རྒྱ་ནག་དང་ཁེ་ན་ཌའི་གཞུང་བར་ཚོང་གི་འབྲེལ་ལམ་འཛུགས་འདོད་ཡོད་ཀྱང་། རྒྱ་ནག་གཞུང་གིས་འགྲོ་བ་མིའི་ཐོབ་ཐང་དང་དམངས་གཙོ། གསར་འགོད་རང་དབང་སོགས་བཀག་སྡོམ་བྱེད་ཀྱིན་ཡོད་སྟབས། ཚོང་འབྲེལ་གྲོས་ཆོད་འཇོག་མ་ཐུབ་པར་ལྷག་ཡོད་འདུག
ཁ་སང་ཧུ་ཧྥིན་ཊོན་(Huffington Post)གསར་ཁང་གིས་གནས་ཚུལ་སྤེལ་བ་ལྟར་ན། ཁེ་ན་ཌའི་གསར་ཁང་(The Canadian Press)ཞེས་བས་ཁེ་ན་ཌའི་ནང་གི་རྒྱ་ནག་གཞུང་ཚབ་པ་ལའོ་ཧྲ་ཡེ་ལ་(Lu Shaye)ཟླ་འདིའི་ནང་འཚོགས་འཆར་ཡོད་པའི་རྒྱ་ནག་དང་ཁེ་ན་ཌ་བར་གྱི་ཚོང་འབྲེལ་ཚོགས་འདུ་ཐེངས་གསུམ་པའི་སྐོར་ལ་བཅར་འདྲི་བྱས་སྐབས། རྒྱ་ནག་གཞུང་ཚབ་པས། ཁེ་ན་ཌའི་གསར་འགྱུར་བརྒྱུད་ལམ་ཁག་གིས་རྒྱ་ནག་ནི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་མཁན་ཞིག་དང་དམངས་གཙོ་མེད་པའི་རྒྱལ་ཁབ་ཅིག་ཏུ་ངོས་འཛིན་བྱས་ཏེ། རྒྱ་ནག་ལ་སྣང་བརྙན་ངན་པ་སྐྲུན་བཞིན་ཡོད་པ་དེ་མཚམས་འཇོག་དགོས་སྐོར་དང་། ཁེ་ན་ཌའི་གཞུང་གིས་རྒྱ་ནག་དང་ལྷན་དུ་ཚོང་འབྲེལ་གྲོས་ཆོད་འཇོག་རྒྱུ་གལ་ཆེན་ཡིན་སྐོར་སོགས་བརྗོད་ཡོད་འདུག
རྒྱ་ནག་གི་གཞུང་ཚབ་པ་ལའོ་ཧྲ་ཡེ་ཡིས་ཁེ་ན་ཌའི་གསར་འགྱུར་བརྒྱུད་ལམ་ཁག་ལ་སྐྱོན་བརྗོད་བྱས་བ་དེས་རྒྱལ་ཁབ་གཉིས་བར་གྱི་འགལ་བ་འགྲོ་བ་མིའི་ཐོབ་ཐང་དང་ཚོང་འབྲེལ་རང་དབང་སོགས་ཐེངས་འདིའི་ཚོགས་ཐོག་ཏུ་མ་གླེང་ག་མེད་ཀྱི་བརྗོད་གཞི་ཞིག་ཆགས་ཡོད་པ་དང་། ཁེ་ན་ཌའི་གཞུང་གིས་འགྲོ་བ་མིའི་ཐོབ་ཐང་ནི་རྒྱ་ནག་དང་ཁེ་ན་ཌའི་བར་གྱི་ཚོང་འབྲེལ་གྲོས་ཆོད་ཀྱི་ཆ་ཤས་ཤིག་ཡིན་དགོས་ཞེས་རྗོད་བཞིན་ཡོད་ཀྱང་། རྒྱ་ནག་གཞུང་གིས་དེར་ངོས་ལེན་མེད་པ་མ་ཟད། དགག་པ་བརྒྱབ་སྟེ་ཚོང་འབྲེལ་དང་འགྲོ་བ་མིའི་ཐོབ་ཐང་གཉིས་འབྲེལ་བ་མེད་སྐོར་རྗོད་བཞིན་ཡོད།
ལའོ་ཧྲ་ཡིས་ཁེ་ན་ཌའི་གསར་འགྱུར་བརྒྱུད་ལམ་སྐོར་བརྗོད་དོན། ངས་བལྟས་ན་ཁེ་ན་ཌའི་གསར་འགྱུར་བརྒྱུད་ལམ་ཁག་གིས་ཁེ་ན་ཌའི་གཞུང་ལ་གནོད་ཤུགས་སྤྲད་དེ་རྒྱ་ནག་དང་ལྷན་དུ་འགྲོ་བ་མིའི་ཐོབ་ཐང་སྐོར་གླེང་ཐབས་བྱེད་བཞིན་འདུག ཅེས་དང་། ཁེ་ན་ཌའི་ནང་གསར་འགྱུར་བརྒྱུད་ལམ་ཁག་གིས་སྤྱི་ཚོགས་ལ་ཤུགས་རྐྱེན་ཆེན་པོ་ཐེབས་འདུག ཅེས་སོགས་བརྗོད་ཡོད་པ་མ་ཟད། ཁོས་ད་དུང་ཁེ་ན་ཌའི་གཞུང་གིས་གསར་འགྱུར་བརྒྱུད་ལམ་ཁག་ལ་མགོ་བཏགས་འདུག་ཅེས་ཁེ་ན་ཌའི་ཆབ་སྲིད་པ་ཚོར་གནོད་ཤུགས་སྤྲོད་ཐབས་ཀྱང་བྱས་ཡོད་པ་རེད།
བཅར་འདྲི་དེའི་སྐབས་སྐུ་ཞབས་ལའོ་ཧྲ་ཡིས་རྒྱ་ནག་དམར་ཤོག་ཚོགས་པས་གསར་འགྱུར་བརྒྱུད་ལམ་ཁག་ལ་ཚོད་འཛིན་བྱས་ཕྱོགས་སྐོར་བརྗོད་དོན། “རྒྱ་ནག་གཞུང་གིས་མི་མང་གི་བསམ་ཚུལ་ལ་ཡག་པོ་ཉན་གྱི་ཡོད། འོན་ཀྱང་། མི་མང་གིས་སྤྱི་ཚོགས་ནང་ཟིང་ཆ་བསླངས་ན་དེར་གཞུང་གིས་སྟངས་འཛིན་ནན་མོ་བྱེད་བཞིན་ཡོད་”ཅེས་བརྗོད་ཡོད་པ་དང་། ལའོ་ཧྲ་ཟླ་བ་བཞིའི་གོང་ལ་ཁེ་ན་ཌར་ཡོང་སྐབས། ཁོས་རྒྱ་ནག་དང་ཁེ་ན་ཌའི་བར་ཚོང་ལས་མཉམ་འབྲེལ་ཇེ་ཟབ་དུ་གཏོང་རྒྱུའི་དམིགས་ཡུལ་བཟུང་ཡོད་སྐོར་བརྗོད་ཡོད།
ཁེ་ན་ཌའི་སྲིད་བློན་ཇཱ་སི་ཊིན་ཊོར་ཌའོ་(Justin Trudeau)ལགས་ལོ་སྔོན་མའི་དབྱར་ཁར་རྒྱ་ནག་ཏུ་བསྐྱོད་ཡོད་པ་དང་། བདུན་ཕྲག་འགའི་རྗེས་ལ་རྒྱ་ནག་གི་སྲིད་བློན་ལི་ཁེ་ཆཱང་ཁེ་ན་ཌའི་རྒྱལ་ས་འོ་ཊ་ཝར་སྐོར་སྐྱོད་བྱས་ཡོད། ཁེ་ན་ཌའི་སྲིད་བློན་ལ་རྒྱ་ནག་དང་ལྷན་དུ་ཚོང་དང་ཆབ་སྲིད་གནས་བབ་སོགས་ཡར་རྒྱས་གཏོང་འདོད་ཡོད་ཀྱང་། སྲིད་བློན་ཁོང་རྒྱ་ནག་ནང་སྐྱོད་སྐབས་ཁོས་རྒྱ་ནག་གཞུང་ལ་གནོན་ཤུགས་ཆེ་བའི་བརྗོད་གཞི་འགའ་ཐད་ཀར་གླེང་སློང་བྱས་ཡོད།
སྲིད་བློན་ཊོར་ཌའོ་ཡིས་རྒྱ་ནག་ཧྲང་ཧེ་གྲོང་ཁྱེར་ནང་གཏམ་བཤད་ཅིག་སྤེལ་སྐབས། ང་ཚོས་རྒྱ་ནག་མི་མང་གི་གནས་བབ་ཡར་རྒྱས་དང་འགྲོ་བ་མིའི་ཐོབ་ཐང་སྲུང་སྐྱོབ་བྱ་རྒྱུར་རྒྱ་ནག་གཞུང་ལ་རེ་ལྟོས་ཆེན་པོ་བྱེད་བཞིན་ཡོད་ཅེས་བརྗོད་ཡོད་འདུག
ཁེ་ན་ཌའི་རྒྱ་ནག་གཞུང་ཚབ་ལའོ་ཧྲ་ཁེ་ན་ཌའི་ནང་འབྱོར་རྗེས། ཁོས་ཁེ་ན་ཌའི་ནང་རྒྱ་ནག་ལ་ལྟ་སྟངས་ངན་པ་འཛིན་གྱི་ཡོད་པའི་གནས་སྟངས་དེ་ཁེ་ན་ཌའི་གསར་འགྱུར་བརྒྱུད་ལམ་ཁག་གིས་བཟོ་བཞིན་ཡོད་སྐོར་བརྗོད་དོན། “ངས་ཁེ་ན་ཌའི་གསར་འགྱུར་བརྒྱུད་ལམ་ཁག་གིས་རྒྱ་ནག་ལ་ལྟ་སྟངས་མི་ལེགས་པ་འཛིན་བཞིན་ཡོད་པ་དེ་གོ་བ་ལོག་གི་ཡོད་པ་ཞིག་ལ་མཐོང་གི་ཡོད། དེས་རྒྱ་ནག་དང་ཁེ་ན་ཌའི་བར་གྱི་འབྲེལ་ལམ་ལའང་གནོད་འཚེ་གཏོང་གི་རེད།”ཅེས་སོགས་བརྗོད་ཡོད།
༼ ཁེ་ན་ཌས་རྒྱ་ནག་ལ་མཐོང་ཆུང་བྱེད་པ། ༽
སྐུ་ཞབས་ལའོ་ཧྲ་ཡིས་ཁེ་ན་ཌས་རྒྱ་ནག་ལ་བཟང་ཕྱོགས་ཀྱི་ཁྱད་ཆོས་གང་ཡང་མེད་པར་མཐོང་གི་ཡོད་སྟབས་རྒྱ་ནག་ལ་ཚོང་འབྲེལ་བྱ་རྒྱུར་ཡང་རིན་ཐང་དུ་མཐོང་གི་མེད། ཅེས་དང་། ཁོས་མུ་མཐུད་དུ་ཁེ་ན་ཌས་རྒྱ་ནག་ནང་དམངས་གཙོ་དང་འགྲོ་བ་མིའི་ཐོབ་ཐང་། དེ་བཞིན། རང་དབང་སོགས་མེད་པར་ངོས་འཛིན་བྱས་ཏེ་རྒྱ་ནག་ལ་མཐོང་ཆུང་བྱེད་ཀྱི་འདུག ཅེས་སོགས་བརྗོད་ཡོད།
ལའོ་ཧྲ་ཡིས་རྒྱ་ནག་གཞུང་དམངས་གཙོ་དང་འགྲོ་བ་མིའི་ཐོབ་ཐང་གླེང་རྒྱུར་ཞེད་སྣང་མེད་ཚུལ་བརྗོད་ཡོད་ཀྱང་། རྒྱ་ནག་གཞུང་གིས་དམངས་གཙོ་དང་འགྲོ་བ་མིའི་ཐོབ་ཐང་སོགས་ནི་ཚོང་འབྲེལ་དང་འབྲེལ་བ་མེད་པར་རྗོད་ཀྱི་ཡོད་སྟབས། ཁོས་“ཆབ་སྲིད་པ་ཚོས་བློ་སྟོབས་ལྡན་པའི་ཐོག་ནས་འོས་འགན་ཕྲག་ཏུ་བླངས་ཏེ་མི་མང་ལ་རྒྱལ་ཁབ་ཀྱི་རྩ་བའི་ཕུགས་འདུན་གང་ཡིན་པ་དེ་འགྲེལ་བཤད་རྒྱག་དགོས”ཞེས་བརྗོད་ཡོད།
ཁེ་ན་ཌའི་གཞུང་གིས་འགྲོ་བ་མིའི་ཐོབ་ཐང་ནི་རྒྱ་ནག་དང་ཁེ་ན་ཌའི་བར་གྱི་ཚོང་འབྲེལ་གྱི་ཆ་ཤས་གལ་ཆེན་ཞིག་ཡིན་པར་ངོས་འཛིན་བྱེད་བཞིན་ཡོད་པ་དང་། དེ་སྔ་ཁེ་ན་ཌའི་གཞུང་གིས་རྒྱ་ནག་དང་ལྷན་དུ་ཚོང་འབྲེལ་གྲོས་ཆོད་འཇོག་རྒྱུའི་ཐད་ཞིབ་འཇུག་བྱས་སྐབས། ཁེ་ན་ཌའི་མི་མང་གིས་རྒྱ་ནག་ལ་འགྲོ་བ་མིའི་ཐོབ་ཐང་དང་ཁྲིམས་ལུགས། ཕོ་མོ་དབྱེ་འབྱེད་དང་། ལས་གནས་འདྲ་མཉམ། དེ་བཞིན། ཁོར་ཡུག་སོགས་ཀྱི་ཐད་དཀའ་ངལ་ཚབས་ཆེན་ཡོད་པའི་སེམས་ཚབས་བསྟན་ཡོད་སྟབས། ཐེངས་འདིར་ཁེ་ན་ཌའི་གཞུང་གིས་རྒྱ་ནག་དང་ལྷན་དུ་གྲོས་མོལ་ཞིབ་ཚགས་བྱས་ཏེ། མི་མང་ལ་དཀའ་ངལ་དེ་དག་ཐད་ལན་འདེབས་གསལ་བཤད་བྱེད་དགོས་ཁེལ་ཡོད།
ཁེ་ན་ཌའི་གཞུང་གིས་ “ང་ཚོས་རྒྱ་ནག་དང་ལྷན་དུ་ཚོང་འབྲེལ་གྲོས་ཆོད་བཞག་ཀྱང་རྒྱལ་སྤྱིའི་ཐོག་ནས་རྒྱ་ནག་ལ་སྐྱོན་བརྗོད་ཡོང་གི་ཡོད་པའི་དཀའ་ངལ་དེ་ཁེ་ན་ཌས་སེལ་ཐུབ་པ་ཞིག་མ་རེད”ཅེས་བརྗོད་ཡོད་པ་དང་། སྲིད་བློན་ཊོར་ཌའོ་ལགས་ཀྱིས་ཀྱང་ཁེ་ན་ཌས་གསར་འགོད་རང་དབང་ལ་ནམ་ཀུན་བརྩི་བཀུར་བྱེད་ཀྱིན་ཡོད་སྐོར་བརྗོད་དོན། “དམངས་གཙོ་ཡང་དག་ཅིག་ཡོང་ཐབས་སུ་སྲིད་གཞུང་ཞིག་གི་མདུན་དང་རྒྱབ་གཉིས་ལ་གསར་འགོད་རང་དབང་དགོས་བ་གལ་ཆེན་ཡིན་”ཞེས་བརྗོད་ཡོད།
༼ གསར་འགོད་རང་དབང་གི་གནད་འགག ༽
རྒྱ་ནག་གཞུང་ལ་རྒྱལ་སྤྱིའི་ཚོགས་སྡེ་ཁག་གིས་གསར་འགོད་རང་དབང་བཀག་སྡོམ་བྱེད་ཀྱི་ཡོད་པའི་སྐྱོན་བརྗོད་བྱེད་བཞིན་ཡོད་པ་དང་། ཉེ་ཆར་རྒྱལ་མཚམས་མེད་པའི་གསར་འགོད་མཐུན་ཚོགས་(Reporters Without Borders)ཀྱིས་ཀྱང་ “གོ་ལའི་གསར་འགོད་རང་དབང་སྒེར་གཅོད་དང་འཕྲོག་བཅོམ་བྱེད་མཁན་གྱི་ཉེན་རྟོག་པ་ལྟེ་པོ་རྒྱ་ནག་གི་སྲིད་འཛིན་ཞི་ཅིན་ཕིན་ཡིན་པ་དང་། ཁོས་རྒྱ་ནག་ནང་གི་གསར་འགོད་རང་དབང་བཀག་སྡོམ་གྱི་སྣེ་ཁྲིད་དེ་རྒྱལ་སྤྱིའི་གསར་འགྱུར་བརྒྱུད་ལམ་ཁག་གི་རང་དབང་ལའང་ཤུགས་རྐྱེན་ངན་པ་ཐེབས་བཞིན་ཡོད་སྐོར་བརྗོད་ཡོད།
ཁེ་ན་ཌའི་རྒྱ་ནག་གཞུང་ཚབ་པ་ལའོ་ལ་ཁེ་ན་ཌའི་གསར་ཁང་གི་གསར་འགོད་པ་གཉིས་ཀྱིས་དུས་ཡུན་སྐར་མ་ ༩༠ རིང་བཅར་འདྲི་བྱས་ཡོད་པ་དང་། སྐུ་ཞབས་ལའོ་ཡིས་བཅར་འདྲི་དེའི་དཀྱུལ་མ་ཙམ་ནས་རྒྱ་ནག་དང་ཁེ་ན་ཌའི་བར་གྱི་མི་མཐུན་པའི་ཕྱོགས་ཏེ་ཚོང་འབྲེལ་རང་དབང་དང་མ་འཛུགས། དྲ་ལམ་རྒོལ་གཏོར་སོགས་ཀྱི་གནད་དོན་མང་པོ་ཞིག་གླེང་ཡོད་ཅིང་། དེ་ནི་ཐེངས་འདིར་རྒྱ་ནག་གཞུང་གིས་ཁེ་ན་ཌ་དང་རྒྱ་ནག་བར་གྱི་མི་མཐུན་པའི་ཕྱོགས་ཕྱིར་བསྒྲགས་བྱས་པ་ཐོག་མ་དེ་ཆགས་ཡོད་པ་རེད།
མི་འགྱངས་བར་ཁེ་ན་ཌའི་རྒྱལ་སྤྱིའི་གསར་ཁང་ཞིག་གིས་སྐུ་ཞབས་ལའོ་ལ་བཅར་འདྲི་ཐེངས་བཞི་བ་དེ་བྱེད་རྒྱུ་ཡིན་སྟབས། སྐབས་དེར་ལའོ་ཡིས་ཁེ་ན་ཌའི་གསར་འགོད་པ་མང་པོ་ཞིག་གི་དྲི་བར་ལེན་འདེབས་བྱེད་ཀྱི་ཡིན་སྐོར་བརྗོད་དོན། “ཁེ་ན་ཌའི་གསར་འགོད་པས་མི་མང་གི་ཚབ་མཚོན་གྱི་ཡོད་པ་དང་། གསར་འགོད་པའི་དྲི་བ་རེ་རེ་ཡིས་ཁེ་ན་ཌའི་མི་མང་གི་རྣམ་རྟོག་མཚོན་གྱི་ཡོད་”ཅེས་སོགས་བརྗོད་ཡོད།
གསར་འགོད་པ། སྐལ་བཟང་སྦྱིན་པ།
