རྒྱ་གར་གྱི་གཞོན་སྐྱེས་གཙོ་བོར་གྱུར་བའི་མི་གྲངས་ས་ཡ་ ༡༢༠ ལྷག་གིས་བེད་སྤྱོད་གཏོང་བཞིན་པའི་རྒྱ་ནག་གི་ཊིག་ཊོག་ཅེས་པའི་སྤྱི་ཚོགས་དྲ་ལམ་བཀག་སྡོམ་དགོས་པའི་བཀའ་རྒྱ་བསྒྲགས།
ཁ་སང་རྒྱ་གར་ལྷོ་ཕྱོགས་ཏཱ་མིལ་ཎ་དྷུ་(Tamil Nadu)མངའ་སྡེའི་མཱ་དྷ་ར་སི་མཐོ་རིམ་ཁྲིམས་ཁང་(Madras High Court) གིས། རྒྱ་ནག་གི་ཊིག་ཊོག་ (Tik Tok) གམ་རྒྱ་སྐད་དུ་ཏའོ་ཡུན་ཞེས་པའི་དྲ་ལམ་བརྙན་མཛོད་ནང་འཁྲིག་སྤྱོད་ཆགས་སྲེད་རིགས་བརྒྱུད་གཏོང་བྱེད་བཞིན་ཡོད་པ་དེས། གཞོན་སྐྱེས་ཚོར་ཤུགས་རྐྱེན་ངན་པ་འཇོག་གི་ཡོད་སྐོར་བརྗོད་དེ། གྷུ་གྷལ་དང་ཀུ་ཤུ་ཚོང་གཉེར་ཁང་གཉིས་ཀྱིས་མཉེན་ཆས་དེ་རྒྱ་གར་གྱི་མཉེན་མཛོད་ (Appstore) ནས་མར་ལེན་དགོས་པའི་བཀའ་རྒྱ་བཏང་བ་ལྟར། གོང་བརྗོད་ཚོང་གཉེར་ཁང་གཉིས་དང་། ཨོ་བྷོ་ཚོང་གཉེར་ཁང་སོགས་ནས་ཕབ་ལེན་བྱེད་མ་ཐུབ་པ་བཟོས་འདུག ཡིན་ནའང་། བརྒྱུད་ལམ་གཞན་ནས་མཉེན་ཆས་དེ་མུ་མཐུད་ཕབ་ལེན་དང་བེད་སྤྱོད་བྱེད་ཐུབ་ཀྱི་འདུག
མཐོ་རིམ་ཁྲིམས་ཁང་དེས་བྷའེ་ཊི་ཌན་སི་དྲ་ལམ་འཕྲུལ་རིག་བཟོ་ཚོང་ཁང་ནས་མཉེན་ཆས་ཀྱི་གནད་དོན་དེ་དང་འབྲེལ་བའི་ཡིག་ཆ་ཁག་མཁོ་སྤྲོད་གནང་དགོས་པ་མ་ཟད། ཟླ་འདིའི་ཟླ་མཇུག་ཏུ་ཉན་ཞིབ་བྱ་རྒྱུ་ཡིན་སྐོར་བཀའ་ཁྱབ་བཏང་ཡོད་པ་ལྟར། བཟོ་ཚོང་ཁང་གིས་གནད་དོན་དེའི་ཆེད་དུ་ཁྲིམས་རྩོད་པ་རྒན་པ་ཞིག་ཆེད་བསྐོས་བྱེད་པར་མོས་མཐུན་བྱས་ཡོད་འདུག
ད་ལན་གྱི་ཐག་གཅོད་དེ་ཐོག་མར་རྒྱ་གར་གྱི་མི་སྒེར་ཞིག་གིས་མཱ་དྷ་ར་སི་མཐོ་རིམ་ཁྲིམས་ཁང་ལ་སྤྱི་དམངས་ཀྱི་བདེ་དོན་ཞུ་གཏུག་བྱས་པ་བརྒྱུད་བྷའེ་ཊི་ཌན་སི་དྲ་ལམ་འཕྲུལ་རིག་བཟོ་ཚོང་ཁང་ཁྲིམས་གཏུག་བྱས་ཡོད་པ་དང་། མཐོ་རིམ་ཁྲིམས་ཁང་དེས་ཟླ་འདིའི་ཕྱི་ཚེས་ ༣ ཉིན་རྒྱ་གར་དབུས་གཞུང་ལ་མཉེན་ཆས་དེ་རྒྱ་གར་ནང་བཀག་སྡོམ་བྱེད་དགོས་སྐོར་ཞུ་གཏུག་བྱས་ཡོད་འདུག ཡིན་ནའང་། བྷའེ་ཊི་དན་སི་བཟོ་ཚོང་ཁང་གིས་ཊིག་ཊོག་མཉེན་ཆས་ནང་འཁྲིག་སྤྱོད་དང་འབྲེལ་བའི་བརྙང་ཐུང་ཧ་ཅང་ཉུང་ཉུང་ཡིན་པ་དང་། མཐོ་རིམ་ཁྲིམས་ཁང་གི་ཐག་གཅོད་དེ་རྒྱ་གར་ནང་གི་སྨྲ་བརྗོད་རང་དབང་དང་རྒྱབ་འགལ་དུ་སོང་ཡོད་པར་བརྗོད་དེ། རྒྱ་གར་གྱི་ཆེས་མཐོའི་ཁྲིམས་ཞིབ་ཁང་ལ་མཐོ་རིམ་ཁྲིམས་ཁང་གི་ཐག་གཅོད་དེ་རྩིས་མེད་གཏོང་དགོས་པའི་རེ་འདུན་བཏོན་ཡོད་འདུག ཡིན་ནའང་། ཆེས་མཐོའི་ཁྲིམས་ཞིབ་ཁང་ནས་གྱོད་གཞི་དེ་མཐོ་རིམ་ཁྲིམས་ཁང་རང་ནས་ཐག་གཅོད་དགོས་པའི་དབང་ཚད་སྤྲད་ཡོད་འདུག
མཐོ་རིམ་ཁྲིམས་ཁང་གིས་ཐག་གཅོད་མ་བྱས་གོང་དུ་ཊིག་ཊོག་མཉེན་ཆས་གཙོ་གཉེར་བས་ཡོངས་ཁྱབ་གསལ་བསྒྲགས་ཤིག་སྤེལ་བའི་ནང་། བཟོ་ཚོང་ཁང་དེས་རྒྱ་གར་གྱི་ཁྲིམས་ཞིབ་ལམ་ལུགས་ལ་ཡིད་ཆེས་ཡོད་པ་དང་། མཉེན་ཆས་དེ་ཉིད་བཀོལ་སྤྱོད་བྱེད་མཁན་གྱི་མི་གྲངས་ས་ཡ་མང་པོས་དགའ་བསུ་བྱེད་འོས་པའི་མཇུག་འབྲས་བཟང་པོ་ཞིག་ལ་རེ་བ་འཆང་གི་ཡོད་སྐོར་སོགས་བརྗོད་ཡོད་འདུག་ལ། བཟོ་ཚོང་ཁང་དེས་མཉེན་ཆས་བེད་སྤྱོད་གཏོང་མཁན་ཚོས་ཚོར་བ་སྐྱེན་པའི་གནས་ཚུལ་རིགས་བརྒྱུད་གཏོང་བྱེད་པར་བཀག་འགོག་དང་ནག་གསུབ་གཏོང་བར་འབད་བརྩོན་བྱེད་བཞིན་ཡོད་པ་ལྟར། ད་བར་རྒྱ་གར་ནང་བརྙན་ཐུང་རིགས་ས་ཡ་ ༦ ལྷག་ནག་གསུབ་བཏང་ཡོད་སྐོར་བརྗོད་འདུག
ཕྱི་ལོ་ ༢༠༡༨ ལོའི་ཟླ་ ༧ ཚེས་ ༣ ཉིན་ཧིན་དྷུ་ནི་ཤེ་ཡ་ (Indonisia) རྒྱལ་ཁབ་ཀྱིས་ཉིན་གྲངས་ ༨ རིང་མཉེན་ཆས་དེ་བཀག་སྡོམ་བྱས་པར་བརྟེན། མཉེན་ཆས་གཙོ་གཉེར་བས་ཁྲིམས་ཁང་གི་བཀའ་རྒྱ་ཇི་བཞིན་མཉེན་ཆས་ལ་བསྐྱར་བཅོས་བྱས་ཏེ་བསྐྱར་དུ་བཀོལ་སྤྱོད་ཆོག་པར་བཟོས་ཡོད་འདུག དེ་བཞིན་འདས་ལོར་བྷང་ལ་ཌེ་ཤི་ (Bangladesh) ནང་དུ་ཡང་མཉེན་ཆས་དེ་བཀག་སྡོམ་བྱས་ཡོད་འདུག འདི་ལོའི་ཕྱི་ཟླ་ ༢ པའི་ཚེས་ ༢༧ ཉིན་ཨ་རིའི་ཚོང་དོན་ལྷན་ཁང་ (The Federal Trade Commission) གིས། བྷའེ་ཊི་ཌན་སི་འཕྲུལ་རིག་བཟོ་ཚོང་ཁང་གིས་ཊིག་ཊོག་བརྒྱུད་མཉེན་ཆས་བཀོལ་སྤྱོད་པའི་གནས་ཚུལ་བསྡུ་ལེན་བྱེད་ཀྱི་ཡོད་པའི་ནག་ཉེས་བཙུགས་ཏེ། བཟོ་ཚོང་དེར་ཨ་སྒོར་ས་ཡ་ ༥།༧ གྱི་ཉེས་ཆད་དང་། བསྡུ་ལེན་བྱས་ཟིན་པའི་གནས་ཚུལ་རྣམས་འཕྲལ་དུ་བསུབ་དགོས་པའི་བཀའ་རྒྱ་བཏང་ཡོད་འདུག
ཊིག་ཊོག་ཅེས་པའི་དྲ་ལམ་མཉེན་ཆས་དེ་ནི་རྒྱ་ནག་རྒྱལ་ས་པེ་ཅིན་དུ་རྟེན་གཞི་བྱས་པའི་བྷའེ་ཊི་ཌན་སི་(Bytedance) དྲ་ལམ་འཕྲུལ་རིག་བཟོ་ཚོང་ཁང་གིས་ཕྱི་ལོ་ ༢༠༡༦ ལོར་ཏོ་དབྱིན་ (Douyin) ཞེས་པའི་མིང་ཐོག་ནས་རྒྱ་ནག་ནང་ཐོག་མར་འགྲེམ་སྤེལ་བྱས་ཡོད་པ་དང་། ལོ་གཅིག་གི་རྗེས་སུ་ཊིག་ཊོག་ཅེས་པའི་མིང་ཐོག་ནས་རྒྱལ་སྤྱིའི་ཁྲོམ་ར་ནང་འགྲེམ་སྤེལ་བྱས་ཏེ། རྒྱ་གར་དང་ཨ་རི་གཙོས་པའི་རྒྱལ་ཁབ་མང་པོའི་ནང་དར་ཁྱབ་ཆེན་པོ་ཆགས་ནས་ད་ལྟའི་ཆར་དངོས་སུ་མཉེན་ཆས་བཀོལ་སྤྱོད་བྱེད་མཁན་ས་ཡ་ ༥༠༠ ལྷག་དང་། རྒྱ་གར་ནང་གཅིག་པོར་བེད་སྤྱོད་བྱེད་མཁན་ས་ཡ་ ༡༢༠ བརྒལ་བ་ཡོད་པ་དང་། འཛམ་གླིང་གི་སྐད་ཡིག་ ༧༥ ཙམ་ནང་ཕབ་བསྒྱུར་བྱས་ཚར་ཡོད་འདུག
གསར་འགོད་པ། པ་སངས་ཚེ་རིང་།
