ཏཱ་ལའི་བླ་མའི་ཡང་སྲིད་རྒྱ་ནག་གི་ཕྱི་རོལ་དུ་འཁྲུངས་སྲིད་པའི་སེམས་ཚབ།

དེ་རིང་རྒྱ་གར་དུས་བབ་ཐོག་སྤེལ་བའི་གནས་ཚུལ།

༧གོང་ས་ཏཱ་ལའི་བླ་མ་མཆོག་གི་ཕྱི་སྐྱོད་མཛད་རིམ་ཁག་ལ་རྒྱ་ནག་གཞུང་གིས་སེམས་ཁྲལ་ཆེན་པོ་བྱེད་ཀྱིན་ཡོད་སྟབས། མི་འགྱངས་བར་ཏཱ་ལའི་བླ་མ་མཆོག་ཨ་རུ་ན་ཅལ་མོན་རྟ་དབང་དུ་ཕེབས་འཆར་ཡོད་པ་དེར་ཡང་མཁྲེགས་འཛིན་བྱེད་ངེས་རེད། ཨ་རུ་ན་ཅལ་ནི་སྤྱི་ལོའི་དུས་རབས་བཅུ་དྲུག་པའི་ནང་ཏཱ་ལའི་བླ་མའི་ཡང་སྲིད་འཁྲུངས་ཡུལ་རེད།

གཟའ་ཕུར་བའི་ཉིན་རྒྱ་གར་གྱི་སྲིད་དོན་པ་ཁག་ཅིག་གིས་༧གོང་ས་ཏཱ་ལའི་བླ་མ་མཆོག་མོན་རྟ་དབང་དུ་ཕེབས་འཆར་ཡོད་པ་དེས་རྒྱ་དཀར་ནག་བར་གྱི་འབྲེལ་ལམ་ལ་དོ་ཕོག་བཟོ་ངེས་ཡིན་སྐོར་བརྗོད་འདུག ཀྲུང་གོའི་བོད་རིག་པའི་ཞིབ་འཇུག་ལྟེ་གནས་ཀྱི་དེང་རབས་བོད་རིག་པའི་ཞིབ་འཇུག་ཁང་གི་འགན་འཛིན་ལིན་ཞཱོང་མིན་ (Lian Xiangmin) གྱིས་གསར་འགོད་གསལ་བསྒྲགས་ཐོག་མོན་རྟ་དབང་ནི་རྒྱ་ནག་གི་ཆ་ཤས་ཡིན་ལུགས་བཤད་ཡོད་པ་མ་ཟད། ཁོས་རང་གི་སྐད་ཆར་བདེན་དཔང་ཆེད་རྒྱ་ནག་སྐམ་ས་ཆེན་མོ་དང་མོན་རྟ་དབང་གི་འབྲེལ་ལམ་ལོ་རྒྱུས་ལུང་འདྲེན་བྱས་འདུག

ལིན་ཞཱོང་མིན་གྱིས་བརྗོད་རྒྱུར། “བོད་ཀྱི་དགོན་ཆེན་གསུམ་གྱི་གཅིག་ནི་ལྷ་སའི་ཉེ་འཁྲིས་སུ་ཡོད་པའི་འབྲས་སྤུངས་དགོན་པ་རེད། སྔོན་ཆད་འབྲས་སྤུངས་དགོན་གྱི་འཛིན་སྐྱོང་འོག་མོན་རྟ་དབང་དགོན་པས་ས་གནས་སྲིད་གཞུང་ལ་ཁྲལ་འཇལ་དགོས་སྟབས། རྟ་དབང་དགོན་པ་དེ་བོད་ཀྱི་ཆ་ཤས་དང་། བོད་དེ་རྒྱ་ནག་གི་ཆ་ཤས་ཡིན། ” ཞེས་བརྗོད་འདུག

༢༠༠༩ ལོར་༧གོང་ས་ཏཱ་ལའི་བླ་མ་མོན་རྟ་དབང་དུ་ཕེབས་སྐབས། ཁོང་གིས་མོན་རྟ་དབང་ནི་རྒྱ་གར་གྱི་ཆ་ཤས་ཡིན་སྐོར་གསུངས་ཡོད་ཀྱང་། ལིན་ཞཱོང་མིན་གྱིས་ “ ཏཱ་ལའི་བླ་མའི་སྐད་ཆ་དེ་བདེན་པ་མ་རེད། དེ་དོན་དངོས་གཞིར་བཟུང་གིས་བཤད་པ་ཞིག་མ་རེད་” ཅེས་བཤད་འདུག ལིན་ཞཱོང་མིན་གྱི་སྐད་ཆ་དེ་ཆེད་དུ་མི་འགྱངས་བར་ཏཱ་ལའི་བླ་མ་རྟ་དབང་དགོན་པར་ཕེབས་འཆར་ཡོད་པ་དེར་དམིགས་ཏེ་བཤད་པ་ཞིག་རེད།

རྒྱ་གར་གྱི་སྲིད་དོན་པ་ཁག་ཅིག་གིས། “ང་ཚོས་རྒྱ་ནག་ཕྱོགས་ནས་ཏཱ་ལའི་བླ་མའི་ཆིབས་བསྒྱུར་ལ་འགོག་རྐྱེན་བཟོ་བའི་དཀའ་རྙོག་ཡང་བསྐྱར་མཐོང་འདོད་མེད། ཐེངས་འདིར་རྒྱ་གར་རྒྱལ་ཡོངས་ནས་ཏཱ་ལའི་བླ་མ་རྟ་དབང་དགོན་དུ་ཕེབས་བསྒྱུར་གྲ་སྒྲིག་བྱས་ཡོད་སྟབས། རྒྱ་ནག་གི་འགོག་རྐྱེན་དེས་རྒྱལ་ཁབ་གཉིས་བར་གྱི་འབྲེལ་ལམ་ལ་དོ་ཕོག་བཟོ་ངེས་རེད། ” ཅེས་དང་། “ ཆེས་རྣོ་ངར་ལྡན་པའི་རྩོད་གླེང་དེས་རྒྱ་དཀར་ནག་གི་འབྲེལ་ལམ་ཐད་ལྡོག་ཕྱོགས་ཀྱི་ཤུགས་རྐྱེན་ཐེབས་རྒྱུ་ཡིན་པ་བསྙོན་མེད་རེད” ཅེས་ཀྱང་བརྗོད་འདུག

རྒྱ་ནག་ཕྱི་སྲིད་བློན་ཆེན་གྱིས་ཆིབས་བསྒྱུར་དེས་རྒྱལ་ཁབ་གཉིས་བར་གྱི་མཐའ་མཚམས་རྩོད་གླེང་དེ་སྔར་བས་མགོ་རྙོག་བཟོ་སྲིད་ཅེས་༧གོང་ས་ཏཱ་ལའི་བླ་མའི་ཆིབས་བསྒྱུར་ལ་ངོ་རྒོལ་བྱས་ཡོད་པ་རེད།

གསར་འགོད་པའི་དྲི་བ་དྲིས་ལན་སྐབས་ལིན་ཞཱོང་མིན་གྱིས་རྒྱ་ནག་གཞུང་གིས་ཏཱ་ལའི་བླ་མའི་ཡང་སྲིད་འཚོལ་འདོད་ཡོད་སྐོར་བཤད་ཡོད། ཏཱ་ལའི་བླ་མ་ཁོང་ད་ལྟ་དགུང་ལོ་ ༨༡ རེད། རྒྱ་ནག་གཞུང་གིས་ཕྱོགས་གཅིག་ནས་ཁོང་གི་ཡང་སྲིད་རྒྱ་ནག་གི་སྟངས་འཛིན་འོག་ཡོད་པའི་ས་ཁུལ་ཞིག་ཏུ་འཁྲུངས་རྒྱུའི་རེ་བ་བྱེད་ཀྱིན་ཡོད་ཀྱང་། ཕྱོགས་གཞན་ཞིག་ནས་རྒྱ་གར་ནང་གི་བཙན་བྱོལ་བོད་མའི་ས་གནས་སམ། ཡང་ན་མོན་རྟ་དབང་ལྟ་བའི་མཐའ་མཚམས་ཤིག་ཏུ་འཁྲུངས་པར་ཞེད་སྣང་ཡང་བྱེད་ཀྱིན་ཡོད་པ་རེད། ལིན་ཞཱོང་མིན་བརྗོད་རྒྱུར། “ཏཱ་ལའི་བླ་མའི་ཡང་སྲིད་དེ་ཆོས་ལུགས་ཆོ་ག་དང་ཡང་སྲིད་ལམ་ལུགས་གཞི་རྩར་བཟུང་སྟེ་ཐག་གཅོད་བྱེད་དགོས་སྟབས། ཡང་སྲིད་འཚོལ་ཞིབ་ཚོགས་པས་ཁོང་གི་ཡང་སྲིད་དེ་ཁོང་གི་ཕ་ཡུལ་རྒྱ་ནག་ནང་རྙེད་པའི་རེ་བ་བྱེད་ཀྱིན་ཡོད།” ཅེས་བཤད་འདུག

ལིན་ཞཱོང་མིན་གྱིས་ད་དུང་རྒྱ་ནག་ནང་བོད་མི་ས་ཡ་ ༦ ཡོད་པ་དང་རྒྱ་ནག་ཕྱི་ལོགས་སུ་བོད་མི་ ༢༠༠༠༠༠ ཙམ་ལས་མེད་ལུགས་ཀྱང་བཤད་འདུག ལིན་ཞཱོང་མིན་གྱིས་བརྗོད་རྒྱུར། “ད་ལྟའི་བར་ཏཱ་ལའི་བླ་མའི་སྐུ་ཕེང་ ༡༤ བར་ཚང་མ་རྒྱ་ནག་ནང་འཁྲུངས་ཡོད།” ཅེས་བཤད་འདུག

གསར་འགོད་པ། པདྨ་རྒྱལ་གྱིས་བསྡུ་བསྒྱུར་བྱས།