༧གོང་ས་མཆོག་གིས་དེང་སྐབས་ཀྱི་འཛམ་གླིང་ནང་ཕྱི་ལུས་པོའི་འཕྲོད་བསྟེན་དང་ནང་སེམས་ཀྱི་འཕྲོད་བསྟེན་གཉིས་མཉམ་གནས་ཡོང་བར་རྒྱ་གར་གྱིས་ནུས་པ་ཆེན་པོ་འདོན་ཐུབ་ཀྱི་ཡོད་སྐོར་གསུངས་འདུག
དེ་རིང་སྔ་དྲོའི་ཆུ་ཚོད་ ༡༠ ཐོག རྒྱ་གར་གྱི་རྒྱལ་ས་ལྡི་ལིའི་ཨན་དྷ་ཛི་ཧའེ་ཊི་ (Andaz Hyatt Hotel) གསོལ་མགྲོན་ཁང་དུ། ༧གོང་ས་རྒྱལ་བ་རིན་པོ་ཆེ་མཆོག་དབུ་བཞུགས་ཐོག་ཏཱ་ལའི་བླ་མའི་དགེ་རྩ་དང་ཨ་རིའི་ཨེ་མོ་རི་གཙུག་ལག་སློབ་གཉེར་ཁང་གཉིས་ཀྱིས་མཉམ་སྒྲུབ་གནང་པའི་སྤྱི་ཚོགས་དང་སེམས་མྱོང་། བཟང་སྤྱོད་བཅས་ཀྱི་བསླབ་གཞི་ (Social, Emotional and Ethical Learning/SEE Learning) གཏན་འབེབ་ཀྱི་ལས་གཞི་ཡོངས་སུ་གྲུབ་པ་དང་འབྲེལ་བའི་གསར་འགོད་གསལ་བསྒྲགས་ཤིག་བསྐྱངས་ཡོད་པ་དང་། སྐབས་དེར་༧གོང་ས་མཆོག་ནས་ད་ལན་གྱི་ཉིན་འགའི་ཚོགས་འདུའི་ནང་བཟང་སྤྱོད་དང་འབྲེལ་བའི་བསླབ་གཞི་ལག་ལེན་ཐོག་ཕན་ཐོགས་ཡོད་པའི་དགོངས་ཚུལ་ཐོས་རྒྱུའི་རེ་བ་ཆེན་པོ་བྱེད་ཀྱི་ཡོད་སྐོར་གསུངས་འདུག
ཨེ་མོ་རེ་གཙུག་ལག་སློབ་གྲྭའི་སྤྱི་ཚོགས་དང་སེམས་མྱོང་། བཟང་སྤྱོད་བསླབ་གཞིའི་འགན་འཛིན་ལས་རོགས་བྷི་རན་ཌན་ཨོ་ཛ་ཝ་ཌི་སིལ་ཝ་ (Brendan Ozawa-de Silva) ལགས་ཀྱིས། ཆོགས་ལུགས་ལ་མ་བརྟེན་པའི་ལས་གཞི་སྟེ། སྤྱི་ཚོགས་དང་སེམས་མྱོང་། བཟང་སྤྱོད་ཅེས་བའི་བསླབ་གཞི་ངོ་སྤྲོད་གནང་སྐབས་ཁོང་གིས། ཕྱི་ལོ་ ༡༩༩༨ ལོར་ཨེ་མོ་རེའི་གཙུག་ལག་སློབ་གཉེར་ཁང་དང་བོད་ཀྱི་མཉམ་འབྲེལ་ལས་གཞི་མགོ་བཙུགས་པ་ནས་བཟུང་། ༧གོང་ས་མཆོག་གི་ལམ་སྟོན་འོག་ཨེ་མོ་རེ་གཙུག་ལག་སློབ་གཉེར་ཁང་གི་ལས་གཞི་འདྲ་མིན་སྤེལ་ཡོད་པ་དང་། དེ་ཚོའི་ཁྲོད་བོད་ཀྱི་སེམས་ཁམས་རིག་པའི་བློ་སྦྱོང་གཞིར་བཞག་ཐོག་ཆོས་ལུགས་དང་མ་འབྲེལ་བའི་བྱམས་སྙིང་རྗེ་གོང་མཐོར་གཏོང་ཐབས་དང་། ཨེ་མོ་རེ་གཙུག་ལག་སློབ་གཉེར་ཁང་གི་ཚན་རིག་སྡེ་ཚན་ནས་ཚན་རིག་སྦྱོང་བརྡར་དང་དགོན་པའི་གྲྭ་བཙུན་གྱི་བྱེད་སྒོ་མཉམ་འབྲེལ་ཡོང་ཐབས་ཀྱི་ལས་གཞི་སྤེལ་ཡོད་པ་དང་། སྤྱི་ཚོགས་དང་སེམས་མྱོང་། བཟང་སྤྱོད་བཅས་ཀྱི་ལས་གཞི་འདི་ནི་ཆེས་ཉེ་བའི་གཏིང་ཟབ་པའི་མཉམ་སྒྲུབ་ཀྱི་ལས་གཞི་ཞིག་ཡིན་པ་རེད། ལས་གཞི་འདི་༧གོང་ས་རྒྱལ་བ་རིན་པོ་ཆེ་མཆོག་གི་ལུས་སེམས་གཉིས་ཀྱི་སློབ་གསོ་དགོས་པའི་དགོངས་གཞི་ལྟར། དགེ་རྒན་དང་སློབ་གྲྭ་ཚོར་སྤྱི་ཚོགས་དང་སེམས་མྱོང་། བཟང་སྤྱོད་དང་སེམས་གཅོང་སོགས་ཀྱི་ཐབས་གསར་གཞི་གཅིག་ཏུ་བསྡུས་པའི་བསླབ་གཞི་ཞིག་རེད། ༧གོང་ས་མཆོག་གིས་རྟག་ཏུ་ལམ་སྟོན་དང་སྐུལ་འདེད་གནང་བར་བརྟེན། ཁོང་ཐེངས་འདིའི་གསར་འགོད་གསལ་བསྒྲགས་དང་རྒྱལ་སྤྱིའི་རང་བཞིན་གྱི་བསླབ་གཞི་དབུ་འབྱེད་ཀྱི་མཛད་སྒོར་ཕེབས་ཐུབ་པ་བྱུང་བར་ང་ཚོར་དགའ་ཚོར་ཆེན་པོ་བྱུང་། ཞེས་དང་། བསླབ་གཞི་དེ་བྱིས་པར་དམིགས་ནས་མཉམ་འབྲེལ་རྒྱལ་ཚོགས་ཀྱི་བཀོལ་བཞིན་པའི་སྐད་ཡིག་ ༦ ཚུད་པའི་སྐད་ཡིག་ ༡༢ ནང་གཏན་འབེབ་བྱས་པ་ཞིག་ཡིན་སྐོར་སོགས་བརྗོད་འདུག
གསར་འགོད་ལྷན་ཚོགས་ཐོག་༧གོང་ས་རྒྱལ་བ་རིན་པོ་ཆེ་མཆོག་གིས། ད་ལྟའི་ཤེས་ཡོན་ལམ་སྲོལ་གྱིས་བདེ་སྐྱིད་ལྡན་པའི་འཛམ་གླིང་ཞིག་བསྐྲུན་རྒྱུའི་འགན་ལེན་བྱེད་ཀྱི་མེད་ལ། ངས་དེ་སྔོན་བརྗོད་པ་ལྟར་མིའི་རིགས་ཀྱི་བྱམས་བརྩེ་ནི་ང་ཚོའི་བདེ་སྐྱིད་ཀྱི་འབྱུང་རྩ་གཙོ་བོ་དེ་ཡིན་སྟབས། ང་ཚོའི་ཤེས་ཡོན་ནང་སེམས་བཟང་གི་སློབ་གསོ་དགོས་ཀྱི་ཡོད་པ་རེད། སྤྱིར་འཛམ་གླིང་གི་ཆོས་ལུགས་ཚང་མས་བསླབ་བྱ་གཅིག་སྟོན་གྱི་ཡོད་ཀྱང་། དེང་གི་དུས་འདིར་མི་འབོར་ཐེར་འབུམ་མང་པོས་ཆོས་ལུགས་ཁས་ལེན་གྱི་མེད་པར་བརྟེན། ཁོ་ཚོའི་བསམ་བློའི་ནང་བྱམས་བརྩེ་ཞེས་པ་དེ་ཆོས་ལུགས་ཀྱི་བསླབ་བྱ་ཞིག་དང་། དེར་དོ་དབྱིངས་མེད་ཅེས་བརྗོད་སྲིད་པ་རེད། ལོ་ ༣༠༠༠ ལྷག་གི་རིང་རྒྱ་གར་གྱི་ཆོས་ལུགས་ལ་མ་བརྟེན་པའི་ལམ་སྲོལ་དེའི་འོག་ཆོས་ལུགས་འདི་དང་དེ་ལ་ཁས་ལེན་མིན་དང་། ཡང་ན་ཆོས་ལུགས་ལ་ཁས་ལེན་མིན་གྱི་གནས་དོན་དེ་གཉིས་པ་རེད། དེ་བས་ང་ཚོ་ཚང་མ་འགྲོ་བ་མིའི་རིགས་གཅིག་པ་ཡིན་པའི་ཆ་ནས་ཀུན་སྤྱོད་ཀྱི་རིན་ཐང་དེ་གལ་ཆེ་བ་ཡིན། ངོས་ཀྱི་གྲོགས་པོ་འགའ་ཤས་ཀྱིས་ཆོས་ལུགས་ལ་མ་བརྟེན་པ་ (Secular) ཞེས་པའི་ཐ་སྙད་དེར་དགོངས་ཚུལ་མི་འདྲ་བ་དང་། འོས་འཚམ་གྱི་ཐ་སྙད་ཅིག་སྤྱོད་དགོས་སྐོར་ཡང་བརྗོད་ཀྱི་འདུག་ཀྱང་། ངོས་ཀྱིས་ཤེས་ཀྱི་མེད། གནད་དོན་གཙོ་བོ་དེ་ང་ཚོས་སྔོན་འགྲོ་སློབ་གྲྭའི་ཤེས་ཡོན་ནས་བཟུང་ཕྱིའི་དངོས་པོའི་ཤེས་བྱ་ཙམ་མིན་པར་མིའི་རིགས་ཀྱི་གཞི་རྩའི་ནང་སེམས་ཀྱི་རིན་ཐང་སྐོར་གྱི་ཤེས་བྱ་ཡང་ཚུད་ཐབས་བྱེད་དགོས་པ་ཡིན། དེང་སང་ངོས་ཀྱིས་ལུས་པོའི་འཕྲོད་བསྟེན་གྱི་མཉམ་དུ་སེམས་མྱོང་གི་འཕྲོད་བསྟེན་ཡང་བཤད་ཀྱི་ཡོད། དེར་བརྟེན་ང་ཚོས་ཤེས་ཡོན་བརྒྱུད་ནས་གཅིག་བྱེད་ཐུབ་ཀྱི་ཡོད་པ་དང་། དེང་གི་འཇིག་རྟེན་གྱི་དཀའ་ངལ་གང་འཚམ་ཞིག་ང་ཚོས་བཟོས་པ་རེད། མི་སུ་ཞིག་གིས་ཀྱང་དཀའ་ངལ་འདོད་ཀྱི་མེད་ཀྱང་། སེམས་མྱོང་གི་རྐྱེན་པས་མི་གསོད་པ་སོགས་ཀྱི་དཀའ་ངལ་མང་དག་ཅིག་དང་འཕྲད་བཞིན་ཡོད། དེ་དག་ཚང་མ་ང་ཚོ་རང་ཉིད་ཀྱིས་བསྐྲུན་པ་ཞིག་རེད། ང་ཚོས་ལག་ལེན་ཁོ་ནའི་ཐོག་ནས་མ་གཏོགས་སྨོན་ལམ་བརྒྱབས་ནས་དཀའ་ངལ་དེ་དག་སེལ་ཐབས་མེད། ཀུན་སློང་ཡོད་པའི་ཐོག་ནས་ལག་ལེན་བསྟར་ན་ད་གཟོད་དུས་རབས་ཉེར་གཅིག་འདི་ཞི་བདེ་དང་འཚེ་བ་མེད་པའི་དུས་རབས་ཤིག་དུ་འགྱུར་སྲིད་པ་རེད། དེའི་དོན་ནི་འཛམ་གླིང་འདིར་ནམ་ཡང་དཀའ་ངལ་འབྱུང་གི་མ་རེད་ཅེས་བརྗོད་ཀྱི་མེད་པར། ང་ཚོར་དཀའ་ངལ་བྱུང་ཚེ་འཚེ་མེད་ཞི་བ་དང་གྲོས་མོལ་གྱི་ཐོག་ནས་དཀའ་ངལ་དེར་གདོང་ལེན་བྱེད་རྒྱུའི་ལག་ཆ་ཡོད་པ་རེད། དེར་བརྟེན་ང་ཚོས་ཤེས་ཡོན་བརྒྱུད་ནས་འགྱུར་བ་ཞིག་གཏོང་ཐུབ་ཀྱི་ཡོད། ཤེས་ཡོན་བརྒྱུད་ནས་དེ་ལྟ་བུའི་བསམ་བློའི་འཛིན་སྟངས་ཤིག་བསྐྲུན་ཐུབ་ཀྱི་ཡོད་པར་བརྟེན། ངོས་ཀྱིས་འབྱུང་འགྱུར་གྱི་ཚོགས་འདུའི་ཉིན་གྲངས་འགའ་ཤས་ནང་ལག་ལེན་ཐོག་ཕན་ཐོགས་ཡོད་པའི་དགོངས་ཚུལ་དེ་འདྲ་ཐོས་རྒྱུའི་རེ་བ་ཆེན་པོ་བྱེད་ཀྱི་ཡོད་ལ། ངོས་ཀྱིས་འདི་ནི་འཛམ་གླིང་རང་བཞིན་གྱི་ལས་འགུལ་ཞིག་ཏུ་འགྱུར་གྱི་རེད་བསམ་གྱི་འདུག ཅེས་གསུངས་འདུག
དེའི་རྗེས་ཨ་རིའི་སེམས་ཁམས་རིག་པ་བ་དང་། སེམས་མྱོང་གི་རིག་སྟོབས་ཞེས་པའི་དཔེ་དེབ་རྩོམ་པ་པོ་གྲགས་ཅན་ཌེ་ཎིལ་གྷོལ་མེན་ (Daniel Goleman) ལགས་ཀྱིས་ཐད་གཏོད་བརྙན་ལམ་བརྒྱུད། ངས་ལོ་ ༢༥ ཡར་སྔོན་དུ་སེམས་མྱོང་གི་རིག་སྟོབས་ཞེས་པའི་དཔེ་དེབ་དེ་འབྲི་དུས། ངས་རང་ཉིད་ཀྱི་གོ་རྟོགས་(Self awareness)དང་། རང་བཅུན།(Self management) གཞན་སེམས།(Empathy) སྤྱི་ཚོགས་རིག་རྩལ་བཅས་ཀྱིས་སློབ་མའི་མི་ཚེའི་ནང་ཐག་གཅོད་བྱེད་རྒྱུའི་ཕན་ཐོགས་ཆེན་པོ་ཡོད་པ་དང་། ནུས་རྩལ་དེ་དག་ཚུད་པའི་ལས་གཞི་བརྒྱུད་སློབ་མའི་ཁྲོད་ན་འཚེ་བ་དང་བརྙས་བཅོས། སེམས་ངལ། སློབ་སྦྱོང་ཁུངས་མ་འཁྱོལ་བ་སོགས་ཀྱི་དཀའ་ངལ་སེལ་ཐབས་ལ་ཕན་ཆེན་པོ་ཐོགས་ཀྱི་ཡོད་པའི་གྲུབ་དོན་ལ་གཞི་བཅོལ་ཏེ། སློབ་མ་རྣམས་ལ་སེམས་མྱོང་གི་སྤྱི་ཚོགས་སློབ་གསོ་སྤྲོད་དགོས་པའི་བསམ་ཚུལ་བཏོན་པ་དང་། དེའི་རྗེས་ང་ཚོ་གྲོགས་པོ་སྐོར་ཞིག་གིས་སློབ་མ་རྣམས་ཀྱི་འཚོ་བའི་ཐབས་རྩལ་དེ་དག་གོང་འཕེལ་གཏོང་རྒྱུར་དམིགས་ཏེ། སྤྱི་ཚོགས་དང་སེམས་མྱོང་གི་སློབ་གསོ་ (Social Emotional Learning) ཞེས་པའི་ལས་གཞི་དེ་མགོ་བརྩམས་ཡོད་པ་དང་། ད་ལྟ་ལས་གཞི་དེ་རྒྱལ་སྤྱིའི་ཡོངས་ལ་ཁྱབ་སྟེ་འགའ་ཤས་ཀྱིས་སློབ་ཚན་གྱི་ཞོར་དུ་འཁྲིད་པ་དང་། ཡང་འགའ་ཤས་ཀྱིས་སློབ་གྲྭའི་བསླབ་གཞིར་གཏན་འབེབ་ཀྱིས་སློབ་འཁྲིད་བྱེད་ཀྱི་ཡོད་སྐོར་དང་། སློབ་མ་འབུམ་གཉིས་དང་ཁྲི་བདུན་ཙམ་ལ་ཞིབ་འཇུག་བྱས་པ་བརྒྱུད་ནས་སྤྱི་ཚོགས་དང་སེམས་ཀྱི་སློབ་གསོས་འཁྲུག་འཛིང་དང་བརྙས་བཅོས་ལྟ་བུའི་སྤྱི་ཚོགས་དང་མ་མཐུན་པའི་དཀའ་ངལ་རིགས་བརྒྱ་ཆ་ ༡༠ ཙམ་གྱིས་ཉུང་དུ་ཕྱིན་པ་དང་། སློབ་གྲྭར་དགའ་མོས་བྱེད་པ་སོགས་པའི་སྤྱི་ཚོགས་རང་བཞིན་གྱི་བསམ་བློ་བརྒྱ་ཆ་ ༡༠ ཡིས་མང་དུ་ཕྱིན་ཡོད་པ་མ་ཟད། སློབ་གྲྭའི་ཤེས་ཡོན་གྱི་གྲུབ་འབྲས་ཀྱང་བརྒྱ་ཆ་ ༡༡ ཡིས་འཕར་ཡོད་པ་ཤེས་རྟོགས་བྱུང་ཡོད་སྐོར་དང་། ད་ལྟ་ཨི་མོ་རི་གཙུག་ལག་སློབ་གྲྭ་ཆེན་མོས་བསྒྲིགས་པའི་སྤྱི་ཚོགས་དང་། སེམས་མྱོང་། བཟང་སྤྱོད་བཅས་ཀྱི་བསླབ་གཞི་དེ་༧གོང་ས་མཆོག་ས་མཆོག་གི་བཀའ་དགོངས་བཞིན་དུས་རབས་ཉེར་གཅིག་གི་མི་རྣམས་ལ་ནང་བསམ་བློའི་ཤེས་ཡོན་སྤྲོད་ཐབས་ཀྱི་སྒྲོམ་གཞི་དང་མཐུན་ཞིང་། དེ་སྔོན་གྱི་སྤྱི་ཚོགས་དང་སེམས་མྱོང་གི་སློབ་གསོའི་ནང་མེད་པའི་བློ་སྒྲིམ་ཐབས་དང་། སེམས་ཁུར་དང་བྱམས་བརྩེ། དེ་བཞིན་བཟང་སྤྱོད་ཀྱི་ལྟ་ཕྱོགས་བཅས་ཀྱི་སྦྱོང་བརྡར་སོགས་ནུས་རྩལ་རིགས་ཁ་སྣོན་བྱས་ཡོད་སྐོར་སོགས་བརྗོད་སོང་།
དེ་བཞིན་སྤྱི་ཚོགས་དང་སེམས་ཚོར་སློབ་གསོའི་ཆེད་མཁས་པ་ལིན་ཌ་ལེན་ཊེ་རི་ (Linda Lantieri) ལགས་ཀྱིས་དྲ་ཐོག་བརྒྱུད། ཐེངས་འདིའི་དབུ་འབྱེད་མཛད་སྒོར་ཞུགས་མ་ཐུབ་པར་དགོངས་སེལ་ཞུ་རྒྱུ་ཡིན། འོན་ཀྱང་ལོ་འགའི་སྔོན་ནས་བསླབ་གཞི་གཏན་འབེལ་དང་འབྲེལ་བ་བྱུང་ཡོད་པ་དང་། ངས་སྤྱི་ཚོགས་དང་སེམས་མྱོང་། བཟང་སྤྱོད་ཀྱི་བསླབ་གཞི་འདི་ནི་འཛམ་གླིང་གི་སློབ་གྲྭ་ཁག་གི་སློབ་གསོའི་རྩ་འཛིན་ལྟ་བུར་མཐོང་གི་ཡོད་པ་དང་། ད་ལྟ་མི་མང་པོ་ཞིག་གིས་མ་འོངས་པའི་སློབ་གྲྭ་དང་བྱིས་པར་རེ་བ་ཆེན་པོ་བྱེད་པ་ལྟར་སྐུ་ཉིད་ལའང་དེ་ལྟར་ཡོད་པའི་རེ་བ་ཡོད། བསླབ་གཞི་འདི་དབུ་འབྱེད་བྱ་ཡི་ཡོད་པ་རེད། རྒྱལ་ཁབ་མང་པོ་ནས་མི་མང་པོ་ཞིག་ལྡི་ལིར་མཉམ་ཞུགས་བྱས་ཡོད་པ་རེད་ལ། སྟོང་ཕྲག་མང་པོས་ཐད་གཏོང་བརྒྱུད་མཉམ་ཞུགས་བྱེད་ཀྱི་ཡོད་པས། དེ་ནི་དགའ་སྤྲོ་སྐྱེས་འོས་པ་ཞིག་རེད། ངས་འདས་པའི་ལོ་བཅུ་ཕྲག་གཉིས་རིང་སློབ་གྲྭ་མང་པོ་ཞིག་གི་ནང་སྤྱི་ཚོགས་དང་སེམས་མྱོང་ཐོག་ཞིབ་འཇུག་བྱས་ཡོད་པ་དང་། ཐེངས་འདིའི་བསླབ་གཞི་ནི་དེང་སྐབས་ཀྱི་བསླབ་གཞི་གཞན་ལས་གཏིང་ཟབ་པ་དང་གཞི་རྒྱ་ཆེ་བ་ཡོད་པ་རེད། སེམས་ཀྱི་སློབ་གསོ་སྤྲད་པའི་ཐོག་ལུས་ཀྱི་སློབ་གསོ་ཐོབ་ཡི་ཡོད་པ་དང་། བསླབ་གཞི་འདིས་སྙིང་རྗེ་སོགས་སྦྱོང་བརྡར་སྐོར་མང་པོ་བཤད་ཀྱི་ཡོད་པ་རེད། དེ་བཞིན་གང་ཟག་སྒེར་ཁོ་ན་མ་ཡིན་པར་གོ་རིམ་ལྡན་པའི་སྤྱི་ཚོགས་ཁྱོན་ཡོངས་བཤད་ཀྱི་ཡོད་པ་རེད། འདི་འདྲའི་བསླབ་གཞི་ནི་ང་ཚོའི་འཛམ་གླིང་འདིར་ཧ་ཅང་མཁོ་ཡི་ཡོད་པ་རེད། ང་ཚོ་ཚང་མས་རྩོད་རྙོག་སེལ་ཐབས་སུ་ཐབས་ལམ་གསར་པ་ཞིག་དང་ལྷག་པར་དུ་སྙིང་རྗེ་གཞིར་བཞག་ཐོག་འཚེ་བ་མེད་པ་ཞིག་ལ་རེ་བ་བྱེད་བཞིན་ཡོད་པ་རེད། འཛམ་གླིང་གི་སློབ་གསོའི་སྒྱུ་རྩལ་དང་སྤྱི་ཚོགས་དང་སེམས་མྱོང་སོགས་ཀྱི་ཐད་ཡར་རྒྱས་ཆེན་པོ་ཕྱིན་ཡོད་པ་རེད་ལ། སློབ་གྲྭའི་སློབ་གསོ་ནང་འགྱུར་བ་ཞིག་དགོས་པ་བཞིན་ང་ཚོ་གྲ་སྒྲིག་ཡོད་པ་རེད། ཅེས་བརྗོད་སོང་།
མཇུག་ཏུ་སློབ་དཔོན་ཀིམ་བྷར་ལི་སི་ཁོ་ནེཌ་རེ་ཆལ་ (Kimberly Schonert-Reichl) ལགས་ཀྱིས། ང་ཚོས་ཞིབ་འཇུག་བྱས་པ་བརྒྱུད་སྤྱི་ཚོགས་དང་། སེམས་མྱོང་། བཟང་སྤྱོད་ཀྱི་སློབ་གསོ་དེས་ཕྲུ་གུ་རྣམས་ལ་ཕན་ཐོགས་ཡོང་གི་ཡོད་པ་གསལ་པོ་ཆགས་ཡོད་པ་དང་། ངས་འདས་པའི་ལོ་ངོ་ ༣༠ ལྷག་གི་རིང་སྤྱི་ཚོགས་དང་སེམས་མྱོང་གི་སློབ་གསོའི་ཐོག་ལ་ཞིབ་འཇུག་བྱས་པ་ཡིན་ཡང་། ང་རང་ཐོག་མའི་ཆར་དགེ་རྒན་ཞིག་ཡིན་པ་དང་། ངའི་སློབ་ཕྲུག་ཁྲོད་བཙོན་འཇུག་བྱས་མྱོང་བ་སོགས་སེམས་མྱོང་དང་སྤྱི་ཚོགས་ཀྱི་དཀའ་ངལ་ཡོད་མཁན་མང་པོ་ཡོད་ཀྱང་། དེ་དུས་ང་ལ་དཀའ་ངལ་དེ་དག་སེལ་བའི་ཐབས་བྱུས་མེད་པ་རེད། འོན་ཀྱང་ད་ལྟ་བཟང་སྤྱོད་ཀྱི་སློབ་གསོ་དེ་ཡིས་སློབ་མའི་སྦྱོང་འབྲས་ཇེ་ལེགས་སུ་ཕྱིན་ཡོད་པ་མ་ཟད། སློམ་མའི་ཁྲོད་ན་སེམས་མྱོང་དང་སྤྱི་ཚོགས་ཀྱི་དཀའ་ངལ་ཡོད་མཁན་ཉུང་དུ་ཕྱིན་ཡོད་པ་རེད། ད་ལན་གྱི་སྤྱི་ཚོགས་དང་སེམས་མྱོང་། བཟང་སྤྱོད་ཀྱི་སློབ་གསོས་དེ་སྔོན་གྱི་སློབ་གསོའི་ནང་གི་སྟོང་ཆ་རྣམས་བསྐངས་ཡོད་པ་རེད། ད་བར་རྒྱལ་ཁབ་མང་པོས་བཟང་སྤྱོད་ཀྱི་སློབ་གསོ་དེ་ལག་བསྟར་བྱེད་འདོད་ཡོད་ཀྱང་། རང་གི་སྐད་ཡིག་ཐོག་མེད་པའི་རྐྱེན་གྱིས་སློབ་ཚན་དུ་དངོས་སུ་གཏན་འབེབ་བྱུང་མེད་པ་རེད། ཡིན་ན་ཡང་། ཐེངས་འདིའི་སྤྱི་ཚོགས་དང་། སེམས་མྱོང་། བཟང་སྤྱོད་ཀྱི་བསླབ་གཞི་འདི་སྐད་ཡིག་མང་པོར་བསྒྱུར་ཡོད་སྟབས། ང་ཚོས་ལོ་མང་རིང་ནས་ནང་བསམ་བློའི་སློབ་ཚན་དེ་སློབ་གྲྭའི་ཤེས་ཡོན་ནང་ཚུད་ཐུབ་ན་སྙམ་པའི་དམིགས་ཡུལ་དེ་རིང་མངོན་འགྱུར་ཐུབ་ཡོད་སྐོར་བརྗོད་སོང་།
དྲི་བ་དྲི་ལན་གྱི་སྐབས་སུ་གསར་འགོད་པ་ཞིག་གིས་བསླབ་གཞི་གཏན་འབེབ་ཀྱི་དབུ་འབྱེད་མཛད་སྒོའི་ཚོགས་ཡུལ་རྒྱ་གར་འདེམས་དགོས་དོན་དྲིས་པར་བྷི་རན་ཌན་ཨོ་ཛ་ཝ་ཌི་སིལ་ཝ་ (Brendan Ozawa-de Silva) ལགས་ཀྱིས། རྒྱ་གར་ནང་དབུ་འབྱེད་མཛད་སྒོ་ཚོགས་ཚེ་༧གོང་ས་མཆོག་ཕེབས་པར་སྟབས་བདེ་ཡིན་པ་དང་། བསླབ་གཞི་གཏན་འབེབ་བྱེད་མཁན་ཚོས་༧གོང་ས་མཆོག་མཛད་སྒོའི་ཐོག་ཕེབས་འདོད་ཆེན་པོ་བྱེད་ཀྱི་ཡོད་པ། རྒྱུ་མཚན་གཞན་ཞིག་ནི་༧གོང་ས་རྒྱལ་བ་རིན་པོ་ཆེ་མཆོག་ནས་ལམ་སྟོན་གནང་བ་བཞིན་རྒྱ་གར་ནི་གནའ་སྔ་མོ་ནས་ཆོས་ལུགས་ལ་མ་བརྟེན་པའི་བཟང་སྤྱོད་ཉམས་ལེན་གྱི་ལོ་རྒྱུས་རིང་པོ་ཡོད་པ་དང་། རྒྱ་གར་གྱི་རྩ་ཁྲིམས་ནང་ཆོས་ལུགས་ཚང་མར་འདྲ་མཉམ་གྱིས་ལྟ་ཡི་ཡོད་པ་མ་ཟད། ཆོས་ལ་དད་པ་མེད་མཁན་གྱི་བཟང་སྤྱོད་ལ་བརྩི་བཀུར་བྱེད་ཀྱི་ཡོད་པས་རྒྱ་གར་བདམསཔ་ཡིན་ཚུལ་བརྗོད་སོང་།
ཡང་གསར་འགོད་པས་བསླབ་གཞི་འདི་ནི་ཚན་རིག་དང་ཆོས་གཉིས་ཟུང་འབྲེལ་ལྟ་བུ་རེད་འདུག་པས། ཆོས་དང་ཚན་རིག་གི་གཞི་རྒྱ་ཆེ་བའི་གནས་ལུགས་འདི་གཉིས་ཕྱོགས་གཅིག་དུ་འདུས་ཐབས་ཡོད་མེད་དྲིས་པར་༧གོང་ས་མཆོག་གིས། འཛམ་གླིང་གི་དཔལ་ཡོན་ཡར་རྒྱས་ཁྲོད་རྒྱ་གར་གྱི་དཔལ་ཡོན་ཡར་རྒྱས་ལས་ནང་སེམས་ཀྱི་ཡར་རྒྱས་ཆེན་པོ་ཕྱིན་ཡོད་པར་ངོས་འཛིན་བྱེད་ཀྱི་ཡོད་པ་དང་། ལོ་ངོ་སྟོང་ཕྲག་འགའི་སྔོན་ནས་རྒྱ་གར་ནང་འཚེ་བ་མེད་པའི་ལྟ་གྲུབ་ཤུགས་ཆེན་དར་ཡོད་པས། དེང་སྐབས་ཀྱི་འཛམ་གླིང་ནང་རྒྱ་གར་གྱིས་ལྟ་གྲུབ་དེ་གསར་གཏོད་བྱེད་མི་དགོས་པར་བསྐྱར་གསོ་ཙམ་བྱུང་ན་འགྲིག་པ་དང་། ཕྱི་ལུས་པའི་འཕྲོད་བསྟེན་དང་ནང་སེམས་ཀྱི་འཕྲོད་བསྟེན་གཉིས་མཉམ་གནས་ཡོང་བར་རྒྱ་གར་གྱིས་ནུས་པ་ཆེན་པོ་འདོན་ཐུབ་ཀྱི་ཡོད་སྐོར་དང་། འཛམ་གླིང་གི་དཀའ་རྙོག་ཡོད་དོ་ཅོག་ཚང་མ་མིའི་དཀའ་ངལ་ཡིན་པས། ང་ཚོའི་མ་འོངས་བ་ནི་བྱམས་བརྩེ་དང་ལྡན་པ་ཞིག་དང་མཚོན་ཆ་མེད་པའི་འཛམ་གླིང་ཞིག་ཡིན་དགོས་པས་དེ་སེལ་ཐབས་སུ་མཚོན་ཆ་བཀོལ་ནས་སེལ་ཐབས་མེད་པར་འཚེ་བ་མེད་པའི་ཐོག་ནས་སེལ་ཐབས་དགོས་ཀྱི་ཡོད་སྐོར་གསུངས་སོང་།
གསར་འགོད་པ། པ་སངས་ཚེ་རིང་དང་ཀླུ་མགོན་ཐར།
བདག་སོགས་གཞིས་བྱེས་བོད་འབངས་ཡོངས་ཀྱི་བླ་ན་མེད་པའི་མགོན་སྐྱབས་དཔུང་གཉེན་མཚུངས་ཟླ་མ་མཆིས་པ་༧སྐྱབས་མགོན་རྒྱལ་བའི་དབང་པོ་མཚོག་གི་ཐུགས་བཞེད་མཐའ་དག་ལྷུན་གྱིས་གྲུབ་པར་སྨོན། ཁྱེད་ཀྱིས་ཐུགས་བརྩེས་བདག་སོགས་རིས་མེད་འགྲོ་བ་ཀུན་ཚེ་རབས་ནས་ཚེ་རབས་རྗེས་སུ་བཟུང་དུ་གསོལ། སྐྱབས་སུ་མཆིའོ།