ཊི་རུམ་ཕི་གཞུང་གསར་བས་བསླངས་པའི་དངངས་འཚུབ།

ཁ་སང་ཨ་རིའི་སྲིད་འཛིན་གསར་པ་སྐུ་ཞབས་ཊི་རུམ་ཕི་ཡིས་ལས་འཁུར་དམ་འབུལ་ཐོག ཨ་རིའི་རྒྱལ་མང་གི་ཁེ་ཕན་དང་བདེ་སྲུང་གཙོ་བོར་འཛིན་རྒྱུ་ཡིན་སྐོར་བཤད་རྗེས། ཨེ་ཤ་ཡའི་གསར་འགྱུར་བརྒྱུད་ལམ་ཁག་ཏུ་ཊི་རུམ་ཕི་ལ་སྐྱོན་བརྗོད་དང་། རྒྱལ་ཁབ་ཕན་ཚུན་བར་གྱི་དཔལ་འབྱོར་འབྲེལ་ལམ་ཐོག་དཀའ་རྙོག་འབྱུང་སྲིད་པར་ཞེད་སྣང་བསླངས་ཡོད་འདུག

ཊི་རུམ་ཕི་ཡིས། ཕྱིའི་རྒྱལ་ཁབ་ཁག་ནས་ཨ་རིར་གནས་སྤོ་བྱས་ཡོད་པ་རྣམས་དང་ལས་བཟོ་བ་ཚོས་ཨ་རིའི་མི་མང་གི་ལས་གནས་ལ་གོད་ཆགས་ཆེན་པོ་བཟོས་ཡོད་སྟབས། ཨ་རིའི་སྟོབས་འབྱོར་སླར་གསོ་བྱ་རྒྱུ་ནི་ཨ་རིའི་གཞུང་གསར་བའི་ལས་འགན་གཙོ་བོ་ཡིན་སྐོར་བརྗོད་ཡོད་པ་དེར། ཉི་ཧོང་གི་གཞུང་འབྲེལ་བརྒྱུད་ལམ་ (Yomiuri Shimbun)ཞེས་པའི་སྟེང་། ཨ་རིའི་གཞུང་གསར་བའི་འོག་འཛམ་གླིང་གི་རྒྱལ་ཁབ་མང་པོ་ཞིག་རྒྱལ་མཚམས་རྩོད་གླེང་ནང་ཚུད་སྲིད་སྟབས། ཕོ་བྲང་དཀར་པོའི་ངོས་ནས་སྐུ་ཞབས་ཊི་རུམ་ཕི་ཡི་གཏམ་སྤྱོད་ལ་འགན་འཁུར་དགོས། ཞེས་བཀོད་འདུག

རྒྱ་ནག་མི་མདམངས་ཉིན་རེའི་གསར་འགྱུར་ནང་། ཨ་རིའི་གཞུང་གསར་བས་ཨ་རྒྱའི་བར་གྱི་ཕྱི་འབྲེལ་སྲིད་ཇུས་ཀྱི་གལ་ཆེན་རང་བཞིན་ཤེས་དགོས་པ་དང་། གལ་ཏེ་ཨ་རིའི་གཞུང་གསར་བས་རྒྱ་ནག་ཐོག་འཛིན་པའི་སྲིད་ཇུས་ལ་འགྱུར་བ་མ་བཏང་ཚེ་པེ་ཅིན་གཞུང་གིས་ཡ་ལན་ནན་པོ་བསློག་རྒྱུ་ལས་ལམ་ཁ་གཞན་མེད་སྟབས། རྒྱལ་ཁབ་གཉིས་ཀས་ནས་བསམ་ཤེས་དང་། རྩོད་ཉོག་ལ་སྟངས་འཛིན་བྱས་ན་བཟང་ཚུལ་འཁོད་འདུག

ཨོ་སི་ཊོར་ལི་ཡའི་བརྒྱུད་ལམ་ (Sydney Morning Herald) ཞེས་པའི་སྟེང་། ང་ཚོའི་དཔལ་འབྱོར་གྱི་ཡོང་ཁུངས་གཙོ་བོ་ཞིག་ཨ་རི་དང་རྒྱ་ནག་གི་ཚོང་ཟོག་སྐྱེལ་འདྲེན་ལ་བརྟེན་ཡོད་སྟབས། ཨ་རིའི་སྲིད་གཞུང་གསར་པའི་བྱེད་སྟངས་ཀྱིས་ང་ཚོར་དཀའ་ངལ་འཕྲད་སྲིད་སྟབས། ང་ཚོས་ཉོ་ཚོང་སྐྱེལ་འདྲེན་དང་། ཨུ་རུ་སུའི་གནད་དོན། འཛམ་གླིང་གནམ་གཤིས་འགྱུར་ལྡོག་སོགས་ཀྱི་ཐད་གྲོས་ཆོད་གསར་བ་ཞིག་འཇོག་རྒྱུར་བསམ་བློ་གཏོང་དགོས། ཞེས་འཁོད་འདུག

རྒྱ་གར་བང་ཆེན་ (Indian Express) སྟེང་། རྒྱ་གར་གྱིས་ཨ་རིའི་རང་སྲུང་རིང་ལུགས་ཀྱི་ཕྱི་འབྲེལ་སྲིད་ཇུས་དང་། དམངས་གཙོའི་ལམ་ལུགས་ཁ་རུ་ཁྱེར་ཏེ། དེང་གི་རྒྱལ་སྤྱིའི་སྤྱི་ཚོགས་ཀྱི་གནས་བབ་ལ་འགན་འཁུར་མེད་པའི་གཏམ་སྤྱོད་དེ་རིགས་ལ་གདོང་ལེན་བྱ་རྒྱུར་གྲ་སྒྲིག་བྱེད་དགོས་ཚུལ་འཁོད་འདུག

གཞན། ཉེ་ཆར་གསར་ལམ་ཁག་ཅིག་གི་བཅར་འདྲིའི་ལན་དུ་སྐུ་ཞབས་ཊི་རུམ་ཕི་ཡིས། ཡུ་རོབ་རྒྱལ་ཁབ་ཁག་ཡུ་རོབ་མཐུན་ཚོགས་ནང་མུ་མཐུད་སྡོད་འདོད་ཡོད་མེད་ལ་མང་མོས་འོས་བསྡུ་བྱ་དགོས་སྐོར་དང་། དབྱིན་ཇི་ཡུ་རོབ་མཐུན་ཚོགས་ལས་ཕྱིར་བུད་པ་དེ་ཧ་ཅང་ལེགས་ཚུལ་བཤད་ཡོད་སྟབས། སུད་སིར་འཚོགས་བཞིན་པའི་རྒྱལ་སྤྱིའི་དཔལ་འབྱོར་གླེང་སྟེགས་སྟེང་། ཆབ་སྲིད་དང་དཔལ་འབྱོར་གྱི་མགོ་ཁྲིད་མང་པོ་ཞིག་གིས་དངོས་ཤུགས་ཅི་རིགས་ནས་བརྡ་ལན་སྤྲད་ཡོད་པ་རེད།

ཡུ་རོབ་མཐུན་ཚོགས་ཀྱི་འཛིན་སྐྱོང་ལྷན་ཁང་གི་འགན་འཛིན་རྗུ་ནག་ཀིར་ (Juncker) གྱིས། གལ་ཏེ་ཨ་རིའི་གཞུང་གསར་བས་ཡུ་རོབ་རྒྱལ་ཁབ་ཁག་ཡུ་རོབ་མཐུན་ཚོགས་ལས་ཕྱིར་འབུད་པར་སྐུལ་མ་བཏང་ཚེ། ཡུ་རོབ་མཐུན་ཚོགས་ངོས་ནས་ཨ་རིའི་བྱང་ཤར་མངའ་སྡེ་ (Ohio) ཨ་རི་ལས་ལོགས་སུ་འབུད་པར་འབོད་སྐུལ་གཏོང་ངེས་ཡིན། ཞེས་བརྗོད་འདུག

ཧྥ་རིན་སའི་དཔལ་འབྱོར་བློན་ཆེན་མེ་ཆིལ་ (Michel Sapin) གྱིས། སྐུ་ཞབས་ཊི་རུམ་ཕི་ཡིས་དེ་སྔོན་རྒྱལ་སྤྱིའི་ཚོང་དོན་གྲོས་ཆོད་ཁག་བཀག་སྡོམ་དང་། གྲོས་ཆོད་གསར་པ་འཇོག་དགོས་ཚུལ་བཤད་པ་དེ་དག་དངོས་སུ་ལག་བསྟར་བྱས་ཚེ། དེས་རྒྱལ་སྤྱིའི་ཚོང་འབྲེལ་ཐོག་གནོན་སྐྱོན་ཆེན་པོ་ཐེབས་ངེས་ཡིན་སྟབས། ཕོ་བྲང་དཀར་པོའི་ངོས་ནས་གནད་དོན་དེ་དག་ཐོག་དབུ་མའི་ལམ་གྱི་སྲིད་ཇུས་ཤིག་འཛིན་དགོས་སྐོར་བཤད་འདུག

དེ་བཞིན། ཊི་རུམ་ཕི་ཡིས་དེ་སྔ་ཨ་རིས་འཇར་མན་གྱི་རླངས་འཁོར་མང་པོ་ཉོ་བཞིན་ཡོད་ཀྱང་། འཇར་མན་གྱིས་ཨ་རིའི་རླངས་འཁོར་གཅིག་ཀྱང་ཉོ་ཡི་མེད་སྟབས། ཁོས་མ་འོངས་པར་འཇར་མན་གྱི་ཚོང་ཟོག་དཔྱ་ཁྲལ་བརྒྱ་ཆ་ ༣༥ སྤར་རྒྱུ་ཡིན་སྐོར་བཤད་ཡོད་སྟབས། འཇར་མན་གྱི་ནོར་སྲིད་བློན་ཆེན་སི་ཆུ་བྷལ་ (Schäuble) ལགས་ཀྱིས་ཨ་རིའི་གཞུང་གསར་བས་རྒྱལ་སྤྱིའི་ཉོ་འཚོང་གྲོས་ཆོད་ཁག་ལ་བརྩི་འཇོག་བྱེད་དགོས་ཚུལ་བརྗོད་འདུག

ཨུ་རུ་སུའི་སྲིད་བློན་མི་ཌ་ཝི་ཌི་ཝ་ (Medvedev) ཡིས། ཨོ་བྷ་མའི་གཞུང་གིས་ཨ་རི་དང་ཨུ་རུ་སུའི་འབྲེལ་ལམ་དེ་ཚད་དམའ་ཤོས་སུ་བསྐྱལ་ཡོད་པ་དང་། ཊི་རུམ་ཕི་ཡིས་ཨུ་རུ་སུར་སྲིད་བྱུས་གང་འདྲ་འཛིན་མིན་ད་ལྟ་ད་དུང་ཁ་གསལ་མེད་ཀྱང་། ཨ་རིས་ད་བར་དུ་ཨུ་རུ་སུར་སྲིད་ཇུས་དེ་འདྲ་ཞིག་འཛིན་དགོས་པའི་རྒྱུ་མཚན་གསལ་བཤད་བྱེད་པའི་རེ་བ་ཡོད། ཨུ་རུ་སུའི་ཕྱོགས་ནས་རྒྱལ་ཁབ་གཉིས་བར་གྱི་འབྲེལ་ལམ་ཡར་རྒྱས་གཏོང་རྒྱུར་གྲ་སྒྲིག་ཡོད། ཅེས་བརྗོད་འདུག

གསར་འགོད་པ། པདྨ་རྒྱལ།