སྤྱི་འཐུས་ཚོགས་གཙོ་མཆོག་ནས་ད་ལན་གྱི་གྲོས་ཚོགས་ཚོགས་དུས་ཐོག་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་རྩིས་ལོ་ ༢༠༡༧། ༢༠༡༨ ཀྱི་སྔོན་རྩིས་གཏན་འབེབས་ཟིན་པ་ལྟར་དབུས་སའི་འབྲེལ་ཡོད་ལས་བྱེད་རྣམ་པས་དངུལ་རྣམས་བསྲི་ཚགས་དང་འགན་འཁུར་ཆེ་བཞེས་ཀྱིས་དོན་ཕན་ལྡན་པ་ཞིག་ཡོང་ཐབས་དགོས་པའི་འབོད་སྐུལ་གནང་སོང་།
དེ་རིང་སྔ་དྲོའི་ཆུ་ཚོད་ ༡༠།༣༠ ཙམ་ལ་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གསུམ་པ་ལེགས་པར་མཇུག་བསྡུས་སོང་བ་དང་། སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གི་མཇུག་བསྡོམས་གསུང་བཤད་གནང་སྐབས་ད་ལན་བཀའ་ཤག་ལྷན་རྒྱས་གྲོས་ཚོགས་ནས་ཕྱིར་ཐོན་སོང་བ་དེར་ཚོགས་གཙོ་སྦྲེལ་པོའི་ངོས་ནས་བཀའ་ཤག་གིས་ཚོགས་འདུའི་འགྲོ་ལུགས་ལས་དོན་བྱེད་ཕྱོགས་ཀྱི་སྒྲིག་གཞི་ལ་བརྩི་བཀུར་དང་ཉམས་ལེན། དེ་བཞིན་གྲོས་ཚོགས་ལ་འགན་འཁུར་བཞེས་ཕྱོགས་དེ་ག་འདྲ་འདྲ་པོ་ཆགས་ཀྱི་ཡོད་ན་བསམ་པའི་ཚོར་སྣང་བྱུང་སྐོར་དང་། གྲོས་ཚོགས་ནང་ཆ་ཤས་ལེན་སྐབས་སྐད་ཡིག་གཞན་བེད་སྤྱོད་གཏོང་བར་ཚོགས་གཙོའི་བཀའ་འཁྲོལ་དགོས་པ་དང་། གྲོས་ཚོགས་ནས་ཕྱིར་འགྲོ་ནང་འོང་བྱེད་སྐབས་གྲོས་ཚོགས་ཀྱི་ཞབས་བཀྱག་ལ་གུས་འདུད་དགོས་པ་སོགས་ཀྱི་ཐད་སྐྱོན་གནད་ཡང་ཡང་ཡོང་གི་ཡོད་པ་དེར་ཐུགས་གཟབ་དགོས་སྐོར་གསུངས་སོང་།
དེ་ཡང་ད་ལན་གྱི་ཚོགས་དུས་ཐོག་བཙན་བྱོལ་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་རྩིས་ལོ་ ༢༠༡༧།༢༠༡༨ ཀྱི་སྔོན་རྩིས་གཏན་འབེབས་གནང་ཟིན་པའི་སྐོར་ལ་སྤྱི་འཐུས་ཚོགས་གཙོ་མཆོག་གིས། བཙན་བྱོལ་བའི་གནས་སྟངས་ཀྱི་ཐོག་ནས་དཔལ་འབྱོར་ཐད་རང་ཁ་རང་གསོ་བྱེད་ཐུབ་པ་ཁག་པོ་ཆགས་ཡོད་ཀྱང་། རྩིས་ལོ་ ༢༠༡༧།༢༠༡༨ ནང་ས་ཡ་ཉིས་སྟོང་བཞི་བརྒྱ་ལྷག་ཞིག་བཀའ་འཁྲོལ་གཏན་འབེབས་ཞུས་ཐུབ་ཡོད་པ་དང་། འཛིན་སྐྱོང་བཀའ་ཤག་གི་ངོས་ནས་ལས་འཆར་མང་པོ་ཞིག་ལ་འཆར་འབུལ་ཞུས་ཐུབ་པ་དེ་ལེགས་གསོལ་བསྔགས་བརྗོད་ཞུ་རྒྱུ་ཡིན་ལ། དངོས་སུ་བཀའ་འཁྲོལ་གཏན་འབེབས་བྱུང་རྗེས་བོད་མིའི་སྒྲིག་འཛུགས་ཀྱི་དབུས་སའི་ལས་ཁུངས་ཁག་གི་འབྲེལ་ཡོད་ལས་བྱེད་ཚང་མའི་ངོས་ནས་ལྷག་བསམ་དང་འགན་འཁུར་ཆེ་བཞེས་ཀྱི་ཐོག་ནས་བཀའ་འཁྲོལ་ཐོབ་པའི་དངུལ་འབོར་དེ་ཚོར་བསྲི་ཚགས་ཀྱི་ཐོག་ནས་ལས་དོན་རྣམས་དོན་ཕན་ལྡན་པ་ཞིག་ཡོང་ཐུབ་དགོས་པ་དེ་གལ་ཆེན་པོ་ཆགས་ཡོད་སྟབས། ལས་དོན་རྣམས་དོན་ལ་སྨིན་པ་ཡོང་བར་ཚང་མས་ཧུར་ཐག་འབད་ཐག་དང་འགན་འཁུར་མཉམ་བཞེས་ཡོང་དགོས་པའི་འབོད་སྐུལ་ཞུ་ཡི་ཡོད་སྐོར་གསུངས་སོང་།
བཀའ་ཤག་ལྷན་རྒྱས་གྲོས་ཚོགས་ནས་ཕྱིར་ཐོན་པ་དེར་ཚོགས་གཙོ་སྦྲེལ་པོའི་ངོས་ནས་དགོངས་ཚུལ་ཅི་ཡོད་སྐོར་ལ་ཁོང་གིས། ཚོགས་དུས་འདིའི་ནང་ཕེབས་པའི་འོས་བསྡུའི་སྒྲིག་གཞི་བསྐྱར་བཅོས་འཆར་ཟིན་ཚོགས་ཆུང་གི་སྙན་ཐོ་དང་འཆར་ཟིན་གྱི་ལས་དོན་རྣམས་ཞིབ་ཚགས་དང་ཡག་པོ་ཡོང་འདུག་ཅེས་བསྔགས་བརྗོད་ཞུ་རྒྱུ་དང་། གྲོས་ཚོགས་ནང་དངོས་སུ་སྙན་ཐོ་དང་འཆར་ཟིན་ཕེབས་སྐབས་དེ་ལ་བཀའ་ཤག་ནས་དགག་པ་བརྒྱབ་པ་དང་། བཀའ་ཤག་ལྷན་རྒྱས་གྲོས་ཚོགས་ནས་ཕྱིར་ཕེབས་པའི་གནས་ཚུལ་བྱུང་ཡོད་སྟབས། ཚོགས་གཙོ་སྦྲེལ་པོའི་ངོས་ནས་བཀའ་ཤག་གིས་ཚོགས་འདུའི་འགྲོ་ལུགས་ལས་དོན་བྱེད་ཕྱོགས་ཀྱི་སྒྲིག་གཞི་ལ་བརྩི་བཀུར་དང་ཉམས་ལེན། དེ་བཞིན་གྲོས་ཚོགས་ལ་འགན་འཁུར་བཞེས་ཕྱོགས་དེ་ག་འདྲ་འདྲ་པོ་ཆགས་ཀྱི་ཡོད་ན་བསམ་པའི་ཚོར་སྣང་ཞིག་བྱུང་། ཚོགས་གཙོས་འོས་བསྡུའི་སྔོན་འགྲོ་དང་དངོས་གཞི་གཉིས་དགོས་དང་མི་དགོས་ཀྱི་ཐོག་ལ་ཞིབ་ཕྲ་ཞུ་བའི་འབད་བརྩོན་ཞུ་རྒྱུ་མིན་ཡང་། འོས་བསྡུའི་བྱུང་རིམ་གྱི་རྩོད་རྙོག་ལས་དེའི་གྲུབ་འབྲས་དེ་བས་ཀྱང་ཉེན་ཁ་ཆེ་བ་ཞིག་ཆགས་ཡོད་སྟབས། འོས་བསྡུའི་གྲུབ་འབྲས་དེ་ཡག་པོ་ཞིག་བྱུང་མ་ཐུབ་པ་ཡིན་ན་ཉེན་ཁ་ཆེ་བ་དང་མི་མང་གི་ཡིད་ཆེས་བརླག་པ། ༧སྐྱབས་མགོན་རིན་པོ་ཆེའི་དགོངས་བཞེད་གཞིར་བཟུང་བོད་མིའི་རྩ་དོན་འཐབ་རྩོད་ཐོག་མདུན་སྐྱོད་བྱེད་མ་ཐུབ་པ་དེ་འདྲ་བྱུང་བ་ཡིན་ན། མི་རིགས་ཀྱི་རྩ་དོན་དང་འཐབ་རྩོད་སོགས་གང་ཅིའི་ཐོག་ལའང་འཐུས་ཤོར་ཆེ་ཤོས་ཤིག་ཆགས་འགྲོ་ཡི་ཡོད་པར་བརྟེན། ལོ་ལྔ་ཚན་ནང་ཟང་ངེ་ཟིང་ངེ་རྐྱང་རྐྱང་དང་དངོས་ཤུགས་བརྒྱུད་གསུམ་ནས་སྤྱི་ཚོགས་ལ་བརྡབ་གསིག་འདྲ་རྐྱང་རྐྱང་ཡོང་བསྡད་པ་ཡིན་ན། ང་རང་ཚོར་བཙན་བྱོལ་བོད་མིའི་བཅའ་ཁྲིམས་ཀྱིས་འགན་དབང་བསྐུར་བ་དེ་མ་འགྲུབ་ཅིག་ཆགས་ཀྱི་ཡོད་པར་བརྟེན། དེ་རིང་གི་གོ་སྐབས་འདི་བརྒྱུད་ནས་གྲོས་ཚོགས་ཀྱི་ཚོགས་མི་རྣམ་པ་དང་རྒྱ་ཆེའི་མང་ཚོགས་ཀྱི་ངོས་ནས་ཀྱང་དེ་ལ་ཐུགས་སྣང་དང་འགན་འཁུར་བཞེས་དགོས་པ་གལ་ཆེན་པོ་ཡིན་སྐོར་གསུངས་སོང་།
སྤྱི་འཐུས་རྣམ་པ་དང་བཀའ་ཤག་ལྷན་རྒྱས་ནས་གྲོས་ཚོགས་ནང་ཆ་ཤས་ལེན་སྐབས་སྐྱོན་གནད་ཡང་ཡང་ཡོང་གི་སྐོར་ཁོང་གིས། གྲོས་ཚོགས་ཀྱི་ལས་རིམ་སྐྱོང་སྐབས་བཀུར་འོས་སྤྱི་འཐུས་རྣམ་པ་རིགས་ཤིག་དང་། འཛིན་སྐྱོང་བཀའ་ཤག་ནས་ཚོགས་འདུའི་འགྲོ་ལུགས་ལས་དོན་བྱེད་ཕྱོགས་ཀྱི་སྒྲིག་གཞི་གཞིར་བཟུང་ཕེབས་མ་ཐུབ་པའི་སྐྱོན་གནད་ཡང་ཡང་ཐོན་གྱི་འདུག ཚོགས་གཙོས་ཁ་ཐུག་དེར་སྟངས་འཛིན་བྱས་པ་ཡིན་ན་ཡང་གནས་ཚུལ་ཆེད་མངགས་བཟོས་བསྡད་པ་ནང་བཞིན་ཆགས་མི་སྲིད་པ་མི་འདུག་པས་བཟོད་སྒོམ་དེ་འདྲ་གནང་གི་ཡོད་པ་རེད། སྐྱོན་གནད་ཀྱི་དཔེ་མཚོན་ཞིག་ཞུས་པ་ཡིན་ན། གྲོས་ཚོགས་ནང་སྐད་ཡིག་གཞན་བེད་སྤྱོད་གཏོང་སྐབས་ཚོགས་གཙོ་ལ་བཀའ་འཁྲོལ་ཞུ་དགོས་པ་དང་། དེ་བཞིན་གྲོས་ཚོགས་ཀྱི་ཚོགས་མི་དང་ཟུར་ཉན་པ། ལས་བྱེད་ཚོ་དངོས་འབོད་ཞུ་དགོས་ན་ཚོགས་གཙོ་ལ་བཀའ་འཁྲོལ་ཞུ་དགོས། གྲོས་ཚོགས་ནས་ཕྱིར་ཐོན་པ་དང་ནང་ལ་ཕེབས་པའི་སྐབས་སུ་གྲོས་ཚོགས་ཀྱི་ཞབས་བཀྱག་ལ་གུས་འདུད་ཞུ་དགོས་པ་སོགས་དེ་ཚོའི་རིགས་ཤིག་རྩ་བ་ནས་ཡོང་གི་མེད་པ་དང་། དེ་ཚོའི་གྲས་དེ་གྲོས་ཚོགས་ཀྱི་ཚོགས་འདུའི་འགྲོ་ལུགས་ལས་དོན་བྱེད་ཕྱོགས་ཀྱི་སྒྲིག་གཞི་དོན་ཚན་ ༢༣ པའི་ནང་ལྷན་ཚོགས་སྐབས་སྒྲིག་སྲུང་དགོས་པ་ཞེས་བཀོད་ཡོད་པ་དང་། དེ་བཞིན་ཚོགས་འདུའི་ནང་བག་ཡོད་བསྟེན་ཕྱོགས་ཞེས་ཟུར་དུ་སྒྲིག་གཞིའི་ནང་བཀོད་ཡོད་པ་དེ་ཚོ་ཉམས་ལེན་བྱེད་ཐུབ་དགོས་པ་གལ་ཆེན་པོ་ཞིག་ཏུ་མཐོང་གི་ཡོད་སྐོར་དང་། གྲོས་ཚོགས་ནང་འཐུས་མི་སྒེར་སོ་སོའི་བསམ་ཚུལ་གཙོ་བོར་བཏོན་བསྡད་པ་དང་། སྒེར་གྱི་ཁེ་ཕན་སྲུང་སྐྱོབ་ཀྱི་རྣམ་པ་རེ་གཉིས་ཡོང་གི་ཡོད་པ་དེ་ཚོར་ཐུགས་གཟབ་གནང་དགོས་པ་གལ་ཆེན་པོ་ཡིན་སྐོར་དང་། སྒེར་གྱི་འཚོ་བ་དང་སྤྱི་པའི་ལས་དོན་གཉིས་མཉམ་བསྲེས་མ་ཡིན་པའི་ཐོག་ནས་ཐོག་མའི་དམ་བཅའ་ལྟར་བོད་མིའི་འཕྲལ་ཕུགས་རྒྱང་གསུམ་ལ་ཕན་པའི་ལས་དོན་ནང་ཞུགས་ཐུབ་དགོས་པ་དེ་ཧ་ཅང་གལ་ཆེན་པོ་ཡིན་སྐོར་གསུངས་སོང་།
སྤྱི་པའི་ལས་དོན་ཐོག་ནུས་པ་མཉམ་སྤུངས་ཀྱིས་སྔར་ལས་ནུས་པ་ཐོན་ཐབས་དགོས་པའི་སྐོར་ལ་ལམ་སྟོན་གནང་དོན། བོད་མིའི་སྒྲིག་འཛུགས་ལ་བཅའ་ཁྲིམས་ཀྱིས་བཙན་བྱོལ་སྤྱི་ཚོགས་བདེ་ཐབས་བྱེད་པ་དང་། བོད་དོན་བདེན་མཐའ་སེལ་ཐབས། དེ་བཞིན་བོད་ཀྱི་ཁོར་ཡུག་སྲུང་སྐྱོབ་ཡོང་ཐབས་བཅས་ཀྱི་འགན་དབང་གཙོ་བོ་བསྐུར་ཡོད་པ་དེ་ཚོ་སྒྲུབ་ཐུབ་དགོས་པ་གཅིག་དང་། ལྷག་པར་དུ་ང་རང་ཚོ་ཆབ་སྲིད་ཀྱི་སྐྱབས་བཅོལ་བ་ཞིག་ཆགས་བསྡད་ཡོད་སྟབས། བོད་དོན་བདེན་མཐའ་སེལ་ཐབས་ལ་དངོས་ཤུགས་བརྒྱུད་གསུམ་ནས་ནུས་པ་ཆེ་རུ་གཏོང་ཐུབ་དགོས་པ་དེ་གལ་ཆེན་པོ་ཞེ་དྲགས་མཐོང་གི་ཡོད་ལ། འཛིན་སྐྱོང་བཀའ་ཤག་གི་ངོས་ནས་དེ་ལྟར་གནང་གི་ཡོད་ལ། བཀུར་འོས་འཐུས་མི་རྣམ་པ་དང་མང་ཚོགས་ཀྱི་ངོས་ནས་ཡིནའང་གནང་གི་ཡོད་པ་རེད། ཡིན་ནའང་། ང་ཚོའི་ནུས་པ་སྔར་ལས་མཐོ་རུ་གཏོང་ཐུབ་པ་ཞིག་དང་ཤུགས་རྐྱེན་སླེབ་ཐུབ་པར་ནུས་པ་གཅིག་སྒྲིལ་གནང་བར་འབད་བརྩོན་དགོས་པ་གལ་ཆེན་པོ་ཆགས་ཡོད།
བོད་མིའི་སྒྲིག་འཛུགས་འདི་གཙོ་བོ་བླ་ན་མེད་པ་༧གོང་ས་སྐྱབས་མགོན་ཆེན་པོ་མཆོག་གི་ཐུགས་རྗེས་གཟིགས་པ་དང་། བོད་ནང་གི་བོད་མིའི་ལྷག་བསམ་དང་སྙིང་སྟོབས། རེ་བ། དེ་བཞིན་བཙན་བྱོལ་བོད་མི་རྣམས་ཀྱི་ཡིད་ཆེས་དང་བརྩི་བཀུར། གནས་ཡུལ་རྒྱ་གར་གཞུང་གི་མཐུན་འགྱུར་གྱི་ཐོག་ནས་འགྲོ་ཡི་ཡོད་སྟབས། རྒྱུན་དུ་ལས་དོན་གང་བརྩམ་པ་ཡིན་ནའང་དེ་ཚོའི་བཀའ་དྲིན་དྲན་ཐུབ་དགོས་པ་ཞིག་དང་། ཡིད་ཆེས་བརླག་མ་བཅུག་པ་བྱེད་དགོས་པ་དེ་གལ་ཆེན་པོ་ཞེ་དྲགས་ཡིན་ལ། དེ་འདྲའི་བསམ་བློ་གཏང་བའི་ཐོག་ནས་སོ་སོར་ཀུན་སློང་མ་དག་པ་སྐྱེས་པ་ཡིན་ནའང་བཅོས་ཏེ། སྤྱི་པའི་ལས་དོན་ཐོག་ལ་ནུས་པ་མཉམ་སྤུང་དང་ཡིད་ཆེས་མ་བརླག་པ་བྱེད་དགོས་པ་དེ་གལ་ཆེན་པོ་ཞེ་དྲགས་ཡིན་པ་དང་། ལྷག་པར་དུ་༧གོང་ས་སྐྱབས་མགོན་ཆེན་པོ་མཆོག་ནས་ཐུགས་རེ་གནང་བ་ནང་བཞིན་ང་ཚོས་ཞབས་འདེགས་སྒྲུབ་ཐུབ་དགོས་པ་དེ་ལས་འགན་གལ་ཆེ་ཤོས་ནང་གི་ཆེ་ཤོས་ཤིག་ཆགས་ཡོད་སྟབས། དེ་ཚོ་དུས་རྒྱུན་དུ་བསམ་བློའི་ནང་བཅང་དགོས་པ་ཞིག་དང་། གྲོས་ཚོགས་ཚོགས་པའི་སྐབས་སུ་ཡིན་ནའང་དེ་འདྲར་དགོངས་པ་བཞེས་པའི་ཐོག་ནས་ལས་རིམ་ནང་ཆ་ཤས་ལེན་ཐུབ་དགོས་པ་དེ་གལ་ཆེན་པོ་ཡིན་སྐོར་གསུངས་སོང་།
བཙན་བྱོལ་བོད་མི་རྣམས་ཀྱིས་བོད་ནང་གི་བོད་མིར་གདུང་སེམས་མཉམ་སྐྱེད་ཙམ་མིན་པར་ཆབ་སྲིད་ཀྱི་མདུན་སྐྱོད་ཆེན་པོ་ཞིག་བྱེད་པར་འབད་བརྩོན་དགོས་པ་དང་། དེ་བཞིན་རྒྱ་ནག་གཞུང་གི་ངོས་ནས་བོད་མིའི་མངོན་འདོད་ལ་བསྐྱར་ཞིབ་ཀྱི་ཐོག་ནས་མདུན་སྐྱོད་ཀྱི་གོ་སྐབས་ལེན་དགོས་སྐོར་ཁོང་གིས། ད་ལན་གྱི་གྲོས་ཚོགས་ལས་རིམ་འགྲོ་བཞིན་པའི་དུས་སྐབས་སུའང་བོད་གསེར་རྟ་རུ་ཛ་དྲག་གི་གནས་སྟངས་ཆགས་བསྡད་ཡོད་པ་དང་། དེ་བཞིན་ཁམས་ཉག་རོང་ནས་བོད་མི་པདྨ་རྒྱལ་མཚན་ཞུ་བ་ཞིག་གིས་སྐུ་ལུས་མེར་བསྲེགས་གནང་ཡོད་པ་དང་། ད་ལྟའང་ཁོང་འདས་གསོན་གང་ཡིན་གྱི་གནས་སྟངས་གསལ་ཆ་མེད་པ་ཆགས་བསྡད་ཡོད། ཕྱི་ལོ་ ༢༠༠༩ ནས་༢༠༡༧ བར་དུ་བོད་མི་ ༡༤༦ གིས་སྐུ་ལུས་མེར་བསྲེགས་གནང་ཡོད་པའི་ནང་ནས་ ༡༢༥ འདས་གྲོངས་སུ་ཕྱིན་ཟིན་པ་དང་། མི་ ༢༠ ཙམ་འདས་གསོན་ཅི་ཡིན་གྱི་གནས་སྟངས་ཁ་གསལ་མེད་པ་ཆགས་ཡོད། ཁོང་རྣམ་པའི་བློས་གཏོང་དང་མངོན་འདོད་གཙོ་བོ་དེ་༧གོང་ས་སྐྱབས་མགོན་ཆེན་པོ་མཆོག་བོད་ནང་ཕེབས་བཅུག་དགོས་པ་དང་། བོད་མིར་རང་དབང་དགོས་པ་དེ་ཆགས་ཡོད་སྟབས། ཁོང་རྣམ་པའི་བློས་གཏོང་དང་མངོན་འདོད་ལ་ང་ཚོས་གདུང་སེམས་མཉམ་སྐྱེད་ཙམ་མ་ཡིན་པར་མངོན་འདོད་འགྲུབ་པར་ཆབ་སྲིད་ཀྱི་རླབས་ཆེན་མདུན་སྐྱོད་བྱེད་ཐུབ་པར་འབད་བརྩོན་བྱེད་དགོས་པ་དེ་བོད་མིའི་སྒྲིག་འཛུགས་དང་། རྒྱ་ཆེའི་མང་ཚོགས་ཀྱི་ཐོག་ནས་ཧ་ཅང་གལ་ཆེན་པོ་ཆགས་ཡོད་ལ། ལྷག་པར་དུ་རྒྱ་ནག་གཞུང་ངོས་ནས་མཁྲེགས་བཟུང་གི་སྲིད་བྱུས་དེ་དོར་བའི་ཐོག་ནས་བོད་མི་རྣམས་ཀྱི་མངོན་འདོད་ལ་བརྩི་བཀུར་དང་དང་ལེན་གྱིས་བོད་རྒྱ་འབྲེལ་མོལ་བསྐྱར་གསོ་དང་། བོད་ནང་གི་བོད་མི་ཚོའི་མངོན་འདོད་ལ་བསྐྱར་ཞིབ་ཀྱི་ཐོག་ནས་མདུན་སྐྱོད་བྱེད་པའི་གོ་སྐབས་ལེན་དགོས་སྐོར་གསུངས་སོང་།
མཇུག་ཏུ་ཚོགས་གཙོ་མཆོག་ནས་གྲོས་ཚོགས་ལེགས་པར་གྲུབ་རྗེས་སྤྱི་འཐུས་རྣམ་པ་ས་བགོས་ཕྱོགས་ཕེབས་ཀྱིས་༧གོང་ས་སྐྱབས་མགོན་ཆེན་པོ་མཆོག་གི་མཛད་འཕྲིན་དང་བོད་ནང་གི་བོད་མིའི་གནས་སྟངས། རྒྱལ་སྤྱིའི་ཆབ་སྲིད་ཀྱི་གནས་བབ། དེ་བཞིན་མང་ཚོགས་ཀྱི་ཤེས་ཡོན་དང་འཕྲོད་བསྟེན། འཚོ་བའི་གནས་སྟངས་སོགས་ཀྱི་ཐོག་གཟིགས་ཞིབ་གནང་རྒྱུ་དེ་ལས་རིམ་གལ་ཆེན་ཞིག་ཏུ་བརྩི་ཡི་ཡོད་སྟབས། ས་གནས་ཁག་གི་མང་ཚོགས་ནས་ལས་རིམ་དེའི་ནང་མཉམ་ཞུགས་དང་ཆ་ཤས་ལེན་ཐུབ་པའི་རེ་བ་ཞུ་ཡི་ཡོད་སྐོར་བཅས་གསུངས་སོང་།
གསར་འགོད་པ། པདྨ་མཚོ།
གྲོས་ཚོགས་འཚོགས་མུས་བོད་མིའི་གནས་རིམ་མཐོ་ཤོས་དེས་རང་བློ་མི་ཁེངས་སྟབས་ཕྱིར་ཐོན་པའི་གནས་སྟངས་དེ་གཞིས་བཞུགས་བོད་མིའི་སེམས་ནང་མི་བདེ་བའི་བག་ཆགས་ངན་པ་ཞིག་གང་སར་གོ་རྒྱུ་འདུག་
ལེགས་བྱུང་། བཀའ་ཤག་གྲོས་ཚོགས་ནས་ཕྱིར་ཐོན་པ་ནོར་འཁྲུལ་རེད། ད་རུང་འགྲིག་པའི་སྤྱི་འཐུས་རེ་ཟུང་ཡོད་པ་རྣམས་ཆོལ་ལོགས་ཞེན་ལོགས་ཀྱི་རྣམ་པ་བསྟན་པ་རེད།
གྲོས་ཚོགས་ནས་ཡར་མར་ཕེབས་སྐབས་གུས་བརྩི་མ་བྱས་པ་དེ་ཚོགས་གཙོ་གཞོན་མ་གུས་པ་མ་ཡིན་པར་བོད་རྒྱ་ཆེ་མི་མང་ལ་མ་གུས་པ་དང་གཅིག་མཚུངས་རེད།
རྒྱལ་བའི་སྐུ་ཚེ་བརྟན་ཞིང་མཛད་དོན་ལྷུན་འགྲུབ།བོད་ཀྱི་བདེན་མཐའ་གང་མགྱོགས་སེལ་བའི་སྨོན་འདུན་གྲངས་མེད་ཞུ།