ཕྱི་དྲིལ་པར་རིས་འགྲེམས་སྟོན་གྱི་མཛད་སྒོའི་སྟེང་དཔལ་འབྱོར་བཀའ་བློན་མཆོག་གིས་བོད་ནང་གི་བོད་མི་ཚོས་རྩོམ་ཞིག་བྲིས་པའམ་གླུ་གཞས་ཤིག་བླངས་རུང་ཆིག་སྒྲིལ་དང་རྒྱལ་ཞེན་སྐོར་ཡིན་པས་བཙན་བྱོལ་བོད་མི་ཚོས་ཁོ་ཚོར་མིག་དཔེ་བལྟས་ནས་མི་ལོ་ ༦༠ སྲུང་གཙི་དང་བོད་ནང་ཕྱིར་ལོག་པའི་རེ་བ་རྒྱག་དགོས་སྐོར་གསུངས་སོང་། 
དེ་རིང་སྔ་དྲོའི་ཆུ་ཚོད་ ༡༠ ཐོག བཞུགས་སྒར་དྷ་སའི་ཕྱི་དྲིལ་བོད་ཀྱི་འགྲེམས་སྟོན་ཁང་དུ། ཕྱི་དྲིལ་བོད་ཀྱི་འགྲེམས་སྟོན་ཚན་པའི་གོ་སྒྲིག་འོག བོད་མིའི་འགོག་རྒོལ་གྱི་ལོ་ངོ་ ༦༠ ཐམ་པ་ཞེས་པའི་བརྗོད་གཞིའི་ཐོག་དུས་ཐུང་པར་རིས་འགྲེམས་སྟོན་ཞིག་བྱས་སོང་བ་དང་། མཛད་སྒོའི་ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་གིས་པར་རིས་འགྲེམས་སྟོན་དབུ་འབྱེད་དང་སྦྲགས། ཚོགས་བཅར་བ་ཡོངས་ནས་བོད་རྒྱལ་ཁབ་ཆེན་པོའི་རྒྱལ་གླུ་བླངས་པ་དང་རྒྱལ་གཅེས་དཔའ་བོ་དཔའ་མོ་རྣམ་ལ་མྱ་ངན་གུས་འདུད་སྐར་མ་གཅིག་རིང་གནང་སོང་།
མཛད་སྒོའི་ཐོག་མར་འགྲེམས་སྟོན་འགན་འཛིན་བཀྲིས་ཕུན་ཚོགས་ལགས་ཀྱིས་པར་རིས་འགྲེམས་སྟོན་ཞུ་དགོས་པའི་རྒྱུ་མཚན་སྐོར་ལ། ཕྱི་ལོ་ ༡༩༥༩ ལོ་ཟླ་ ༣ ཚེས་ ༡༠ ཉིན། རྒྱ་ནག་དམར་པོའི་གཞུང་གིས་དྲག་གནོན་གྱི་སྲིད་བྱུས་ལ་བོད་མིས་འགོག་རྒོལ་གཞི་རྒྱ་ཆེ་བ་ཞིག་གནང་ཡོད་པ་རེད། དུས་དེ་ནས་བཟུང་ཟླ་ ༣ ཚེས་ ༡༠ དེ་བོད་མིའི་རང་དབང་སྒེར་ལངས་དང་གསུམ་བཅུའི་དུས་དྲན་ཞེས་ངོས་འཛིན་དང་སྲུང་གཙི་བྱེད་ཀྱི་ཡོད་པ་རེད། དེ་བཞིན་འདི་ལོའི་གསུམ་བཅུའི་དུས་དྲན་ནི་ལོ་ངོ་ ༦༠ ཧྲིལ་བོ་འཁོར་གྱི་ཡོད་སྟབས། འདས་པའི་ལོ་ངོ་ ༦༠ རིང་བོད་ཀྱི་དཔའ་བོ་དཔའ་མོ་རྣམ་གྱི་ལུས་སྲོག་ཕན་ཆད་བློས་བཏང་གནང་བར་རྗེས་དྲན་དང་དྲན་གསོ་ཞུས་པར་དམིགས་ནས་ཐེངས་འདིའི་པར་རིས་འགྲེམས་སྟོན་ཞུ་ཡི་ཡོད། ཅེས་བརྗོད་སོང་།
དེའི་རྗེས་ཕྱི་དྲིལ་དྲུང་ཆེ་དག་པོ་བསོད་ནམ་ནོར་བུ་ལགས་ནས་ལོ་འདི་གལ་ཆེན་ཡིན་སྐོར་ལ། ཕྱི་ལོ་ ༡༩༤༩ ལོར་རྒྱ་ནག་གིས་བོད་ལ་བཙན་འཛུལ་བྱས་ནས་ལོ་ངོ་ ༧༠ ཧྲིལ་པོ་དང་། ཕྱི་ལོ་ ༡༩༥༩ ལོར་བོད་མི་ཡོངས་ནས་རྒྱ་ནག་གཞུང་གི་དྲག་གནོན་ལ་ཞི་བའི་ངོ་རྒོལ་གནང་ནས་ལོ་ངོ་ ༦༠ ཧྲིལ་པོ། དེ་བཞིན་ཕྱི་ལོ་ ༢༠༠༨ ལོར་བོད་མི་ཡོངས་ནས་རྒྱ་གཞུང་ལ་ཞི་བའི་ངོ་རྒོལ་བྱས་ནས་ལོ་ངོ་ ༡༡ འཁོར་གྱི་ཡོད་པས་ལོ་འདི་གལ་ཆེན་ཆགས་ཡོད་པ་མ་ཟད། དུས་སྐབས་འདི་དག་ལ་རྒྱ་ནག་གཞུང་གིས་དྲིལ་བསྒྲགས་ལོག་པ་བྱེད་མུས་ཡིན་པས་ང་ཚོས་དངོས་ཡོད་ཀྱི་གནས་སྟངས་དེ་པར་རིས་འགྲེམས་སྟོན་དང་ལོ་རྒྱུས་ཀྱི་ངོས། དེ་བཞིན་སྐབས་དེ་དག་ཏུ་ཡུལ་དངོས་སུ་ཡོད་པའི་མིས་དཔང་པོ་བྱས་ནས་མཐོང་ཐོས་མྱོང་གསུམ་འགྲེལ་བརྗོད་བྱ་རྒྱུ་གལ་ཆེན་རེད། ཅེས་བརྗོད་སོང་།
དེ་བཞིན་ཟླ་འདིའི་ཕྱི་ཚེས་ ༦ ཉིན། རྒྱ་ནག་དམར་ཤོག་ཚོགས་པའི་ཚོགས་ཆེན་གཉིས་དང་བསྟུན། བོད་རང་སྐྱོང་ལྗོངས་དྲུང་ཆེ་ཝུ་ཡེན་ཅེ་ (Wu Yingjie) ཟེར་བ་དེས། བོད་མི་ཚོའི་ནང་༧གོང་ས་མཆོག་ལ་དད་གུས་ཞུ་མཁན་མེད་པར་དམར་ཤོག་ཚོགས་པར་དགའ་མོས་བྱེད་བཞིན་ཡོད་ཚུལ་སོགས་བརྗོད་ཡོད་པའི་སྐོར་ལ་ཕྱི་དྲིལ་དྲུང་ཆེ་ལགས་ནས། བོད་རྒྱལ་ཁབ་དང་མི་རིགས་ཀྱི་ངོ་བོ་མཚོན་པའི་ཆོས་དང་རིག་གཞུང་སྲུང་སྐྱོབ་ཀྱི་ལས་འགུལ་དེ་ཚོར་རྒྱ་གཞུང་གིས་ཁ་བྲལ་གྱི་བྱ་བ་རེད་ཟེར་པ་སོགས། ༧རྒྱལ་བ་རིན་པོ་ཆེ་མཆོག་ནས་བོད་མིར་ཕན་ཐོགས་སྣེ་གཅིག་ཀྱང་བྱས་མེད་སྐོར་བཤད་ཀྱི་ཡོད་པ་རེད། ཕན་ཐོགས་བྱས་དང་མ་བྱས་དེ་༧རྒྱལ་བ་རིན་པོ་ཆེ་མཆོག་རྒྱ་ནག་ནང་ཕེབས་ཏེ་རི་བོ་རྩེ་ལྔར་གནས་མཇལ་དུ་ཕེབས་རྒྱུ་གསུང་གི་ཡོད་པ་དེར་རྒྱ་གཞུང་གིས་ཆོག་མཆན་གནང་ཚེ། བོད་མི་མང་གི་སེམས་ནང་༧རྒྱལ་བ་རིན་པོ་ཆེ་མཆོག་ལ་དད་པ་དང་ཡིད་ཆེས་ག་ཚོད་ཡོད་པ། དེ་བཞིན་༧རྒྱལ་བ་རིན་པོ་ཆེ་མཆོག་ནས་བོད་མི་མང་ལ་ཕན་ཐོགས་ག་ཚོད་ཡོད་མེད་དེ་ཤེས་ངེས་རེད། དེ་ལས་གལ་ཆེ་བ་ཞིག་ལ་༧རྒྱལ་བ་རིན་པོ་ཆེ་མཆོག་ལ་བོད་པའི་མགོ་འཁྲིད་ཡིན་ཟེར་བ་དེ་ཚོས་མཚན་སྨད་ཞུས་སྟབས་གོ་གནས་འཕར་གྱི་ཡོད་པ་རེད། ང་ཚོ་བོད་མི་ས་ཡ་དྲུག་ལ་༧རྒྱལ་བ་རིན་པོ་ཆེ་བཀའ་དྲིན་ཆེ་བ་སྨོས་མེད་རེད་ལ། རྒྱལ་བ་རིན་པོ་ཆེ་མཆོག་ལ་མཚན་སྨད་ཞུ་མཁན་གྱི་བོད་རིགས་དང་རྒྱ་རིགས་དེ་ཚོའང་མཚན་སྨད་ཞུས་ཏེ་གོ་གནས་འཕར་ཀྱི་ཡོད་པས། ༧རྒྱལ་བ་རིན་པོ་ཆེ་མཐའ་ན་ཁོང་ཚོར་ཀྱང་བཀའ་དྲིན་ཆེན་པོ་རེད། ཅེས་བརྗོད་བྱུང་།
སྐུ་མགྲོན་གཙོ་བོ་དཔལ་འབྱོར་བཀའ་བློན་མཆོག་ནས་ཕྱི་ལོ་ ༡༩༨༧ ནས་བསྟུད་མར་ལོ་གསུམ་ལ་བོད་མིས་རྒྱ་གཞུང་ལ་ཞི་བའི་ངོ་རྒོལ་བྱུང་བར་བརྟེན། རྒྱ་ནག་གི་སློབ་ཕྲུག་ཚོར་སེམས་ཚོར་བྱུང་ནས་གནམ་བདེ་སྒོ་མོ་ཆེའི་ལས་འགུལ་དེ་བྱུང་བ་ཁོང་སྒེར་ངོས་ནས་འདོད་ཀྱི་ཡོད་པ་གསུངས་རྗེས། ད་ལྟའང་བོད་ནང་གི་བོད་མི་ཚོའི་སྙིང་སྟོབས་ལ་ཞུམ་པ་མེད་པར་གནས་ཡོད་པ་དང་། ད་བར་བོད་ནང་ཁྱོན་མི་གྲངས་ ༡༥༣ ལྷག་གིས་བོད་དོན་ཆེད་རང་ལུས་མེར་སྲེག་གནང་བ་དང་། དེ་བཞིན་བོད་ནང་རྩོམ་ཞིག་བྲིས་པའམ་གླུ་གཞས་ཤིག་བླངས་རུང་ཆིག་སྒྲིལ་དང་རྒྱལ་ཞེན། སྐད་ཡིག་དང་ཁོར་ཡུག་སོགས་བཤད་ཀྱི་ཡོད་པས། དེ་ཚོར་བཙན་བྱོལ་བོད་མི་ཚོས་མིག་དཔེར་བལྟས་ནས་མི་ལོ་ ༦༠ སྲུང་གཙི་བྱ་དགོས་པ་དང་བོད་ནང་ཕྱིར་ལོག་པའི་རེ་བ་རྒྱག་དགོས་སྐོར་སོགས་གསུངས་སོང་།
ཡང་དཔལ་འབྱོར་བཀའ་བློན་མཆོག་ནས་འགྲེམས་སྟོན་ཁང་དང་འབྲེལ་ནས། ད་ལྟ་ནི་དྲ་རྒྱའི་དུས་རབས་ཡིན་པས་པར་རིས་འགྲེམས་སྟོན་ཆ་ཚང་དྲ་ཐོག་ནས་འཛམ་གླིང་གང་སའི་མི་ཚོས་ལྟ་ཐུབ་པ་ཞིག་དང་། འཛམ་གླིང་གི་སྐད་ཡིག་གཞན་ནང་པར་རིས་ཀྱི་འགྲེལ་བཤད་བྲིས་ཏེ་སྐད་ཡིག་སྣ་མང་ནང་རྒྱ་སྐྱེད་གནང་དགོས་པ། དེ་དང་འབྲེལ་ནས་བོད་དོན་རྒྱབ་སྐྱོར་བ་གསར་པ་འཚོལ་ཐབས་གནང་དགོས་པ། དེ་བཞིན་གཞུང་འབྲེལ་མ་ཡིན་པའི་གསར་འགྱུར་བརྒྱུད་ལམ་ཁག་ནས་ཀྱང་འཁུར་མཉམ་ལེན་གྱིས་བོད་ཀྱི་གནད་དོན་དེ་རྒྱལ་སྤྱིའི་སྤྱི་ཚོགས་ནང་སྐྱེལ་ཐབས་གནང་དགོས་སྐོར་གྱི་རེ་སྐུལ་གནང་སོང་།
མཛད་སྒོའི་མཇུག་ཏུ་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་གོ་སྒྲིག་འོག ཕྱི་ལོ་ ༡༩༥༩ ལོའི་བོད་མིའི་རང་དབང་སྒེར་ལངས་ནང་མཉམ་ཞུགས་གནང་མྱོང་པའི་བློ་བཟང་ཡོན་ཏན་ལགས་དང་། དེ་བཞིན་ཕྱི་ལོ་ ༡༩༨༩ ལོའི་བོད་མིའི་ངོ་རྒོལ་ལས་འགུལ་ནང་སོགས་ལ་མཉམ་ཞུགས་གནང་མྱོང་ཡོད་པའི་ཆབ་སྲིད་བཙོན་ཟུར་ངག་དབང་འོད་འབར་ལགས་བཅས་ཀྱིས་བོད་མིའི་ཞི་རྒོལ་སྐོར་ལ་བགྲོ་གླེང་ཆུ་ཚོད་གཅིག་ཙམ་རིང་གནང་སོང་།
གསར་འགོད་པ། ཀླུ་མགོན་ཐར།
