པདྨ་དབང་ཆེན་འདས་གྲོངས་སུ་ཕྱིན།

རྒྱ་གཞུང་ཉེན་རྟོག་པས་བོད་མི་པདྨ་དབང་ཆེན་ཞུ་བ་ཞིག་ལ་གཅར་རྡུང་མང་པོ་བྱས་རྗེས་ཀློད་གྲོལ་བཏང་ཡོད་ཀྱང་ངོས་མི་ཟིན་པའི་ན་ཚ་ཞིག་གིས་ཡུན་རིང་མནར་ཏེ་འདས་གྲོངས་སུ་ཕྱིན་ཡོད་འདུགདེ་རིང་བོད་ནང་གི་ཉིན་གུང་ཆུ་ཚོད་ ༢ ཡས་མས་ཤིག་ལ་ཁྲིན་ཏུའུ་གྲོང་ཁྱེར་གྱི་སཱ་ལོ་སཱ་ཞེས་པའི་སྨན་ཁང་ཞིག་གི་ནང་། དཀར་མཛེས་རྫོང་འོད་བཟོ་སྡེ་བ་ནས་ཡིན་པའི་པདྨ་དབང་ཆེན་ཞུ་བ་ཞིག་འདས་གྲོངས་སུ་ཕྱིན་ཡོད་པ་དང་། འབྲེལ་ཡོད་ཅིག་གིས་པདྨ་དབང་ཆེན་ལགས་ཀྱིས་ལོ་སར་སྐབས་བོད་ཀྱི་རྒྱལ་གླུ་བཏང་བའི་རྐྱེན་གྱིས་རྒྱ་གཞུང་ཉེན་རྟོག་པས་གཅར་རྡུང་བཏང་སྟེ་ལོ་གཅིག་ཙམ་གྱི་རྗེས་སུ་ངོས་མི་ཟིན་པའི་ན་ཚ་ཞིག་བྱུང་སྟེ་དྲག་སྐྱེད་ཐུབ་མེད་སྐོར་བརྗོད་བྱུང་།

དེའི་སྐོར་ལ་འབྲེལ་ཡོད་ཅིག་གིས་འདི་གའི་གསར་འགོད་པར། ཕྱི་ལོ ༢༠༡༦ ལོའི་བོད་ཀྱི་ལོ་སར་བཏང་ནས་ཟླ་གཅིག་ཙམ་འགོར་རྗེས། ཉིན་ཞིག་པདྨ་དབང་ཆེན་ལགས་ཀྱིས་རླངས་འཁོར་བཏང་ནས་འགྲོ་སྐབས། གློ་བུར་དུ་ཉེན་རྟོག་པས་འཛིན་བཟུང་བྱས་ནས་དཀར་མཛེས་རྫོང་ཐོག་ཏུ་བཙན་འཁྲིད་བྱས་ཡོད་པ་དང་། འདྲི་གཅོད་སྐབས་ཁྱེད་ཀྱིས་ལོ་སར་སྐབས་གཞས་ག་རེ་བཏང་བ་དང་། གཞས་དེ་ག་ནས་སྦྱངས་བ་ཡིན་ཞེས་དྲིས་པར། པདྨ་དབང་ཆེན་ལགས་ཀྱིས་གཞས་གང་ཡང་མིན་པར་ང་ཚོ་བོད་རྒྱལ་ཁབ་ཆེན་མོའི་རྒྱལ་གླུ་བཏང་བ་ཡིན་ཞེས་བརྗོད་ཡོད་པ་སོགས་ཀྱིས། ཉེན་རྟོག་པས་ཁོང་ལ་གཅར་རྡུང་དང་མནར་གཅོད་ཚད་མེད་བཏང་ཡོད་པ་དང་། བཀག་ཉར་ཁང་དུ་ཟླ་གཅིག་ལྷག་འགོར་རྗེས་ཁོང་ཀློད་གྲོལ་བཏང་ཡོད་ཀྱང་།  ལོ་གཅིག་ཙམ་གྱི་རྗེས་ཁོང་ལ་བཅོས་ཐབས་མེད་པའི་ནད་ཅིག་བྱུང་སྟེ། སྨན་ཁང་སོགས་སུ་བརྟག་དཔྱད་ག་ཚོད་བྱས་ཀྱང་ནད་ངོས་འཛིན་ཐུབ་མེད་པ་རེད། ཅེས་བརྗོད་བྱུང་།

ཡང་གནས་ཚུལ་མཁོ་སྤྲོད་པས། ཆབ་སྲིད་བཙོན་ཟུར་ཚོར་མཚོན་ན། སྨན་ཁང་སོགས་སུ་བརྟག་དཔྱད་བྱེད་དུ་འགྲོ་སྐབས་རྒྱ་ནག་གཞུང་ཉེན་རྟོག་པ་ཚོས་རྗེས་འདེད་བཏང་སྟེ། སྨན་ཁང་ལ་ནད་གཞི་ངོ་མ་ངོས་འཛིན་བྱེད་དུ་འཇུག་གི་མེད་སྟབས།  ཁོ་ལ་ནད་ག་རེ་འདུག་དང་ནང་ལོག་ལ་ག་རེ་བྱས་ཡོད་སོགས་བརྗོད་མི་ཆོག་ཅེས་བཀག་འགོག་བྱས་པར་བརྟེན། ད་བར་ན་ཚ་ག་རེ་ཡིན་ངོས་འཛིན་ཐུབ་མེད་པ་དང་།  ང་ཚོའི་ངོས་ནས་ཁོང་གི་རྒྱབ་ལོག་ཅིག་ལ་ཤུགས་ཆེན་པོ་ཞིག་རྡུང་རྡེག་བཏང་ཡོད་པའི་དོགས་གཞི་བྱེད་པ་ལས་གཞན་གང་ཡང་ཤེས་མེད་པ་རེད། ཅེས་བརྗོད་བྱུང་།

གནས་ཚུལ་མཁོ་སྤྲོད་པས་བརྗོད་ན། པདྨ་དབང་ཆེན་ལགས་དཀར་མཛེས་དགོན་པའི་གྲྭ་ཟུར་ཞིག་ཡིན་པ་དང་། ཁོང་ལ་ཕ་མ་གཅིག་གི་སྤུན་མཆེད་གྲྭ་དཔལ་ལྡན་འཕྲིན་ལས་ཞུ་བ་ཞིག་ཡོད་པ་དེས། ཕྱི་ལོ་ ༢༠༠༨ ལོར་དཀར་མཛེས་རྫོང་ཐོག་ཏུ་རྒྱ་ནག་གཞུང་གི་བཙན་གནོན་ལ་ཞི་རྒོལ་གནང་པར་བརྟེན། རྒྱ་ནག་གཞུང་གིས་འཛིན་བཟུང་བྱས་ཏེ་ལོ་ངོ་ ༤ བཙོན་འཇུག་ཁྲིམས་ཐག་བཅད་ཡོད་འདུག

ཕྱིས་སུ་གྲྭ་དཔལ་ལྡན་འཕྲིན་ལས་ལགས་བཙོན་གྲོལ་ཐོབ་རྗེས། རྒྱ་ནག་གཞུང་གིས་ཆབ་སྲིད་ཀྱི་ཉེས་མིང་འོག་དཀར་མཛེས་དགོན་པར་འདུག་མ་བཅུག་པར་ད་ལྟ་དགོན་པ་གཞན་ཞིག་ལ་གསང་བའི་ཐོག་ནས་འཛུལ་ཡོད་པ་དང་། རྒྱ་ནག་གཞུང་གིས་གྲོང་མི་ཚོར་ཁང་པ་བཟོ་སྐྲུན་དང་ཤིང་ནགས་འཛུགས་སྐྲུན་ཟེར་བ་སོགས་ཀྱི་ཐོག་ནས་རོགས་དངུལ་སྤྲོད་བཞིན་ཡོད་ན་ཡང་། པདྨ་མ་འཕྲིན་ལས་ཀྱི་ནང་ལ་ཆབ་སྲིད་བཙོན་པ་གཉིས་ཡོད་པར་བརྟེན། རྒྱ་ནག་གཞུང་གིས་དངུལ་གཅིག་ཀྱང་སྤྲོད་ཀྱི་མེད་པ་དང་། ད་ལྟ་ཁོང་གི་ཤུལ་དུ་ལྷག་པའི་ནང་མི་ཚོར་རྟེན་ས་ཡོད་པ་ཁོ་རང་གཅིག་པུ་ཆགས་ཡོད་སྟབས་དཀའ་ངལ་ཆེན་པོ་འཕྲད་བཞིན་ཡོད་འདུག

པདྨ་དབང་ཆེན་ལགས་ཆུང་དུས་རྒྱ་གར་དུ་ཡོང་སྟེ། གྷོ་པལ་པོར་བོད་ཁྱིམ་སློབ་གྲྭའི་ནང་སློབ་སྦྱོང་བྱས་ཏེ་ལོ་གཅིག་གཉིས་ཙམ་རིང་སློབ་སྦྱོང་བྱས་ཡོད་ཀྱང་། འཚོ་བ་སོགས་ཀྱི་ཐད་དཀའ་ངལ་མང་པོ་ཞིག་འཕྲད་དེ་རྗེས་སུ་ཕྱིར་བོད་ལ་ལོག་ཡོད་འདུག  ད་ལྟ་ཁོང་གི་ནང་ལ་ལོ་ན་ ༦༠ ནས་ ༧༠ བར་ཡིན་པའི་ཕ་མ་གཉིས་དང་། ཕྲུ་གུ་གསུམ། སྤུན་མཆེད་དགེ་འདུན་པ་དཔལ་ལྡན་འཕྲིན་ལས་བཅས་ཡོད་པ་དང་། སྲིང་མོ་ཞིག་ཡོད་པ་བཙུན་མ་བྱས་ཏེ་བཙུན་དགོན་ཞིག་ཏུ་ཡོད་འདུག 

རྒྱ་གར་ལྷོ་ཕྱོགས་ཀྱི་ས་གནས་གསར་འགོད་པ་དོན་འགྲུབ་བཀྲ་ཤིས།