དགའ་ལྡན་ཤར་རྩེ་གྲྭ་ཚང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཞུས་པ།
༄༅། །དེ་ཡང་དགའ་ལྡན་ཤར་རྩེ་གྲྭ་ཚང་དང་གྲྭ་ཚང་གི་སློབ་གྲྭ་ཐུན་མོང་གིས་གོ་སྒྲིག་ཞུས་ཏེ། ལྷར་བཅས་སྲིད་ཞིའི་གཙུག་རྒྱན། ས་སྟེང་རྒྱལ་བསྟན་ཡོངས་རྫོགས་ཀྱི་མངའ་བདག །འཛམ་གླིང་ཞི་བདེའི་དེད་དཔོན་ཆེན་པོ། རང་ཅག་གངས་ཅན་པ་རྣམས་ཀྱི་མེ་ཏོག་གང་ལ་ཕོག་པའི་ལྷ་སྐལ་འཕགས་མཆོག་འཇིག་རྟེན་དབང་ཕྱུག་སྡོམ་བརྩོན་ངུར་སྨྲིག་གར་གྱི་རྣམ་པར་རོལ་པ། ༸གོང་ས་ལྷ་མིའི་རྣམ་འདྲེན་༸སྐྱབས་མགོན་༸རྒྱལ་དབང་སྐུ་འཕྲེང་བཅུ་བཞི་པ་ཆེན་པོ་མཆོག་དགུང་གྲངས་བརྒྱད་ཅུ་གྱ་གསུམ་ལ་ཕེབས་པའི་སྐུའི་འཁྲུངས་སྐར་དུས་ཆེན་གྱི་མཛད་སྒོར། དགའ་ལྡན་ཤར་བྱང་གྲྭ་ཚང་གཉིས་ཀྱི་མཁན་རིན་པོ་ཆེ་རྣམ་པ་གཉིས་དང་། མཁན་ཟུར་རྣམ་པ། སྐྱབས་མཆོག་ཟོང་མཆོག་སྤྲུལ་རིན་པོ་ཆེ། དགེ་བསྐོས་དང་དབུ་མཛད་ལགས་ཀྱིས་གཙོས་བླ་སྤྲུལ་དགེ་བཤེས་དགེ་འདུན་འདུས་མང་དང་། མོན་གྷོ་འདོད་རྒུ་གླིང་གི་ས་གནས་གཞིས་འགོ་མཆོག་དང་ས་གནས་གྲོས་ཚོགས་ཀྱི་ཚོགས་གཙོ། རང་བདེན་ཚོགས་ཆུང་གི་ཚོགས་གཙོ། མཉམ་འབྲེལ་ཚོགས་གཙོ་སོགས་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་རྣམ་པ། རྒྱ་གར་བའི་སྐུ་མགྲོན་ཁག་ཅིག་དང་། སམ་བྷོ་ཊའི་སློབ་གྲྭའི་སློབ་སྤྱི་དང་དགེ་ཆེ། གཞིས་གྲོང་ཁག་གི་སྤྱི་མི་སོགས་ཕྱི་ནང་གི་སྐུ་མགྲོན་ཁག་དང་། སམ་བྷོ་ཊའི་སློབ་ཕྲུག་བཅས་མི་མང་འདུ་འཛོམས་ཐོག་སྐུ་མགྲོན་རྣམས་ཀྱིས་༸རྒྱལ་བའི་སྐུ་དཔར་མཐོང་གྲོལ་རིན་པོ་ཆེར་མཎྜལ་རྟེན་གསུམ་འདེགས་འབུལ་ཞུས་རྗེས། སྣང་གསལ་མར་མེ་ཞལ་ཕྱེ། སྔོན་འགྲོ་དང་འཛིན་གྲྭ་དང་པོའི་སློབ་ཕྲུག་རྣམས་ཀྱིས་འཁྲུངས་སྐར་ལ་བསྟོད་ཚིག་འབུལ་བ་དང་་སྐུ་མགྲོན་གཙོ་བོ་རྣམས་ཀྱིས་སྤྲི་གོར་གཅོད་བྲེགས་གནང་ཞིང་། གྲྭ་ཚང་གི་སྦྱིན་བདག་ཨ་མ་མེ་ཤཱང་དང་། འགྲོ་ཕན་གླིང་ཆོས་ཚོགས་ཀྱིས་འཁྲུངས་སྐར་གྱི་མཛད་སྒོའི་མཐུན་རྐྱེན་གནང་བར་ཤེས་ཚོགས་དང་སློབ་གྲྭ་ནས་དམིགས་བསལ་ཆེ་བསྟོད་ཞུས།
གྲྭ་ཚང་གི་དབུ་བཞུགས་སྐྱབས་གནས་མཁན་རིན་པོ་ཆེ་མཆོག་གིས་དུས་ཆེན་དང་འབྲེལ་བའི་བཀའ་སློབ་གསུང་བཤད་གནང་དོན། འཛམ་གླིང་ཞི་བདེའི་དེད་དཔོན་ཆེན་པོ་༸གོང་ས་༸སྐྱབས་མགོན་༸རྒྱལ་དབང་ཡིད་བཞིན་ནོར་བུ་མཆོག་དགུང་གྲངས་བརྒྱད་ཅུ་གྱ་གསུམ་ལ་ཕེབས་པའི་སྐུའི་འཁྲུངས་སྐར་དུས་ཆེན་གྱི་དགའ་སྟོན་ལ་གཞིས་བྱེས་བོད་མི་ཡོངས་དང་། མགོན་པོ་མཆོག་གི་བཀའ་སློབ་ལམ་སྟོན་ལ་རྒྱུན་དུ་ཉམས་བཞེས་དང་གུས་བརྩི་ཆེ་མཐོང་ཞུ་མཁན་གྱི་འཛམ་གླིང་མི་མང་ཡོངས་ལ་དགའ་ལྡན་ཤར་རྩེ་གྲྭ་ཚང་གིདགེ་འདུན་འདུས་མང་ཡོངས་ཀྱི་ཚབ་ཞུས་ཏེ། འཚམས་འདྲི་བཀྲ་ཤིས་བདེ་ལེགས་ཞུས་པ་དང་འབྲེལ། ༸རྒྱལ་དབང་མཆོག་གིས་བོད་ནང་དུ་དགུང་ལོ་ཉེར་ལྔའི་བར་བསྐྱངས་པའི་མཛད་འཕྲིན་ཁག་དང་། དེ་རྗེས་བཙན་བྱོལ་དུ་ཕེབས་པ་ནས་ད་ལྟའི་བར་བོད་གཞུང་མང་གཉིས་ཀྱི་ཆེད་བསྐྱངས་དང་སྐྱོང་བཞིན་པའི་རླབས་ཆེན་གྱི་མཛད་འཕྲིན་སྤྱི་དང་། ཁྱད་པར་འགྲོ་བ་ཀུན་ལ་ཁྱབ་པའི་བྱམས་བརྩེ་དང་། མིའི་སེམས་ལ་བག་ཕེབས་དང་སྤྲོ་སྣང་རབ་ཏུ་སྟེར་བའི་བཅོས་མིན་ཞལ་རས་དགྱེས་བརྩེའི་འཛུམ་མདངས་དང་། བཞད་སྒྲ་དང་བཅས་འཛམ་གླིང་གི་ཡུལ་གྲུ་གང་སར་ཞབས་ཀྱིས་བཅགས་ཏེ། འཛམ་གླིང་ཞི་བདེ་དང་། རྒྱལ་སྤྱིའི་འཁྲུག་རྩོད་ཁག་ཞི་ཐབས། འགྲོ་བ་མིའི་བཟང་སྤྱོད་གོང་སྤེལ། ཆོས་ལུགས་མཐུན་སྒྲིལ། ཁོར་ཡུག་སྲུང་སྐྱོབ། འགྲོ་བ་མིའི་ཐོབ་ཐང་གི་འགན་ཁུར། མིའི་རིགས་སྤྱི་ལ་འཕྲད་བཞིན་པའི་ཐུན་མོང་གི་དཀའ་ངལ་སེལ་ཐབས་བཅས་ཀྱི་ཆེད། འགྲོ་བ་མིའི་རིགས་སྤྱི་ལ་ཁྱབ་པའི་བྱམས་བརྩེ་དང་འབྲེལ་བའི་བཟང་སྤྱོད་ཀྱི་རིན་ཐང་གོང་མཐོར་དང། ཆོས་ལུགས་ཕན་ཚུན་བར་མཐུན་ལམ་གོང་འཕེལ་དུ་གཏོང་རྒྱུ། རང་བྱུང་ཁོར་ཡུག་སྲུང་སྐྱོབ་བཅས་ལ་ཐུགས་དགོངས་རྒྱ་ཆེར་བཞེས་ཏེ། རྟེན་འབྱུང་གི་ལྟ་བ་དང་གཞན་ཕན་སྙིང་རྗེ་ཟུང་དུ་འཇུག་པའི་ལམ་བཟང་དེ་ཉིད་གང་ཉིད་ཀྱི་ཉམས་བཞེས་ཀྱི་ཐུགས་དམ་གྱི་མཐིལ་དུ་མཛད་ཅིང་། གཞན་ལའང་འཆད་སྤེལ་གཙོ་བོར་མཛད་པ་སོགས་སྐུ་གསུང་ཐུགས་ཀྱི་མཛད་པ་མཐའ་དག་འགྲོ་བ་མི་རིགས་སྤྱིའི་བདེ་དོན་ཆེད་གཏོང་གནང་མཛད་པའི་རླབས་ཆེན་གྱི་མཛད་འཕྲིན་བགྲང་ལས་འདས་པ་ཞིག་བསྐྱངས་དང་སྐྱོང་བཞིན་ཡོད་པ་བཅས་ལ་འཛམ་གླིང་ཁྱོན་གྱི་རྒྱལ་ཁབ་དང་ཚོགས་སྡེ་ཁག་འདྲ་མིན་ནས་ཆོས་དང་། རིག་གཞུང་། ཚན་རིག ལྟ་གྲུབ། སེམས་ཁམས་རིག་པ་སོགས་སྡེ་ཚན་སྣ་ཚོགས་པའི་སྒོ་ནས་ཆེ་བསྟོད་དང་གཟེངས་རྟགས། ཕྱག་འཁྱེར། མཚན་གནས་སོགས་བགྲང་གིས་མི་ལང་བ་ཕུལ་ཏེ་༸རྒྱལ་དབང་མཆོག་ནི་དེང་འཛམ་གླིང་ནང་རྩོད་མེད་ཡོངས་གྲགས་ཐོག་གུས་བཀུར་དང་དགའ་མོས་ཆེ་ཤོས་ཞུ་ཡུལ་དང་། ཞི་བདེ་དང་བྱམས་བརྩེའི་མཚོན་རྟགས་དང་། མཚན་སྙན་ཆེ་ཤོས་སུ་གྱུར་ཡོད་པ་དང་། ཁོང་གི་མཛད་པ་འཕྲིན་ལས་དང་མཚན་སྙན་འཛམ་གླིང་ཕྱོགས་གང་དུ་ཁྱབ་པ་དེར་བོད་དང་བོད་མི་ཙམ་དུ་མ་ཟད། བོད་ཀྱི་ཆོས་དང་རིག་གཞུང་གཅིག་གྱུར་ཡིན་པའི་ཧཱི་མ་ལའི་མི་རིགས་རྣམས་ཀྱི་ཆེ་མཐོང་དང་མཚན་སྙན་ཡང་མཉམ་དུ་ཡོད་ཡོད་པ་ཞིག་ཡིན་པས། དེ་ལྟར་༸གོང་ས་མཆོག་གི་མཛད་པ་རྣམ་པར་ཐར་པ་རྣམས་ཤེས་པ་དང་བཀའ་དྲིན་རྗེས་སུ་དྲན་པའི་སྒོ་ནས་ཁོང་གིས་ལམ་སྟོན་བཀའ་སློབ་ཕེབས་པ་རྣམས་སྤྱི་སྒེར་ཚང་མས་གལ་འགངས་ཆེ་ཤོས་སུ་བརྩིས་ཏེ་ཉིན་རེའི་འཚོ་བའི་ནང་ཉམས་བཞེས་གནང་ཐུབ་པ་ཞིག་བྱུང་ན། ༸རྒྱལ་བའི་འཁྲུངས་སྐར་དུས་ཆེན་སྲུང་བརྩི་ཞུས་པའི་དགོས་དོན་ཚང་གི་ཡོད་ཚུལ་སོགས་དུས་ཆེན་དང་འབྲེལ་བའི་བཀའ་སློབ་གཟབ་རྒྱས་གནང་།
དེ་བཞིན་ས་གནས་གཞིས་འགོ་མཆོག་དང་ས་གནས་གྲོས་ཚོགས་ཀྱི་ཚོགས་གཙོ་རྣམ་གཉིས་ཀྱིས་དུས་ཆེན་དང་འབྲེལ་བའི་བཀའ་སློབ་གཟབ་རྒྱས་གནང་ཞིང་། གྲྭ་ཚང་གི་སློབ་གྲྭའི་འཛིན་རིམ་དྲུག་པ་ནས་བཅུ་པ་བར་གྱི་སློབ་ཕྲུག་དབར་༸རྒྱལ་བའི་མཛད་རྣམ་དང་རིག་གནས་ཐོག་འགྲན་བསྡུར་བགྲོ་གླེང་དང་། སློབ་ཕྲུག་ཁག་ཅིག་ནས་དབྱིན་སྐད་ཐོག་ནས་༸རྒྱལ་བའི་མཛད་རྣམ་ངོ་སྤྲོད་ཞུས།
ལོ་མང་རིང་གྲྭ་ཚང་ལ་ཞབས་ཞུ་གནང་མཁན་ལས་བྱེད་ཁག་ཅིག་ལ་སྲི་ཞུ་ཕུལ་བྱུང་གི་གཟེངས་བསྟོད་ཕྱག་ཁྱེར་དང་ལེགས་སྐྱེས་གསོལ་རས། འདི་ལོའི་དབྱར་ཁའི་ཚན་རིག་ཟབ་སྦྱོང་འཚོགས་སྐབས་གྲྭ་ཚང་གི་ཁོངས་ནས་ནུབ་ཕྱོགས་ལྟ་གྲུབ་དང་། དངོས་ཁམས། སྐྱེ་དངོས། དབང་རྩའི་ཐོག་རྒྱུགས་འབྲས་རྩེར་སོན་རྣམས་ལ་ལེགས་སྐྱེས་གསོ་རས། སམ་བྷོ་ཊའི་ཟློས་གར་དགེ་རྒན་དང་སློབ་ཕྲུག་རྣམས་ཀྱིས་གཞས་སྣ་གཟིགས་འབུལ་ཞུས་རྗེས། གྲྭ་ཚང་གི་སློབ་སྤྱི་མཆོག་གིས་སྐུ་མགྲོན་རྣམས་ལ་ཐུགས་རྗེ་ཆེ་ཞུས་པ་བཅས་མཛད་སྒོ་སྲུང་བརྩི་གཟབ་རྒྱས་ཞུས་པ་དང་། དེའི་ཉིན་རྒྱབ་ནས་གྲྭ་ཚང་ཁྱབ་ཁོངས་ཁང་ཚན་སོ་སོར་ཡང་༸རྒྱལ་བའི་འཁྲུངས་སྐར་སྲུང་བརྩི་གཟབ་རྒྱས་ཞུས་ཡོད་འདུག།
ཡང་སྤྱི་ཟླ་ ༦ ཚེས་ ༢༦ ཉིན། ཐཱའི་ཝན་དུ་དགའ་ལྡན་ཤར་རྩེ་ནང་བསྟན་སློབ་གཉེར་ཁང་དང་ཐའི་ཝན་སྐུ་ཚབ་དོན་གཅོད་ཐུན་མོང་གིས་གོ་སྒྲིག་ཞུས་ཏེ། ཐཱའི་ཝན་དུ་༸རྒྱལ་བའི་འཁྲུངས་སྐར་དུས་ཆེན་མཛད་སྒོ་གཟབ་རྒྱས་ཤིག་འཚོགས་ཡོད་ཅིང་། མཛད་སྒོ་དེར་༸གོང་ས་༸རྒྱལ་དབང་ཡིད་བཞིན་ནོར་བུ་མཆོག་གིས་དྲ་ལམ་བརྒྱུད་བཀའ་སློབ་གཟབ་རྒྱས་ཐད་གཏོང་བཀའ་དྲིན་བསྩལ་པར་མཛད་སྒོར་ཞུགས་པའི་མི་མང་སྟོང་ཚོ་མང་པོའི་སེམས་ལ་སྤྲོ་སྣང་དང་སེམས་མགུལ་ཚད་མེད་ཐེབས་ཡོད་འདུག་ལ། ཐཱའི་ཝན་དུ་དགའ་ལྡན་ཤར་རྩེ་ནང་བསྟན་སློབ་གཉེར་ཁང་གིས་༸རྒྱལ་བའི་འཁྲུངས་སྐར་དུས་ཆེན་སྲུང་བརྩི་ཞུས་པ་ད་རེས་ཐེངས་བཅུ་པ་ཆགས་ཡོད།
དེ་བཞིན་སིང་གྷ་པུར་དགའ་ལྡན་ཤར་རྩེ་འགྲོ་ཕན་གླིང་ཆོས་ཚོགས་དང་། ཨ་རི་ཐུབ་བསྟན་དར་རྒྱས་གླིང་དང་མཱ་ལེ་ཤཱའི་གྲྭ་ཚང་གི་ཆོས་ཚོགས་རྣམས་སུའང་༸རྒྱལ་བའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཞུས་པར། དེར་ཡོད་ཆོས་ཚོགས་ཀྱི་སློབ་མ་དང་ས་གནས་མི་མང་མང་པོར་༸རྒྱལ་བའི་མཛད་རྣམ་དང་བོད་ཀྱི་ཆོས་དང་རིག་གཞུང་ལ་གོ་རྟོགས་དང་དེ་ལ་བརྟེན་ནས་སོ་སོའི་མི་ཚེར་འགྱུར་བ་གསར་པ་ཞིག་འབྱུང་ངེས་པས་འབྲེལ་ཡོད་ཚང་མར་ཐུགས་རྗེ་ཆེ་ཞུ་རྒྱུ་ཡིན། མཐའ་དོན་༸གོང་ས་སྐྱབས་མགོན་༸རྒྱལ་དབང་ཡིད་བཞིན་ནོར་བུ་མཆོག་སྐུ་ཚེ་༸ཞབས་པད་ཡུན་དུ་བརྟན་ཞིང་། ཀུན་ཁྱབ་རླབས་ཆེན་གྱི་མཛད་འཕྲིན་མཐའ་དག་འགྲུབ་པའི་སྨོན་འདུན་བཅས། དགའ་ལྡན་ཤར་རྩེ་གྲྭ་ཚང་ནས་ ༢༠༡༨ སྤྱི་ཟླ་ ༧ ཚེས་ ༧ ལ།།
