མ་ལེ་ཤི་ཡའི་ནང་བུད་མེད་གཉིས་ཀྱིས་མཚན་མཐུན་དགའ་རོགས་བསྒྲིགས་པའི་རྐྱེན་གྱིས་ཡུལ་དེའི་ཆོས་ཁྲིམས་གཞིར་བཟུང་ལྕག་ཚན་ ༦ རེ་གཞུས།
བྷི་བྷི་སི་གསར་ཁང་གི་གནས་ཚུལ་སྤེལ་བ་ལྟར་ན། མ་ལེ་ཤི་ཡ་ནང་ཁ་ཆེའི་བུད་མེད་ལོ་ ༢༢ ཅན་ཞིག་དང་ ༣༢ ཅན་གཉིས་མཚན་མཐུན་དགའ་རོགས་བསྒྲིགས་པ་གཞུང་གིས་ཤེས་རྟོགས་བྱུང་སྟེ། ཁ་སང་ཡུལ་དེའི་ཊེ་རན་གྷ་ནའོ་མངའ་སྡེའི་ (Terengganu) ཤཱ་རེ་ཡ་མཐོ་རིམ་ཁྲིམས་ཁང་ (Sharia High Court) གིས་བུད་མེད་གཉིས་ཀྱི་ཕ་མ་སྤུན་མཆེད་བཅས་འཛོམས་ཏུ་བཅུག་སྟེ། མི་གྲངས་ ༡༠༠ ལྷག་འཛོམས་པའི་ཁྲོམ་གཞུང་དུ་བུད་མེད་དེ་གཉིས་ལ་ལྕག་ཚན་ཐེངས་ ༦ རེ་གཞུས་ཡོད་པ་དང་། དེ་བཞིན་ཨ་སྒོར་ ༨༠༠ རེ་ཡིས་དངུལ་ཆད་བཅད་ཡོད་འདུག
འདི་ལོའི་ཕྱི་ཟླ་ ༤ ནང་མངའ་སྡེ་དེའི་མི་མང་འཛོམས་སའི་གླིང་ཀ་ཞིག་ཏུ་བུད་མེད་དེ་གཉིས་ཀྱིས་རླངས་འཁོར་ནང་འཁྲིག་སྤྱོད་བྱེད་སྐབས་འཛིན་བཟུང་བྱས་ཡོད་པ་དང་། ཟླ་སྔོན་མར་ཡུལ་དེའི་ཆོས་ཁྲིམས་གཞིར་བཟུང་ཉེས་ཆད་གཏན་འབེབ་བྱས་ཡོད་པ་དང་། ད་རེས་ཀྱི་མཚན་མཐུན་དགའ་རོགས་ཀྱི་ཁྲིམས་ཆད་དེ་ནི་ཡུལ་དེའི་ནང་གི་དེའི་འབྲེལ་གྱི་ཉེས་ཆད་ཐོག་མ་དེ་ཡིན་པ་དང་། བུད་མེད་གཉིས་ལ་ཁྲིམས་ཆད་ལག་བསྟར་བྱེད་སྐབས་ཁོང་གཉིས་ཀྱི་ཕ་མ་སྤུན་མཆེད་བཅས་ནང་མི་ཚང་མ་སྐད་བཏང་ནས་། མི་ཚོགས་ཁྲོད་ངོ་ཚ་དང་མིང་ཆད་བཟོ་ཐབས་བྱས་ཡོད་པ་རེད།
ས་གནས་དེ་གའི་རྒྱལ་སྤྱིའི་ཉེས་ཡང་ཚོགས་པའི་ཚོགས་གཞོན་གྷན་ལི་ (Gwen Lee) ཡིས། མང་ཚོགས་དཀྱིལ་དུ་ལྕག་ཚན་གཞུས་པ་དེ་ནི་མ་ལེ་ཤི་ཡའི་འགྲོ་བ་མིའི་ཐོབ་ཐང་གི་འཇིགས་སུ་རུང་བའི་སྣང་བརྙན་དེ་མཚོན་བཞིན་ཡོད་པ་དང་། ལྕག་ཚན་གཞུས་པ་ནི་མནར་གཅོད་བྱེད་སྟངས་གཞན་ཞིག་ཡིན་པ་དང་། རང་འཐད་བྱུང་ཡོད་པའི་བུད་མེད་དེ་གཉིས་ལ་ཚད་མེད་ཀྱི་ཉེས་ཆད་བཅད་པ་དེས་མ་ལི་ཤི་ཡ་བསྐྱར་དུ་མུན་ནག་གི་དུས་སུ་འཁྲིད་བཞིན་པ་རེད། ཅེས་བརྗོད་འདུག
མ་ལེ་ཤི་ཡ་ནང་གི་མི་འབོར་བརྒྱ་ཆ་ ༦༡ ཙམ་གྱིས་ཁ་ཆེ་ཆོས་ལུགས་ལ་དད་པ་བྱེད་ཀྱི་ཡོད་པ་དང་། ནང་ཆོས་ལ་དད་པ་བྱེད་མཁན་གྱིས་བརྒྱ་ཆ་ ༡༩ ཙམ་ཟིན་གྱི་ཡོད་འདུག ཡུལ་དེའི་སྤྱི་མང་གི་བཅའ་ཁྲིམས་ནང་མང་ཚོགས་ཀྱི་དཀྱིལ་དུ་ལྕག་ཚན་གཞུ་པ་བཀག་སྡོམ་བྱས་ཡོད་ན་ཡང་། ཆོས་ཁྲིམས་ནང་ལྕག་ཚན་གཞུ་ཆོག་གི་ཡོད་འདུག འདས་པའི་ཟླ་ཤས་རིང་མ་ལེ་ཤི་ཡ་ནང་མཚན་མཐུན་དགའ་རོགས་དང་མཚན་བསྒྱུར་སོགས་ཀྱི་གནད་དོན་ལ་སྤྱི་ཚོགས་ནང་ལྟ་སྟངས་འདྲ་མིན་གྱི་འགལ་ཟླ་བྱུང་བཞིན་ཡོད་འདུག་ལ། ད་ལོའི་ཟླ་ ༧ ཚེས་ ༡༥ ཉིན་རྒྱལ་ས་ཀོ་ལ་ལམ་པུར་ (Kuala Lumpur) དུ་མཚན་བསྒྱུར་བུད་མེད་ཤིག་ལ་མི་འགས་དོན་མེད་ལ་གཅར་རྡུང་དྲག་པོ་བྱས་ཡོད་པ་རེད་འདུག
གསར་འགོད་པ། ཀླུ་མགོན་ཐར།
