བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ལྔ་པ་དང་བསྟུན་ཉིན་གྲངས་ ༧ རིང་གངས་སྐྱིད་སིལ་སྤོལ་རྩེད་ཐང་དུ་ཞི་རྒོལ་བྱེད་མཁན་རྣམས་ལ་སྤྱི་འཐུས་ཁག་ཅིག་ནས་དངོས་སུ་མཇལ་འཕྲད་གནང་སྟེ་བཀའ་ཤག་ལ་བཟང་ཕྱོགས་ནས་རེ་བ་རྒྱག་དགོས་པའི་ལམ་སྟོན་གསུང་བཤད་གནང་།
དེ་རིང་སྔ་དྲོའི་ཆུ་ཚོད་ ༡༠ མ་ཟིན་ཞིག་ལ་གངས་སྐྱིད་སིལ་སྤོལ་རྩེད་ཐང་དུ། བདེན་རྒྱབ་དང་བླངས་མི་མང་གིས་གྲོས་ཚོགས་ཚོགས་དུས་ལྔ་པའི་ལས་ཉིན་མཐའ་མ་དང་བསྟུན་གསར་འགོད་གསལ་བསྒྲགས་ཤིག་སྤེལ་སོང་བ་དང་། སྐབས་དེར་ལས་འགུལ་སྣེ་འཁྲིད་པ་འཕྲིན་ལས་སྐལ་བཟང་ལགས་ཀྱིས། ང་ཚོས་ད་བར་སྤྱི་ཚོགས་ལ་འགན་འཁུར་དང་བཅའ་ཁྲིམས་རིན་པོ་ཆེར་སྲུང་སྐྱོབ་བྱེད་དགོས་པ་སོགས་ཀྱི་གནས་ལུགས་དང་རྒྱུ་མཚན་མང་པོའི་ཐོག་ནས་སྐུ་ངོ་སྲིད་སྐྱོང་བློ་བཟང་སེང་གེ་མཆོག་དང་། སྤྱི་འཐུས་བསྟན་པ་ཡར་འཕེལ་ལགས་གཉིས་བཟང་སྤྱོད་ཀྱི་ཐོག་ནས་དགོངས་པ་ཞུ་དགོས་པའི་སྙན་ཞུ་བསྟུད་མར་ཕུལ་ཡོད། ང་ཚོའི་བསམ་ཚུལ་ནི་སྤྱི་ཚོགས་ནང་གི་དཀའ་རྙོག་སེལ་ཐབས་སུ་འདས་པའི་ལོ་རྒྱུས་ནང་ལའང་མཁས་པ་མང་པོ་ཞིག་གིས་སྤྱི་ཚོགས་ཞི་འཇམ་ཡོང་ཐབས་སུ་དོ་བདག་རང་ཉིད་ལས་གནས་ནས་དགོངས་པ་ཞུས་ཏེ་འགྲོ་ཡི་ཡོད་སྟབས། ང་ཚོས་ཀྱང་རེ་སྐུལ་དེ་ག་རང་ཞུ་ཡི་ཡོད་ལ། ད་རེས་གྲོས་ཚོགས་ནང་ལའང་སུ་བདེན་པ་ཡིན་མིན་ལ་མ་ལྟོས་པར་སྤྱི་འཐུས་གྲོས་ཚོགས་ཀྱིས་འགན་འཁུར་བའི་ཐོག་དམིགས་བསལ་རང་དབང་ལྡན་པའི་ཞིབ་འཇུག་ཚོགས་ཆུང་ཞིག་འཛུགས་རོགས་གནང་ཞེས་འབོད་སྐུལ་ཞུས་ཡོད། ཅེས་བརྗོད་སོང་།
ཡང་ཁོང་གིས། ད་ལྟའི་ཆར་མི་མང་གིས་མཁྱེན་གསལ་ལྟར། ང་ཚོའི་འབོད་སྐུལ་ལ་རེ་བ་མེད་པ་འདྲ་བོ་ཆགས་བསྡད་ཡོད་པ་རེད། འོན་ཀྱང་། ང་ཚོས་ལས་འགུལ་སྤེལ་ཏེ་ད་ལྟ་གསལ་པོ་ཞུ་རྒྱུ་ཞིག་ལ་ང་ཚོའི་སྤྱི་ཚོགས་ནང་གི་རྙོག་དྲ་དང་དཀའ་ངལ་ཅན་གྱི་གནས་སྟངས་མང་པོ་ཞིག་གི་ཐོག་སྙན་གསེང་ཞུ་ཡོད། ང་ཚོའི་ལས་འགུལ་འདི་དེ་རིང་མཚམས་འཇོག་གི་ཡོད་ཀྱང་། མ་འོངས་པར་གནས་ཚུལ་ག་རེ་འབྱུང་མིན་ང་ཚོས་ཚོད་དཔག་བྱེད་མི་ཐུབ་སྟབས། ད་ལྟའི་སྤྱི་ཚོགས་ནང་གི་དཀའ་རྙོག་དང་མ་འོངས་པར་གནས་ཚུལ་ག་རེ་བྱུང་བ་ཡིན་ན་དེའི་འགན་དེ་བཀའ་སྤྱི་གཉིས་ནས་འཁུར་དགོས་ཡོད། དེ་སྔ་དྷ་རམ་ས་ལར་གནས་ཚུལ་བྱུང་མྱོང་ཡོད་ལ། ཉེ་ཆར་རང་གྲྭ་བ་ཞིག་གིས་ཀྱང་གནས་ལུགས་རྒྱུ་མཚན་མང་པོའི་ཐོག་ནས་རང་ལུས་མེར་མཆོད་ཀྱི་ལས་འགུལ་སྤེལ་རྒྱུའི་བརྡ་ཞིག་བསྟན་ཡོད། དེ་བཞིན། གསལ་པོ་ཞུ་རྒྱུ་ཞིག་ལ་ད་ལྟ་མི་མང་གི་ཚོར་བ་དེ་ཧ་ཅང་ཤུགས་ཆེན་རེད་འདུག་ལ། དེ་མི་སྒེར་གྱི་ཆེད་མ་ཡིན་པར་བོད་སྤྱིའི་དོན་དུ་རེད་འདུག དེར་བརྟེན་མ་འོངས་པར་གནས་སྟངས་ཡག་པོ་དང་སྡུག་པོ་ག་རེ་བྱུང་བ་ཡིན་ན་དེའི་འགན་དེ་སྲིད་སྐྱོང་གཙོས་པའི་བཀའ་ཤག་དང་གྲོས་ཚོགས་ལ་ཡོད་ཅེས་མཐའ་ཚིག་བསྒྲགས་རྒྱུ་ཡིན་ཞེས་དང་། དམངས་གཙོའི་སྤྱི་ཚོགས་ནང་མི་མང་གིས་བཟང་སྤྱོད་ལྡན་པའི་ཐོག་ནས་འགན་འཁུར་ཏེ། ད་ལན་སྤེལ་བའི་ཉིན་གྲངས་ ༧ རིང་གི་ལས་འགུལ་གྱི་ཉམས་མྱོང་ཁྲོད་བཀའ་ཤག་ནས་ཁོང་ཚོར་ཐུག་འཕྲད་གནང་བའི་རེ་བ་མཐོང་མེད་ཀྱང་མུ་མཐུད་རེ་བ་རྒྱག་གི་ཡོད་སྐོར་སོགས་བརྗོད་སོང་།
དེ་རིང་སྔ་དྲོའི་ཆུ་ཚོད་ ༡༠།༤༥ ཙམ་ལ་གྲོས་ཚོགས་ཚོགས་དུས་ལྔ་པ་གྲོལ་རྗེས། བོད་མི་མང་སྤྱི་འཐུས་ཁག་ཅིག་སིལ་སྤོལ་རྩེད་ཐང་དུ་དངོས་སུ་ཕེབས་ཏེ་ཞི་རྒོལ་བ་རྣམས་ལ་ཐུག་འཕྲད་གནང་བ་མ་ཟད། བཀའ་ཤག་ནས་ལས་འགུལ་བ་རྣམས་ལ་མཇལ་འཕྲད་ཀྱི་རྣམ་འགྱུར་ཞིག་སྟོན་གྱི་ཡོད་སྟབས། བཀའ་ཤག་ལ་རེ་བ་མེད་ཅེས་ཐག་མ་བཅད་པར་བཟང་ཕྱོགས་ནས་རེ་བ་རྒྱག་དགོས་པ་དང་། ཞི་འཇམ་གྱི་ཐོག་ནས་ལས་འགུལ་སྤེལ་བ་ཞེ་དྲག་ཡག་པོ་ཡིན་སྐོར་སོགས་གསུངས་ཡོད་པ་རེད།
གསར་འགོད་པ། སྐལ་བཟང་སྤྱིན་པ།
ཁྱི་སྤྱང་ངན་འབྲེལ་དང་རྐུན་རྒྱབ་ཇག་ལང་ཟེར་བ་མི་ངན་འདི་ཚོའི་གྲལ་མིན་ནམ། མི་ངན་འདི་ཚོའི་གྲལ་ལ་ཞེན་པ་གཏིང་ནས་ལོག་སོང་ངོ་།
ད་ལམ་རྡ་ས་གངས་སྐྱིད་དུ་ངོ་བརྒོལ་བྱེད་མཁན་རྣམས་ལ་བོད་མི་མང་སྤྱི་འཐུས་ལྷན་ཚོགས་ཀྱི་ཞུགས་མོལ་ལྷན་ཚོགས་ཐོག་ཐག་གཅོད་ལྟར་གཞུང་འབྲེལ་ངོ་ཐུག་མ་གནང་ནའང་སྤྱི་འཐུས་སྒེར་ཁག་གཅིག་ཐུག་པ་རེད། བཀའ་ཤག་ནས་གཞུང་འབྲེལ་གྱིས་ཆེད་འབོད་ལྟར་མ་བཅར་བར་གཡས་ཁག་གཡོན་དཀྲི་བྱས་ཏེ་བཅར་མ་ནུས་པ་ནི་ངོ་བློ་ཕམ་བྱུང་། སླད་དོན་མེད་མང་ཚོགས་ནང་དགྲ་དགའ་གཉེན་སྡུག་མ་གནང་ན་ཡག་པོ་རེད།།
བློ་སེང་ཕྱོགས་གཏོགས་ཀྱིས་གསལ་འགྱུར་ཚང་མ་བློ་སེང་ཕྱོགས་གཏོགས་ཀྱི་འདོད་པ་ལྟར་སྤེལ་དགོས་པར་འདོད།
དེ་ལྟར་མིན་ན་གསལ་འགྱུར་དྲང་བདེན་མིན་པར་བཤད།
སྤེན་ཚེ་ཕྱོགས་གཏོགས་ཀྱིས་གསལ་འགྱུར་ཚང་མ་སྤེན་ཚེའི་ཕྱོགས་གཏོགས་ཀྱིས་འདོད་པ་ལྟར་སྤེལ་དགོས་པར་འདོད།
དེ་མིན་ཚེ་དྲན་བདེན་མིན་པར་འདོད།
དོན་ལ་ཕྱོགས་སུ་ལྷུང་བ་འདི་གཉིས་ཀྱིས་གསར་འགོད་པ་ཞིག་གིས་སྒྲུབ་འོས་པའི་ལས་དོན་ཆེས་ཕྲ་ཆུང་གསུམ་ཅི་ཡིན་ཤེས་མེད་ལ། ཤེས་འདོད་ཀྱང་མེད་པ་གསལ་བོ་རེད།
ངས་བསམ་ན་གསལ་འགྱུར་ནི་པར་ཆས་ལྟ་བུ་རེད། དེའི་ནང་དུ་པར་ཇི་ཞིག་སླེབས་མིན་དེ་པར་ཆས་ལ་དབང་ཚད་མེད། པར་ཆས་ཀྱི་མདུན་ན་ཅི་ཞིག་ལང་ཡོད་པ་དེ་འགན་ཁུར་རེད། པར་ཆས་ཀྱི་ནང་དུ་པར་ཡག་པོ་ཞིག་འཐེབ་དགོས་ན་མི་རང་ཉིད་ཀྱིས་གཟོ་ལྟ་དང་རྣམ་འགྱུར་སོགས་ཡག་པོ་བཏོན་དགོས་པ་དེ་རེད་སྙམ། བསམ་ཚུལ་ཡིན།
བདེ་མོ་བྱོས་ཨ།
སྤྱི་ཟླ་དགུ་བའི་གྲོས་ཚོགས་སྐབས་སུ་བློ་བཟང་སངས་རྒྱས་དང་བསྟན་པ་ཡར་འཕེལ་གཉིས་ལ་ངོ་རྒོལ་ཡོད་མཁན་ཚང་མས་མཉམ་རུབ་ཀྱིས་ལས་འགུལ་སྤེལ་དགོས།
སྨྲ་བརྗོད་རང་དབང་རྒྱལ་སྤྱིའི་ཁྲིམས་ཀྱི་བསྟན་།
ཚད་འཀག་བྱེད་པ་གུང་ཁྲན་དམར་པོའི་ལུགས་།
རང་དབང་མང་གཙོའི་སྤྱི་ཚོགས་ཆེན་པོའི་ནང་།
རང་རང་བསམ་ཚུལ་གླེང་སའི་རྒྱུད་ལམ་མང་།
མི་མང་གི་སྐུ་ཚབ་མི་མང་ལ་ཐུགས་འཕྲད་གནང་བ་ཡག་པོ་རེད་
དེ་རིང་གི་གསལ་འགྱུར་འདི་ཀློག་དུས་ཡིད་སྤྲོ་བས་བརྟས།
གང་ཡིན་ཟེར་ན་བཙན་བྱོལ་ནང་དམངས་གཙོའི་ངོ་བོ་ཞིག་གསལ་བོར་མཐོང་ཡོང་བས་ཡིན།
དུས་བབ་འདི་གསར་ཁང་རྙིང་གྲས་ཤིག་ཡིན་ཙང་། དེ་སྔོན་སྤྱི་ཚོགས་ནང་མཐོང་གང་ཙམ་ཡོད། དེ་འདྲ་སོང་ཙང་། གསར་འགྱུར་འགོད་དུས་གཟབ་གཟབ་་གནང་དགོས་འདུག དཔེར་ན། (བདེན་རྒྱབ་དང་བླངས་) ཞེས་པའི་ཐ་སྙད་འདི་རྩོད་བཞིན་པ་ཡིན་ཙང་། བཀའ་ཤག་བདེན་དང་། ངོ་རྒོལ་བྱེད་མཁན་མི་བུ་བཅུ་གྲངས་འདི་བདེན། ད་དུང་རྩད་ཞིབ་གནང་དགོས་པ་ཞིག་རེད་མ་གཏོགས། བདེན་རྒྱབ་དང་བླངས་ཞེས་བརྗོད་དུས་བཀའ་ཤག་ནི་རྫུན་མ་ཡིན་པ་སུས་ཐག་བཅད་པ་རེད་དམ། གསར་ཁང་ནི་དྲང་བདེན་གྱི་སྲོང་ཤིང་ཡིན་ཙང་ཆབ་སྲིད་པ་ཚོའི་འདོད་ཕྱོགས་དང་མཐུན་པའི་གསར་འགྱུར་འགོད་མི་ཉན།
ཚང་མ་སོར་སྐྱེས་ཁྱོད་དང་ང་འདྲ་ཡིན་ཙང་སོ་སོའི་ལྟ་བ་དང་ལངས་ཕྱོགས་སྒང་ལ་ཏོག་ཙམ་མི་འགྲོ་མཁན་གླིང་འདི་ན་ཡོད་མ་རེད།
བཀུར་འོས་སྤྱི་འཐུས་རྣམ་པ་མི་མང་གི་ངག་བཅད་ངོ་རྒོལ་ལས་འགུལ་བ་རྣམ་པར་ཐུག་འཕྲད་གནང་བར་སྙིང་དབུས་བཀའ་དྲིན་ཆེ་ཞུ།དེ་ནི་ཁྱེད་རྣམ་པའི་གཟི་བརྗིད་ཅིག་རེད་ཅེས་བསྔགས་བརྗོད་ཞུ་ཡི་ཡོད།
དེང་སང་དུས་བབ་ཀྱི་གསར་འགྱུར་དེ་ཚོ་བློ་གཏོད་དང་ཡིད་ཆེས་ཆོག་པ་ཞིག་མཐོང་བཞིན་མེད།
ཕྱོགས་རིས་འབའ་ཞིག་གི་གསར་འགྱིར་མ་གཏོགས།