ཅིའི་ཕྱིར་རྒྱ་ནག་གི་ཕོ་གསར་ས་ཡ་མང་པོ་གཉེན་སྒྲིག་མ་བྱས་པར་ལྷག་པ་རེད།

རོ་བྷུ་དིན་ Rob Budden གྱིས་སྤེལ།

རྒྱ་ནག་ནང་ཕོ་ལོ་ ༣༠ བརྒལ་མཁན་ལ་ “ཧྲིན་ནཱན་” ཞེས་མིང་ཞིག་བཏགས་ཡོད། དེའི་དོན་ནི་གཉེན་སྒྲིག་གི་ལོ་ཚད་བསླེབས་ཀྱང་། ད་དུང་གཉེན་སྒྲིག་བྱས་མེད་པར་ལུས་པའི་ཕོ་ཧྲེང་ལ་ཟེར་ཞིང་། དེང་སང་རྒྱ་ནག་ནང་ཕོ་མོའི་གྲངས་ཚད་ལ་ཧེ་བག་འགྲོ་བཞིན་ཡོད་སྟབས། གཉེན་སྒྲིག་བྱེད་པར་དཀའ་ངལ་ཇེ་ཆེ་ནས་ཇེ་ཆེར་འགྲོ་བཞིན་ཡོད།

རྒྱ་ནག་ནང་མོ་ལས་ཕོ་ས་ཡ་ཁ་ཤས་ཀྱིས་མང་བ་ཡོད། དེ་ལྟར་ཆགས་དགོས་པའི་རྒྱུ་མཚན་རྒྱ་ནག་གིས་ཕྲུ་གུ་གཅིག་ལས་སྐྱེ་མི་ཆོག་པའི་སྲིད་བྱུས་ལག་བསྟར་བྱས་པའི་རྐྱེན་གྱིས་རེད། ༢༠༡༥ ལོར་སྲིད་བྱུས་དེ་འགྱུར་བ་བཏང་ཚར་ཡང་། དེས་ཤུགས་རྐྱེན་ད་དུང་ལོ་ངོ་བཅུ་ཕྲག་ཁ་ཤས་རིང་ལྷག་ངེས་རེད། རྒྱ་ནག་གི་ཕོ་མོའི་གྲངས་འབོར་ལ་ཧེ་བག་ཆེན་པོ་ཤོར་ཡོད་སྟབས། རྒྱ་ནག་གི་ཕོ་གསར་ཚོས་རང་གི་ཆུང་མ་འཚོལ་བར་དཀའ་ངལ་ཆེན་པོ་ཞིག་ལ་གདོང་ལེན་བྱེད་དགོས་ཀྱི་ཡོད། བཤད་སྲོལ་ལྟར་ན། རྒྱ་ནག་ནང་རང་གི་ཚེ་རོགས་འཚོལ་མཁན་གྱི་སྐྱེས་པའི་གྲངས་འབོར་ས་ཡ་ ༣༠ ལྷག་ཡོད་ཟེར། འབྱུང་འགྱུར་གྱི་སྐྱེ་འཆིའི་གངས་ཀའི་འཕར་ཆག་ཞིབ་འཇུག་བྱེད་མཁན་དང་ཆབ་སྲིད་དཔལ་འབྱོར་རིག་པ་བ་ཨ་རིའི་མཁས་དབང་ནཱི་ཀོ་ལཱ་འེས་ཨི་སྦར་ཊཌ་(Nicholas Eberstadt)ལགས་ཀྱིས་ཁོ་རང་གི་དེབ་ཅིག་གི་ནང་དུ་ “ཕྱི་ལོ་ ༢༠༣༠ ལོའི་བར་རྒྱ་ནག་གི་ཕོ་བཞི་ཆ་གཅིག་གཉེན་སྒྲིག་མ་བྱས་པར་ཕོ་ཧྲེང་དུ་ལྷག་གི་རེད” ཅེས་འཁོད་ཡོད།

རྒྱ་ནག་ཏུ་བུད་མེད་ཉུང་ཉུང་ཞིག་ལས་མེད་པའི་ཁྲོད་ནས་སྐྱེས་པ་ཚོས་རང་གི་ཆུང་མ་འཚོལ་དགོས་ཀྱི་ཡོད། དེ་ནི་འགྲན་རྩོད་ཆེན་པོ་ཞིག་ཡིན། བུ་མོ་ཞིག་མི་གཞན་གྱིས་ཆུང་མར་མ་བླང་སྔོན་ལ་རང་གིས་ལེན་ཐུབ་དགོས་པ་དང་། གནས་སྟངས་དེའི་འོག་ཆུང་མ་ཞིག་རག་པར་དུས་ཚོད་ཀྱང་ཧ་ཅང་རྒྱུན་རིང་པོ་འགོར་གྱི་ཡོད། རྒྱ་ནག་གི་སྐྱེས་པ་ཚོས་རང་ལ་ཆུང་མ་ཐོབ་ཐབས་སུ་རང་རང་གི་སྒྱུ་རྩལ་སྣ་ཚོགས་ངོམ་པ་དང་། དེའི་ཐད་འགྲོ་སོང་ཡང་ཆེན་པོ་གཏོང་གི་ཡོད་ཀྱང་ད་དུང་རང་གི་འདོད་དོན་དེ་འགྲུབ་ཐུབ་པའི་ངེས་པ་མེད།

ཀུ་ཤུ་རྟགས་ཅན་གྱི་ཁ་པར་ ༩༩ སྤྲད་ཀྱང་ད་དུང་ཁས་ལེན་བྱས་མེད།

༢༠༡༥ ལོར་རྒྱ་ནག་གི་ཚོང་བདག་རང་ལོ་བཞི་བཅུའི་ནང་ཡོད་པ་ཞིག་གིས་ཧྲང་ཧེ་རུ་ཡོད་པའི་ཕོ་མོ་ངོ་སྤྲོད་ཚོགས་པ་ཞིག་ལ་ཁོ་བོར་ཆུང་མ་འཚོལ་ཆེད་རྒྱ་སྒོར་ས་ཡ་ ༧ (ཨ་སྒོར་ས་ཡ་ ༡) ལྷག་གི་འགྲོ་གྲོན་བཏང་ཡང་ཁོ་བོར་ཆུང་མ་རག་མེད་པའི་གནས་ཚུལ་ཐོན་ཡོད།

གནས་ཚུལ་དེ་དང་འདྲ་བོ་གཞན་ཞིག་ནི། རྒྱ་ནག་ལྷོ་ཕྱོགས་ཀུང་ཀྲུའུ་གྲོང་ཁྱེར་ནང་གི་གློག་ཀླད་སྒྲིག་སྦྱོར་ཆེད་ལས་པ་ཞིག་གིས་རང་ཉིད་དགའ་སའི་བུ་མོ་དེར་ཀུ་ཤུ་རྟགས་ཅན་གྱི་ཁ་པར་ ༩༩ ཉོས་ཏེ་སྤྲད་ཡོད། སྟབས་མ་ལེགས་པ་ཞིག་ལ་བུ་མོ་དེས་ད་དུང་སྐྱེས་པ་དེར་ངོས་ལེན་བྱས་མེད་པ་མ་ཟད། སྐྱེས་པ་དེ་ངོ་ཚ་ཁ་སྐྱེངས་ཆགས་གཞིའི་པར་དང་སྐད་ཆ་སྣ་ཚོགས་གང་སར་ཁྱབ་དུ་བཅུག་ཡོད་པ་དང་། དེ་དག་སྤྱི་ཚོགས་དྲ་ལམ་ཁག་ཏུའང་ཐོན་ཡོད་འདུག

དཀའ་ངལ་གཞན་ཞིག་ནི། རྒྱ་ནག་གི་ཕོ་མོ་ཐུག་འཕྲད་བྱེད་ལུགས་རྙིང་པ་དང་གསར་པ་གཉིས་མ་འདྲ་བས་རེད། རྒྱ་ནག་གི་ལོ་གསར་ནི་ཕྱི་ཟླ་ ༡ པོའི་མཇུག་དང་ཕྱི་ཟླ་ ༢ པའི་དཀྱིལ་ལ་འཁེལ་གྱི་ཡོད། སྐབས་དེར་གཉེན་སྒྲིག་བྱས་མེད་པ་ཚོ་རང་གི་ཚེ་རོགས་ལ་ཐུག་པའི་གོ་སྐབས་ཡག་ཤོས་ཡིན། ལོ་གསར་སྐབས་མི་མང་ཆེ་བ་རང་གི་གཉེན་ཉེ་གྲོགས་པོ་ཚོའི་ཁྱིམ་དུ་ཕར་འགྲོ་ཚུར་འོང་བྱེད་ཀྱིན་ཡོད་སྟབས། སྐབས་དེར་ཕོ་ཧྲེང་ཚོས་རང་ལ་འཚམས་པའི་ཚེ་རོགས་རེ་རྙེད་རྒྱུའི་རེ་བ་ཆེན་པོ་ཡོད།

འོན་ཀྱང་། རང་ལ་འཚམས་པའི་ཚེ་རོགས་ཐུག་འཕྲད་བྱེད་པའི་ལུགས་སྲོལ་རྙིང་པ་དེས་དུས་རབས་གསར་པའི་བྱེད་སྒོ་ལ་ཕེབས་བསུ་བྱས་ཏེ་དེང་སྐབས་སྔོན་གྱི་གནས་སྟངས་ཡོད་ཚད་ལ་འགྱུར་བ་ཐེབས་ཚར་ཡོད། རྒྱལ་ཁབ་གཞན་དག་ལྟར་རྒྱ་ནག་ནང་དུའང་དྲ་ཐོག་ནས་ཕོ་མོ་ཐུག་འཕྲད་ཀྱི་ལམ་སྲོལ་ཆེན་པོ་དར་བཞིན་ཡོད་ཅིང་། སྐད་འཕྲིན་སོགས་འཕྲིན་ཐུང་སྐུར་བྱེད་ཀྱང་སྣ་ཚོགས་ཤིག་དར་བཞིན་ཡོད། སྤྱི་ཚོགས་བརྒྱུད་ལམ་དེ་དག་རྒྱ་ནག་གི་སྐྱེས་པ་ཚོས་དགའ་རོགས་དང་ཚེ་རོགས་འཚོལ་བའི་ལམ་ཁ་ཡག་ཤོས་དེ་རེད།

རྒྱ་མི་ཅིན་ལེ་(Jun li)ཞེས་པ་ཞིག་གིས་བརྗོད་དོན་ “བར་ལམ་རྒྱ་ནག་ནང་དུའང་ཕྱི་རྒྱལ་ལྟར་(China Dating)ཞེས་པའི་དྲ་ཐོག་འཛོམ་ས་དེ་འདྲ་ཕྱི་གསལ་ནང་གསལ་གྱིས་བེད་སྤྱོད་གཏོང་མཁན་དང་། དེའི་སྐོར་ཧ་གོ་མཁན་ཇེ་མང་དུ་འགྲོ་བཞིན་འདུག” ཅེས་དང་། “ ད་ལྟའི་གཞོན་སྐྱེས་རྣམས་ལ་འདམ་ག་མང་པོ་ཡོད་པ་མ་ཟད། ཁོང་ཚོས་རང་གི་ཕ་མས་བཤད་པ་ལྟར་མ་ཡིན་པར་རང་གི་ཡིད་ལ་གང་དྲན་པ་ལྟར་བྱེད་ཀྱིན་འདུག” ཅེས་བརྗོད་ཡོད།

རིག་གཞུང་མཚམས་འཇོག་བྱེད་བཞིན་པ།

རྒྱ་ནག་ཅང་སུའུ་ཞིང་ཆེན་གྱི་ས་གནས་སི་ཀྲུའུ་ཞེས་པའི་བུད་མེད་ཅིན་ལེ་ཞེས་པ་དེ་ད་ལྟ་རང་ལོ་ཉི་ཤུའི་ནང་ཡིན་ཞིང་གཉེན་སྒྲིག་བྱས་མེད། ཁོང་མོས་དེང་སང་ཕོ་གསར་མང་པོ་ཞིག་གིས་ཕོ་མོ་ཐུག་འཕྲད་ཡོང་བའི་ཆེད་དུ་སྤྱི་ཚོགས་ནང་མཐོང་དང་ཆ་འཇོག་ཡོད་པའི་འཁྲབ་སྟོན་པ་དང་གཞས་པ་གཞས་མ་གླས་ཏེ་མང་ཚོགས་འདུ་འཛོམས་ཀྱི་གོ་སྐབས་སྐྲུན་བཞིན་འདུག་ཟེར།

ཕོ་གསར་ཁ་ཤས་སེམས་ཁམས་རིག་པ་བ་དང་མཛེས་བཟོ་བྱེད་མཁན་སོགས་ཀྱི་གམ་དུ་ཕྱིན་ཏེ། གཞན་གྱི་མཐོང་སྣང་ལ་རང་ཉིད་ཡིད་དབང་འཕྲོག་པ་ཞིག་ཇི་ལྟར་བཟོ་དགོས་པའི་སྐོར་ལ་ལམ་སྟོན་ཞུ་པ་དང་། ཁ་ཤས་ཤིག་གིས་བརྡ་འཕྲིན་ ‘ང་གླ་རོགས་’(Hire me)ཞེས་པའི་དྲ་ཚུགས་བརྒྱུད་དེ། ཕ་མ་ཐུགས་ཁྲལ་ཆེན་པོ་དག་གིས་རང་ལ་དྲི་བ་ཡང་ཡང་མི་གཏོང་བའི་ཆེད་དུ་དགའ་རོགས་རྫུན་མ་གླས་ནས་སྟོན་གྱིན་ཡོད་འདུག ཞིབ་འཇུག་སྙན་ཐོ་ཞིག་ཏུ་དགའ་རོགས་རྫུན་མ་གླ་བར་ཉིན་གཅིག་ལ་རྒྱ་སྒོར་ ༡༠༠༠༠ (ཨ་སྒོར་ ༡༤༥༠)ཙམ་སྤྲོད་དགོས་ཚུལ་བཀོད་འདུག

རྒྱ་ནག་གི་གྲོང་གསེབ་ཁུལ་གྱི་ཕོ་གསར་ཚོར་རང་གི་ཚེ་རོགས་འཚོལ་བར་དཀའ་ངལ་འཕར་མ་ཞིག་ཡོད། གང་ཡིན་ཟེར་ན། རྒྱ་ནག་ལ་ཕོ་མོ་གཉེན་སྒྲིག་མ་བྱས་སྔོན་ལ་བུའི་ཕྱོགས་ནས་བུ་མོའི་ནང་དུ་དངུལ་དང་རྔན་པ་འདོད་པ་ཚིམ་པ་ཞིག་སྤྲོད་དགོས་པའི་ལུགས་སྲོལ་ཡོད།

གཉེན་སྒྲིག་བྱས་ཟིན་པའི་བུ་མོ་ཧོང་ཡན་(Hong Yang)ཞེས་པ་ད་ལྟ་རང་ལོ་སུམ་ཅུའི་ནང་ཡོད་པ་ཞིག་གིས་ལུགས་སྲོལ་དེ་ནི་ཨ་ཞང་དང་ཨ་ནེའི་དཔལ་འབྱོར་གོང་འཕེལ་གཏོང་རྒྱུའི་ཆེད་དུ་རེད་ཟེར། མོ་རང་གིས་བརྗོད་དོན “གལ་སྲིད་ཕོ་གསར་ཞིག་གིས་གཉེན་སྒྲིག་བྱེད་འདོད་ན། ཁོ་བོས་མ་འོངས་པའི་ཨ་ནེ་དེར་སྐད་ཆ་རིམ་པ་གཉིས་པ་མ་བཤད་སྔོན་ལ། ཨ་ནེ་དེས་ཐོག་མར་ཁང་པ་ཞིག་ཉོ་དགོས་ཟེར་གྱི་རེད། དེ་ནི་དེང་སྐབས་ཁང་པའི་གོང་ཚད་སྔར་ལས་ལྡབ་མང་པོ་འཕར་ཡོད་པའི་རྒྱུ་མཚན་གྱིས་རེད།” ཅེས་བརྗོད་སོང་།

རྒྱ་ནག་ནང་ཕོ་གསར་ཚོ་གཉེན་སྒྲིག་བྱེད་ཡུལ་མ་རེག་པར་ཕོ་ཧྲེང་དུ་ལྷག་དགོས་པའི་རྒྱུ་མཚན་གཅིག་ནི། བུ་མོའི་ནང་མི་ཚོས་ཁྱོ་ག་དེར་དཔལ་འབྱོར་གྱི་འགན་ལྕི་མོ་འཇོག་གི་ཡོད་པས་རེད། རྒྱ་ནག་གི་ཕོ་གསར་མང་པོ་ཞིག་ལ་གཉེན་སྒྲིག་བྱེད་པར་དཔལ་འབྱོར་གྱི་དཀའ་ངལ་འཕྲད་ཀྱི་ཡོད་སྟབས། ཁོང་ཚོས་གནས་སྐབས་རིང་གཉེན་སྒྲིག་ཕྱི་འགྱང་བྱས་ཏེ་དཔལ་འབྱོར་མཁོ་སྒྲུབ་ལ་ཤུགས་རྒྱག་གི་ཡོད། ཁོང་ཚོར་དཔལ་འབྱོར་དཀའ་ངལ་མེད་པ་ཆགས་རྗེས་གཞི་ནས་རང་ལས་ལོ་ཚད་ ༡༠ དང་ ༢༠ ཙམ་གྱིས་ཆུང་བའི་བུ་མོ་ཞིག་ལ་གཉེན་སྒྲིག་བྱེད་ཀྱིན་ཡོད། གནས་ཚུལ་དེ་རྒྱ་ནག་ནང་རྒྱུན་ལྡན་གྱི་གཉེན་སྒྲིག་བྱེད་སྟངས་ཤིག་ཆགས་ཡོད་འདུག

བུ་མོ་ཧོང་ཡན་གྱིས་བརྗོད་དོན་ “བུ་མོ་རང་ལོ་ ༣༢ བརྒལ་བ་རྣམས་ལའང་ཁྱོ་ག་ཡག་པོ་ཞིག་རེག་རྒྱུ་ཁག་པོ་ཆགས་ཡོད། གང་ཡིན་ཟེར་ན། དཔལ་འབྱོར་ཡོད་མཁན་ཚོས་བུ་མོ་ལོ་ཆུང་དང་མཛེས་མ་རྐྱང་འདོད་ཀྱི་ཡོད་ལ། བུ་མོ་ཚོས་ཀྱང་དཔལ་འབྱོར་ཡག་པོ་ཡོད་པ་ཞིག་འདོད་ཀྱི་ཡོད་སྟབས། རང་བཞིན་གྱིས་ཁོ་མོ་ཚོ་རང་ལས་རྒན་པ་དག་གི་ཕྱོགས་སུ་ཤོར་འགྲོ་བཞིན་ཡོད།” ཅེས་བརྗོད།

ཧྲང་ཧེ་རུ་གནས་སྡོད་བྱེད་པའི་བུད་མེད་ཧིའེ་ཋར་མཱ་(Heather Ma)ཞེས་པ་ད་ལྟ་རང་ལོ་སུམ་ཅུའི་ནང་ཡོད་པ་ཞིག་གིས་བརྗོད་དོན། “བུ་མོ་གཉེན་སྒྲིག་མ་བྱས་པར་ལྷག་སྡོད་མཁན་རེ་ཟུང་ཡོད། དེ་ནི་ཤེས་ཡོན་གྱི་གནས་ཚད་མཐོ་བོ་ཡོད་པ་དང་དཔལ་འབྱོར་ཡང་གཞན་ལ་བརྟེན་མི་དགོས་པར་རང་ཁ་རང་གསོ་ཐུབ་མཁན་དེ་དག་རེད། ཁོ་ཚོ་ལ་བེད་སྤྱོད་མེད་པའི་བུ་མོ་(Unwanted Girls)ཞེས་ཟེར་གྱི་ཡོད་”ཅེས་ཟེར།

ཕ་མ་ཚོ་གཉེན་སྒྲིག་མགྱོགས་པོར་བྱེད་དགོས་པའི་སྐུལ་མ་གཏོང་མཁན་ཡིན། “ཁོང་ཚོས་བཤད་པ་བཞིན་བྱེད་མཁན་ཡང་ཡོད།” ཅེས་གཉེན་སྒྲིག་བྱས་ཟིན་པའི་རོ་གྷར་ཀྲུའུ་(Roger Zhou)ལགས་ཀྱིས་བརྗོད་བྱུང་། ཁོ་བོ་ད་ལྟ་རང་ལོ་ ༣༩ ཡིན་པ་དང་སུ་ཀྲུའུ་ཞེས་པའི་ས་གནས་སུ་སྡོད་ཀྱིན་ཡོད། ཁོས་བརྗོད་དོན་ “ཕ་མ་ཚོས་དེ་ལྟར་བྱེད་པ་ནི་རང་གི་ཕྲུ་གུའི་ཁྱིམ་ཚང་གསར་པ་འཛིན་པར་རོགས་པ་བྱེད་ཀྱིན་ཡོད་བསམ་གྱི་ཡོད། ཁོང་ཚོས་དུས་རྒྱུན་རང་གི་བུ་ལ་ཚེ་རོགས་འཚོལ་དགོས་པའི་གནོན་ཤུགས་སྤྲོད་པ་དང་། གཉེན་སྒྲིག་བྱེད་ཆེད་དུ་མི་ལ་ཐུག་འཕྲད་བྱེད་དུ་འགྲོ་དགོས་པ། གཉེན་སྒྲིག་ལ་གྲ་སྒྲིག་བྱེད་དགོས་པ་སོགས་ཀྱི་སྐུལ་མ་ཡང་ཡང་གཏོང་གི་ཡོད།”ཅེས་བརྗོད་བྱུང་།

ཕ་མ་ཚོས་ཕྲུ་གུའི་གཉེན་སྒྲིག་ལ་ཐེ་གཏོགས་དང་གནོན་ཤུགས་སྤྲོད་པ།

རང་ལོ་ ༣༢ ཡིན་ཡང་གཉེན་སྒྲིག་བྱས་མེད་པའི་མཱི་ལིན་ཌ་ཧཱུ་(Melinda Hu)ཡིས་བརྗོད་དོན། “ ནག་ཁུང་གི་གཉེན་སྒྲིག་(Blind Date)སྟེ་ཕ་མས་བཟའ་ཚང་སྒྲིག་པའི་ལུགས་སྲོལ་ལ་ཟེར། ལུགས་སྲོལ་དེ་ད་དུང་རྒྱ་ནག་ནང་དར་སྲོལ་ཆེན་པོ་ཡོད།” “རང་ལོ་ ༣༠ བརྒལ་རྗེས་གཉེན་སྒྲིག་བྱས་མེད་ན། རང་བཞིན་གྱིས་ཕ་མ་ཚོར་སྤྱི་ཚོགས་ཀྱི་གནོན་ཤུགས་ཡོང་གི་ཡོད་སྟབས། ཕ་མ་ཚོས་རང་གི་བུ་གཉེན་སྒྲིག་གི་ལོ་ཚད་མ་བརྒལ་སྔོན་ནས་བྲེལ་བ་ཆེན་པོས་ནག་ཁུང་གི་གཉེན་སྒྲིག་(blind Date)ལ་འགྲོ་དགོས་པའི་སྐུལ་མ་བྱེད་ཀྱིན་ཡོད།”ཟེར།

དེ་བཞིན་ “ ཕྱི་རོལ་གྱི་གཉེན་སྒྲིག་ཁྲོ་རྭ་”(Outdoor Marriage Market)ཞེས་པ་ཞིག་ཡོད། དེ་ནི་ཕོ་མོ་གཉེན་སྒྲིག་ཁྱབ་བསྒྲགས་བྱེད་ས་ཡིན། རྒྱ་ནག་ཧྲང་ཧེ་ས་ཁུལ་གྱི་ཕ་མ་ཚོས་རང་གི་ཕྲུ་གུ་གཉེན་སྒྲིག་ལོ་ཚད་བརྒལ་བ་རྣམས་ཀྱི་ལོ་རྒྱུས་མདོར་བསྡུས་དང་། སློབ་སྦྱོང་གི་རྒྱུད་རིམ། ཀུན་སྤྱོད། དངུལ་གྱི་ཡོང་འབབ་སོགས་བྲིས་ཏེ་ཁྱབ་བསྒྲགས་བྱེད་ཀྱིན་ཡོད། ཕ་མ་ཁ་ཤས་ལོ་གཅིག་གི་བདུན་ཕྲག་རྟག་པར་ཁྲོམ་རྭ་དེར་སོང་ནས་ཁྱབ་བསྒྲགས་ཀྱི་གྲུབ་འབྲས་ལ་བལྟས་ཀྱང་ད་དུང་ལམ་ལྷོངས་མ་བྱུང་བར་ལྷག་སྡོད་མཁན་ཡོད།

གོང་དུ་རྒྱ་ནག་ནང་མི་ཕན་ཚུན་ཇི་ལྟར་ཐུག་འཕྲད་བྱེད་ཚུལ་དང་། ཕོ་གསར་ཚོས་ཇི་ལྟར་རང་གི་ཚེ་རོགས་འཚོལ་སྟངས་སྐོར་རིམ་པ་བཞིན་བཤད་པ་རེད། འོན་ཀྱང་། དེང་རབས་ཀྱི་མི་ཚོས་སྔར་གྱི་སྲོལ་རྒྱུན་གོམས་གཤིས་ཡོད་ཚད་ལ་གུས་བརྩི་ཞུ་རྐྱང་མི་བྱེད་པ་དང་། དཔལ་འབྱོར་ཡག་པོ་ཡོད་པ་ཙམ་གྱིས་ཀྱང་མི་ཆོག་པར་ཕན་ཚུན་བརྩེ་བ་དང་སྣང་བ་འགྲོ་བོ་དགོས་ཀྱི་ཡོད་པ་རེད།

དཔེར་ན། ཅིན་ལེ་ཞེས་པའི་བུད་མེད་ཅིག་གིས་ཁོ་མོ་ད་ལྟ་གཉེན་སྒྲིག་བྱ་རྒྱུར་བྲེལ་བ་མེད། ཁོ་མོས་རང་གི་བློར་འབབ་པའི་མི་དེར་སྒུག་ནས་བསྡད་ཡོད་ཅེས་བརྗོད་བྱུང་། རྒྱལ་ཁབ་གཞན་དག་ལྟར་ད་དུང་ཡང་རྒྱ་ནག་ལ་བརྩེ་བའི་བྲོ་བ་མ་ཡལ་ཞིང་མུ་མཐུད་ནས་ལག་ལེན་བསྟར་བཞིན་འདུག