ང་རང་འདས་པའི་ཟླ་བ་གཉིས་ནང་གྱུར་བ་ཆེན་པོ་ཞིག་ཕྱིན་སོང་། དེ་རིང་འདིར་ངས་ང་ལ་བཟོད་བསྲན་དང་སྤྲོ་སྣང་ལྡན་པའི་ཚོར་བ་སྔར་ལས་ཤུགས་ཆེ་བ་ཞིག་ཡོད་ཅེས་བཤད་ཐུབ་པ་མ་གཏོགས་དེའི་འགྱུར་བ་འགྲོ་ལུགས་འགྲོ་སྟངས་ཡོངས་རྫོགས་བཤད་ཐུབ་པ་མི་འདུག
སྔོན་མ་ངའི་ནང་མི་དང་གྲོགས་པོ་ཚོས་རྒྱུན་པར་ང་ལ་ཁྱོད་སྐྱིད་པོ་འདུག་ཀྱང་། བྲེལ་བ་ཆེ་དྲགས་འདུག་ཟེར་གྱིན་ཡོད། དོན་དངོས་སུའང་སྐབས་དེར་ཉི་མ་རེ་རེ་བཞིན་ཧ་ཅང་བྲེལ་ཚུབ་ཆེན་པོ་དང་། ངལ་གསོ་མེད་པར་སྐྱེལ་བཞིན་ཡོད། འོན་ཀྱང་ད་ལྟ་གནས་སྟངས་དེ་རིམ་བཞིན་མེད་པ་ཆགས་བཞིན་འདུག
ངས་སྣང་བ་མ་གཡེང་བར་ང་རང་གི་ཕྲུ་གུ་ཆུང་བ་དང་མཉམ་དུ་དུས་ཚོད་སྐྱེལ་ཐུབ་པ་དང་། སྔོན་ཆད་ལྟར་ཁ་པར་ལ་ཡང་ཡང་ལྟ་མི་དགོས་པར། རང་འཁྲིའི་ལས་ཀའི་ཐོག་བློ་རིག་བསྒྲིམ་ཐུབ་པའི་ནུས་པ་སྔར་ལས་ཆེ་བ་འདུག ལས་ཀ་བྱེད་སྐབས་བསམ་བློ་འཁྱར་མ་བཅུག་པར། དྲན་པ་རྩེ་གཅིག་ལ་གནས་ཐུབ་པ་དེ་དག་གིས་ང་ད་ལྟ་ཧ་ཅང་དགའ་ཚོར་ཆེན་པོ་སྐྱེ་བཞིན་ཡོད། ང་རང་གི་འགྱུར་བ་དེ་དག་ལོ་སྔོན་མའི་ལོ་མཇུག་ལ་རྒྱ་གར་དུ་༸གོང་ས་ཏཱ་ལའི་བླ་མ་མཆོག་དང་མཉམ་དུ་ཞོགས་པ་སྒོམ་བརྒྱབ་པར་བརྟེན་ཏེ་བྱུང་བ་ཞིག་ཡིན།
དང་པོ་ངས་དེའི་སྐོར་ཚིག་དེ་འདྲ་ཞིག་བྲིས་དུས་ཚོར་བ་ཁྱད་མཚར་ཞིག་སྐྱེས་སོང་ལ། སྔོན་མ་༸གོང་ས་ཏཱ་ལའི་བླ་མ་མཆོག་གིས་ང་ཁོང་གི་སར་མགྲོན་འབོད་གནང་དུས་ཀྱང་ཚོར་བ་འདི་ལྟར་སྐྱེས་མྱོང་། སྤྱིར་བཏང་ངས་སྔོན་ཆད་སྒོམ་ཕྲན་བུ་རེ་རྒྱག་ཁུལ་བྱེད་ཀྱིན་ཡོད་ཀྱང་། སྒོམ་གྱི་འགྲོ་སྟངས་ཏག་ཏག་འགྲིག་གི་ཡོད་མེད་མི་ཤེས། ༸གོང་ས་ཏཱ་ལའི་བླ་མ་མཆོག་གི་མདུན་དུ་བསྡད་དེ་སྒོམ་རྒྱག་ཆོག་གི་ཡོད་མེད་ནི་དེ་བས་ཀྱང་མི་ཤེས།
༸གོང་ས་ཏཱ་ལའི་བླ་མ་མཆོག་གི་མདུན་དུ་མ་ཕྱིན་གོང་དུ་ང་ལ་སེམས་ཁྲལ་ཏོག་ཙམ་འདུག གལ་སྲིད་ཁོང་གིས་ང་སྒོམ་རྒྱག་མཁན་ཡག་པོ་ཞིག་ལ་རེ་བ་རྒྱག་གི་ཡོད་ཚེ་ང་ནི་སྒོམ་ཡག་པོ་རྒྱག་ཐུབ་མཁན་ཞིག་མིན་ལ། དེར་མ་ཟད་ང་རང་ཞ་ལའི་སྟེང་རྐང་པ་སྐྱིལ་ཀྲུང་བྱས་ཏེ་རྒྱུན་རིང་པོར་སྡོད་ཐུབ་མཁན་ཞིག་ཀྱང་མིན། ང་རང་སྐྱིལ་ཀྲུང་བྱས་ཏེ་སྡོད་སྐབས་ཐོག་མ་རྒྱབ་གཟུགས་ན་བ་དང་རིམ་གྱིས་པུ་མོ་སོགས་ན་བཞིན་ཡོད། དེ་བཞིན། ངས་རང་གི་དབུགས་འབྱིན་རྔུབ་ལ་དམིགས་པ་གཏོད་ཁུལ་བྱས་ཀྱང་དབུགས་སྙོམས་མ་ཐུབ་པར་ཧྲད་སྒྲ་ལམ་སང་འཐོན་ཡོང་མཁན་ཞིག་ཡིན། དེ་དག་ལ་བསམ་བློ་གཏོང་སྐབས་ངའི་སེམས་ལྷོད་ལ་འབབ་རྒྱུ་ལས་ལྡོག་སྟེ་ཚ་གི་ཚིག་གི་ཆགས་ཡོང་གི་འདུག
འོན་ཀྱང་། ༸གོང་ས་ཏཱ་ལའི་བླ་མ་མཆོག་དང་མཉམ་དུ་སྒོམ་རྒྱག་པའི་གོ་སྐབས་བྱུང་ཚེ་མི་སུས་ཀྱང་གོ་སྐབས་དེ་བློས་གཏོང་གི་མ་རེད། དེར་བརྟེན། ངས་ཁོང་དང་མཉམ་དུ་ཞོགས་པ་སྔ་པོར་ཁོང་སྒེར་གྱི་གཟིམ་ཤག་ཏུ་སྒོམ་རྒྱག་རྒྱུ་ཁས་བླངས་པ་ཡིན།
ཉམས་ལེན་དེ་ནི་ཐོ་རེངས་ཆུ་ཚོད་ ༣ ནས་མགོ་འཛུགས་གནང་གི་ཡོད།
༸གོང་ས་ཏཱ་ལའི་བླ་མ་མཆོག་ད་ལྟ་དགུང་གྲངས་ ༨༡ ལ་ཕེབས་ཟིན་ན་ཡང་། ཕྱག་ལས་བྱེད་སྒོའི་རེའུ་མིག་ནི་ཧ་ཅང་དམ་པོ་རེད། ང་༸གོང་ས་ཏཱ་ལའི་བླ་མ་མཆོག་ལ་རྒྱ་གར་ལྷོ་ཕྱོགས་མོན་གྷོ་ཊི་གཞིས་ཆགས་ནང་རྟེན་གཞི་བྱེད་པའི་འབྲས་སྤུངས་དགོན་པར། ནང་ཆོས་དང་ཚན་རིག་བར་གྱི་བགྲོ་གླེང་འཚོགས་བཞིན་པའི་སྐབས་སུ་མཇལ་བ་ཡིན།
འབྲས་སྤུངས་དགོན་པ་བཞེངས་སྟངས་དེ་ལོ་ངོ་ ༦༠༠ ལྷག་འདས་པའི་བཟོ་དབྱིབས་ལྟར་བཞེངས་སྐྲུན་བྱས་ཡོད་སྟབས་ཧ་ཅང་ཡིད་དུ་འོང་པ་ཞིག་རེད། དགོན་པའི་ལྷ་ཁང་དག་གི་རྩིག་གྱང་ངོས་སུ་གསེར་རྩི་འབྱུག་པའི་སངས་རྒྱས་གྱི་སྐུ་བརྙན་ཧ་ཅང་ཆེན་པོ་དེ་འདྲ་བཞེངས་འདུག ང་ཚོ་བགྲོ་གླེང་ཚོགས་སའི་ཚོགས་ཁང་དེ་ཧ་ཅང་ཆེན་པོ་ཞིག་རེད། ཚོགས་ཁང་དེའི་སྒོ་དང་སྒེའུ་ཁུང་ཚང་མ་ཕྱེ་ཡོད་ཀྱང་། རྒྱ་གར་ལྷོ་ཕྱོགས་ཀྱི་ཉི་དྲོད་ཚ་བོས་ཚོགས་ཁང་དེའི་ནང་ཧྲིལ་བོར་ཚ་དྲོད་འཁྱིལ་འདུག
༸གོང་ས་ཏཱ་ལའི་བླ་མ་མཆོག་གིས་ཉིན་གསུམ་རིང་ཧ་ཅང་གཏིང་ཟབ་པའི་བརྗོད་གཞི། མངོན་སུམ་ཚད་མའི་ཁྱབ་ཚད་དང་། འཇིག་རྟེན་གྲུབ་ལུགས་ཀྱི་རྣམ་གཞག སེམས་དང་སྲོག་གི་གནས་ལུགས། རྣམ་པར་ཤེས་པའི་མྱོང་བ་བཅས་ཀྱི་སྐོར་གསུངས་གནང་སོང་།
བགྲོ་གླེང་དེ་ནི་ཡ་མཚན་ཅན་ཞིག་རེད་ལ་སེམས་འགུལ་ཐེབས་པ་ཞིག་ཀྱང་རེད། ནང་དོན་ཟབ་དྲགས་ཏེ་མཚམས་རེར་གོ་ཐུབ་ཀྱི་མི་འདུག འོན་ཀྱང་ཚོགས་འདུ་དེར་ནང་པ་དང་ཚན་རིག་པ་གཉིས་བར་བགྲོ་གླེང་ཧ་ཅང་ལྷུག་པོ་བྱུང་ཡོད་སྟབས། ཉོབ་སྣང་མེད་པར་རང་བཞིན་གྱིས་གྲུང་རིལ་རིལ་ཆགས་ཀྱི་འདུག བགྲོ་གླེང་དེའི་མགོ་མཇུག་བར་གསུམ་དུ་༸གོང་ས་ཏཱ་ལའི་བླ་མ་མཆོག་གི་ལུས་ངག་ཙམ་མིན་པར། ཡིད་ཀྱིས་ཀྱང་མཉམ་ཞུགས་ཤུགས་ཆེན་པོ་གནང་ཞིང་། བགྲོ་གླེང་གཏམ་བཤད་ཀྱི་ནང་དོན་ཕྱེད་ལྷག་སྐད་བསྒྱུར་བྱེད་དགོས་ཀྱི་འདུག་ཀྱང་། ཁོང་གིས་སྐད་སྒྱུར་གནང་བཞིན་པར་ཡང་དོ་ནན་ཆེན་པོས་གསན་གཟིགས་གནང་གི་འདུག
༸གོང་ས་ཏཱ་ལའི་བླ་མ་མཆོག་རྒྱུན་པར་ཞོགས་པ་ཆུ་ཚོད་ ༢ དང་སྐར་མ་ ༤༠ ཙམ་གྱི་སྟེང་སྐུ་བཞེངས་གནང་གི་ཡོད་པ་དང་། ཆུ་ཚོད་ ༣ པའི་ཐོག་རྟག་པར་སྒོམ་སྒྲུབ་གནང་གི་རེད། སྐབས་དེར་ཁོང་གི་ཕྱག་རོགས་མང་ཆེ་བ་གཉིད་དུ་ཡུར་ཡོད།
ཉིན་དེའི་ཞོགས་པ་སྔ་བོར་༧གོང་ས་ཏཱ་ལའི་བླ་མ་མཆོག་གི་ཕྱག་རོགས་རྒན་གྲས་ཤིག་གིས་གཙུག་ལག་ཁང་གི་སྒོ་ཁར་ང་ལ་སྣེ་ལེན་བྱེད་པར་སྒུག་འདུག ངེད་གཉིས་སྣུམ་འཁོར་ཞིག་ལ་བསྡད་དེ་ཁོང་སྐུ་སྒེར་གྱི་གཟིམ་ཁང་སྒོ་ཁར་བསྐྱལ་སོང་།
དེ་ནས་ཁོང་གི་ཞབས་ཞུ་བ་ཁ་ཤས་ཀྱིས་ང་ཚོགས་ཁང་ཆུང་ཆུང་ཞིག་གི་ནང་དུ་སྣེ་ལེན་བྱས་སོང་། ཁོང་གི་སྐུ་སྲུང་བ་ཚོ་མལ་ནས་གཉིད་སད་མ་ཐག་ཚོགས་ཁང་དེར་ཡོང་སྟེ་དལ་དལ་ལྷོད་ལྷོད་ཀྱིས་ཞོགས་ཟས་བཟའ་བཞིན་འདུག མཐར་ཁོང་གི་ཞབས་ཞུ་བ་གཙོ་བོ་ཞིག་ངའི་སར་བསླེབས། སྐབས་དེར་ང་ཏག་ཏག་ཁོང་གི་གཟིམ་ཆུང་སྒོ་ཁར་བསྡད་ཡོད།
སྒོམ་སྒྲུབ་བྱ་རྒྱུ་ནི་ཁོང་ལ་ཡང་ལས་སླ་མོ་ཞིག་མིན།
ཁོང་གི་གཟིམ་ཆུང་ནང་མ་འཛུལ་གོང་ལ་ངེས་པར་དུ་ཤེས་དགོས་པའི་དོན་དག་ཁ་ཤས་ཡོད། མིག་གིས་ཐད་ཀར་ཁོང་ལ་བལྟས་ན་མ་ཆོག་པ་མེད་ལ། ལག་པ་གཉིས་ཀས་ཁོང་ལ་ལག་འཇུ་བྱས་ནའང་མ་ཆོག་པ་མེད། འོན་ཀྱང་ལག་པ་གཅིག་གིས་ལག་འཇུ་བྱེད་སྲོལ་མེད་ལ། དེ་བཞིན། ཁོང་གི་གཟིམ་ཆུང་ལས་ཕྱིར་འཐོན་ཁར་ཁོང་ལ་རྒྱབ་གཟུགས་བསྟན་ཏེ་འགྲོ་མི་རུང་བར། རང་གིས་གོམ་པ་མདུན་སྤོ་མིན་པར་ལུས་ཙུང་སྒུར་ནས་ཁོང་ལ་ལྟ་བཞིན་གོམ་པ་རྒྱབ་ཏུ་སྤོ་བཞིན་ཕྱིར་ལོག་དགོས། ཁོང་གི་མདུན་དུ་རྐང་པ་སྐྱིལ་ཀྲུང་བྱས་ནས་སྡོད་སྐབས་ཁོང་ལ་ཐད་ཀར་མཛུབ་མོ་ཀེར་མི་རུང་པ་མ་ཟད། ཁོང་ལ་བཀའ་མོལ་གནང་སྐབས་རིན་པོ་ཆེ་ “His Holiness”ཞེས་གུས་བརྩིའི་ཚིག་བེད་སྤྱོད་བྱེད་དགོས།
ཁོང་གི་གཟིམ་ཆུང་ནི་ཧ་ཅང་བག་ཕེབས་ལྷིང་འཇགས་ཤིག་རེད། གཟིམ་ཆུང་གི་སྒོ་ཕྱེས་ཏེ་ང་གཟིམ་ཆུང་ནང་འཛུལ་མ་ཐག ཁོང་སྔ་ས་ནས་བཞུགས་གདན་དམའ་བོ་ཞིག་གི་སྟེང་དུ་བཞུགས་ཏེ་སྒོམ་རྒྱག་བཞིན་པ་མཐོང་བས། ངའི་སེམས་ཚ་གི་ཚི་གི་ཞིག་ཆགས་སོང་། ངས་རང་གི་ལྷམ་གཉིས་ཕུད་ནས་ཁོང་གི་མདུན་དུ་རྐང་པ་སྐྱིལ་ཀྲུང་བྱས་ཏེ་བསྡད་པ་དང་། མིག་བཙུམ་སྟེ་རང་གི་དབུགས་འབྱིན་རྔུབ་ལ་དམིགས་པ་གཏད་མགོ་བརྩམས་པ་ཡིན།
ངས་སྒོམ་རྒྱག་ཁུལ་བྱས་ཀྱང་དེ་ཙམ་རྒྱག་ཐུབ་ཀྱི་མི་འདུག སྐར་མ་ཁ་ཤས་རྗེས་ཁོང་གི་ཐུན་མོང་མ་ཡིན་པའི་གསུང་སྐད་སྦོམ་པོ་དེས་ང་ལ་ “དྲི་བ་ཡོད་དམ།” ཞེས་བཀའ་འདྲི་གནང་སོང་། ངས་མགོ་ཡར་བཀྱགས་ནས་ལྟ་སྐབས། ཁོང་གི་འཛུམ་མུལ་བའི་བཞིན་རས་དེ་མཇལ་བྱུང་ལ། ཁོང་གི་ཡིད་དབང་འཕྲོག་པའི་བཞད་མོའི་ཁྱད་ཆོས་དེའང་ཕྱིར་བསྟན་གནང་སོང་།
ངས་ཁོང་ལ་ “སྒོམ་རྒྱག་རྒྱུ་དཀའ་ལས་ཁག་པོ་འདུག་” ཅེས་ཞུས་སྐབས། ཁོང་གིས་ཀྱང་ “ང་ལའང་ཁག་པོ་འདུག” ཅེས་གསུངས་ཤིང་། “ངས་ལོ་ངོ་དྲུག་ཅུའི་རིང་རྟག་པར་སྒོམ་བརྒྱབས་ཀྱང་། ད་དུང་ང་ལ་དཀའ་ལས་འདུག་” ཅེས་གསུངས་སོང་། བོད་པའི་ཆོས་ཀྱི་དབུ་ཁྲིད་དང་ཤཱཀྱའི་དགེ་སློང་ཏཱ་ལའི་བླ་མ་མཆོག་གིས་ཁོང་ལའང་སྒོམ་རྒྱག་སྐབས་དཀའ་ལས་འདུག་གསུངས་སྐབས། ང་རེ་ཞིག་ཡ་མཚན་སྐྱེས་ཤིང་ཡིད་མ་ཆེས་པ་ཞིག་བྱུང་སོང་།
ཁོང་གིས་ང་ལ་ “ངའི་བསམ་པར་ཁྱོད་ཀྱིས་དཔྱད་སྒོམ་ཡག་པོར་མཐོང་གི་རེད།” གསུངས་ཤིང་། དངོས་པོ་ཞིག་ལ་བློ་བསྒྲིམས་ཏེ་བློ་རྩེ་གཅིག་གིས་སྒོམ་སྒྲུབ་བྱེད་པ་ལས་རང་གིས་སེལ་ཐབས་བྱེད་བཞིན་པའི་དཀའ་ངལ་དང་། ཡང་ན། སྔོན་ཆད་བཀླགས་མྱོང་བའི་བརྗོད་གཞི་དང་ཉེ་ལམ་ཚོགས་པའི་ཚོགས་འདུའི་ལྟ་གྲུབ་ཅིག་གཞི་རྩར་བཟུང་ན་ཡག་པོ་ཡོང་གི་རེད་ཅེས་བསམ་ཚུལ་བཏོན་གནང་སོང་།
ཁོང་གིས་རང་ལ་ཡོད་པའི་དཀའ་ངལ་དང་རྙོག་གྲ་ཡོད་ཚད་ཆུ་ཡི་ཝུ་བ་ལྟར་རང་གི་ལུས་སེམས་གཉིས་ལས་བྲལ་སོང་བ་ལྟ་བུའི་བསམ་བློ་ཐོངས་གསུངས་སོང་། ངས་རང་གི་མིག་གཉིས་བཙུམ་ནས་སེལ་མ་ཐུབ་པའི་དཀའ་ངལ་ཡོད་ཚད་ལ་བསམ་བློ་ཞིག་བཏང་པ་ཡིན། ངས་དཀའ་ངལ་གྱི་ཕུང་པོ་དེ་དག་ཆུ་ཡི་ཝུ་བ་ལྟ་བུ་ཞིག་ཏུ་བསམ་བློ་བཏང་མ་ཐག་རང་བཞིན་གྱིས་དོན་དག་ཁ་ཤས་འབྱུང་མགོ་བརྩམས་སོང་།
ངས་དཀའ་ངལ་དེ་ཚོ་ལྗིད་ཁོག་མེད་པར་ངའི་མདུན་གྱི་ཁ་ཐུག་ཏུ་ཡོད་པ་མཐོང་སོང་བ་མ་ཟད། ངས་སེམས་ནང་དེ་ཚོ་ཡར་སྐོར་མར་སྐོར་བྱེད་ཐུབ་ཅིང་མགོ་གཏིང་ཡང་སློག་ཐུབ་ཀྱི་འདུག དེ་ནི་བསམ་བློ་གཏིང་ཟབ་མོ་གཏོང་ཐབས་ཀྱི་སྦྱོང་བརྡར་ཞིག་རེད་འདུག
ཝུ་བ་དེ་རང་བཞིན་གྱིས་ཡར་འཕར་བ་དང་ལྷན་དུ་འདོད་སྲེད་ལས་བྱུང་བའི་དཀའ་རྙོག་དང་སེམས་ཀྱི་འཛིན་པ་རྣམས་རང་བཞིན་གྱིས་མར་གྲིབ་ནས་སེམས་ཇེ་ཡང་ཇེ་བདེར་འགྲོ་བཞིན་པ་ཚོར་བ་དང་། དཀའ་རྙོག་རྣམས་མིག་མདུན་དུ་གཅིག་པུར་ལུས་པ་ལྟ་བུའི་བསམ་བློ་ཞིག་ངང་ངམ་ཤུགས་ཀྱིས་འཁོར་ཡོང་གི་འདུག
སྤྱིར་ང་ཚོར་དཀའ་རྙོག་སེལ་བའི་ཐབས་ཤེས་དོན་དང་ལྡན་པ་ཞིག་ཡོད་ཀྱང་། ང་ཚོ་མང་ཆེ་བས་འབྲེལ་མེད་ཀྱི་ཚོར་བ་དང་རྣམ་རྟོག་མང་པོ་ཞིག་བློས་བཞེངས་སྐྲུན་བྱས་ཏེ་ཐབས་ལམ་དེ་རེ་ཞིག་འགེབ་བཞིན་ཡོད་སྟབས། ང་ཚོས་དཀའ་རྙོག་དེ་དག་སེལ་ཐབས་མེད་པ་ལྟ་བུར་མཐོང་གི་ཡོད། ༸གོང་ས་ཏཱ་ལའི་བླ་མ་མཆོག་གིས་ང་ལ་དཔྱད་སྒོམ་ལ་བརྟེན་ནས་ང་ཚོས་ཇི་ལྟར་རྒྱུ་མཚན་དང་རིག་པ་ལྡན་པའི་ངང་ནས་རང་གི་དོགས་པ་དེ་དག་གསལ་པོར་ངོས་འཛིན་བྱ་ཚུལ་དང་། ངོས་འཛིན་བྱས་རྗེས་ཇི་ལྟར་རང་གི་བློས་བཞེངས་སྐྲན་བྱས་པའི་རྟོག་བཟོ་དང་དོགས་པ་རྣམས་བསལ་ཏེ། དོན་དང་ལྡན་པའི་ལན་གསལ་བོ་ཞིག་འཚོལ་ཚུལ་སོགས་བསླབས་གནང་སོང་། དེ་ནི་ལས་སླ་བོ་དང་གོ་རྒྱུ་ཡོད་པ་ཞིག་རེད་ལ། ང་ལ་མཚོན་ན་ཧ་ཅང་ཕན་ཐོགས་ཡོད་པ་ཞིག་ཀྱང་རེད།
རྟོག་བཟོའི་སྒོམ་སྒྲུབ།
ང་རང་ནི་དབང་རྩའི་མཚན་རིག་པ་ཞིག་ཡིན་སྟབས། ངས་ནམ་ཡང་ནང་པའི་གྲྭ་པ་ཏཱ་ལའི་བླ་མ་མཆོག་ལྟ་བུ་ཞིག་གིས་ངའི་མི་ཚེའི་ནང་དཀའ་ངལ་ཇེ་ཉུང་དུ་གཏོང་ཐབས་ཡག་པོ་དང་། བསམ་བློ་གཏོང་ཕྱོགས་སྐོར་སློབ་འཁྲིད་བྱེད་པའི་འི་དུས་ཚོད་ཅིག་ཡོང་གི་རེད་དྲན་མྱོང་མེད། འོན་ཀྱང་ད་ལྟ་དེ་འདྲ་ཞིག་ངའི་མི་ཚེ་ནང་དངོས་སུ་བྱུང་བ་རེད།
༸གོང་ས་ཏཱ་ལའི་བླ་མ་མཆོག་དང་མཇལ་བའི་མི་ཚད། ཁོང་དང་ལྷན་དུ་སྒོམ་བརྒྱབས་རྗེས་ང་རང་ལ་འགྱུར་བ་ཆེན་པོ་ཞིག་ཕྱིན་སོང་། ད་ལྟ་ངས་སྒོམ་སྔར་ལས་ཡག་པོ་རྒྱག་ཐུབ་ཀྱི་འདུག་ལ། ཉིན་ལྟར་ཞོགས་པ་དཔྱད་སྒོམ་སྦྱོང་བརྡར་བྱེད་ཀྱིན་ཡོད། སྒོམ་རྒྱག་སྐབས་ཀྱི་ཐོག་མའི་སྐར་མ་ཁ་ཤས་རིང་ད་དུང་ཅུང་དཀའ་ངལ་འདུག་ཀྱང་། བཟོད་བསྲན་བྱས་ཏེ་ངས་རང་གི་བསམ་བློར་དཀའ་སྡུག་རྣམས་ཆུ་ཡི་ཝུ་བར་བསྒོམས་ཏེ་ཡར་ལྡིང་འཇུག་གི་ཡོད། དེ་རྗེས་ང་རང་ལྷོད་ཤིག་གེར་ཆགས་པའམ་སེམས་ངོས་སྟོང་སང་ངེར་འགྲོ་བཞིན་འདུག་ལབ་ན་མ་འགྲིག་པ་མི་འདུག ངས་དེ་འདྲའི་ཚོར་བའི་ཐོག་ནས་སྒོམ་སྒྲུབ་སྐར་མ་ཉི་ཤུ་ནས་སུམ་ཅུའི་བར་དཀའ་ཁག་གང་ཡང་མེད་པར་ལས་སླ་བོས་བྱེད་ཐུབ་ཀྱི་འདུག
ངས་དཔྱད་སྒོམ་ལ་བརྟེན་ཏེ་རྟོག་བཟོའི་སྡུག་བསྔལ་ཆེན་པོ་དེ་དག་སྟབས་བདེ་པོའི་ངང་ནས་སེལ་ཐུབ་ཀྱི་ཡོད་པའི་ངེས་ཤེས་ཟབ་མོ་རྙེད་སོང་། ངས་གུང་སེང་མང་ཆེ་བར་༸གོང་ས་མཆོག་ཏཱ་ལའི་བླ་མ་མཆོག་གིས་ང་ལ་ལམ་སྟོན་གནང་བའི་དཔྱད་སྒོམ་གྱི་ཐབས་ལམ་དང་། དེའི་གཞི་རིམ་གྱི་བསླབ་གཞི་རྣམས་ངའི་ནང་མི་དང་གྲོགས་པོ་ཚོར་བཤད་དེ་དུས་ཚོད་སྐྱེལ་བཞིན་ཡོད། དེ་ནི་ངས་ཁོང་ཚོར་བགོ་འགྲེམ་བྱེད་འོས་པའི་ལག་རྟགས་ཡག་ཤོས་ཤིག་ཏུ་མཐོང་གི་ཡོད་ལ། དེ་རིང་ངས་དེ་དག་ཁྱོད་ཚོ་དང་ལྷན་དུ་བརྗེ་རེས་བྱེད་བཞིན་ཡོད།
འབྲེལ་ཐག http://edition.cnn.com/2017/02/15/health/sanjay-gupta-dalai-lama-meditation/index.html
དང་པོ་བོད་བསྒྱུར་དེ་ཐད་ཀར་ཀློག་སྐབས་སྒོམ་གྱི་དམིགས་རྟེན་དུ་སེམས་ཀྱི་དཀའ་ངལ་ལྦུ་བ་ལྟར་ལུས་ནས་བྲལ་སོང་བསམ་ཟེར་བ་བསྒྱུར་སྟངས་དེར་དོགས་པ་ཞིག་ཟ་བྱུང་། སེམས་ཅན་སྣ་ཚོགས་ལ་སྒོམ་སྟངས་མི་འདྲ་བ་ཐབས་མཁས་དང་ལྡན་པ་སངས་རྒྱས་ཀྱིས་གསུངས་པའང་ཡོང་ཆོག་སྙམ། དེ་ནས་སན་ཇེ་གུཔ་ཏཱའི་དབྱིན་ཇི་ནང་གི་མ་དཔེ་བལྟས་སྐབས་གཞི་ནས་ཡིག་བསྒྱུར་པས་ནོར་བ་ཤེས་སོང་། ལྦུ་བ་ལྟར་རྟོག་དཔྱོད་རྒྱུ་མཚན་རྟེན་འབྲེལ་སྣ་ཚོགས་ནས་འབེལ་འབེལ་དང་གསལ་པོ་ཡོང་བ་བྱེད་དགོས་གསུངས་པ་ལས་ལྦུ་བ་ཞིག་ཏུ་བསྒོམ་ཞེས་མོས་སྒོམ་ལྟར་གསུངས་མེད་པ་གསལ་པོ་འདུག དཔྱད་སྒོམ་བསྟེན་ནས་དཀའ་ངལ་ལམ་དཔྱད་པ་བྱ་རྒྱུའི་དངོས་པོ་དེ་ཆུ་ལས་ལྦུ་བ་བདར་བ་བཞིན་དུ་རིགས་པ་རྒྱུ་མཚན་གྱིས་ཡང་ཡང་བསམ་བློ་བཏང་སྟེ་ལོགས་སུ་ཐེར་འདོན་གྱིས་དྲན་པས་ཚིར་གྱིས་བཟུང་ནས་བསམ་བྱུང་གིས་ངེས་པ་རྙེད་པ་ཞིག་བྱེད་དགོས་ཞེས་གསུངས་པ་ལས་ལྦུ་བ་དམིགས་རྟེན་བཟོས་དགོས་ན་དཔེ་གཞན་ཡང་འཇོག་ཆོག་པ་ཡོད། ལྦུ་བ་གསུང་དགོས་དོན་ཁྱད་ཆོས་དམིགས་བསལ་ཤིག་མེད་དམ་སྙམ།