་དུང་རྩད་གཅོད་ཐུབ་མེད་ལགས་བཀོད་འདུག
ཟླ་འདིའི་འཆར་ཚེས་ ༢༠ ཉིན་རྒྱབ་རྒྱལ་ས་ཝ་ཤིན་ཊོན་གྱི་ (Capitol Hill) ནང་ཨ་རིའི་སྲིད་འཛིན་སྐབས་ ༤༥ བ་སྐུ་ཞབས་ཊི་རུམ་ཕི་ཡི་སྲིད་འཛིན་དམ་འབུལ་མཛད་སྒོ་འཚོགས་རྒྱུ་ཡིན་འདུག
གསར་འགོད་པ། པདྨ་རྒྱལ།
“ཊི་རུམ་ཕི་” ཟེར་ནས་དོན་མེད་སྒྲ་མདངས་སྣེ་གཅིག་མེད་པ་བཟོས་པ་ལས། ཁྲོམ། ཞེས་བྲིས་ན་བདེ་པོ་མི་འདུག་པས།