ཨ་ཇོ་བསོད་ནམས་སྟོབས་རྒྱལ།
ཉེ་ཆར་བཀའ་ཤག་གིས་གློ་བུར་དུ་ཨ་རིའི་དོན་གཅོད་གསར་པ་བསྐོ་གཞག་བྱས་པའི་བཀའ་རྒྱ་ཞིག་སྤྱི་ཚོགས་བརྒྱུད་ལམ་ཁག་ཏུ་གསལ་བསྒྲགས་སྤེལ། དོན་གཅོད་ལས་ཐོགས་པ་འཕོ་འགྱུར་ཇི་ལྟར་བྱུང་བའི་རྒྱུད་རིམ་རྣམས་གསང་བ་ཆེ་མདོག་གིས་ཚིག་གཅིག་མ་བཤད་པ་རེད། གསར་འགོད་པ་ཚང་མ་བཀའ་ཤག་གི་སྒོ་འགྲམ་དུ་རུབ་ནས་སྲིད་སྐྱོང་དང་། འབྲེལ་ཡོད་བཀའ་བློན་གཞན་ཁག བཀའ་དྲུང་སོགས་ལ་བཀའ་འདྲི་ག་ཚོད་ཞུས་ཀྱང་བཀའ་ལན་མ་གནང་བར་དེ་ལས་ཀྱང་གསང་བ་ཆེ་མདོག་བྱས་པ་རེད། ནང་དོན་གང་ཞིག་ཡིན་མིན་ལ་མ་ལྟོས་པར་མཐོ་རིམ་ལས་གནས་འཕོ་འགྱུར་གཏོང་སྟངས་ཀྱི་རྣམ་འགྱུར་འདིར་གཞིགས་ན་ནང་ཁུལ་དབང་ཆའི་འཐབ་རྩོད་ཆེན་པོ་ཞིག་འགྲོ་གི་ཡོད་པ་གསལ་པོ་རེད། རྒྱུད་རིམ་འདིའི་ངོ་གདོང་ལ་ལྟ་སྐབས་གསར་འགོད་པའི་པར་ཆས་ཀྱི་མདུན་དུ་མངོན་པ་ནི་བྱང་ཀོ་རི་ཡའི་མཐོ་རིམ་དཔོན་རིགས་བསྐོ་འཐེན་བྱེད་སྟངས་དང་། རྒྱ་ནག་དམར་ཤོག་ཚོགས་པའི་དཔོན་རིགས་ཁག་གི་དབང་ཆའི་འཐབ་རྩོད་ཀྱི་རྣམ་འགྱུར་དང་ཕྱོགས་ཀུན་ནས་མཚུངས་པའི་གཟུགས་བརྙན་ཞིག་ཤར་བ་རེད། སྐྱབས་བཅོལ་བའི་སྤྱི་ཚོགས་གཞན་ལ་མེད་པའི་དབུ་ཁྲིད་ཅིག་གི་ངལ་རྩོལ་དང་། གཞིས་ལུས་མི་དམངས་མང་པོའི་ཚེ་སྲོག་ལས་གྲུབ་པའི་སྐྱབས་བཅོལ་བའི་སྤྱི་ཚོགས་སྐྱིད་པོ་འདིའི་ནང་། རུལ་སུངས་ཀྱི་དྲི་ངན་འདི་འདྲ་ཁྱབ་ཡོང་གི་ཡོད་ན་བོད་མི་རིགས་ཀྱི་རྩ་དོན་ཟེར་བ་དེ་ཚོ་མཐོ་རིམ་དཔོན་རིགས་ཀྱི་མ་རྩར་གྱུར་ཟིན་པ་གསལ་པོ་རེད། གནས་ཚུལ་འདིས་རྐྱེན་བྱས་ཏེ་སླར་ཡང་ང་ཚོའི་སྤྱི་ཚོགས་ཟང་ཟིང་དུ་གྱུར་ཅིང་། མཐོ་རིམ་སྐུ་དྲག་གསར་པའི་དཔོན་རིགས་ཚོས་ཆིག་སྒྲིལ་ཁ་ན་ན་བཤད་པ་དེ་ཚོའི་གདོང་རིས་དམར་རྗེན་དུ་ཐོན་པ་རེད།
སྲིད་སྐྱོང་སྐབས་གཉིས་པའི་བཀའ་ཤག་གི་ལས་ཡུན་འགོ་ཚུགས་པ་དང་ལྷན་དུ་མཐོ་རིམ་དཔོན་རིགས་ཀྱི་ཞབས་སྟེགས་ལ་འཕོ་འགྱུར་འགྲོ་འགོ་ཚུགས། བཀའ་བློན་དང་དོན་གཅོད་སོགས་གསར་བསྐོ་བྱེད་པ་དེ་ནི་སྲིད་གཞུང་གསར་པའི་འགྲོ་སྟངས་རེད། ཨ་རིའི་དོན་གཅོད་དང་ལྡི་ལི་དོན་གཅོད་སོགས་གནད་ཡོད་ཀྱི་དོན་ཁང་གང་ཞིག་ཡིན་ནའང་༸གོང་ས་སྐྱབས་མགོན་ཆེན་པོའི་མཚན་གནས་བེད་སྤྱོད་མ་བྱས་ན་ནུས་མེད་དམ་གནས་ཡུལ་རྒྱལ་ཁབ་ཀྱིས་ངོས་ལེན་བྱེད་མ་ཐུབ་པའི་གནས་སྟངས་ཤིག་ཏུ་འགྱུར་འགྲོ་གི་ཡོད་པ་རེད། བོད་གཞུང་གི་དོན་ཁང་གང་ཞིག་ལ་༸གོང་ས་སྐྱབས་མགོན་ཆེན་པོ་མཆོག་གི་མཚན་གནས་གཡར་པོ་ངེས་པར་དུ་ཞུ་དགོས་ན་དེར་༸གོང་ས་མཆོག་ནས་དགོངས་བཞེས་ངེས་པར་གནང་གི་ཡོད་ནའང་༸གོང་ས་ཆེན་པོའི་མཚན་གནས་བེད་སྤྱོད་ཀྱི་བདག་ཐོབ་སྤྲོད་སའི་གང་ཟག་དེས་མཚན་གནས་གང་བྱུང་དུ་བེད་སྤྱོད་བཏང་ནས་མཚན་ཤས་བཟོས་ན་དེ་དག་༸གོང་ས་ཆེན་པོའི་མཚན་དོན་དང་འབྲེལ་བ་ཆགས་ཀྱི་ཡོད་པས་ངེས་པར་དུ་གཟབ་ནན་གནང་དགོས་ཀྱི་ཡོད་པ་རེད། བཀའ་ཤག་སྐབས་སྔོན་མའི་ཨ་རིའི་དོན་གཅོད་སྐལ་རྡོར་གྱིས་༸གོང་ས་ཆེན་པོའི་མཚན་གནས་གང་བྱུང་བེད་སྤྱོད་བཏང་ནས་སྤྱི་ཚོགས་ནང་མཐོང་ཕྱོགས་བཟོས་པ་གསལ་པོར་གྱུར་པས་༸གོང་ས་མཆོག་ནས་ཀྱང་བཀའ་ཕེབས་དགོས་པ་དེ་འདྲ་བྱུང་བ་རེད། དེར་བརྟེན་བཀའ་ཤག་འཕོ་འགྱུར་གྱི་མཚམས་དེར་དོན་གཅོད་ཁག་ཀྱང་འཕོ་འགྱུར་གཏོང་གི་ཡོད་སྟབས་དགའ་ལྡན་ཕོ་བྲང་ནས་དེར་ཐུགས་སྣང་མ་གནང་ཐབས་མེད་བྱུང་བ་རེད།
ཤེས་རིག་བཀའ་བློན་དངོས་གྲུབ་ཚེ་རིང་དེ་སྔོན་ནས་ཨ་རིའི་དོན་གཅོད་ལ་ཐེངས་གཅིག་བསྐོས་ཟིན་པ་རེད། དེ་ནི་ཁོང་རང་གིས་བཀའ་བློན་ལས་ཡུན་རྫོགས་རྗེས་ཨ་རིའི་དོན་གཅོད་ཡིན་སྐོར་ལས་ཁུངས་ནང་བཤད་ནས་ལས་ཁུངས་ནས་ཁོང་ཕེབས་སྐྱེལ་གྱི་གསོལ་སྟོན་ཡང་བཤམས་ཟིན་པ་རེད། དེའི་སྐབས་ཀྱི་ནང་སྲིད་བཀའ་བློན་རྒྱ་རི་སྒྲོལ་མས་ཀྱང་རང་ཉིད་ལྡི་ལི་དོན་གཅོད་ཡིན་ཟེར་ནས་ནང་ཆས་འགའ་ཤས་ཀྱང་ལྡི་ལི་དོན་གཅོད་ལ་བཏང་ཟིན་པ་ལྡི་དོན་ལས་བྱེད་མང་པོས་ཤེས་ཀྱི་ཡོད་པ་རེད། དངོས་གྲུབ་ཚེ་རིང་དང་རྒྱ་རི་སྒྲོལ་མ་གཉིས་ནི་སྲིད་སྐྱོང་བློ་སེང་གི་འོས་ཤོག་ལ་རྒྱབ་སྐྱོར་བྱེད་མཁན་འོས་བསྡུའི་གར་སྟེགས་ཐོག་དངོས་སུ་འཐོན་མཁན་གྱི་མཐོ་རིམ་མི་སྣ་གཉིས་རེད། ཁོང་གཉིས་ལ་དོན་ཁང་རེ་རེའི་ཞབས་སྟེབས་ཕུལ་བ་དེ་ནི་ཆབ་སྲིད་ཀྱི་འཁྲབ་ཚན་ཞིག་ཡིན་པས་དེའི་ཐད་དགའ་ལྡན་ཕོ་བྲང་འགན་འཛིན་ལྷན་ཚོགས་ནས་ཐུགས་གནང་མ་གནང་ཐབས་མེད་དུ་གྱུར་པ་གསལ་པོ་རེད། དེས་ན་སྲིད་སྐྱོང་ལ་གདམས་ཀ་གཉིས་ཡོད་པ་རེད། གཅིག དགའ་ལྡན་ཕོ་བྲང་ལ་གོ་བསྡུར་མི་དགོས་པར་རང་འདོད་ལྟར་སྲིད་སྐྱོང་གི་སྐུ་དབང་ཐོག་ནས་གོང་གསལ་གནད་ཡོད་དོན་ཁང་གཉིས་ལ་རང་གི་ཕྱོགས་གཏོགས་མི་སྣ་ཐད་བསྐོས་བྱེད་དགོས་ན་༸གོང་ས་ཆེན་པོའི་མཚན་གནས་མི་དགོས་པར་རང་རྐྱ་འཕེར་བ་དགོས་ཤིང་། གལ་ཏེ་༸གོང་ས་མཆོག་གི་མཚན་གནས་གཡར་པོ་ཞུ་དགོས་ན་དགའ་ལྡན་ཕོ་བྲང་ལ་གོ་བསྡུར་ངེས་པར་དགོས་པ་རེད། བཀའ་ཤག་གིས་དང་པོ་༸གོང་ས་མཆོག་གི་མཚན་གནས་མི་དགོས་པར་རང་རྐྱ་ཐུབ་པའི་དོན་གཅོད་ཁང་ཞིག་འཛུགས་ཐབས་ལ་ཚོད་ལྟ་བྱས་པ་རེད། དེ་མཚམས་དགའ་ལྡན་ཕོ་བྲང་ནས་ཨ་རི་དང་། ཡོ་རོབ། ལྡི་ལི་བཅས་སོ་སོར་སྐུ་ཚབ་ལོགས་སུ་བསྐོ་རྒྱུའི་སྐད་ཆ་བྱུང་མཚམས་སུ་ས་གནས་སོ་སོའི་གཞུང་སྒེར་གྱི་མཐོ་རིམ་སྒྲིགས་འཛུགས་དང་མི་སྒེར་ཚང་མས་དེར་ཐུགས་སྣང་གནང་པར་བརྟེན་གཞུང་གི་དོན་གཅོད་རང་རྐྱ་འཕེར་ཐབས་མེད་པ་གསལ་པོ་ཆགས་མཚམས་ལྡི་ལི་དང་ཨ་རིའི་དོན་གཅོད་གསར་བསྐོའི་བཀའ་རྒྱ་ཕྱིར་བསྡུ་བྱས་ཏེ་གཞི་ནས་དགའ་ལྡན་ཕོ་བྲང་ལ་གོ་བསྡུར་ཞུས་པ་རེད། དགའ་ལྡན་ཕོ་བྲང་དང་གོ་བསྡུར་རིམ་པར་བྱས་མཐར་ལྡི་ལི་དོན་གཅོད་དུ་བདེ་སྲུང་བཀའ་ཟུར་འབྲོང་ཆུང་དངོས་གྲུབ་ལགས་དང་། ཨ་རིའི་དོན་གཅོད་ལ་ཚོགས་ཟུར་སྤེན་པ་ཚེ་རིང་གཉིས་ཐུན་མོང་ཐག་གཅོད་ཀྱིས་བསྐོས་པ་རེད།
བཙན་བྱོལ་བོད་མིའི་མཐོ་རིམ་སྐུ་དྲག་གསར་པ་ཚོས་ཨ་རི་སྟོབས་ཆེན་རྒྱལ་ཁབ་དེ་བཞིན་རང་ཉིད་ཀྱི་ནང་མི་དང་བཅས་པའི་ཕུགས་བསམ་གྱི་གཏན་གཞིའི་ས་ཁུལ་ཞིག་ཏུ་བཟོོ་རྩིས་ཡོད་ན་རང་གི་ལས་ཡུན་ནང་དེ་དང་འབྲེལ་བའི་མཐོ་རིམ་རྐུབ་སྟེགས་སྟེང་དུ་རང་རང་སོ་སོའི་གདོང་བསྐྱོད་དམག་དཔོན་རེ་འཇོག་དགོས་པ་རུལ་སུངས་ཀྱི་དགོས་མཁོ་གལ་ཆེ་ཤོས་ཤིག་རེད། སྲིད་སྐྱོང་གིས་རང་ཉིད་ཀྱི་བསམ་འདུན་འགྲུབ་ཕྱིར་བར་སྐབས་ནས་སྲིད་སྟེགས་ཀྱི་འཁྲབ་ཚན་མང་དག་ཅིག་འཁྲབ་ཡོད་པའི་སྐད་ཆ་གོ་རྒྱུ་ཡོད། ཕྱོགས་གཅིག་ནས་གལ་ཆེའི་མི་སྣ་གཞན་ཞིག་གིས་སྣེ་ཁྲིད་དང་སློབ་སྟོན་འོག་དགའ་ལྡན་ཕོ་བྲང་དང་༸གོང་ས་ཆེན་པོར་མཚན་སྨད་དང་ཟུར་ཟ་བྱེད་མཁན་གྱི་དཔུང་ཁག་ཅིག་གསོ་སྐྱོང་བྱས་ནས་ལས་འགུལ་སྤེལ་བ་དང་། རང་ཉིད་ཀྱིས་སྣེ་འཁྲིད་པའི་དཔུང་ཁག་གཞན་ཞིག་མདུན་དུ་ཐོན་ནས་དེ་དག་ལ་འགོག་རྒོལ་བྱེད་ཁུལ་བྱས་ནས་དགའ་ལྡན་ཕོ་བྲང་དང་༸གོང་ས་ཆེན་པོའི་མཚན་མཐོང་གཟིགས་པ་ཐོབ་ཐབས་གནང་གི་ཡོད་སྐོར་ཤོད་ཀྱི་ཡོད་པ་རེད། འདི་ནི་མཐོ་རིམ་སྤྱི་ཚོགས་ནང་ཁྱབ་བཞིན་པའི་སྐད་ཆའི་གཟུགས་བརྙན་ཞིག་རེད། དེ་ལྟར་ན་སྲིད་སྐྱོང་གི་ཞི་དྲག་གཉིས་ཀྱི་དཔུང་ཁག་སོ་སོའི་ནུས་སྟོབས་ཀྱི་གཟིལ་ཤུགས་དེས་དགའ་ལྡན་ཕོ་བྲང་གི་སྐུ་ངོ་རྣམ་པ་ཉམ་ཆུང་དུ་གྱུར་པ་འདྲ། དཔེར་ན་ཉེ་ཆར་གྲོས་ཚོགས་ནང་བཀའ་བརྒྱུད་སྤྱི་འཐུས་ཀྱིས་དགའ་ལྡན་ཕོ་བྲང་ལ་རྙོན་འཛུགས་བྱས་པ་དང་། སྲིད་སྐྱོང་གིས་དགའ་ལྡན་ཕོ་བྲང་ལ་ཞལ་པར་ཕུལ་བ་ལྟ་བུ་ནི་འཁྲབ་ཚན་དེའི་ཆ་ཤས་ཡིན་སྲིད།
དཔལ་ལྡན་སྲིད་སྐྱོང་མཆོག་གིས་ད་བར་གྱི་ལོ་གཅིག་དང་ཟླ་བ་ཁ་ཤས་ཀྱི་ནང་ཐབས་ཤེས་སྣ་དགུ་བེད་སྤྱད་ནས་༸གོང་ས་མཆོག་གི་གཟིགས་པ་ཐོབ་པ་དེ་ཚོར་བརྟེན་ནས་ལམ་སེང་ཨ་རིའི་དོན་གཅོད་འཕོ་འགྱུར་གཏོང་རྒྱུར་བེད་སྤྱོད་བཏང་བ་རེད། ཨ་རིའི་དོན་གཅོད་སྤེན་པ་ཚེ་རིང་མི་ཡག་སྡུག་ག་རེ་ཡིན་པ་དང་། ཁོ་པ་ངེས་པར་དུ་ཨ་རིའི་དོན་གཅོད་ལ་འཇོག་དགོས་མིན་སོགས་ནི་སྐབས་འདིའི་གླེང་བྱ་མིན། འདིར་གླེང་བར་བྱ་བ་ནི་འཆི་གསོན་གྱི་ས་མཚམས་སུ་སླེབས་ཟིན་པའི་སྐྱབས་བཅོལ་བའི་སྤྱི་ཚོགས་ཤིག་གི་དབང་ཆ་འཐབ་རྩོད་ཀྱི་རུལ་སུངས་གསལ་བཏོན་བྱེད་རྒྱུ་དེ་ཡིན། ཨ་རིའི་དོན་གཅོད་འཕོ་འགྱུར་དང་འབྲེལ་བའི་ཐད་འདི་ཟླའི་ཚེས་དགུ་ཉིན་བཀའ་ཤག་ནས་གསལ་བཤད་ཅིག་གནང་ཡོད་ཀྱང་དེས་གསལ་པོ་གང་ཡང་ཆགས་ཐུབ་མེད་པ་རེད། ད་སྔ་དུས་འཁོར་དབང་ཆེན་གྱི་གླེང་སློང་སྐབས་དཔལ་ལྡན་སྲིད་སྐྱོང་མཆོག་དོན་གནད་ལས་གཡོལ་ཕྱིར་ཕྱོགས་ཕེབས་གནང་བ་བཞིན། ད་ཐེངས་སླར་ཡང་ཕྱོགས་ཕེབས་གནང་བ་དང། ཁོང་གི་གདོང་བསྐྱོད་དམག་དཔོན་གཉིས་པ་ཆོས་རིག་བཀའ་བློན་གྱིས་བསྐྱར་དུ་སྲིད་ཚབ་གནང་བ་རེད། དོན་གནད་གང་སར་མིག་ཆུ་བཏང་ནས་གཞན་གྱི་སྙིང་རྗེ་དང་བྱམས་སྐྱོང་འཐོབ་ཐབས་བྱས་ཏེ་རང་དོན་སྒྲུབ་མཁན་གྱི་མཐོ་རིམ་མི་སྣ་ང་ཚོའི་སྤྱི་ཚོགས་ནང་ཉུང་ཉུང་མིན་པ་ལྟར་ཁོང་ཡང་དེའི་ཁྲོད་ཀྱི་གཅིག་རེད། ད་རེས་ཀྱང་བཀའ་བློན་མཆོག་གི་རྣམ་འགྱུར་སྐྱོ་པོ་ཞིག་བསྟན་ནས་བྱ་སྤུ་གནོན་གྱི་སྒྲིག་འཛུགས་འགྲོ་སྟངས་ཤིག་བཤད་ནས་ཁུངས་འཁྱོལ་ཐབས་ཙམ་བྱས་པ་དེས་མང་ཚོགས་ནང་ཟང་ཟིང་དུ་མི་འགྱུར་བར་ཁྲིད་སྟོན་གང་ཡང་གནང་ཐུབ་མེད་པ་མ་ཟད། ད་དུང་དེ་ལས་ལྷག་པའི་གོ་འཛོལ་ཡོང་གཞིའི་སྒོ་འཕར་ཕྱེས་ཡོད་པ་རེད། འདི་ལྟར་གཞིས་ལུས་བོད་མིའི་ཚེ་སྲོག་མ་རྩར་བཞག་པའི་ཆབ་སྲིད་ཀྱི་གར་སྟེགས་སྟེང་གི་དབང་ཆ་འཐབ་རྩོད་ཀྱི་སྐྱོ་གར་འདིའི་ཁྲོད་དུ་མཐོ་རིམ་སྐུ་དྲག་གསར་པའི་དཔོན་རིགས་ཀྱི་ཡ་ང་བའི་རུལ་སུངས་མངོན་གསལ་དུ་ཐོན་ཡོད།། །།
མི་མང་བོ་ཞིག་གིས་ག་དུས་ཡིན་ན་ཡང་གཞན་ལ་སྐྱོན་བརྗོད་ཀྱི་མཛུབ་མོ་གཅིག་ཕར་ལ་བཙུགས་ན་མཛུབ་མོ་བཞི་ཚུར་ལ་འཁོར་བ་དེ་བློ་ལ་ཤར་གི་མེད་ཙང་ནོངས་འགྱོད་ཀྱི་ནོར་འཁྲུལ་རྟག་པར་བཟོ་གི་ཡོད་པ་རེད།
མ་གཞི་དྲ་ཐོག་གི་ཁ་རྩོད་ཆུང་ཆུང་དེ་ཚོ་ཡིད་ལ་སེམས་ནད་འཛིན་རྒྱུ་དང་། སྙིང་རླུང་སྟོད་ལ་ཚངས་རྒྱུའི་ཚོར་བ་ཞིག་ཡོང་རིན་ཡོད་ཚོད་མི་འདུག་མོད།
ལ་ལ་ཞིག་ནི་རྒྱུན་གཏན་ནས་གོམས་གཤིས་དང་དགའ་ཕྱོགས་མ་འདྲ་བའི་དབང་གིས་གཞན་དག་ལ་མཛུབ་མོ་བཙུགས་ན་སེམས་སྐྱིད་པ་འབྱུང་ཞིང་། རང་ཉིད་ལ་མཛུབ་མོ་བཙུགས་ན་རང་སེམས་མི་སྐྱིད་པ་ངོ་མ་འབྱུང་གི་ཡོད་པ་རེད།
དྲ་ཐོག་གི་སྐད་ཆ་ཚང་མ་ནི་ངས་བལྟས་ན་བློ་སྐྱེད་ལེན་ས་ཞིག་དང་།སློང་སྦྱོང་བྱེད་ས་ཞིག ཉམས་མྱོང་ལེན་ས་ཞིག་ཡིན་པ་ལས་སེམས་ཚོར་དྲག་པོས་ཕན་ཚུན་དགྲ་གཉེན་འཛིན་ས་ཞིག་མ་རེད།
གོང་ནས་བོད་ལགས་ཀྱི་གསུང་བ་ལ་ཡི་རིང་ཡོད་བདེན་པ་རེད། ད་དུང་གསལ་བོ་ཞིག་མ་ཆག་པར་སྐད་ཆ་གང་བྱུང་བཤད་ནས་ཕན་པ་ཡོད་པ་མ་རེད་ལ་དགེ་མཚན་དེ་བས་དབེན། གང་ལྟར་བཀའ་ཤག་ལྷན་རྒྱས་ནས་རྒྱུ་མཚན་གནས་ལུགས་དང་ལྡན་པའི་ཐོག་ནས་གསལ་བཤད་གནང་ནས་སྤྱི་ཚོགས་ཐོག་ལབ་གླེང་མེད་པ་ཞིག་དང་དགྲ་དགའ་གཉེན་སྡུག་གི་ལས་སུ་མི་འགྲོ་བ་གནང་དགོས་པ་གལ་ཆེན་རེད།
འཆལ་གཏམ་མ་སྤེལ་རོགས། རྣམ་དཔྱོད་དང་ལྡན་པའི་བོད་རིགས་ཤིག་དང་མི་རིགས་ཤིག་ཡིན་ན་ངེས་པར་དུ་གཞན་གྱིས་གང་ཟེར་རྗེས་ལ་མ་འགྲོ་བར་ངང་རྒྱུད་རིང་ཙམ་གནང་སྟེ་བརྟག་ཅིང་དཔྱད་པ་གནང་རོགས།
དོན་ངོ་མ་བཤད་ན་གནས་ཚུལ་འདི་གསལ་བོ་བཟོ་མཁན་བཀའ་ཤག་ལྷན་རྒྱས་ནང་ཐག་གཅོད་གནང་པ་ཡིན་ན་ངེས་པར་གསལ་བོ་གསལ་རྐྱང་བཟོ་དགོས་པ་ལས་འདི་འདྲ་སྤྱི་ཚོགས་ནང་ལབ་གླེང་བྱས་ན་དགྲ་དགའ་གཉེན་སྡུག་གི་ལས་སུ་མི་འགྲོ་བའི་ངེས་པ་མེད་ཙང་རྣམ་པ་ཚོས་གསལ་བོ་བཟོ་དགོས་པ་གལ་ཆེན་ནང་གི་དོན་ཆེན་མཐོང་།
༧རྒྱལ་བ་དོན་གྱི་བདག་པོའི་ལྷ་མིག་བརྩེ་གཟིགས་ཀྱིས་བསྐྱངས་དང་སྐྱོང་བཞིན་པ་ཡོད་པའི་ཁར།བཀའ་ཤག་ནང་ལའང་དཔལ་ལྡན་སྲིད་སྐྱོང་གཙོས་གཞན་ཡང་གཞུང་ཞབས་ཕྱི་ནང་ག་སར་མཁྱེན་མྱོང་ལྡན་པའི་ལས་ཀྱི་སྣེ་མོ་བ་མང་དག་ཅིག་ཡོད་དུས། ཁོང་རྣམ་པའི་བཀའ་གྲོས་ཐོག་ནས་རྟོག་ཞིབ་གནང་མཐར་ཐག་གཅོད་གནང་བར་སྒེར་དོན་ངོ་དགའ་དང་། བོད་སྤྱིའི་ཕུགས་བསམ་མེད་པའི་དགྲ་ཕྱོགས་དགའ་དགོས་པའི་བྱ་གཞག་ལ་ལས་མེད་དུས་གཏོང་དང་། དགྲ་དགའ་གཉེན་སྡུག་གི་ནང་མཚང་དྲུས་ནས་ཕན་མེད་དུ་དགོངས་ནས་ཅང་མི་སྨྲ་བའི་བརྟུལ་ཞུགས་འཛིན་པ་ལ་བསྙོན་གཏུག་བྱས་ནས་ཕུ་མདའ་དཀྲུག་པ་དང་གཅིག གནད་འགག་མ་ཤེས་བཞིན་ཁྱབ་འབྱམས་སུ་སྨྲ་ཤེས་པའི་ལྕེ་བདེ་ངོམ་པ་དང་གཉིས། རྟིང་དོན་མི་མངའ་བའི་ཡིག་རིགས་དྲ་ཐོག་དང་། ཚགས་ཤོག་སོགས་གསར་འགྱུར་བརྒྱུད་ལམ་ཐོག་ནས་འཁྱམ་ཁྱིའི་ཀུ་ཅོ་འདོན་པ་ལྟར་ཕྱོགས་མཐའ་གང་ལ་ཇི་གནོད་ཀྱི་བསམ་ཤེས་རྩ་སྟོར་གྱིས་འུར་སྒྲོག་འུར་སྤེལ་གང་ཐུབ་བྱེད་མཁན་དང་གསུམ་གྱི་ཐོག་ལ་བོད་མི་རྣམས་གཟབ་གཟབ་བྱེད་དགོས་སོ། དེ་རིགས་ནི་༧རྒྱལ་བ་དོན་གྱི་བདག་པོ་ལ། ཁ་ཙམ་གྱིས་ཐམས་ཅད་མཁྱེན་པ་བརྩི་མཁན། མགོན་པོ་མཆོག་གྱིས་ང་ཡོད་དུས་སྲིད་སྐྱོང་གི་མ་འགྲིག་ན་ཤ་གཅུས་རྒྱབ་ཀྱི་ཡིན་ད་ཞེས་རྟག་ཏུ་ཐུགས་བརྩེ་བས་གཟིགས་ཞིབ་དང་ལམ་སྟོན་གནང་བ་ལའང་སོམ་ཉི་ཐེ་ཚོམ་དོགས་པས་འབག་པའི་སེམས་རྒྱུད་ཀྱིས་གང་དྲན་གང་བྱུང་གིས་ཆོལ་ཁ་ལུང་ཚན་དཀྲུག་གཞིར་འགྱུར་ཉེན་ཡོད་པའི་གཏམ་འཆལ་རིགས་སྤེལ་གང་ཐུབ་ཀྱིས་༧རྒྱལ་བ་དོན་གྱི་བདག་པོ་འཚོ་བཞུགས་སྐབས་སེམས་ཚོར་མེད་པར་རྒྱལ་བའི་ལྷ་དགོངས་དཀྲུག་པར་རྩོམ་པ་རྣམས་ལ་དོགས་གཟོན་བྱ་དགོས་སོ།།
འཆད་རྩོད་རྩོམ་པའི་ལག་ཆ་ལྡན་ཡོད་ན་ཡང་།
མཁས་བཙུན་བཟང་བའི་རྣམ་དཔྱོད་མི་ལྡན་ན།
ཐོས་བསམ་སྒོམ་པའི་རྟོགས་ལྡན་ངས་མི་བརྩི།
དྲ་ལམ་གླེང་སྟེགས་ནང་གི་ནད་འབུ་ཡིན་ལགས།།
གཞན་ལ་ཕན་མ་ཐོགས་ཀྱང་གནོད་པ་མ་བྱེད་ཅིག
སོ་སོའི་གཞུང་དང་དབུ་འཁྲིད་ལ་ཕན་མ་ཐོགས་ཀྱང་གནོད་པ་མ་བྱེད་ཅིག
སྲང་ལམ་གྱི་ཁྱི་རྒན་ནང་བཞིན་མ་བྱེད་པར་རིག་པ་སྒྲིམ།
དོན་དངོས་དཔྱད་པ་མ་ཐལ་བ་བགྱིས་ཤིག་ཨང།
དམར་པོའི་སྲིད་གཞུང་ཡིན་ན་མ་གཏོགས་གོ་ལ་འདིའི་ནང་འཕོ་འགྱུར་མེད་པའི་ལས་གནས་དང་གཞུང་ཞིག་ག་ན་འདུག ཨ་ཇོ་བསོད་ནམས་སྟོབས་རྒྱལ་ཟེར་བ་འདིས་སྲང་ལམ་གྱི་ཚིག་འཁྱམ་ཁ་ཤས་འཁྱེར་ཡོང་ནས་དཔྱད་བརྗོད་ཡིན་མདོག་གིས་སྤྱི་ཚོགས་དཀྲུག་གང་ཐུབ་བྱས་འདུག སྤེན་པ་ཚེ་རིང་གིས་སྲིད་སྐྱོང་གི་དགོངས་པ་ལྟར་ལས་དོན་མི་སྒྲུབ་པ་དང་བཀའ་ལ་མ་བརྩི་བཞིན་དུ་དེ་མུར་སྣང་མེད་བསྐྱུར་འཇོག་གིས་སྲིད་སྐྱོང་རང་ཉིད་གཙང་མ་དང་སྤྱི་ཚོགས་ནང་ལབ་གླེང་མི་ཡོང་བ་ཞིག་བྱེད་ཐུབ་ཀྱང་། དེ་ལྟར་བྱས་མེད། འགོ་ཁྲིད་སུ་དང་སུ་ཡིན་རུང་རང་ལ་རྒྱབ་སྐྱོར་བྱེད་མཁན་གྱི་ལས་རོགས་དགོས་པ་རེད། དེ་སྔ་ཟམ་གདོང་བླ་མས་བཀའ་ཁྲི་གནང་སྐབས་ཀྱང་རང་ལ་ལགས་སོ་ཞུ་མཁན་གྱི་བཀའ་བློན་ཤ་སྟག་བདམས་ཡོད། མ་རེད་པས།
ཨ་ཧོ། མི་ལ་བཟང་སྤྱོད་དང་། ངོ་ཚ། ཁྲེལ་གཞུང་མེད་ན་རྫུན་གཅིག་རྗེས་གཉིས་མཐུད་ཡོང་ངེས་རེད། བློ་སེང་ཡང་གཞི་རྩའི་མི་ཆུང་ཆུང་ཞིག་རེད། ཁོ་མི་ཆེན་པོ་བསམ་བློ་ཆེན་པོ་ཡོད་མཁན་དེ་འདྲ་མ་རེད། ད་དུང་ང་ཚོའི་སྤྱི་ཚོགས་ནང་ཆོལ་ཁའི་འཐེན་ཁྱེར་ཡོང་ཉེན་འདུག འདི་མདོ་དབུས་ཁམས་གསུམ་གྱི་རྙོག་དྲ་རྩ་བ་ནས་མ་རེད། བློ་སེང་རང་གི་ཨ་ཕྲུག་འདི་ག་རྒྱ་གར་དང་ཨ་རི་ལ་ཡོད་སྲིད། ཡིན་ན་ཡང་ད་ལན་གནས་ཚུལ་འདི་སྐབས་འཚོལ་རིང་ལུགས་ཀྱི་འཁྲབ་སྟོན་ཞིག་རེད། སྐབས་འཚོལ་བ་བློ་སེང་གི་བྱ་ངན་ལ་གསར་འགོད་གསལ་བསྒྲགས་གནང་མཁན་བཀའ་བློན་ཀ་དགེ་གཡུ་ཐོག་དང་། ཨ་རི་སྤེན་ཚེ་ལགས་ཀྱི་ངོ་ཚབ་འགྲོ་མི་དངོས་གྲུབ་ཚེ་རིང་གི་འཁྲུངས་ཡུལ་སྐྱེས་ཁུངས་ལས་ཤེས་ཐུབ། ད་དུང་ལོ་གཞོན་པའི་ཁོངས་སུ་སྲིད་སྐྱོང་གི་ཤ་རྡོག་ལ་རེ་འགུག་བྱས་ཏེ་བསྡད་མཁན་མང་པོ་འདུག
ཨ་རིའི་དོན་གཅོད་འཕོ་འགྱུར་སྐོར་འདས་པའི་བཙན་བྱོལ་བའི་དོན་གཅོད་གཅིག་དང་མ་འདྲ་བའི་དྲི་བ་དང་དོགས་གཅོད་གསལ་བཤད་སོགས་ལ་བསམ་གཞིགས་སྐབས། བཙན་བྱོལ་བོད་རིགས་ནང་ཁུལ་དྲང་བདེན་དང་དངོས་ཡོད་མ་ཡིན་པ་ཡིན་ཁུལ་གྱིས་རྒྱལ་སྤྱིའི་ནང་དགྲ་དགའ་གཉེན་སྡུག་གི་ཡིག་འཆར་སྤེལ་དང་སྤེལ་བཞིན་པ་ཁག་ལ་རང་རིགས་ཚང་མས་ཐུགས་སྣང་ཆེ་ཙམ་གནང་གལ་ཆེ་བའི་འབོད་སྐུལ་ཞུ་རྒྱུ་མ་ཟད། མི་བདེན་རྫུན་སྒྲིག་འདི་བཞིན་བོད་རིགས་ནང་ཁུལ་ལ་མ་ཡིན་པར་བོད་བསྟན་སྲིད་མི་རིགས་དང་བཅས་པ་བཙན་་གྱིས་འཕྲོག་མཁན་དག་ལ་རིག་པ་འདོན་ན་ཅི་མ་རུང་། ཡིག་འཆར་སྤེལ་མཁན་ཁག་ཕ་རོལ་པོ་མིན་ཚེ་བྱ་ཕྱོགས་འདི་དག་མཐོང་སྐབས་ད་བོད་རིག་རྣམས་ཀྱི་བསོད་ནམ་ནི་འཆི་ལ་ཉེ་བའི་མར་མེ་ལྟར་བཟོ་བཞིན་པ་ལྟ་བུ་དང་། དངོས་འབྲེལ་བྱས་ན་དོན་གཅོད་འཕོ་འགྱུར་དབང་ཚད་ཅན་གྱིས་གནང་བ་ཞིག་ལས་དམིགས་བསལ་གང་ཡང་མ་མཐོང་ཞིང་ཁོ་པ་གཞུང་ཞིག་ཡིན་ན་ལས་ངོར་བསྐོད་སྒྲིག་དགོས་པ་ལས་དེ་མིན་ལ་བྱ་ལམ་མེད་པ་མངོན་གསལ་རེད། ང་ཚོས་༧གོང་ས་ཆེན་པོ་ཞལ་བཞུགས་བཞིན་པའི་སྐལ་བཟང་གི་དུས་འདིར་འདི་བཞིན་བྱ་སྤྱོད་གནང་ན་འགྲིགས་མིན་རང་རིགས་ཡོངས་ནས་དཔྱད་པ་གནང་གལ་ཆེ་བར་སྙིང་ནས་གསལ་འདེབས་ཞུ།།
དགའ་ལྡན་ཕོ་བྲང་དང་༧གོང་ས་མཆོག་གིས་སྐུ་དབང་ཐོག་ནས་བསྐོ་བཞག་གནང་བའི་དོན་གཅོད་གཅིག་ལ་མཚོན་ན་སུ་གང་ལ་ཡང་རྩིས་མི་དགོས་པ་དང་སུ་ཞིག་ལ་ཡང་འཇིག་མི་དགོས་སྙམ་པའི་སྤོབས་པ་ཤིག་ཡོད་པ་ནི་བཤད་མི་དགོས་པ་ཞིག་རེད། འཁྲུལ་སྣང་ང་རྒྱལ་དེ་འདྲ་བའི་འོག་ནས་སེང་གེ་བཀའ་ཤག་ལ་རྩི་བཀུར་མེད་པ་དང་། བོད་མིའི་སྒྲིག་འཛུགས་ཀྱི་ལམ་ལུགས་དང་སྒྲིག་ཁྲིམས་ལ་རྩིས་འཇོག་མེད་པར་རྡོག་རོལ་བཏང་བའི་ཉེར་འབྲས་ལ་བརྟེན་ནས་གནས་ཚུལ་ངན་པ་དེ་བྱུང་བ་ཞིག་རེད།
དགའ་དགོས་པ་ཞིག་ནི།
སྐུ་ངོ་སྤེལ་པ་ཚེ་རིང་དོན་གཅོད་ནས་གནས་དབྱུང་གཏོང་བ་ནི་བོད་མིའི་སྒྲིག་འཛུགས་དེ་དམངས་གཙོ་གཙང་མ་ཡིན་པ་དང་།
གང་ཟག་གིེ་དབང་འགྱུར་མིན་པར་ཁྲིམས་ཀྱིས་དབང་འགྱུར་གྱི་ཐོག་ནས་སྲིད་སྐྱོང་དང་བཀའ་ཤག་གི་དབང་ཆ་དེ་སུ་གང་ལ་ཡང་ལྟོས་མེད་རང་དབང་ཆ་ཚང་ཡོད་པ་དེ་བོད་པའི་སྤྱི་ཚོགས་ཙམ་མིན་པར་རྒྱལ་སྤྱིའི་གླེང་སྟེགས་ཐོག་གསལ་སྟོན་བྱས་པ་ཞིག་ཡིན།
ཁང་སེར་རྡོ་རྗེའི་ངོ་དེབ་ན་འདི་འདྲ་ཞིག་འདུག
སྤེན་ཚེ་དོན་གཅོད་གནས་དབྱུང་བ་དེར་ཕྱོགས་ཁ་ཤས་ནས་ལྟ་དགོས།
ཁང་གསར་རྡོ་རྗེ།
༡༽ སྤེན་ཚེ་སྐུ་ཚབ་དོན་གཅོད་དུ་འཇོག་མཁན་ངོ་མ་ནི། ༸གོང་ས་ཏཱ་ལའི་བླ་མ་རེད། དེ་ཡང་འོས་བསྡུའི་སྐབས་ཀྱི་འགལ་བ་སེལ་ཏེ། བོད་པའི་སྤྱི་ཚོགས་ནང་སྤྱི་དོན་མཉམ་སྒྲུབ་དང་། ཕན་ཚུན་མཐུན་སྒྲིལ་ཡོང་བའི་ཆེད་དུ་རེད་ལ། དབང་ཆ་ཡོད་ཚད་མི་གཅིག་གི་ལག་ལ་མི་འགྲོ་བའི་དོན་དུའང་རེད། སྲིད་སྐྱོང་བློ་སེང་གི་སེམས་ནང་སྤེན་ཚེ་དོན་གཅོད་དུ་བསྐོ་འདོད་མེད་པ་ཡང་གསལ་པོ་རེད། ད་རེས་སྤེན་ཚེའི་གནས་བབས་ལ་གནམ་ས་བླ་འོག་གི་འགྱུར་བ་བཏང་བ་དེའི་ཐོག་ནས། བློ་སེང་གི་དབང་ཚད་དེ་ཧ་ཅང་ཚད་མཐོན་པོར་སླེབས་པ་མཚོན་པ་རེད། ཧ་ཅང་ཚད་མཐོན་པོར་སླེབས་ཙང་། ༸གོང་ས་མཆོག་ལའང་། ཁྱེད་རང་གིས་དོན་གཅོད་ལ་བསྐོས་པའི་མི་དེ་ཡག་པོ་མི་འདུག ངའི་བཀའ་ལ་བརྩི་གི་མི་འདུག བཀའ་ཤག་ལ་བརྩི་གི་མི་འདུག འགྱུར་བ་བཏང་གི་ཡིན་ཟེར་གྱི་ཡོད་པ་རེད། དེ་ལ་༸གོང་ས་མཆོག་གིས་ཀྱང་མོས་མཐུན་མ་གནང་རང་གནང་གི་གནས་སྟངས་འདི་ཆགས་པ་རེད།
༢༽ སྤེན་ཚེ་༸གོང་ས་མཆོག་གིས་བསྐོས་པ་ཞིག་ཡིན་པ་དང་། དེ་སྔོན་སྤྱི་འཐུས་དང་། སྤྱི་འཐུས་ཚོགས་གཙོ་བྱེད་མྱོང་བ་ལས། གཞུང་ཞབས་བྱེད་མྱོང་མེད་ཙང་། ཁོའི་བསམ་སྤྱོད་དེ། དོན་གཅོད་གཞན་དང་འདྲ་གི་མ་རེད། ཁོས་སྤྱི་འཐུས་ཚོགས་གཙོའི་སྐབས་བཞིན་དུ། གང་བསམ་དེ་དྲན་ཤོད་པ་དང་། བཀའ་ཤག་གིས་བཤད་ཚད་ལ་ལགས་སོ་ལགས་སོ་ཟེར་གྱི་མེད། ད་དུང་རང་ཉིད་༸གོང་ས་མཆོག་གིས་བསྐོས་ཙང་། བཀའ་ཤག་གིས་ལས་སླ་པོར་རང་གི་གནས་སྟངས་ལ་འགྱུར་བ་གཏོང་ནུས་ཀྱི་མ་རེད་དྲན་བཞིན་ཡོད་ངེས་རེད། གཞན་ཡང་ལས་ཀ་མང་པོ་ཞིག་བཀའ་ཤག་མ་བརྒྱུད་པར་ཕོ་བྲང་ལ་ཞུས་པ་ཡང་ཡོང་གི་ཡོད། བཀའ་ཤག་གིས་”བྱ་སྤུ་གནོན་”ཡོང་གི་མི་འདུག་ཟེར་བ་དེ། དོན་དུ་གོ་ས་འདི་རེད། འདི་ལས་གཞན་དུ་སྤེན་ཚེས་ལས་ཀ་རྫབ་ཆེན་བྱས་པ་ཞིག་བསྟན་དུ་ཡོད་མ་རེད། དེ་ནི་སྲིད་ཚབ་ཀྱིས་གསལ་བཤད་གནང་དུས། ཉེན་བརྡའི་ཡི་གེ་རེ་རེའི་དོན་གཞི་བཟུང་སྤེན་ཚེ་འཕོ་འགྱུར་བཏང་བ་ཡིན་ཟེར་གྱི་ཡོད་མ་རེད། ཁྱོན་ཡོངས་བསྡོམས་ནས་གནས་སྟངས་ཤིག་ཆགས་པ་དེ་གཞི་ལ་བཟུང་ནས་འཕོ་འགྱུར་བཏང་བ་ཡིན་ཞེས་གསུངས་པའི་བབས་ས་དེ་རེད། དེས་ན། ཉེན་བརྡའི་ཡི་གེ་གསུམ་ཀ་ང་ཚོ་ལ་བསྟན་ཡོང་ནའང་། དེའི་ནང་ན་སྤེན་ཚེར་ནག་ཉེས་འབབ་འགྲོ་བ་ཞིག་ཡོད་དཀའ་མོ་རེད། གཅིག་བྱས་ན་དེའི་ནང་ན་བཀའ་ཤག་རང་གི་ངོ་གདོང་མང་པོ་ཞིག་མཐོང་ཉེན་ཡོད།
༣༽ བློ་སེང་གིས་དབུ་ཁྲིད་པའི་བཀའ་ཤག་ལ་མཚོན་ན་ཡང་སྤེན་ཚེ་འདི་དཀའ་ངལ་ཞིག་རེད། གཅིག་ནས་དོན་གཅོད་ལ་འཇོག་འདོད་ཡོད་མ་རེད། གཉིས་ནས་ཁོས་བཀའ་ཤག་གི་བཤད་ཚད་ལ་ལགས་སོ་ཟེར་གྱི་ཡོད་མ་རེད། གསུམ་ནས་རང་གི་བྱས་རྗེས་འབུར་འདོན་ཡོང་ཐབས་ཀྱང་བྱེད་བཞིན་ཡོད་པ་མཐོང་གསལ་རེད། བཞི་ནས་ཨ་རི་དེ་བཙན་བྱོལ་བོད་མིའི་དཔལ་འབྱོར་གྱི་རྒྱབ་རྟེན་ཡོད་ན་མེད་ན་དེ་རེད། ཆབ་སྲིད་ཀྱི་གཞི་རྟེན་ཡང་གལ་ཆེ་ཤོས་ཤིག་རེད། དེ་ནས་གྲུབ་འབྲས་ཐོན་ཡོང་བ་དེ་བཀའ་ཤག་གི་ངོ་སོར་མི་འབབ་དུས་གནས་ཚུལ་ཆེན་པོ་རེད། གཞུང་གང་འདྲ་ཞིག་ཡིན་རུང་། གནད་འགག་ཡོད་ས་ན་རང་གི་མི་འཇོག་གི་ཡོད་རེད། བློ་སེང་གི་གཞུང་གི་གནད་འགག་ཡོད་ན་མེད་ན་གཉིས་ལ་རང་གི་མི་མེད། དེ་ནི་ཨ་རི་དང་ལྡི་ལི་དོན་གཅོད་ཁང་གཉིས་རེད།
༤༽ ད་ལྟའི་དུས་སྐབས་སུ་བོད་མི་ནང་ཁུལ་གྱི་མཐུན་ལམ་དང་། འཐབ་རྩོད་ཀྱི་དགོས་མཁོར་ཁྱོན་ཡོངས་ནས་དགོངས་བཞེས་གནང་མཁན་ཞིག་ཡིན་ན། སྤེན་ཚེ་མཐའ་འབུད་གཏོང་མི་དགོས་པར། བཀོད་སྒྲིག་གཞན་ཞིག་གནང་རྒྱུ་ཏན་ཏན་ཡོད་པ་རེད་དེ། ལམ་དེར་མ་སོང་བར་སྤེན་ཚེ་མཐའ་འབུད་བཏང་བ་རེད། ནག་པོ་བཟོས་པ་རེད། འདིས་སྒེར་ནད་ཅན་དག་ལ་སྙིང་ཚིམ་ཡོང་གི་ཡོད་རེད་དེ། བོད་མི་མང་ལ་བློ་ཕམ་ཡོང་གི་ཡོད་རེད། སྒེར་དབང་ལ་ཕན་ངེས་ཡིན་རུང་སྤྱི་དོན་ལ་གནོད་ཀྱི་ཡོད།
༥༽ ད་རེས་བཀའ་ཤག་གིས་སྤེན་ཚེ་མུ་མཐུད་དོན་གཅོད་དུ་བཞག་ན་བློས་མི་བཟོད་པའི་སེམས་འཚབ་ཡོད་ལུགས་བཤད་དེ། ཁོང་གནས་དབྱུང་བཏང་བ་རེད། ཡིན་ན་ཡང་གནས་ཚུལ་འདི་ལ་བརྟེན་ནས་བོད་མིའི་སྤྱི་ཚོགས་ནང་འགལ་བ་དང་། མི་མཐུན་པ་ཆེན་པོ་ཇི་ཙམ་ཡོང་བའི་མཇུག་འབྲས་དེ་བཀའ་ཤག་གིས་བློས་བཟོད་པ་དང་། འགན་ཐེག་པ་ཞིག་ཡིན་མིན་ལ་དགོངས་བཞེས་མཛད་ཡོད་དམ། དེ་ནི་དྲི་བ་ཞིག་རེད། དེ་ནི་དུས་ཚོད་ཁོ་ནས་ཚོད་བགམ་ཐེབས་ཐུབ་པའི་དྲི་བ་ཆེན་པོ་ཞིག་རེད།
ད་ལྟའི་བཀའ་ཤག་རུལ་སོང་ད་དཀའ་མོ་རེད་ཡ་་་་་
ད་ལྟའི་ང་འཚོ་གཞུང་འདི་དང་རྒྱ་དམར་གཞུང་གཉིས་ཆེད་པར་མི་འདུག
སྐུ་དྲག་ལ་གསར་རྙིང་ཨ་ཡོད་བོད་མི་རིགས་ཀྱི་ལས་དབང་དུ་བསྐོས་པའི་སྐུ་དྲག་ལ་གསར་རྙིང་གི་ཁྱད་པར་ཡོད་པ་ཤེས་མ་སོང་དོན་དངོས་བཙན་བྱོལ་སྤྱི་ཚོགས་ནང་ཕྱོགས་གཏོགས་ཆབ་སྲིད་དང་གཅིག་ལུང་ཚན་ཤོག་སྒྲིལ་དང་གཉིས་འགོ་འདྲེན་དང་སྐབས་ཚོལ་རིང་ལུགས་དང་གསུམ་བཅས་རྩ་སྟོང་དུ་འགྲོ་དགོས་པ་དེ་མ་འོངས་བོད་མི་རིགས་ཀྱི་བདེ་སྐྱིད་ཀྱི་རྩ་བ་ཡིན་པའི་ངོས་འཛིན་བྱེད་ཀྱི་ཡོད་།
སྲིང་སྐྱོང་ལ་སུ་ ཧ་ཅང་གཡོ་སྒྱུ་མང་དྲགས་ན་
རེ་ཞིག་གྲུབ་ཀྱང་མཐའ་མར་བརླག་
གཟིག་ལྦགས་བཀབ་པའི་བོང་བུ་ཡིས་
ལོ་ཏོག་ཟོས་མཐར་གཞན་གྱིས་བསད། ༄། རྗེ་བཙུན་ས་སྐྱ་པནཏིཏ་།།
སྤྱི་ཚོགས་དཀྲུགས་སོང་མ་གསུངས།།
དཀྲུག་མཁན་དཔོན་པོ་རེད་དོ།།
དཔོན་པོས་དཀྲུགས་པའི་སྤྱི་ཚོགས།།
ལྷིང་འཇགས་ཡོང་ཐབས་ཨེ་ཡོད།།
ངོ་མ་རུལ་འདུག སྲིད་སྐྱོང་གིས་དེ་སྔོན་ངས་བརྩིགས་གདན་ཡག་པོ་ཞིག་བཏིང་ཡོད་། ད་དེ་སྒང་ལ་ག་ཚོད་བརྩིག་བརྩིག་ཡིན་གསུངས་སོང་།
སྲིད་སྐྱོང་བརྩིག་མ་ཡག་པོ་གཏིང་གི་མི་འདུག བརྩིག་མ་ཡག་པོ་ཞིག་འདྲུས་ཏེ་སྒྲིག་འཛུགས་ཀྱི་ཁང་འདི་ཐོག་བརྡིབ་བརྒྱབ་དུ་བཅུག་ངེས་རེད་འདུག
དངོས་ཡོད་ཀྱི་གནས་ཚུལ་དང་རྒྱབ་གྱོང་མགོ་འཚོས་ལ་མ་འཚོས་པའི་ཐོག་ནས་ཁ་སུ་བདེ་དང་ལག་སུ་བདེ་བྱས་ནས་གཅིག་བྲིས་བསྡད་པ་ཡིན་ན། དེའི་ཕན་ཐོགས་གང་ཡང་མེ་པ་མ་ཟད་དེ་ལས་ལྡོག་ཏེ་ཚོགས་ཟུར་སྤེན་པ་ཚེ་རིང་ལ་འགལ་རྐྱེན་དང་དཀའ་ངལ་བཟོ་སྲིད། རྒྱུ་མཚན་ནི། དགའ་ལྡན་ཕོ་བྲང་དང་བཀའ་ཤག་ཐུན་མོང་ནས་སླར་ཡང་བསམ་ཡུལ་ལས་འདས་དགོས་པའི་དོན་གཅོད་སྤེན་པ་ཚེ་རིང་གིས་ནོར་འཛོལ་གྱི་ལས་དོན་དངོས་དེ་གང་གནང་ཡོད་མེད་ཐོགས་ལ་ཚང་མ་ཧ་ལས་ཧང་སང་དགོས་པའི་གསལ་བཤད་དེ་འདྲའི་རིགས་ཡོད་མི་སྲིད་པ་མིན། དེ་དོན་དགོངས་འཇགས་འཚལ།
རྒྱབ་སྐྱོར་ཡོད། བཀའ་ཤག་གིས་ཨ་རིའི་དོན་གཅོད་འཕོ་འགྱུར་དུས་བཅད་བཟོད་བཟིན་པ་གནས་སྐབས་ཕྱིར་འཐེན་བྱས་ཏེ་ཉེས་འཛུགས་ཀྱི་གྱོད་དོན་རྣམས་དྲང་བདེན་གྱིས་ཐག་གཅོད་མ་བྱུང་པར་དོན་གཅོད་གསར་བ་བསྐོ་འཇོག་ལ་ངོས་ལེན་མེད་།།
????????? Long live his holiness the Dalai Lama ??
ཧ་ཅང་ཡག་པོ་བྲིས་འདུག་ཐུགས་རྗེ་ཆེ། ད་རེས་བཀའ་ཤག་དང་ལྷག་པར་དུ་སྲིད་སྐྱོང་གི་ཆབ་སྲིད་ནག་པོ་དེས་བཙན་བྱོལ་སྤྱི་ཚོགས་ཁྱོན་ཡོངས་འཁྲུག་རུ་བཅུགས་སོང་། བཀའ་ཤག་གི་གསལ་བཤད་ཟེར་ནའང་འདྲ། གསལ་བསྒྲགས་ཟེར་ཀྱང་ཆོག དེའི་ནང་སྤེན་ཚེས་བྱས་ཉེས་བསགས་པའི་གནས་ཚུལ་ཆེན་པོ་ཡོད་ཚུལ་ཙམ་ལས། རྐང་གཅིག་སྟོན་རྒྱུ་མི་འདུག ལྷག་པར་དུ་མཚམས་རེ་བླང་དོར་སྒྲིག་དང་འགལ་ལུགས་བཤད་ཡང་བླང་དོར་སྒྲིག་གཞི་དང་འབྲེལ་བ་མེད་ལུགས་སོགས།་མདོར་ན། ཕྱོགས་གང་ནས་ཉན་ཀྱང་། གནད་དོན་དེའི་རྐྱེན་གྱིས་རེད་འདུག་ཀ་བསམ་པ་གཅིག་ཀྱང་མི་འདུག དེ་ནི་རྒྱ་ཆེའི་མི་མང་རྣམས་སོམ་ཉིའི་རྒྱ་ལ་ཚུད་པའི་རྒྱུ་མཚན་དེ་རེད་ལ། དེ་ནི་སྐུ་དྲག་གསལ་པའི་ཆབ་སྲིད་འཐབ་བརྩོད་ཀྱི་ཟློས་གར་ཡིན་པར་དོག་གཞི་ཆགས་པའི་གནད་དོན་ཡང་དེ་རེད། ད་དུང་། ཡ་མཚར་བ་ཞིག་ལ། སྲིད་སྐྱོང་གིས་བརྡ་སར་གཡོས་པའི་སྐྱོ་མ་དེ་གཙང་མ་མ་བཟོས་པར་ཡོ་རོབ་ཁུལ་དུ་བྲོས་བྱོལ་ལ་ཕྱིན་ལུགས་དེ་གས་ཀྱང་། དོགས་གཞི་མི་ཉུང་བ་ཞིག་བསླངས་སོང་། གང་ལྟར། ཕྱོགས་གཉིས་ཀས་དཀར་ནག་ཅི་བདེན་ཡིན་དང་། བདེན་རྫུན་གང་ཡིན་གསལ་ཁ་མ་གཏོད་བར་དུ། ང་ཚོའི་སྤྱི་ཚོགས་འདི་ནི་རླུང་འཚུབ་ཁྲོད་ཀྱི་རྦ་ཀློང་དང་འདྲ་བར་ནམ་ཡང་བརྟན་ལྷིང་ཐོག་གནས་ཐབས་མེད། ཆོལ་ཁའི་འཐེན་ཁྱེར་གྱི་རྦ་ཀློང་དཀྲུག་མཁན་དེ་བློ་སེང་དང་སྤེན་ཚེ་རེད་ལ། ད་ལྟའི་ཆར་ཡང་རྦ་སློང་དེའི་མཇུག་སྐྱོང་མཁན་ཁྱེད་གཉིས་ལ་ཐུག་ཡོད། ད་ཡིན་ན། ཆུ་མོ་ལས་ཀྱིས་བཞུར་དགོས་པ་ཞིག་དང་། ཉ་མོ་ཐང་ལ་དོན་དགོས་པའི་དུས་ལ་བབ་འདུག དེ་མིན་སྡིག་སྲིན་མཐོན་ནས་ང་ཚོ་ཚང་མས་གྱུར་མིད་གཏོང་གི་རེད་ཏོ།
བཀྲ་ཤིས་བདེ་ལེགས།
གནད་ལུགས་རྒྱུ་མཚན་ཞེ་དྲགས་འདུག་་་ངེས་པར་བསམ་བློ་གཏོང་དགོས་པ་ཞིག་རེད་་
དེང་སང་གི་བཀའ་ཤག་རོས་འདུག
ཨ་ཇོ་ལགས།ཡག་པོ་ཞིག་བྲིས་འདུག་་་སྙིང་ནས་དགའ་བསུ་ཡོད།སྐུ་ཚེ་རིང་བ།