འདང་ནུབ་རྒྱ་གར་གྱི་ཆུ་ཚོད་ ༡༡ དང་སྐར་མ་ ༤༥ སྟེང་། འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་ ༡༠༣ པ་རྗེ་བཙུན་བློ་བཟང་བསྟན་འཛིན་མཆོག་ལྡི་ལིའི་མེག་སི་སྨན་ཁང་ (Max Hospital )དུ་དགོངས་པ་ཆོས་དབྱིངས་སུ་འཐིམ་ཡོད་འདུག
དགའ་ལྡན་ཁྲི་པ་མཆོག་ད་ལོའི་ཕྱི་ཟླ་དང་པོའི་ནང་གནས་མཆོག་རྡོ་རྗེ་གདན་གྱི་དཔལ་དུས་ཀྱི་འཁོར་ལོའི་དབང་ཆེན་སྟེང་ཕེབས་ཡོད་པ་དང་། སྐབས་དེར་སྐུ་གཟུགས་གསལ་ཐང་ཡིན་པ་དང་། དེའི་རྗེས་སུ་སྐུའི་སྙུང་གཞི་བཞེས་ཏེ་རྒྱ་གར་རྒྱལ་ས་ལྡི་ལིའི་སྨན་ཁང་མཱར་སཱི་རུ་སྨན་བཅོས་དང་གདན་ས་ཁག་གིས་ཞབས་རིམ་བསྟུད་མུར་བསྒྲུབས་ཀྱང་ཕན་འབྲས་གང་ཡང་མ་ཐོན་པར་ཕྱི་ཟླ་ ༤ ཚེས་ ༢༡ ཉིན་གྱི་དགོང་མོར་ཁོང་དགུང་གྲངས་ ༨༠ སྟེང་སྐུ་གྲོངས་ཡོད་པ་རེད།
ཉེ་ལམ་ཕྱི་ཟླ་ ༣ ཚེས་ ༣༡ ཉིན་བོད་མིའི་འདི་ཕྱིའི་སྐྱབས་མགོན་༧རྒྱལ་བ་རིན་པོ་ཆེ་མཆོག་སྨན་ཁང་དེར་ཆེད་ཕེབས་གནང་སྟེ་དགའ་ལྡན་ཁྲི་པ་མཆོག་གི་སྐུའི་སྙུང་གཞིར་འཚམས་འདྲི་གནང་ཡོད་པ་དང་། ཕྱི་ཟླ་ ༤ ཚེས་ ༢ ཉིན་དཔལ་རྒྱལ་བ་ཀརྨ་པ་མཆོག་སྨན་ཁང་དེར་ཕེབས་ཏེ་འཚམས་འདྲི་གནང་ཡོད་པ་རེད།
དགའ་ལྡན་ཁྲི་པ་རྗེ་བཙུན་བློ་བཟང་བསྟན་འཛིན་མཆོག་ ༡༩༣༧ ལོར་བོད་ཁམས་ཡ་རར་སྐུ་འཁྲུངས་ཞིང་། ཆུང་དུས་སུ་ཡ་ར་ཚེམ་དགོན་པར་རབ་ཏུ་བྱུང་སྟེ་དགུང་ལོ་ ༡༦ ཐོག་འབྲས་སྤུངས་བློ་གསལ་གླིང་དུ་ཆོས་ཞུགས་ཀྱིས་གཞུང་ཆེན་ཁག་ལ་བསླབ་པ་སློབ་ གཉེར་གནང་། ཕྱི་ལོ་ ༡༩༥༩ ལོར་བཙན་བྱོལ་དུ་ཕེབས་ནས་སྦག་ས་ཆོས་སྒར་དུ་སློབ་གཉེར་གནང་བ་དང་། དེ་ནས་འབྲས་སྤུངས་བློ་གསལ་གླིང་གྲྭ་ཚང་གི་སྒྲིག་ཁོངས་སུ་ཞུགས་ནས་མུ་མཐུད་སློབ་གཉེར་གནང་འདུག རིན་པོ་ཆེ་མཆོག་གིས་གྲྭ་ཚང་གི་ཕྱག་མཛོད་དང་། གྲྭ་ཚང་གི་ཞིང་ལས་བྱེད་མཁན་གྱི་རྒྱ་དཔོན་དང་བཅུ་དཔོན། དགེ་བསྐོས། དཔེ་ཁྲིད་དགེ་རྒན་སོགས་ཀྱི་ཐུགས་འགན་ཡང་བཞེས་ཡོད་པ་མ་ཟད། དགེ་བཤེས་ལྷ་རམས་པ་དང་སྔགས་རམས་པའི་མཚན་རྟགས་བཞེས་རྗེས། ལོ་གསུམ་རིང་རྒྱུད་སྟོད་བླ་མ་དབུ་མཛད་དང་ལོ་གསུམ་རིང་མཁན་པོ་གནང་ཡོད།
འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཆེན་ ༡༠༣ རྗེ་བཙུན་བློ་བཟང་བསྟན་འཛིན་རིན་པོ་ཆེ་མཆོག་ཕྱི་ལོ་ ༡༩༣༧ ཟླ་ ༥ ཚེས་ ༧ ལ་བོད་ཁམས་ཕྱོགས་ཡ་ར་ཞེས་པར། ཡབ་རྟ་མགྲིན་ཕུན་ཚོགས་དང་། ཡུམ་བྱམས་པ་ཕུན་ཚོགས་གཉིས་ལ་སྐུ་འཁྲུངས། ཁྱིམ་པའི་མཚན་ལ་རྡོ་རྗེ་ཟེར། དགུང་ལོ་ ༦ ནས་གཅེན་མོ་ལྷན་དུ་ར་ལུག་འཚོལ་བར་ཕེབས་ཀྱི་ཡོད་འདུག དགུང་ལོ་ ༩ ཐོག་རབ་ཏུ་བྱུང་། གཞིས་དགོན་ཚེམ་དགོན་བྱ་བར་སྒྲིག་ཞུགས་གནང་། མཚན་ལ་བློ་བཟང་བསྟན་འཛིན་གསོལ། དགུང་ལོ་ ༡༦ ཐོག་ལྷ་སར་ཕེབས་ནས་གདན་ས་ཆེན་པོ་འབྲས་སྤུངས་བློ་གསལ་གླིང་དུ་ཞུགས། ཕྱི་ལོ་ ༡༩༥༩ ནང་༸གོང་ས་མཆོག་གི་རྗེས་སུ་བསྙེགས་ནས་འབྲུག་ཡུལ་བརྒྱུད་རྒྱ་གར་འཕགས་པའི་ཡུལ་དུ་ཕེབས། རིན་པོ་ཆེ་དང་ཕྱག་རོགས་རྣམས་སྦག་སར་ལོ་གྲངས་ ༡༡ རིང་བཞུགས། དེ་ནས་ཕྱི་ལོ་ ༡༩༧༠ ལོར་མོན་གྷོ་གཞིས་ཆགས་སུ་གནས་སྤོས་མཛད། གསན་བསམ་མཛད་ཞོར་དུ་དགོན་པའི་ཕྱག་མཛོད་དང་། ཞིང་ལས་ལྟ་རྟོག་འགན་འཛིན་གྱི་མཛད་ཁུར་ཡང་བཞེས།
ཕྱི་ལོ་ ༡༩༨༢ ལོར་ཆོ་འཕྲུལ་སྨོན་ལམ་ཆེན་མོར་དམ་བཅའ་བཞག་པར་གནང་། དགེ་བཤེས་ལྷ་རམས་པའི་མཚན་རྟགས་བཞེས། དེ་ནས་བསྟན་འཛིན་སྒང་རྒྱུད་སྟོད་གྲྭ་ཚང་དུ་ཕེབས། སྔགས་ཀྱི་དམ་བཅའ་བཞག་སྟེ་སྔགས་རམས་པའི་མཚན་རྟགས་བཞེས། ཕྱི་ལོ་ ༡༩༨༣ ལོར་མོན་གྷོར་ཕྱིར་ཕེབས་ཀྱིས་འབྲས་སྤུངས་བློ་གསལ་གླིང་དུ་དཔེ་ཁྲིད་གནང་རྒྱུས་མཚོན་ཐུགས་འགན་ཆེ་བཞེས་མཛད། ༡༩༨༦ ནས་ ༡༩༨༧ བར་བློ་གསལ་གླིང་གི་དགེ་བསྐོས་མཛད། ཕྱི་ལོ་ ༡༩༩༠ ལོར་༸གོང་ས་མཆོག་གིས་རྒྱུད་སྟོད་བླ་མ་དབུ་མཛད་དུ་བསྐོ་གཞག་བསྩལ། སྐབས་དེར་སུད་སི་ཧྥ་རན་སིར་ཕེབས་ནས་ཆོས་འབྲེལ་བསྐྱངས། ཕྱི་ལོ་ ༡༩༩༣ ལོར་དཔལ་ལྡན་རྒྱུད་སྟོད་གྲྭ་ཚང་གི་མཁན་པོའི་ཁྲི་ལ་ཕེབས། ཕྱི་ལོ་ ༡༩༩༦ བར་དུ་མཛད་འགན་བཞེས། འོན་ཀྱང་། ཕྱི་ལོ་ ༡༩༩༨ ལོ་ཊི་སྦིའི་སྙུང་གཞི་དྲག་པོ་བྱུང་། མེ་སཽར་དང་ཨུ་ཊིའི་སྨན་ཁང་དུ་ཟླ་བ་དྲུག་ཙམ་བཞུགས་དགོས་བྱུང་།
ཕྱི་ལོ་ ༢༠༠༣ ལོའི་ཟླ་ ༡ ཚེས་ ༢༠ ཉིན་༸གོང་ས་མཆོག་གིས་གནས་མཆོག་རྡོ་རྗེ་གདན་དུ་ཤར་པ་ཆོས་རྗེའི་མཚན་གནས་བསྩལ་གནང་མཛད་ཡོད་པ་དང་། ལོ་དེ་ནས་རྒྱ་གར་དང་། ཐེ་ཝན། ཨ་རི། སུད་སི། ཨོ་སི་ཀྲེ་ལི་ཡ། མ་ལེེ་ཤི་ཡ། ཀེམ་བྷོ་ཌི་ཡ་བཅས་སུ་ཆོས་ཕྱོགས་ཀྱི་མཛད་འཕྲིན་བསྐྱངས། ༢༠༡༦ ལོའི་ཕྱི་ཟླ་ ༡༠ པའི་ཚེས་ ༡༩ ཉིན་༧གོང་ས་མཆོག་གིས་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་ ༡༠༣ པར་བསྐོ་བཞག་གི་བཀའ་ཡིག་ཕྱག་རྟགས་བསྩལ་ཅིང་། ཕྱི་ལོ་ ༢༠༡༦ ཟླ་ ༡༡ པའི་ཚེས་ ༥ ཉིན་དགའ་ལྡན་ཁྲི་ཐོག་ཁང་དུ་ཁྲིར་བཞུགས་མཛད་སྒོ་དངོས་སུ་ཚོགས་ཡོད་པ་རེད།
འདས་པའི་ཟླ་ཤས་རིང་སྐུ་སྙུང་བཞེས་ཏེ་སྨན་བཅོས་བྱས་ཀྱང་དྲག་སྐྱེལ་མ་བྱུང་སྟབས་ ༢༠༡༧ ཟླ་ ༤ ཚེས་ ༢༡ ཉིན་གྱི་དགོང་མོའི་ཆུ་ཚོད་ ༡༡།༤༥ སྟེང་རྒྱ་གར་རྒྱལ་ས་ལྡི་ལིའི་མེག་སི་སྨན་ཁང་ (Max Hospital )དུ་དགོངས་པ་ཆོས་དབྱིངས་སུ་འཐིམ་ཚུལ་བསྟན་ཡོད་པ་རེད།།
བདག་གི་བླ་མ་རྗེ་བརྩུན་བློ་བཟང་བསྟན་འཇིན་མཆོག
མ་འོང་སྐལ་པ་དུས་སུ་མཇལ་བའི་རེ་སྨོན་འདི
གསོལ་བ་འདེབས་སོ་སྦྱིན་གྱིས་རློབ
བླ་མ་རྗེ་བརྩུན་མཁྱེན་མཁྱེན་ནོ།།