ཨ་རིའི་སྲིད་འཛིན་དམ་འབུལ་གྱི་སྔོན་འགྲོའི་མཛད་སྒོ།

རྒྱལ་ས་ཝ་ཤིན་ཊོན་དུ་ཨ་རིའི་སྲིད་འཛིན་སྐབས་ ༤༥ བའི་ལས་འཁུར་དམ་འབུལ་གྱི་སྔོན་འགྲོའི་མཛད་སྒོ་དེ་མི་མང་གི་དགའ་འབོད་དང་ངོ་རྒོལ་ཁྲོད་དུ་མགོ་འཛུགས་བྱས་འདུག

མདང་དགོང་ཨ་རིའི་རྒྱལ་ས་ཝ་ཤིན་ཊོན་དུ། མི་མང་གི་དགའ་འབོད་དང་ངོ་རྒོལ་ཟུང་འབྲེལ་ཐོག བདམས་ཐོན་སྲིད་འཛིན་སྐུ་ཞབས་ཊི་རུམ་ཕི་ཡི་མི་མང་རང་བཞིན་གྱི་སྲིད་འཛིན་ལས་འཁུར་གྱི་སྔོན་འགྲོའི་མཛད་སྒོ་ཚོགས་ཡོད། སྐབས་དེར་སྐུ་ཞབས་ཊི་རུམ་ཕི་ཡིས་ཁོང་གི་སྐུ་ཟླ་མི་ལ་ནེ་ཡ་ (Melania) དང་ལྷན་དུ། ཨ་རིའི་སྲིད་འཛིན་སྐབས་ ༡༦ པ་ལེན་ཁུན་ (Lincoln) གྱི་དྲན་རྟེན་རྡོ་རིང་མདུན་དུ་ཕེབས་ཏེ། ཨ་རིའི་མི་མང་ཡོངས་ཀྱི་ཆེད་དུ། ཁོས་མ་འོངས་པར་ཨ་རི་སླར་ཡང་རླབས་ཆེན་བཟོ་རྒྱུ་ཡིན་སྐོར་བརྗོད་འདུག

མཛད་སྒོའི་ཐོག་མར་ཨ་རིའི་གཞས་སྣ་འཁྲབ་སྟོན་ཚོགས་པ་ (3 Doors Down) ཡིས་ (Make America Great Again) ཞེས་པའི་གླུ་གཞས་བཏང་རྗེས། སྐུ་ཞབས་ཊི་རུམ་ཕི་ཡིས་གཏམ་བཤད་སྤེལ་བར། དེ་སྔོན་ཁོང་གི་སྲིད་འཛིན་འོས་བསྡུའི་ལས་རིམ་ནང་། གཟེངས་སུ་ཐོན་པའི་འོས་བསྡུའི་གྲུབ་འབྲས་དེ་ལ། ཨ་རིའི་གཞུང་དམངས་ཡོངས་ཀྱིས་བསྔགས་བརྗོད་མ་བྱས་པ་དེ་ནི་ཡིད་སེམས་སྐྱོ་དགོས་པ་ཞིག་ཡིན་ཡང་། ཁོང་གིས་ཨ་རིའི་མ་འོངས་པའི་ཆེད་དུ། མུ་མཐུད་དུ་དཀའ་ལས་བསྐྱོན་ཏེ། སང་ཉིན་གྱི་སྲིད་འཛིན་དམ་འབུལ་ལ་རེ་སྒུག་བྱས་ཡོད་པ་དང་། ཨ་རིའི་རྒྱ་ཆེའི་མི་མང་ཡོངས་ཀྱི་ཆེད་དུ། ཁོས་ཨ་རིའི་རྒྱལ་ཁབ་ལ་སླར་ཡང་རླབས་ཆེན་བཟོ་རྒྱུ་དང་། ཁོས་མ་འོངས་པར་ཨ་རིའི་སྲིད་འཛིན་ལས་འཁུར་རིང་། རྒྱལ་དོན་ཧ་ཅང་ལེགས་པོར་བསྒྲུབ་པའི་གྲུབ་འབྲས་ལ་བརྟེན་ནས། ལོ་ངོ་ ༤ ཡི་རྗེས་སུ་ཁོ་ལ་སླར་ཡང་སྲིད་འཛིན་རྒྱལ་ཁ་འཐོབ་རྒྱུ་ཡིན་སྐོར་བརྗོད་འདུག

སྲིད་འཛིན་དམ་འབུལ་གྱི་སྔོན་འགྲོའི་མཛད་སྒོའི་ཟུར་དུ་སྐུ་ཞབས་ཊི་རུམ་ཕི་ལ་ངོ་རྒོལ་བྱེད་མཁན་བྷ་ཁོན་ (Bacon) གྱིས་གསར་འགོད་པར། གལ་ཏེ་ཁྱེད་རང་ཚོས་སྲིད་འཛིན་ཨོ་བྷ་མའི་འདས་པའི་ལོ་ངོ་ ༨ རིང་དཀའ་ལས་བརྒྱབ་པའི་གྲུབ་འབྲས་དེ་ལེགས་པོར་མཐོང་བ་ཡིན་ན། མ་འོངས་སྲིད་འཛིན་ཊི་རུམ་ཕི་ཡི་གཞུང་ལ་ཞེད་སྣང་སྐྱེ་ངེས་ཡིན། ཞེས་བརྗོད་འདུག

སྐུ་ཞབས་ཊི་རུམ་ཕི་ཡི་སྲིད་འཛིན་དམ་འབུལ་ལ་ངོ་རྒོལ་བྱེད་མཁན་སར་ཀོ་ (Sarko) ཡིས་གསར་འགོད་པར། ང་སང་ཉིན་འཚོགས་འཆར་ཡོད་པའི་ཊི་རུམ་ཕི་ཡི་སྲིད་འཛིན་དམ་འབུལ་ལ་ངོ་རྒོལ་བྱེད་མཁན་ཞིག་ཡིན། ངས་ཊི་རུམ་ཕི་ཡི་མ་འོངས་པའི་ལོ་ངོ་ ༤ ཡི་སྲིད་འཛིན་ལས་འཁུར་རིང་མུ་མཐུད་ངོ་རྒོལ་བྱ་རྒྱུ་ཡིན། ཞེས་བཤད་འདུག

གཞན། ཊི་རུམ་ཕི་ཡིས་ཨུ་རུ་སུའི་ཐོག་འཛིན་པའི་སྲིད་ཇུས་ལངས་ཕྱོགས་དང་འབྲེལ་ཏེ། ཨ་རིའི་གྲོས་ཚོགས་འཐུས་མི་ ༦༠ ཡིས་ཊི་རུམ་ཕིའི་སྲིད་འཛིན་ལས་འཁུར་མཛད་སྒོར་ཞུགས་རྒྱུ་མིན་པ་མ་ཟད། ཊི་རུམ་ཕི་ཡི་སྲིད་འཛིན་དམ་འབུལ་ལ་ངོས་ལེན་མེད་སྐོར་ཡང་བརྗོད་ཡོད་པ་རེད།

ཨ་རིའི་མངའ་སྡེ་ ༣༦ དང་དབུས་ལས་ཁུངས་བཅས་ནས་བདེ་འཇགས་འགན་སྲུང་མི་ ༢༨༠༠༠ ལྷག་གིས་སྐུ་ཞབས་ཊི་རུམ་ཕི་ཡི་སྲིད་འཛིན་དམ་འབུལ་མཛད་སྒོར་སྲུང་སྐྱོབ་བྱེད་བཞིན་ཡོད་འདུག

གསར་འགོད་པ། པདྨ་རྒྱལ།