དགའ་འབོད་དང་ངོ་རྒོལ་ཁྲོད་ནས་ཨ་རིའི་སྲིད་འཛིན་གྱིས་ལས་འཁུར་དམ་འབུལ་ཞུས།

ཨ་རིའི་གཞུང་དམངས་གཉིས་ཀྱི་དགའ་འབོད་དང་ངོ་རྒོལ་ཁྲོད་དུ། སྐབས་ ༤༥ བའི་སྲིད་འཛིན་སྐུ་ཞབས་ཊི་རུམ་ཕི་ཡིས་ལས་འཁུར་དམ་འབུལ་ཞུས་ཡོད་པ་རེད།

ཁ་སང་ཕྱི་ཚེས་ ༢༠ ཉིན། ཨ་རིའི་རྒྱལ་ས་ཝ་ཤིན་ཊོན་གྱི་ཕོ་བྲང་དཀར་པོའི་ (Capitol Hill) ཞེས་པའི་འདུ་རྭའི་ནང་། ཨ་རིའི་སྲིད་འཛིན་སྐབས་ ༤༥ བ་སྐུ་ཞབས་ཊི་རུམ་ཕི་ཡི་སྲིད་འཛིན་ལས་འཁུར་དམ་འབུལ་མཛད་སྒོ་ཚོགས་ཡོད་པ་དང་། མཛད་སྒོའི་སྟེང་ཨ་རིའི་སྲིད་འཛིན་སྐབས་ ༣༩ པ་སྐུ་ཞབས་(Jimmy Carter)མཆོག་བཟའ་ཟླ་གཉིས་དང་། སྐབས་ ༤༢ པ་སྐུ་ཞབས་བྷེལ་ཁི་ལེན་ཊོན་(Bill Clinton)བ ཟའ་ཟླ་གཉིས། སྲིད་འཛིན་སྐབས་ ༤༣ པ་སྐུ་ཞབས་ཇོར་ཅི་བྷི་ཤུ་ (George W. Bush) བཟའ་ཟླ་གཉིས། སྲིད་འཛིན་ལས་ཐོག་སྐུ་ཞབས་ཨོ་བྷ་མ་བཟའ་མི་གཉིས་བཅས་ཕེབས་ཡོད་པ་དང་། ཨ་རིའི་སྲིད་འཛིན་སྐབས་ ༤༡ པ་སྐུ་ཞབས་རྗོར་ཅི་ཨེ་ཆི་ཌ་བྷི་ཡུ་བྷི་ཤུ་ (George H. W. Bush) སྨན་ཁང་དུ་ཡོད་སྟབས་ཕེབས་ཐུབ་མེད་འདུག

ཐེངས་འདི་ནི་ཨ་རིའི་སྲིད་འཛིན་ཐོག་མ་རྗོར་རྗི་ཝ་ཤིན་ཊོན་ནས་སྲིད་འཛིན་ཊི་རུམ་ཕིའི་བར་གྱི་སྲིད་འཛིན་དམ་འབུལ་མཛད་སྒོར་ཞུགས་པའི་མི་གྲངས་ཉུང་ཤོས་དེ་ཆགས་ཡོད་པ་མ་ཟད། ཐེངས་འདིར་ཨ་རིའི་རྒྱལ་ས་ཝ་ཤིན་ཊོན་གྱི་སྲང་ལམ་ཁག་ཏུ་མི་མང་པོས་ཊི་རུམ་ཕིའི་ལས་འཁུར་མཛད་སྒོར་ངོ་རྒོལ་གྱི་ལས་འགུལ་སྣ་ཚོགས་སྤེལ་ཡོད་པ་མ་ཟད། གྲོང་ཁྱེར་ནང་གི་ཁང་པའི་ཤེལ་སྒོ་དང་ལམ་ཟུར་གྱི་ཅ་དངོས་སོགས་བཅག་ཉིལ་དང་མེར་བསྲེགས་སོགས་བཏང་ཡོད་འདུག

སྐུ་ཞབས་ཊི་རུམ་ཕི་ཡིས་མཛད་སྒོའི་གཏམ་བཤད་གནང་སྐབས། ང་ཚོ་ཚང་མ་ཨ་རིའི་མི་སེར་ཡིན་པའི་ཆ་ནས། ཨ་རིའི་རྒྱལ་མང་ཡར་རྒྱས་གཏོང་ཐབས་སུ་འབད་བརྩོན་བྱེད་ཆད། དེ་རིང་ང་ཚོ་འདིར་འཛོམས་པ་རེད། མ་འོངས་ལོ་ངོ་ ༤ རིང་ང་ཚོ་མཉམ་འབྲེལ་གྱིས་འཛམ་གླིང་དང་ཨ་རིའི་རྒྱལ་ཁབ་ཀྱི་མདུན་ལམ་ཐག་གཅོད་དགོས་སྟབས། ང་ཚོས་དཀའ་རྙོག་མང་པོར་གདོང་ལེན་བྱ་དགོས་པ་དང་། ལོ་བཞི་རེའི་ནང་ཞི་བའི་ཐོག་ནས་ཨ་རིའི་སྲིད་དབང་ཕན་ཚུན་བརྒྱུད་སྤྲོད་བྱེད་ཀྱིན་ཡོད་པ་ལྟར། ཐེངས་འདིར་སྲིད་འཛིན་ཨོ་བྷ་མ་དང་ཁོང་གི་སྐུ་ཟླ་མེ་ཤལ་ཨོ་བྷ་མ་གཉིས་ནས་ཨ་རིའི་སྲིད་དབང་བརྒྱུད་སྤྲོད་ཐད་ལ་རོགས་རམ་ཆེན་པོ་གནང་བྱུང་། ཁོང་གཉིས་ཧ་ཅང་ཡག་པོ་རེད། ངས་ཐུག་རྗེ་ཆེ་ཞུ་རྒྱུ་ཡིན། དེ་རིང་གི་སྲིད་འཛིན་དམ་འབུལ་མཛད་སྒོ་འདི་ཧ་ཅང་གལ་ཆེན་པོ་ཆགས་ཡོད་དོན། དེ་རིང་ང་ཚོས་ཨ་རིའི་སྲིད་དབང་དེ་དམངས་གཙོ་ཚོགས་པ་ནས་སྤྱི་མཐུན་ཚོགས་པར་བརྒྱུད་སྤྲོད་བྱེད་པ་ཙམ་མིན་པར། དེ་རིང་རྒྱལ་ས་ཝ་ཤིན་ཊོན་དུ་ཨ་རིའི་སྲིད་དབང་དེ་ཕྱིར་ཨ་རིའི་མི་མང་ལ་སྤྲོད་ཀྱི་ཡོད་པ་རེད། ཅེས་སོགས་བཤད་འདུག

མི་མང་སྟོང་ཕྲག་མང་པོ་རྒྱལ་ས་ཝ་ཤིན་ཊོན་དུ་འདུ་འཛོམས་ཀྱིས། “ཊི་རུམ་སྲིད་འཛིན་མིན” “མི་རིགས་དབྱེ་འབྱེད་མཁན་ལ་ཞེད་སྣང་ཆེ།” ཞེས་བྲིས་པའི་འཕྲེད་དར་འཕྱར་ཏེ་ངོ་རྒོལ་སྐད་འབོད་བྱས་ཡོད་པ་དང་། བདེ་སྲུང་ཉེན་རྟོག་པས་ཞི་རྒོལ་མི་མང་ ༢༧༠ ལྷག་འཛིན་བཟུང་བཀག་བསྐྱིལ་བྱས་ཡོད་འདུག

གཞན། སྐུ་ཞབས་ཊི་རུམ་ཕི་ཡིས་བུད་མེད་ལ་མཐོང་ཆུང་དང་དམའ་འབེབས་བྱས་རྐྱེན། ཁ་སང་ཨོ་སི་ཊིར་ལི་ཡ་ནང་སྐྱེས་པ་དང་བུད་མེད་ ༣༠༠༠ ལྷག་གིས་ཊི་རུམ་ཕི་ཡི་སྲིད་འཛིན་དམ་འབུལ་ལ་ངོ་རྒོལ་བྱས་ཡོད་པ་དང་། དེ་བཞིན། ནེའུ་ཙི་ལེན་ཊིའི་ནང་བུད་མེད་ ༢༠༠༠ ལྷག་འདུ་འཛོམས་ཀྱིས་ཊི་རུམ་ཕི་ལ་ངོ་རྒོལ་ལས་འགུལ་སྤེལ་ཡོད་པ་མ་ཟད། དེ་རིང་ཨ་རིའི་རྒྱལ་ས་ཝ་ཤིན་ཊོན་དུ་ (sister marches) ཞེས་པའི་བུད་མེད་ཀྱི་ངོ་རྒོལ་ཁྲོམས་སྐོར་བྱེད་འཆར་ཡོད་འདུག

རྒྱ་ནག་གཞུང་འབྲེལ་བརྒྱུད་ལམ་གོ་ལའི་དུས་བབ་ཅེས་པའི་དྲ་ཚིགས་སྟེང་། ཊི་རུམ་ཕི་གཞུང་གིས་ཨ་རིའི་ནང་ཁུལ་གཅིག་པུ་མིན་པར། རྒྱལ་སྤྱིའི་སྟེང་དཀའ་རྙོག་མང་པོ་བཟོ་སྲིད་པ་ནི་མངོན་གསལ་ཡིན་སྟབས། མི་འགྱང་པར་རྒྱ་ནག་གིས་ཊི་རུམ་ཕི་གཞུང་ལ་ཡ་ལན་སྤྲོད་པའི་དུས་སྐབས་ཤིག་བསླེབ་རྒྱུ་ཡིན་ལུགས་བཀོད་འདུག

རྒྱ་གར་གཙོས་པའི་འབྲེལ་ཡོད་རྒྱལ་ཁབ་ཁག་ཅིག་གིས། སྐུ་ཞབས་ཊི་རུམ་ཕི་ཡི་གཞུང་གསར་བའི་འོག ཨ་རིར་འགྲོ་བའི་མཐོང་མཆན་ལག་འཁྱེར་ (visas) དང་གནས་སྡོད་ལག་འཁྱེར་ (green cards) རག་རྒྱུར་དཀའ་ངལ་འཕྲད་སྲིད་པར་སེམས་ཁྲལ་བྱེད་བཞིན་ཡོད་འདུག

ལྷོ་ཀོ་རི་ཡའི་ཕྱོག་ནས། ད་ལྟའི་ལྷོ་ཀོ་རི་ཡ་དང་ཨ་རི་གཉིས་ཀྱི་དམག་དཔུང་མཉམ་འབྲེལ་སྦྱོང་བརྡར་ལ་བརྟེན་ནས། མ་འོངས་པར་ལྷོ་ཀོ་རི་ཡ་ནི། ཨ་རི་དང་བྱང་ཀོ་རི་ཡའི་དཀའ་རྙོག་དང་། ཡང་ན་རྒྱ་ནག་དང་ཨ་རི་གཉིས་བར་གྱི་རྩོད་རྙོག་གང་རུང་ནང་འཚུད་སྲིད་པར་སེམས་འཚུབ་བྱེད་བཞིན་ཡོད་འདུག

གསར་འགོད་པ། པདྨ་རྒྱལ།