བོད་བཙན་པོའི་སྐབས་ཀྱི་མིག་མངས་རྙེད་བྱུང་ཟེར།

དཀར་མཛེས་རྫོང་རོང་པ་ཚོའི་མཁར་སྒང་ནས་ལོ་ངོ་སྟོང་ཕྲག་གི་ལོ་རྒྱུས་ལྡན་པའི་བོད་ཀྱི་མིག་མངས་རྡོ་བརྐོས་མ་ཞིག་གསར་དུ་རྙེད་ཡོད་སྐོར་བསྒྲགས་འདུགཁ་སང་ཕྱི་ཚེས་ ༢༤ ཉིན། རྒྱ་ནག་གཞུང་འབྲེལ་ཀྲུང་དབྱང་བརྙན་འཕྲིན་གསར་ཁང་གིས་སྤེལ་བའི་གནས་ཚུལ་ལྟར་ན། སི་ཁྲོན་ཞིང་ཆེན་དཀར་མཛེས་ཁུལ་རིག་གནས་དང་རིག་དངོས་བརྟག་ཞིབ་སྡེ་ཚན་ཟེར་བ་ཞིག་གིས། དཀར་མཛེས་རྫོང་རོང་པ་ཚའི་མཁར་སྒང་དུ་ལོ་ངོ་སྟོང་ཕྲག་གི་ལོ་རྒྱུས་ལྡན་པའི་ཐང་བོད་སྐབས་ཀྱི་བོད་ཀྱི་མིག་མངས་རྡོ་བརྐོས་མ་ཞིག་གསར་རྙེད་བྱུང་ཡོད་འདུག

གནས་ཚུལ་དེའི་ཐད་དཀར་མཛེས་ཁུལ་རིག་གནས་དང་རིག་དངོས་བརྟག་ཞིབ་སྡེ་ཚན་པས། མིག་མངས་དེ་ནི་ཐང་བོད་དུས་སྐབས་ཀྱི་བོད་ལུགས་མིག་མངས་ཤིག་ཡིན་པ་དང་།  བོད་ཀྱི་རྒྱལ་ས་ལྷ་ས་ཕུད་པའི་བོད་ཁུལ་གཞན་པ་ནས་རྙེད་པའི་གནའ་བོའི་རྡོ་བརྐོས་བོད་ལུགས་མིག་མངས་ཐོག་མ་ཆགས་ཡོད་ལུགས་དང་། མིག་མངས་ཀྱི་ཆེ་ཆུང་དང་རྐོས་རྩལ། ཐིག་རིས། རྣམ་པ་སོགས་དེ་སྔོན་ལྷ་ས་མལ་གྲོ་གུང་དཀར་རྫོང་ནས་གསར་རྙེད་བྱུང་བའི་རྡོ་བརྐོས་མིག་མངས་དང་འདྲ་བོ་ཡོད་སྐོར་བརྗོད་འདུག

གནའ་རྫས་བརྟག་ཞིབ་པ་ཚོས་ཐེངས་འདིར་གསར་དུ་རྙེད་པའི་རྡོ་བརྐོས་དང་ལྷ་ས་མལ་གྲོ་གུང་དཀར་རྫོང་ནས་རྙེད་པའི་མིག་མངས་གཉིས་ཀ་བོད་བཙན་པོའི་དུས་སྐབས་ཀྱི་བོད་ཀྱི་མིག་མངས་ཡིན་པ་དང་། གནའ་ཤུལ་དེ་དག་ལ་རིག་གནས་ཀྱི་རྒྱུན་དང་ལོ་རྒྱུས་ཡུན་རིང་ལྡན་པ་དང་།  བོད་ཀྱི་གནའ་བོའི་ལོ་རྒྱུས་དང་། བོད་བཙན་པོའི་སྐབས་ཀྱི་རིག་གནས་དང་ལོ་རྒྱུས་སོགས་ལ་ཞིབ་འཇུག་བྱེད་པའི་དཔྱད་གཞི་གལ་ཆེན་ཞིག་ཆགས་ཡོད་སྐོར་བརྗོད་འདུག

རྒྱ་ནག་གཞུང་གིས་ཉེ་བའི་ལོ་ཤས་ནས་བོད་ཁུལ་གྱི་ས་ཆ་མང་པོའི་ནང་གནའ་ཤུལ་གསར་རྙེད་དང་གནའ་རྫས་རྙེད་ཡོད་སྐོར་མང་པོ་ཞིག་བསྒྲགས་བཞིན་པ་ལྟར། མང་པོ་ཞིག་གིས་རྒྱ་ནག་གི་བོད་ཀྱི་གནའ་ཤུལ་དང་རིག་དངོས་སོགས་གློ་བུར་དུ་དྲིལ་བསྒྲགས་སྣ་ཚོགས་བྱེད་བཞིན་པའི་རྒྱལ་ལྗོངས་དང་དམིགས་ཡུལ་ག་རེ་ཡིན་མིན་གྱི་དོགས་གཞི་སྣ་ཚོགས་བྱེད་བཞིན་པ་ལྟར། འདས་ལོར་འདི་གའི་གསར་འགོད་པས་བོད་རྒྱའི་གནད་དོན་ཉམས་ཞིབ་པ་དང་རྒྱ་ཡིག་རྩོམ་པ་པོ་སངས་རྒྱས་སྐྱབས་ལགས་སུ། གནད་དོན་དེའི་སྐོར་ལ་རྒྱ་ནག་གཞུང་ངོས་ནས་ཆབ་སྲིད་ཀྱི་གཡོ་བྱུས་དམིགས་ཡུལ་གཞན་ཡོད་མེད་དྲིས་པར་ཁོང་གིས། ཉེ་བའི་ལོ་འགའི་ནང་རྒྱ་ནག་གཞུང་གིས་གཟུགས་མེད་རིག་གནས་ཤུལ་བཞག་ཟེར་བ་དང་གཟུགས་ཡོད་རིག་གནས་ཤུལ་བཞག་ཟེར་བ་སོགས་ཁྱབ་བསྒྲགས་སྣ་ཚོགས་བྱེད་བཞིན་པར་དམིགས་ཡུལ་མང་པོ་ཡོད་པ་རེད། ཕྱོགས་གཅིག་ནས་བོད་ཀྱི་ཤུལ་བཞག་རིག་གནས་གྲགས་ཅན་དག་རྒྱལ་སྤྱིའི་སྒྲིག་ཁག་གི་མིང་ཐོའི་ནང་བཀོད་ནས་རྒྱ་ནག་གི་རིག་གནས་ཡིན་པ་མཚོན་གང་ཐུབ་བྱེད་ཀྱི་ཡོད་པ་དང་། དཔེར་ན་རིག་དངོས་མང་པོ་ཞིག་དང་པོ་གསར་རྙེད་བྱུང་ཡོད་སྐོར་དང་རྗེས་སུ་རྒྱ་ནག་གི་མིང་སྦྱོར་གང་ཐུབ་བྱས་ཏེ་འཛམ་གླིང་ལ་རིག་དངོས་དེ་དག་རྒྱ་ནག་གིས་ཡིན་པར་སྒྲུབ་ཐབས་དང་། ཆབ་སྲིད་ཀྱི་དམིགས་ཡུལ་ཡོད་པའི་སྒོ་ནས་ཐབས་ཤེས་སྣ་ཚོགས་བྱེད་ཀྱི་ཡོད་པ་རེད། ཅེས་བརྗོད་བྱུང་།

ཡང་ཁོང་གིས། ཕྱོགས་གཞན་ཞིག་ནས་རྒྱ་ནག་གཞུང་གིས་གཟུགས་མེད་རིག་གནས་སྲུང་སྐྱོབ་ཆེད་ཡིན་སྐོར་བརྗོད་བཞིན་ཡོད་ཀྱང་། དོན་དམ་པའི་རིག་དངོས་དང་གནའ་རྫས་དེ་དག་ལ་རྒྱལ་ཁབ་རིམ་པ། ཞིང་ཆེན་དང་ཁུལ། རྫོང་སོགས་རིག་དངོས་མིང་བྱང་གཏགས་ནས་རིག་དངོས་སྲུང་སྐྱོབ་ཆེད་མིན་པར། མིང་ཐོབ་དེ་དག་བེད་སྤྱོད་ཀྱིས་ཁྱབ་བསྒྲགས་དང་ཡུལ་སྐོར་སྤྲོ་འཆམ་ལས་གཞི་རྒྱ་ཆེར་སྐྱེད་ཐབས་ཁོ་ན་ཡིན་པ་དང་།  བོད་ཀྱི་རིག་དངོས་མང་པོར་རྒྱལ་ཁབ་དང་ཞིང་ཆེན། ཁུལ་དང་རྫོང་རིམ་པའི་མིང་ཐོབ་འདྲ་མིན་བཏགས་ནས་སྲུང་སྐྱོབ་ལ་ཁ་གཡར་གྱི་ཡོད་མོད། དོན་གྱི་དེ་དག་སྲུང་སྐྱོབ་བྱེད་པ་ལས་གཏོར་བརླག་དང་བདག་དབང་ལ་དམིགས་ཡོད་པ་རེད། ཅེས་བརྗོད་བྱུང་།

བོད་ཀྱི་མིག་མངས་ནི་རྡེའུ་དཀར་ནག་གཉིས་སུ་བགོས་ནས་རང་ཕྱོགས་ཀྱི་རྡེའུ་ཡིས་གཞན་ཕྱོགས་ཀྱི་རྡེའུ་ལ་མཐའ་བསྐོར་ནས་ཕམ་པར་བཟོ་བའི་རྕེད་མོ་ཞིག་ཡིན་པ་དང་། བོད་ཀྱི་ས་ཁུལ་འགའ་ཤས་ནས་(འགྱིག)ཅེས་ཀྱང་འབོད་སྲོལ་ཡོད་ལ། དེ་སྔོན་རྒྱ་ནག་གཞུང་གི་གནའ་རྫས་བརྟག་ཞིབ་པ་ཚོས་བོད་ཀྱི་རྒྱལ་ས་ལྷ་སའི་གཞིས་རྩེ་གཉའ་ནང་དང་། མངའ་རིས། མལ་གྲོ་གུང་དཀར་སོགས་སུ་བོད་ཀྱི་གནའ་བོའི་རྡོ་བརྐོས་མིག་མངས་གསར་རྙེད་བྱུང་ཡོད་པའི་གནས་ཚུལ་བསྒྲགས་ཡོད་པ་རེད།

ལོ་རྒྱུས་མཁས་པ་རེ་འགས་བརྗོད་ན། བོད་ཀྱི་མིག་མངས་ལ་ལོ་ངོ་ ༤༠༠༠ ཡས་མས་ཀྱི་ལོ་རྒྱུས་ཡོད་འདུག ཏུན་ཧོང་ནས་ཐོན་པའི་གནའ་རབས་བོད་ཡིག་གི་ལོ་རྒྱུས་ནང་འཁོད་པར་གཞིགས་ན། བཙན་པོ་སྲོང་བཙན་སྒམ་པོའི་ཡབ་གནམ་རིའི་བློན་པོ་ཁྱུང་པོ་སྤུངས་སད་ཟུ་ཙེ་ཞུ་བས་ལག་པ་གཡས་ཀྱིས་མིག་མངས་རྩེ་བ་དང་ལག་པ་གཡོན་པས་རྩིས་ཐོ་འགོད་པར་གྲགས་ཤིང་། ཁོང་ནི་བོད་ཀྱི་མིང་གྲགས་ཅན་གྱི་མིག་མངས་མཁས་ཅན་དུ་འབོད་པར་བཤད།

གསར་འགོད་པ། སངས་རྒྱས་དཀོན་མཆོག