འདི་ལོར་བོད་རིགས་གཞོན་སྐྱེས་མཛའ་འབྲེལ་རིག་རྩལ་འདུ་འཛོམས་ཆེན་མོ་བསྡུ་རྒྱུ་ཡིན།

རྒྱ་གར་ལྷོ་ཕྱོགས་མ་རྡར་སི་སློབ་ཕྲུག་ཚོགས་པའི་གོ་སྒྲིག་འོག་འདི་ལོར་ཤེས་ཡོན་དང་རིག་གཞུང་། རྩེད་མོ་བཅས་ཚན་པ་གལ་ཆེན་གསུམ་གྱི་ཐོག་ནས་མཐོ་སློབ་འགྲིམས་བཞིན་པའི་བོད་རིགས་སློབ་ཕྲུག་ཚོར་རྒྱ་གར་རྒྱལ་ཡོངས་བོད་རིགས་གཞོན་སྐྱེས་མཛའ་འབྲེལ་རིག་རྩལ་འདུ་འཛོམས་ཆེན་མོ་ཞེས་པའི་རིག་རྩལ་འགྲན་ཚོགས་ཤིག་བསྡུ་འཆར་འདུགདེ་རིང་སྔ་དྲོའི་ཆུ་ཚོད་ ༡༡།༡༥ སྟེང་དྷ་ས་མེག་གྷན་བོད་ཀྱི་གསོལ་མགྲོན་ཁང་དུ།  མ་རྡར་སི་བོད་རིགས་མཐོ་རིམ་སློབ་མའི་ལྷན་ཚོགས་ཀྱིས། མི་འགྱང་བར་རྒྱ་གར་ལྷོ་ཕྱོགས་སྦེལ་ཀོབ་བོད་མིའི་གཞིས་ཆགས་སུ་རྒྱ་གར་རྒྱལ་ཡོངས་བོད་རིགས་གཞོན་སྐྱེས་མཛའ་འབྲེལ་རིག་རྩལ་འདུ་འཛོམས་ཆེན་མོ་ཞེས་པ་ཞིག་འཚོགས་འཆར་ཡོད་པའི་སྐོར་ལ་གསར་འགོད་ལྷན་ཚོགས་ཤིག་བསྐོངས་སོང་བ་དང་། ལྷན་ཚོགས་ཐོག་རིག་རྩལ་འདུ་འཛོམས་ཆེན་མོ་གོ་སྒྲིག་ཚོགས་ཆུང་གི་ཚོགས་གཙོ་ལྷ་རོང་ལགས་ཀྱིས་ཉག་ཕྲ་བའི་བོད་མིའི་འཐབ་རྩོད་ཀྱི་དུས་སྐབས་འདིར་གཞོན་སྐྱེས་ཚོ་མི་རིགས་ཀྱི་སོན་རྩ་ཡིན་སྟབས། འགན་འཁུར་དྭང་དུ་བླངས་ཏེ་ངེས་པར་དུ་རང་མི་རིགས་ཀྱི་སྐད་ཡིག་དང་རིག་གཞུང་སྲུང་སྐྱོབ་བྱ་རྒྱུ་གལ་ཆེན་ཆགས་ཡོད་སྐོར་བརྗོད་སོང་།

རྒྱ་གར་རྒྱལ་ཡོངས་བོད་རིགས་གཞོན་སྐྱེས་མཛའ་འབྲེལ་རིག་རྩལ་འདུ་འཛོམས་ཆེན་མོའི་གོ་སྒྲིག་ཚོགས་ཆུང་གི་ཚོགས་གཙོ་ལྷ་རོང་ལགས་ཀྱིས་རིག་རྩལ་འདུ་འཛོམས་ངོ་སྤྲོད་དང་འབྲེལ་ཏེ་བརྗོད་དོན། རྒྱ་གར་རྒྱལ་ཡོངས་བོད་རིགས་མཐོ་རིམ་སློབ་མའི་མཛའ་འབྲེལ་རིག་རྩལ་འདུ་འཛོམས་ཆེན་མོ་ཞེས་པའི་ལས་གཞི་འདིའི་རྒྱབ་ལྗོངས་མདོར་བསྡུས་ཤིག་ཞུས་པ་ཡིན་ན། ལས་གཞི་འདི་ཐོག་མར་ཆི་ནེ་ནང་སློབ་སྦྱོང་བྱེད་བཞིན་པའི་མ་རྡར་སི་བོད་རིགས་སློབ་ཕྲུག་མཐུན་ཚོགས་(Tsam)ནས་མགོ་འཛུགས་བྱས་ཏེ་ལོ་ངོ་ ༡༣ ལྷག་འགྲོ་བཞིན་ཡོད་པ་རེད། ད་ལྟའི་ཆ་ལ་ས་གནས་སུ་བོད་རིགས་སློབ་ཕྲུག་ཉུང་དུ་སོང་བའི་རྐྱེན་གྱིས་དཔལ་འབྱོར་གྱི་གནས་བབ་ལ་དཀའ་ངལ་བྱུང་ནས་ད་ལོར་ཁོ་རང་ཚོས་གོ་སྒྲིག་བྱེད་ཐུབ་ཀྱི་མེད་པ་དང་། དེ་བཞིན་ས་གནས་ཁག་གཞན་པའི་སློབ་ཕྲུག་ཚོས་ཀྱང་བདག་པོ་མ་བརྒྱབ་པ་ཞིག་ཆགས་ཀྱི་ཡོད་སྟབས། ལས་གཞི་གལ་ཆེན་པོ་འདི་འདྲ་ཞིག་ད་ཐེངས་ང་ཚོས་གོ་སྒྲིག་མ་བྱས་པ་ཡིན་ན་རྒྱུན་ཆད་འགྲོ་བཞིན་ཡོད་པ་རེད། ལས་གཞི་འདི་བོད་པའི་གཞོན་སྐྱེས་ཚོོའི་ནུས་པ་མཉམ་སྤུང་བྱེད་སའི་གཞི་རྩ་ལྟ་བུ་ཞིག་ཆགས་ཡོད་པའི་རྒྱུ་མཚན་ལ་བརྟེན་ནས། དེ་རིང་ང་ཚོས་འདིར་གོ་སྒྲིག་ཚོགས་ཆུང་ཞིག་བཙུགས་ནས་ལས་གཞི་འདི་ངེས་པར་དུ་བསྒྲུབ་དགོས་ཀྱི་འདུག་བསམས་པ་རེད་ལ། ང་ཚོས་ལས་གཞི་འདི་མུ་མཐུད་རྒྱ་ཆེ་བ་ཞིག་དང་སྔར་ལྷག་གི་ཚགས་ཚུད་པ་ཞིག་ཡོང་ན་སྙམ་ནས་འབད་བརྩོན་བྱེད་བཞིན་ཡོད། ཅེས་དང་། གསར་འགོད་ལྷན་ཚོགས་སྐོང་དགོས་དོན་ནི་རྒྱ་གར་རྒྱལ་ཡོངས་ནང་ཡོད་པའི་བོད་རིགས་སློབ་ཕྲུག་ལས་གྲུབ་པའི་ཚོགས་པ་ཆ་ཚང་བ་ཞིག་ལས་གཞི་དེའི་ནང་མཉམ་ཞུགས་བྱེད་ཐུབ་ན་བསམ་ཡོད་སྐོར་བརྗོད་སོང་།

ལས་གཞིའི་དགོས་དམིགས་སྐོར་ལ་ཁོང་གིས། ལས་གཞིར་དམིགས་ཡུལ་གཙོ་བོ་གསུམ་ཡོད་པ་ལས་དང་པོ་བོད་རིགས་གཞོན་སྐྱེས་རྣམས་མ་འོངས་པའི་སོན་རྩ་ཡིན་སྟབས། ༧གོང་ས་མཆོག་གི་བཀའ་སློབ་གཞིར་བཟུང་ཆོས་དང་རིག་གཞུང་གི་སྡིངས་ཆ་ཉར་ཚགས་ཀྱིས་ཉམས་པ་སླར་གསོ་དང་མི་ཉམས་གོང་སྤེལ་བྱེད་པ་དེ་ཡིན་པ་དང་།  གཉིས་པ་སློབ་ཕྲུག་ཚོགས་པ་ཁག་ནི་རང་རེའི་སྤྱི་ཚོགས་ནང་གི་མགོ་འཁྲིད་ཀྱི་ནུས་པ་སྐྱེད་སྲིང་བྱེད་ས་དེ་ཡིན་སྟབས། རྒྱ་གར་གྱི་ས་གནས་མང་པོའི་ནང་གནས་པའི་བོད་རིགས་སློབ་ཕྲུག་ཚོགས་པ་ཁག་མཉམ་འཛོམས་ཀྱི་སྡིངས་ཆ་ཞིག་བསྐྲུན་ཏེ། བོད་ཀྱི་ད་ལྟའི་གནས་བབ་ལ་དཔག་པའི་ནུས་པ་མཉམ་སྤུང་དང་མ་འོངས་པའི་མགོ་འཁྲིད་སྐྱེད་སྲིང་སོགས་ཀྱི་ཐོག་ཕན་ཐོགས་ཡོང་ཐབས། གསུམ་པ་སློབ་མ་ནང་ཁུལ་བར་བསམ་ཚུལ་བརྗེ་ལེན་བྱས་ཏེ་ས་གནས་ས་ཐོག་ནས་ལས་འགུལ་སྤེལ་ཕྱོགས་དང་། བསམ་ཚུལ་མི་འདྲ་བ་མཉམ་གཅིག་ཏུ་སྤུངས་ནས་གཞོན་སྐྱེས་ཚོས་ལོ་གཅིག་གི་ནང་བོད་དོན་དྲིལ་བསྒྲགས་ལས་འཆར་སྤེལ་རྒྱུ་བཅས་ཡིན་སྐོར་སོགས་བརྗོད་སོང་།

རྒྱ་གར་རྒྱལ་ཡོངས་བོད་རིགས་མཐོ་རིམ་སློབ་མའི་ལྷན་ཚོགས་ཀྱི་སྤྱི་ཁྱབ་སྟངས་འཛིན་པ་རིན་ཆེན་དབང་རྒྱལ་ལགས་ཀྱིས།  རྩ་བའི་རྒྱ་གར་རྒྱལ་ཡོངས་བོད་རིགས་སློབ་མའི་ངོ་བོ་ལས་གྲུབ་པའི་ལས་གཞི་འདི་མ་དྷི་ར་སི་བོད་རིགས་སློབ་ཕྲུག་མཐུན་ཚོགས་ནས་འགན་འཁུར་ཏེ་འདས་པའི་ལོ་ངོ་ ༡༣ རིང་ལས་གཞི་འདི་སྤེལ་ནས་ཡོང་ཡོད་པ་རེད། འོན་ཀྱང་། ད་ལྟའི་ཆར་འདུ་འཛོམས་ཆེན་མོ་དེ་ཚོགས་མ་ཐུབ་པའི་དཀའ་ངལ་ཞིག་འཕྲད་ཀྱིན་ཡོད་པའི་གནས་སྟངས་ཤིག་ཆགས་ཡོད། དེའི་རྒྱུ་རྐྱེན་ནི་ཕྱོགས་གཅིག་ནས་མ་དྷི་ར་སིའི་ནང་སློབ་འཇུག་བྱེད་པའི་སློབ་མ་ཇེ་ཉུང་ཡིན་པས་དཔལ་འབྱོར་མཁོ་སྒྲུབ་བྱེད་པ་སོགས་ལ་དཀའ་ངལ་ཞིག་འཕྲད་དེ། ད་ལྟའི་ཆར་ཚོགས་ཐུབ་ཐབས་མེད་པའི་གནས་སྟངས་ཤིག་གི་འོག་ཁོ་རང་ཚོས་ང་ཚོར་ཡིག་ཆ་རྩིས་སྤྲོད་བྱས་ཡོད་པ་རེད། ང་ཚོས་ལས་གཞི་འདི་གནད་འགག་ཆེན་པོ་ཞིག་ལ་རྩིས་དགོས་དོན་ནི། འདས་པའི་ལོ་ ༡༣ རིང་གི་བརྒྱུད་རིམ་ལ་བལྟས་ཡོང་དུས། རྒྱ་གར་རྒྱལ་ཡོངས་ཀྱི་བོད་རིགས་སློབ་མའི་ཚོགས་སྡེ་ཁག་གི་མགོ་འཁྲིད་མཉམ་འཛོམས་བྱས་ཏེ་ནུས་པ་མཉམ་སྤུང་བྱས་ཡོད་པ་དེ་འདྲ་གང་ཡང་མི་འདུག སྤྱིར་བཏང་བོད་མིའི་སྒྲིག་འཛུགས་ཀྱི་ངོས་ནས་གཞོན་སྐྱེས་ཚོར་ཟབ་སྦྱོང་སྤྲོད་པ་སོགས་གནང་སྐབས། གཞོན་སྐྱེས་མཉམ་འཛོམས་ཀྱི་དུས་སྐབས་ཤིག་རང་བཞིན་གྱིས་ཆགས་འགྲོ་ཡི་ཡོད་ཀྱང་། གཞོན་སྐྱེས་རང་གིས་དྭང་དུ་བླངས་ཏེ་བྱས་བཞག་པ་ལས་གཞི་འདི་ལས་ལྷག་ཅིག་ད་ལྟའི་བར་དུ་མེད་བསྡད་པའི་བཟོ་འདྲ་པོ་ཞིག་རེད། ཅེས་བརྗོད་སོང་།

ལས་གཞིའི་ནང་ཤེས་ཡོན་དང་རིག་གཞུང་། རྩེད་མོ་བཅས་ཚན་པ་གལ་ཆེན་གསུམ་ཡོད་པ་ལས་ཤེས་ཡོན་ནང་གཙོ་བོ་ཟླ་གཅིག་གི་གོང་ནས་གསལ་བརྡ་བཏང་སྟེ་དཔྱད་རྩོམ་རང་བཞིན་ལྡན་པའི་རྩོམ་ཡིག་འགྲན་བསྡུར་བྱ་རྒྱུ་དང་། གཉིས་པ་ད་ལོའི་གློག་བརྙན་བཟོ་སྐྲུན་གྱི་བརྗོད་གཞི་ནི་རྒྱ་གར་ནང་ཁ་འཐོར་དུ་ཕྱིན་པའི་སློབ་ཕྲུག་ཚོགས་པ་ཁག་གི་ངོ་སྤྲོད་ཡིན་པ་དང་། རིག་གཞུང་འཁྲབ་སྟོན་ནང་རྐྱང་གཞས་དང་འཁྲབ་གཞས། མཉམ་གཞས། དེ་བཞིན་རྩེད་མོའི་ནང་བུ་བུ་མོའི་གཉིས་ཀྱི་སིལ་སྤོལ་སོགས་ཡོད་སྐོར་བརྗོད་སོང་།

རྒྱ་གར་རྒྱལ་ཡོངས་བོད་རིགས་གཞོན་སྐྱེས་མཛའ་འབྲེལ་རིག་རྩལ་འདུ་འཛོམས་ཆེན་མོའི་ནང་འཛུལ་ཞུགས་སློབ་ཕྲུག་མཐུན་ཚོགས་ཀྱི་ཚོགས་པ་ཁག་ནི་བྷེང་ལོར་ས་གནས་གཞོན་ནུ་ལྷན་ཚོགས་དང་ཏཱ་ལའི་བླ་མ་མཐོ་རིམ་སློབ་གཉེར་ཁང། མེ་སོར་བོད་རིགས་སློབ་ཕྲུག་མཐུན་ཚོགས། མ་རྡར་སི་བོད་རིགས་སློབ་ཕྲུག་མཐུན་ཚོགས། བྷང་ལོར། བྷ་རོ་ཀྲ། ལྡི་ལི། ས་རཱ་བོད་ཀྱི་མཐོ་རིམ་སློབ་གཉེར་ཁང། ལྡེ་ར་ལྡུན་བྱང་སེམས་ཚོགས་པ། ཝཱ་ན་བོད་ཀྱི་གཙུག་ལག་སློབ་གཉེར་ཁང་། ཅན་རྡི་གྷར་ས་གནས་གཞོན་ནུ་སོགས་ཡིན་པ་དང་། འདུ་འཛོམས་ཆེན་མོ་དེ་འདི་ལོའི་ཕྱི་ཟླ་དགུ་བ་བཅུ་བ་ཡས་མས་ཤིག་ལ་འཚོགས་འཆར་ཡོད་ཀྱང་། སྤྱིའི་འགྲོ་སོང་ཚོད་རྩིས་བྱས་ན་ཧིན་སྒོར་འབུམ་ ༥།༥ ཙམ་ཡིན་པ་དང་། ད་ལྟའི་བར་བོད་ཀྱི་གཞུང་འབྲེལ་མ་ཡིན་པའི་ཚོགས་པ་ཁག་ལྔ་དང་ཀིརྟི་དགོན་པ་བཅས་ནས་ཁྱོན་ཧིན་སྒོར་ཁྲི་ ༧ མ་ཟིན་ཙམ་ཞིག་ལས་རག་མེད་སྟབས། རིག་རྩལ་འདུ་འཛོམས་ཆེན་མོ་དེ་ག་དུས་ཤིག་ལ་འཚོགས་ཐུབ་མིན་ངེས་གཏན་མེད་སྐོར་བརྗོད་སོང་།

 གསར་འགོད་པ། སྐལ་བཟང་སྦྱིན་པ་དང་བསོད་ནམས་རྒྱ་མཚོ།