མི་ལྔ་དྲུག་ཅིག་གིས་ཚེ་གང་སྨོན་ལམ་ཚིག་མཛོད་ཆེན་མོ་ཞུ་དག་གཏོང་ཐུབ་པར་འབད་བརྩོན་བྱེད་ཀྱི་ཡོད།

སྨོན་ལམ་ཚིག་མཛོད་ཆེན་མོའི་ཆོས་བརྒྱུད་ཁག་གི་ཚོགས་འདུའི་ཐོག་དགེ་བཤེས་བློ་བཟང་སྨོན་ལམ་ལགས་ནས་སྨོན་ལམ་ཚིག་མཛོད་ཐེངས་ཁ་ཤས་ལ་ཞུ་དག་དང་བསྐྱར་བཅོས་བྱས་པ་ཙམ་མ་ཡིན་པར་མི་བཞི་ལྔ་ཞིག་གིས་མི་ཚེ་གང་བོར་མུ་མཐུད་ལས་ཐུབ་ན་བསམ་པའི་རེ་བ་དང་འབད་བརྩོན་བྱེད་ཀྱི་ཡོད་ཅེས་གསུངས་སོང་།

དེ་རིང་སྔ་དྲོའི་ཆུ་ཚོད་ ༡༠ སྟེང་བོད་ཀྱི་དཔེ་མཛོད་ཁང་གི་ཚོགས་ཁང་དུ། སྨོན་ལམ་བོད་ཀྱི་བརྡ་འཕྲིན་ཞིབ་འཇུག་ཁང་གིས་ལོ་ལྟར་སྒྲུབ་བཞིན་པའི་སྨོན་ལམ་ཚིག་མཛོད་ཆེན་མོའི་ཆོས་ལུགས་དང་འབྲེལ་བའི་རྩོམ་སྒྲིག་མི་སྣའི་ཚོགས་འདུ་ཐེངས་དྲུག་པ་མགོ་འཛུགས་གནང་སོང་བ་དང་། མཛད་སྒོའི་སྐུ་མགྲོན་གཙོ་བོར་ཆོས་དོན་དྲུང་ཆེ་བསྟན་འཛིན་ལུང་རྟོགས་ལགས་ཕེབས་ཡོད་པ་དང་། ཐེངས་འདིའི་ཉིན་གྲངས་ ༢ རིང་གི་ཚོགས་འདུའི་ཐོག་ཆོས་བརྒྱུད་ཁག་གི་ཐ་སྙད་རྩོམ་སྒྲིག་ཚོགས་མི་ ༣༠ ལྷག་ཕེབས་འདུག

མཛད་སྒོའི་ཐོག་མར་སྨོན་ལམ་བརྡ་འཕྲིན་ཞིབ་འཇུག་ཁང་གི་འགན་འཛིན་དགེ་བཤེས་བློ་བཟང་སྨོན་ལམ་ལགས་ཀྱིས་ཚོགས་འདུའི་དགོས་དམིགས་སྐོར་ངོ་སྤྲོད་གནང་དོན། དེ་རིང་ངས་རྣམ་པ་ཚོར་ངོ་སྤྲོད་ཞུ་རྒྱུ་དེ་སྨོན་ལམ་བོད་ཀྱི་བརྡ་འཕྲིན་ཞིབ་མཇུག་ཁང་གི་ཚིག་མཛོད་ཆེན་མོ་རྩོམ་སྒྲིག་གི་ལས་གཞི་ཆགས་བསྡད་ཡོད་པ་རེད། སྨོན་ལམ་བོད་ཀྱི་བརྡ་འཕྲིན་ཞིབ་མཇུག་ཁང་གི་ཚིག་མཛོད་རྩོམ་སྒྲིག་དེ་ལོ་དགུའི་ལས་གཞི་ཞིག་ཡིན་པ་དང་། ལས་གཞི་འདིའི་ཁྲོད་བོད་ཀྱི་ཆོས་བརྒྱུད་གྲུབ་མཐའ་དང་རིག་གཞུང་ལྟ་གྲུབ། ཡུལ་སྲོལ་གོམས་གཤིས་སོགས་གང་ཡོད་པ་ཚང་མ་ཆ་ཚང་བ་དང་ཕུན་སུམ་ཚོགས་པ་ཞིག་ཡོང་བའི་ཆེད་དུ་ང་ཚོས་ལས་གཞི་འདི་མགོ་བཙུགས་པ་རེད་ལ། ལས་གཞིའི་རིམ་པ་དང་པོ་དེ་གལ་ཆེ་ཤོས་ཆོས་ལུགས་དང་ལྟ་གྲུབ་ཁག་རྩིས་ནས་སྔོན་ལ་འདི་དག་གི་ལས་གཞི་བཞག་ཡོད་པ་དང་། ལས་གཞི་འདི་ལྟ་བུ་ཞིག་ལས་ཁུངས་གཅིག་དང་མི་སྣ་རེ་གཉིས་ཞིག་གིས་ཡོང་ཐབས་མེད་དུས། ང་ཚོས་བོད་ཀྱི་ཆོས་བརྒྱུད་དང་གྲུབ་མཐའ་རིས་མེད་ཀྱི་བླ་ཆེན་ཁག་ལ་འབོད་སྐུལ་དང་སྙན་སེང་ཞུས་ཏེ་ལས་གཞི་འདི་མགོ་འཛུགས་ཐུབ་པ་བྱུང་བ་དང་། ད་ལྟ་ལོ་དགུའི་ནང་གི་སུམ་ཚན་དང་པོ་དེ་འགྲོ་ཚར་ཡོད་པ་རེད་ལ། འདས་པའི་ནང་ང་ཚོས་ལས་གཞི་འདི་ཡག་པོ་འགྲོ་ཐུབ་ཡོད་པ་རེད། ང་ཚོས་ཚིག་མཛོད་ཆེན་པོ་འདི་ལྟ་བུ་ཞིག་སྒྲིག་ནས་མི་མང་པོ་ཞིག་གིས་དཀའ་ལས་བརྒྱབས་ཡོད་པ་ལྟར། གྲུབ་འབྲས་གཙོ་བོ་དེ་ག་རེ་རེད་ཅེས་ཞུས་ན། བདུན་ཕྲག་གཅིག་གི་གོང་ལ་སྨོན་ལམ་ཚིག་མཛོད་ཆེན་མོ་ཀུ་ཤུ་ཁ་པར་དང་ཨ་ཕེ་ཊི(Ipad)གཉིས་ཁོ་ནའི་ནང་ལ་ཕབ་ལེན་བྱེད་མཁན་ ༢༣༠༧༡༦༢ ཟིན་ཡོད་པ་དང་། དེའི་ནང་ནས་བེད་སྤྱོད་བྱེད་མཁན་བརྒྱ་ཆ་ ༩༠ ཞིག་བོད་ནང་ལོགས་ནས་རེད་འདུག རྩ་བའི་ཆ་ནས་བོད་ཀྱི་སྐད་ཡིག་དེ་མ་སྐད་ཡིན་མཁན་བོད་མི་ས་ཡ་༦ དང་། དེ་བཞིན་ཡུལ་ལུང་གཞན་ཧི་མ་ལ་ཡའི་རི་རྒྱུད་དང་པ་ཀི་སི་ཐན་ནང་ལྟ་བུ་ནས་བོད་ཡིག་དེ་མ་སྐད་ཡིན་མཁན་སོགས་བསྡོམས་ན་ས་ཡ་༨ ལྷག་ཅིག་བཤད་ཀྱི་ཡོད་པ་རེད། ཅེས་གསུངས་སོང་།

ཡང་ཁོང་གིས་མུ་མཐུད། སྨོན་ལམ་ཚིག་མཛོད་གློག་ཀླད་(PC)དང་(MC)མ་ལག་སོགས་ཀྱི་ནང་དུ་ཕབ་ལེན་བྱེད་ཐུབ་པ་བཟོས་ཡོད་ན་ཡང་། དེ་དག་ལས་ཕབ་ལེན་གྱི་གྲངས་འབོར་ག་ཚོད་ཅིག་ཡིན་མིན་ཤེས་ཐུབ་ཀྱི་མི་འདུག ཀུ་ཤུ་ཁ་པར་ནང་དུ་ཉིན་གཅིག་ལ་ཕབ་ལེན་ག་ཚོད་བྱས་ཡོད་མེད་དང་ས་གནས་གང་ནས་ཡིན་སོགས་གསལ་བོ་ཤེས་ཐུབ་ཀྱི་འདུག ང་ཚོས་ལས་གཞི་འདིར་ལོ་སུམ་ཚན་དང་པོ་དང་སུམ་ཚན་གཉིས་པ། སུམ་ཚན་གསུམ་པ་ཞེས་ལོ་དགུ་ཡི་ལས་གཞི་དེ་ལས་ལོ་སུམ་ཚན་དང་པོའི་གྲུབ་འབྲས་ད་ལྟ་ང་ཚོས་ཕྱི་ལ་བཀྲམས་ཡོད་པ་འདི་རེད། དེ་བཞིན་སྔོན་མའི་སྨོན་ལམ་ཚིག་མཛོད་བེད་སྤྱོད་བྱེད་བཞིན་པ་དེ་མགོ་ནས་རེ་རེ་བཞིན་བསྐྱར་དུ་ཞུ་དག་ཐེངས་དགུ་ལ་ཕྱིན་ཡོད་པ་དང་། ལོ་འདིའི་ནང་ང་ཚོས་དེ་ཕྱི་ལ་བཀྲམས་ཆོག་ཆོག་བྱས་ཡོད་པ་རེད། སྤྱིར་ཞུ་དག་ཐེངས་དགུ་ལ་བྱས་པ་ཡིན་ན་འགྲིག་སོང་བ་གང་ཡང་མ་རེད་ལ་ཞུ་དག་ཞེས་པ་དེ་ཉོག་དྲ་ཧ་ཅང་ཆེན་པོ་ཞིག་ཡིན་པ་རེད། ད་ལྟ་ང་ཚོས་ལོ་སུམ་ཚན་དང་པོའི་ནང་གི་ཐ་སྙད་འབུམ་ཕྲག་དང་དེའི་འགྲེལ་བཤད་ཚང་མ་དེབ་བྱས་ཏེ་བཏོན་པ་ཡིན་ན། དེབ་ཆེན་པོ་གྲངས་ ༡༥ ཞིག་ཆགས་ཀྱི་ཡོད་པ་རེད། དེ་འདྲ་ཞིག་གི་ནང་དུ་ཡིག་ནོར་གཅིག་ཀྱང་མེད་པ་བྱེད་དགོས་ན་ཁག་པོ་རེད། ཡིན་ན་ཡང་། མུ་མཐུད་ཞུ་དག་དང་བསྐྱར་བཅོས་བྱས་ཏེ་འགྲོ་དགོས་པ་ཞིག་ལས་ལོ་དགུའི་མཚམས་ནས་བཞག་ཆོག་པ་ཞིག་མ་རེད། ང་ཚོའི་རེ་བར་ལོ་དགུ་ཡི་རྗེས་ནས་ང་ཚོའི་ལས་ཁུངས་སུ་མི་ལྔ་དྲུག་ཅིག་གིས་མི་ཚེ་གང་བོ་དེའི་ཐོག་སྐྱེལ་ཐུབ་པའི་འབད་བརྩོན་བྱེད་ཀྱི་ཡོད། ཅེས་གསུངས་སོང་།

ཡང་སྨོན་ལམ་ཚིག་མཛོད་སྤྱི་ཚོགས་ནང་ཁྱབ་ཚད་ཆེན་པོ་ཕྱིན་དགོས་པའི་རྒྱུ་རྐྱེན་སྐོར་ལ་ཁོང་གིས། ང་ཚོས་ཚིག་མཛོད་འདི་སྤྱི་ཚོགས་ནང་ལ་བེད་སྤྱོད་དེ་འདྲ་ཞིག་ཡོང་དགོས་པ་དེ་རྒྱུ་རྐྱེན་མང་པོ་འཛོམས་དགོས་ཡོད་པ་རེད། དེ་མིན་གཅིག་བཟོས་ནས་བཀྲམས་བཞག་པ་ཙམ་ཞིག་གིས་འགྲིག་གི་ཡོད་པ་མ་རེད། གཅིག་དེ་བོད་ནང་ལོགས་ཀྱི་ཤེས་ལྡན་པ་དང་གནད་ཡོད་མི་སྣ། ཤེས་ཡོན་སོགས་ཀྱི་སྒང་ལ་ཤུགས་རྐྱེན་ཆེན་པོ་ཡོད་བསྡད་མཁན་ང་ཚོ་དང་འབྲེལ་བ་མེད་པ་ཞིག་མེད་ཅེས་བཤད་ན་ཐུབ་ཀྱི་ཡོད། ཁོང་རྣམ་པ་ཚོར་སློབ་སྟོན་ཞུ་ཡི་ཡོད་ལ་ཁོང་ཚོས་རྒྱབ་སྐྱོར་ཚད་མཐོ་བོ་གནང་གི་འདུག གཉིས་པ་ང་ཚོས་རྒྱལ་སྤྱིའི་སྒང་ལ་ངོས་ལེན་ཡོད་པ་ཞིག་དང་ཕན་ཐོགས་ཡོད་པ་ཞིག་ཏུ་འགྱུར་ཆེད། ད་ལྟ་བར་དུ་གཙུག་ལག་སློབ་ཆེན་ཁག་ ༡༤ ནང་དུ་སོ་སོ་དངོས་སུ་བཅར་ནས་འགྲེལ་བཤད་བརྒྱབས་པ་ཡིན། མདོར་བསྡུས་ན་ད་ལྟ་ང་ཚོ་གཙུག་ལག་སློབ་གྲྭ་གསུམ་བཞི་ཞིག་ལ་འགྲོ་རྒྱུ་ལྷག་ཡོད་པ་མ་གཏོགས། གཞན་བོད་ཀྱི་སྐད་ཡིག་དང་འབྲེལ་བ་ཡོད་བསྡད་པའི་འཛམ་གླིང་གི་གཙུག་ལག་སློབ་ཆེན་ཧ་ལམ་ཆ་ཚང་ལ་སོང་ཡོད། ཁོང་ཚོར་ཕར་བཅར་ནས་འགྲེལ་བཤད་བརྒྱབས་པ་ཡིན་ན་རྒྱབ་སྐྱོར་གནང་གི་འདུག ལྷག་པར་དུ་ང་ཚོས་སྨོན་ལམ་ཚིག་མཛོད་ཆེན་མོའི་རྒྱལ་སྤྱིའི་སློབ་སྟོན་ལྷན་ཚོགས་ཤིག་བཙུགས་ཡོད་པ་རེད་ལ། དེ་དག་ཀྱང་སྤྱིར་བཏང་གི་མཁས་དབང་ཙམ་མ་ཡིན་པར་སྐད་བརྡ་རིག་པའི་སྐོར་ལ་ཞིབ་འཇུག་སློབ་དཔོན་ཐོན་པ་མི་ལྔ་ཆེད་འཛུགས་བྱས་ཡོད་པ་རེད། ཁོང་རྣམ་པ་ཚོས་ཀྱང་དམིགས་བསལ་གྱིས་རྒྱབ་སྐྱོར་གནང་དགོས་ས་དང་། གཙུག་ལག་སློབ་གྲྭ་ཁག་ལ་འབྲེལ་བ་བྱེད་དགོས་སར་རོགས་རམ་གནང་གི་ཡོད་པ་རེད། དེ་ནས་སྨོན་ལམ་ཚིག་མཛོད་ཆེན་མོ་འདི་རྒྱལ་སྤྱིའི་བོད་རིག་པའི་ཚོགས་འདུ་ཐེངས་གཉིས་ཀྱི་སྒང་ལ་ཕྱིན་ཐུབ་པ་བྱུང་ཡོད་པ་རེད། དེ་འདྲའི་རྒྱུ་རྐྱེན་མང་པོ་ཞིག་ལ་བརྟེན་ནས་སྨོན་ལམ་ཚིག་མཛོད་ཆེན་མོ་གང་ལ་གང་འཚམ་གྱིས་སྤྱི་ཚོགས་ནང་ལ་བེད་སྤྱོད་གཏོང་མཁན་མང་པོ་ཞིག་ཆགས་ཡོད་པ་རེད། ཅེས་གསུངས་སོང་།

གཞན་ཡང་། ད་ལྟ་ཐོན་ལ་ཉེ་བའི་སྨོན་ལམ་ཚིག་མཛོད་ནང་དུ་ཐ་སྙད་གསར་པ་ག་ཚོད་དང་དེ་དག་ཁུངས་གང་ནས་ཡོང་གི་ཡོད་སྐོར་ཁོང་གིས། ད་ལོའི་ཕྱི་ཟླ་ ༡༢ པའི་ནང་སྨོན་ལམ་ཚིག་མཛོད་ཐོན་རིམ་གཉིས་པ་དེ་ཕྱི་ལ་བཀྲམ་རྒྱུ་ཡིོན་པ་དང་། ཐོན་རིམ་དང་པོའི་ནང་དུ་ཐ་སྙད་ ༡༡༣༡༡༣ ཞིག་ཡོད་པ་རེད། ད་ཐེངས་ཐོན་གཉིས་པ་དེ་ལའང་ཐ་སྙད་ ༡༠༠༠༠༠ ལྷག་དང་ཐོན་རིམ་གཉིས་ཀ་བསྡོམས་ནས་ཐ་སྙད་ ༢༠༠༠༠༠ ཤིག་ཡོང་རྒྱུར་རེ་བ་དང་འབད་བརྩོན་བྱེད་ཀྱི་ཡོད། ན་ནིང་ལོར་རྩོམ་སྒྲིག་སྡེ་ཚན་ཁག་ནས་བྱུང་བའི་ཐ་སྙད་ ༢༥༠༠༠ ལྷག་ཅིག་ཡོད་པ་དང་། དེའི་སྒང་ལ་སྨན་གྱི་ཐ་སྙད་ ༢༥༠༠༠ ཞིག་དང་། དེ་ནས་ཐོན་སྔོན་མའི་ནང་དུ་མེད་པའི་ཐ་སྙད་ཁྲི་༤ ལྷག་ཅིག་རྩོམ་སྒྲིག་བྱེད་བཞིན་ཡོད། གལ་ཆེན་པོ་གཅིག་དེ་ང་ཚོའི་ཐ་སྙད་ཀྱི་འབྱུང་ཁུངས་གང་རེད་ཅེས་པ་ལྟར། ང་ཚོས་ཏུན་ཧོང་གི་ཡིག་ཆ་དེབ་གྲངས་ ༡༧ ཡོད་པ་ཆ་ཚང་གློག་ཀླད་ནང་དུ་བཅུག་ནས་ལས་ཀ་དེ་འགྲུབ་ཐུབ་པ་བྱུང་ཡོད། མ་འོངས་པར་ཐ་སྙད་དེ་དག་དུས་རབས་གང་ཞིག་གི་ཡིན་ན་གློག་གིས་འཚོལ་ཐུབ་ཀྱི་ཡོད་པ་རེད། དེ་ནས་དུས་རབས་ ༡༢ དང་ ༡༣། ༡༤ ནང་བྱུང་བའི་ཕུ་རིའི་ཡིག་ཚགས་ཟེར་བ་ཞིག་ཡོད་པ་ཧ་ལམ་ཤོག་ལྷེ་ཁྲི་གཅིག་ཙམ་ཡོད་པ་དེ་ད་ལྟ་བོད་ནང་ལ་དཔར་སྐྲུན་བྱ་གྲབས་ཡོད་པ་རེད། ཐ་སྙད་དེ་དག་ཚང་མ་དང་དེ་ནས་དགའ་ལྡན་ཕོ་བྲང་གི་སྲིད་དབང་སྐབས་ཀྱི་ཆབ་སྲིད་ཀྱི་ཐ་སྙད། ས་གཤིས་རིག་པའི་ཐ་སྙད་གསར་པ་སོགས་སྒྲིག་བཞིན་ཡོད། ཅེས་གསུངས་སོང་།

དེའི་རྗེས་ཆོས་དོན་དྲུང་ཆེ་ལགས་ཀྱིས་སྨོན་ལམ་ཚིག་མཛོད་དང་འབྲེལ་བའི་གསུང་བཤད་གནང་སྐབས། སྨོན་ལམ་ཚིག་མཛོད་འདི་ལྟ་བུ་ཞིག་ལ་མཚོན་ན་དངོས་ནས་རླབས་ཆེན་གྱི་ལས་གཞི་ཞིག་རེད་ལ། དཀའ་ལས་བརྒྱབས་པ་བཞིན་གྲུབ་འབྲས་ཀྱང་ཆེན་པོ་བྱུང་འདུག དགེ་བཤེས་བློ་བཟང་སྨོན་ལམ་ལགས་ལ་མཚོན་ན། དང་པོ་གློག་ཀླད་ངན་པ་ཞིག་འཁུར་ནས་ལས་དོན་དེ་མགོ་བཙུགས་ནས་ད་ལྟ་ལོ་གསུམ་བཞི་ཙམ་ཞིག་གི་ནང་གྲུབ་འབྲས་ཆེན་པོ་བྱུང་ཡོད་པ་རེད། བཙན་བྱོལ་ནང་ནས་མི་ཁ་ཤས་ཤིག་གིས་ཁ་རྐྱང་རྐྱང་གིས་གཅིག་འགྲིག་མི་འདུག གཉིས་འགྲིག་མི་འདུག་ཅེས་སྐྱོན་རྐྱང་རྐྱང་བཤད་བསྡད་པ་ལས། སོ་སོའི་ལག་འགུལ་ནས་ལས་ཀ་བྱེད་མཁན་མེད་པ་རེད། ངས་བསམ་ན་ང་ཚོར་ཁ་ནས་བཤད་འདུག་མཁན་ཙམ་མ་ཡིན་པར་དམིགས་ཡུལ་ཞིག་ལ་བསླེབ་དགོས་ན་ལག་འགུལ་ནས་ལས་མཁན་ཡང་དགོས་ཀྱི་འདུག དེ་ཡིན་དུས་རྣམ་པ་ཚོས་ཕྱག་ལས་གནང་སྟངས་དང་ལག་ལེན་བསྟར་སྟངས་ལ་རྗེས་སུ་ཡི་རངས་ཞུ་ཡི་ཡོད། ཅེས་གསུངས་སོང་།

མཇུག་ཏུ་གསར་འགོད་པས་དགེ་བཤེས་བློ་བཟང་སྨོན་ལམ་ལགས་སུ་ཐེངས་འདིའི་ཚོགས་འདུའི་སྐབས་གླེང་བྱ་གཙོ་བོ་ག་རེ་ཡིན་པ་དང་། ཚིག་མཛོད་རྩོམ་སྒྲིག་སྐབས་དཀའ་ངལ་ཆེ་ཤོས་ཕྱོགས་གང་ནས་འཕྲད་ཀྱི་ཡོད་མེད། བོད་ནང་གི་ཤེས་ཡོན་པ་ཚོས་སྨོན་ལམ་ཚིག་མཛོད་ལ་གདེང་འཇོག་ག་འདྲ་གནང་གི་ཡོད་མེད་སོགས་ཀྱི་སྐོར་དྲིས་པར་ཁོང་གིས། ཐེངས་འདིའི་ཚོགས་འདུའི་ཐོག་གླེང་བྱ་གཙོ་བོ་ཐ་སྙད་རྩོམ་སྒྲིག་པ་ཚོ་དང་། ཁོང་ཚོའི་ཐ་སྙད་རྩོམ་སྒྲིག་སྐབས་ཀྱི་དཀའ་ངལ་དང་ཐ་སྙད་རྩོམ་སྒྲིག་ཐད་ཀྱི་བསམ་ཚུལ་སོགས་ལ་དེ་སྔོན་ཁོང་ཚོའི་ངོས་ནས་བསམ་ཚུལ་ཤོག་ལྷེ་ ༡༥ ལྷག་ཅན་ཞིག་ཕུལ་ཡོད་པ་དང་། ང་ཚོའི་ངོས་ནས་དེ་དག་སྡེ་ཚན་གསུམ་དུ་བགོས་ཏེ་དང་པོ་འཛིན་སྐྱོང་དང་འབྲེལ་བའི་སྐོར་དང་། གཉིས་པ་གློག་ཆས་ཀྱི་གནད་དོན་སྐོར། གསུམ་པ་རྩོམ་སྒྲིག་དང་འབྲེལ་བའི་སྐོར་བཅས་ཡིན་པ་རེད། དེ་བཞིན་རྩོམ་སྒྲིག་སྐབས་སུ་དཀའ་ངལ་ཆེ་ཤོས་དེ་ལས་བྱེད་འགྱུར་བ་ཕྱིན་པ་དང་བརྗེ་བོ་བརྒྱབས་འགྲོ་བ་དེ་རེད། ཚིག་མཛོད་རྩོམ་སྒྲིག་པ་ཚོར་མཚོན་ན། ང་ཚོའི་ངོས་ནས་སྦྱོང་བརྡར་སོགས་སྤྲད་ནས་ཡག་པོ་ཆགས་ཡོད་དུས་གློ་བུར་འགྱུར་བ་ཐེབས་སོང་བ་དེ་ཕངས་པོ་ཞེ་དྲག་འདུག དེ་བཞིན་བོད་ནང་གི་ཤེས་ཡོན་པ་ཚོར་མཚོན་ན། སྨོན་ལམ་ཚིག་མཛོད་ལ་རྒྱབ་སྐྱོར་དང་གདེང་འཇོག་ཆེན་པོ་གནང་གི་འདུག་ལ། ཁོང་ཚོས་གཙོ་བོ་བྱ་ཚིག་གི་ཕྱོགས་ནས་བསམ་ཚུལ་མང་པོ་བཏོན་བྱུང་ལ་ཕན་ཐོགས་ཆེན་པོ་བྱུང་། ཞེས་གསུངས་བྱུང་།

གསར་འགོད་པ། སངས་རྒྱས་དཀོན་མཆོག