ཧོང་ཀོང་མི་མང་གིས་རྔམ་སྟོན་ཁྲོམ་སྐོར་གཞི་རྒྱ་ཆེན་པོ་བྱས།

ཧོང་ཀོང་གཞུང་གིས་རྒྱ་ནག་གཞུང་དང་ལྷན་དུ་དོགས་ཡོད་ཉེས་ཅན་རྩིས་སྤྲོད་ཀྱི་ཁྲིམས་འཆར་བཏོན་པར་མི་མང་ཁྲི་ཕྲག་འགས་ངོ་རྒོལ་ཤུགས་ཆེན་བྱས་འདུགཧོང་ཀོང་རང་དབང་གསར་ཁང་གིས་གནས་ཚུལ་སྤེལ་བ་ལྟར་ན། དེ་རིང་ཞོགས་པ་སྔ་བོར་ཀོང་ཧོང་གི་ཞི་རྒོལ་བ་རྣམས་ཁྲིམས་བཟོ་ལྷན་ཁང་ནང་འཛུལ་ཐབས་བྱེད་སྐབས། ས་གནས་ཉེན་རྟོག་པས་ལས་འགུལ་བར་དབྱུག་པས་གཞུས་པ་དང་རླངས་རྫས་(Pepper Spray) གཏོར་ཡོད་པ་དང་། ལས་འགུལ་བ་རྣམས་ཀྱིས་འགྱིག་གི་དམ་བུ་དང་མདུན་ཐང་དུ་ཡོད་པའི་ལྕགས་ཀྱི་ར་བ་གཏོར་ཏེ་ཕྱོགས་གཉིས་བར་འཁྲུག་འཛིང་ཤོར་ཏེ།  ཉེན་རྟོག་པ་དང་ལས་འགུལ་བ་ཉུང་ཤས་ཤིག་ལ་རྨས་སྐྱོན་བྱུང་ཡོད་འདུག

ཁ་སང་ཕྱི་ཚེས་ ༩ ཡི་ཉིན་རྒྱབ་ཆུ་ཚོད་ ༣ པའི་ཐོག ཧོང་ཀོང་ནང་གི་དམངས་གཙོ་དོན་གཉེར་བའི་ཚོགས་པ་འགའ་ལས་གྲུབ་པའི་སྤྱི་དམངས་འགྲོ་བ་མིའི་ཐོབ་ཐང་ཚོགས་པའི་ (Civil Human Rights Front) གོ་སྒྲིག་འོག ཧོང་ཀོང་བ་ཁྲི་ཕྲག་འགས་ཝིག་ཊོ་རི་ཡ་སྤྱི་གླིང་ (Victoria Park) ནས་ཁྲིམས་བཟོ་ལྷན་ཁང་གི་མདུན་ཐང་བར་རྔམ་སྟོན་ཁྲོམ་སྐོར་བྱས་ཏེ། ས་གནས་སྲིད་གཞུང་གིས་རྒྱ་ནག་གཞུང་ལ་དོགས་ཡོད་ཉེས་ཅན་རྩིས་སྤྲོད་ཀྱི་ཁྲིམས་(Extradition Law) ལག་བསྟར་བྱེད་པར་ངོ་རྒོལ་ཤུགས་ཆེན་བྱས་ཡོད་པ་དང་། ཧོང་ཀོང་གཞུང་གི་མགྲིན་ཚབ་པས་ཧོང་ཀོང་འདི་བདེ་འཇགས་ལྡན་པའི་གྲོང་ཁྱེར་ཞིག་ཏུ་འགྱུར་ཆེད། ཁྲིམས་བཟོ་ལྷན་ཁང་གི་ངོས་ནས་རྒྱུ་མཚན་དང་བརྩི་བཀུར་ཡོད་པའི་ཐོག་ནས་ཁྲིམས་དེར་རྟོག་ཞིབ་བྱ་རྒྱུའི་རེ་སྐུལ་ཞུས་ཡོད་སྐོར་གྱི་གསལ་བསྒྲགས་བྱས་ཡོད་ཀྱང་། དེ་རིང་ཧོང་ཀོང་དམིགས་བསལ་སྲིད་འཛིན་ས་ཁུལ་གྱི་མགོ་འཁྲིད་ལྕམ་ཁེ་རི་ལེམ་ (Carrie Lam) གྱིས། ཧོང་ཀོང་གཞུང་ངོས་ནས་འགན་འཁྲི་ཡོད་པའི་ཐོག་ནས་ཁྲིམས་ཀྱི་སྟོང་ཆ་སྐོང་ཐབས་བྱེད་ཀྱི་ཡོད་པ་མ་ཟད། གཞུང་ངོས་ནས་ཤེས་རྟོགས་དང་ཁས་ལེན་གཙང་མའི་ཐོག་ནས་དེ་ལྟར་བྱེད་ཀྱི་ཡོད་སྐོར་གྱི་གསལ་བསྒྲགས་བྱས་ཏེ། སྔར་བཞིན་ཁྲིམས་འཆར་དེར་རྒྱབ་སྐྱོར་ཡོད་པ་བསྟན་ཡོད་འདུག

ཁ་སང་རྒྱ་ནག་གི་གཞུང་འབྲེལ་ཀྲུང་གོའི་ཉིན་རེའི་ཚགས་ཤོག་ཅེས་པའི་ཐོག་ཧོང་ཀོང་ནང་གི་གནས་ཚུལ་བཀོད་པའི་ནང་། ཕྱིའི་སྟོབས་ཤུགས་ཀྱིས་ཧོང་ཀོང་ནང་ཟིང་འཁྲུག་བསླངས་ཏེ་རྒྱ་ནག་ལ་གནོད་སྐྱོན་གཏོང་གི་ཡོད་པ་དང་། བསམ་བློ་གུ་ཡངས་ཅན་ཞིག་གིས་ཁྲིམས་འཆར་དེས་ཧོང་ཀོང་གི་ཁྲིམས་ཀྱི་དབང་སྒྱུར་དང་དྲང་བདེན་བརྩི་སྲུང་གི་ཆེད་དུ་ཚད་ལྡན་དང་རྒྱུ་མཚན་ལྡན་པ་ཞིག་ཏུ་མཐོང་ངེས་པ་རེད་སོགས་བརྗོད་ཡོད་འདུག

ད་ལན་གྱི་རྔམ་སྟོན་ཁྲོམ་སྐོར་གྱི་ལས་འགུལ་གོ་སྒྲིག་པས་ད་ལན་གྱི་ལས་འགུལ་ནང་ཁྱོན་མི་གྲངས་ས་ཡ་ ༡།༣ ལྷག་འཛོམས་ཡོད་སྐོར་བརྗོད་ཡོད་པ་དེ་དོན་དངོས་ཡིན་ཚེ། དེ་ནི་ཕྱི་ལོ་ ༡༩༩༧ ལོར་ཧོང་ཀོང་རྒྱ་ནག་ལ་རྩིས་སྤྲོད་བྱས་རྗེས་ཀྱི་མི་མང་རང་བཞིན་གྱི་ལས་འགུལ་གཞི་རྒྱ་ཆེ་ཤོས་དེ་ཆགས་ཡོད་པ་རེད། ཡིན་ནའང་། ས་གནས་ཉེན་རྟོག་པས་ཁ་སང་དུས་གཅིག་ལ་ཆེས་མང་ན་ཡང་མི་གྲངས་འབུམ་ ༢།༧ མ་གཏོགས་འཛོམས་མེད་སྐོར་བརྗོད་ཡོད་འདུགརྔམ་

སྟོན་ཁྲོམ་སྐོར་སྐབས་“ཁྲིམས་འཆར་སྡུག་པོ་དེ་ཕྱིར་འཐེན་བྱེད་དགོས་” ཞེས་དང་། “རྒྱ་ནག་གི་དོགས་ཡོད་ཉེས་ཅན་རྩིས་སྤྲོད་ཁྲིམས་འཆར་ལ་ངོ་རྒོལ་ཡོད།” ད་དུང་ “ཁེ་རི་ལེམ་གོ་གནས་ནས་མར་འབབ་རོགས།” ཞེས་པ་སོགས་ཀྱི་འབོད་ཚིག་བསྒྲགས་པའི་འཕྲེད་དར་ཁྱེར་ཡོད་པ་དང་། ལས་འགུལ་ནང་མཉམ་ཞུགས་བྱེད་མཁན་སློབ་ཆེན་སློབ་མ་ཀཱ་རེན་ཁྲན་ (Karen Chan) ཞེས་པ་ཞིག་གིས་གསར་འགོད་པར། ངས་ཧོང་ཀོང་གཞུང་གི་བསམ་བློར་འགྱུར་བ་ཐེབས་རྒྱུ་ཁག་པོ་ཡིན་པ་ཤེས་ཀྱི་ཡོད་ཀྱང་། གསར་འགྱུར་བརྒྱུད་ལམ་གྱི་སྟོབས་ཤུགས་བརྒྱུད་དེ་རིང་གི་ངོ་རྒོལ་ལས་འགུལ་འདིས་རྒྱལ་སྤྱིའི་སྤྱི་ཚོགས་ལ་བློ་འཚབ་སྐྱེ་རུ་འཇུག་པའི་རེ་བ་བྱེད་ཀྱི་ཡོད། ཅེས་བརྗོད་འདུག་པ་དང་། ཡང་འབྲིང་རིམ་སློབ་གྲྭའི་དགེ་རྒན་གྷེ་རི་ཁྲིའུ་ (Gary Chiu) ཞེས་པ་ཞིག་གིས། ཧོང་ཀོང་འདི་དབང་ཆ་གཅིག་སྡུད་རིང་ལུགས་ཀྱི་སྲིད་གཞུང་དང་རང་དབང་ཅན་གྱི་འཛམ་གླིང་གཉིས་དབར་གྱི་གཡུལ་སར་འགྱུར་བཞིན་འདུག གཅིག་གཉའ་གནོན་འོག་ཡོད་ཚེ། ཚང་མར་རང་དབང་མེད་པ་དྲན་དགོས། དེར་བརྟེན་ང་ཚོས་རྒྱལ་སྤྱིའི་སྤྱི་ཚོགས་དང་། ཨ་རིའི་གཞུང་། དེ་བཞིན་ཡུ་རོབ་བཅས་ཀྱིས་ཧོང་ཀོང་དང་རྒྱ་ནག་གཞུང་ལ་གནོན་ཤུགས་སྤྲོད་རྒྱུའི་འབོད་སྐུལ་ཞུ་ཡི་ཡོད། ཅེས་བརྗོད་འདུག

དེ་རིང་ཨལ་ཇེ་ཛི་ར་གསར་ཁང་ (Aljazeera) གིས་གནས་ཚུལ་སྤེལ་བ་ལྟར་ན། ལྕམ་ཁེ་རི་ལེམ་གྱིས་གསར་འགོད་པར། ཁྲིམས་འཆར་འདི་ནི་དྲང་བདེན་སྲུང་སྐྱོབ་བྱེད་པའི་ཁྲིམས་གལ་ཆེན་ཞིག་དང་། ཧོང་ཀོང་གིས་རྒྱལ་སྤྱིའི་སྤྱི་ཚོགས་ལ་འཁྲི་པའི་ཉེས་ཅན་རྩིས་སྤྲོད་ཀྱི་འཁུར་ལེན་གྱི་ཡོད་པ་མཚོན་གྱི་ཡོད། ཅེས་དང་། ཟླ་འདིའི་ཕྱི་ཚེས་ ༡༢ ཉིན་ཁྲིམས་འཆར་དེར་ཉན་ཞིབ་ཐེངས་གཉིས་པ་དེ་འཚོག་གཏན་འཁེལ་ཡོད། ང་དང་ངའི་ལས་རོགས་རྣམ་པས་ཁྲིམས་འཆར་དེའི་ཐད་ཀྱི་བསམ་ཚུལ་ཚང་མར་དོ་སྣང་བྱས་ཡོད་། སྔར་བཞིན་ཁྲིམས་འཆར་དེ་ཕྱིར་འཐེན་བྱ་རྒྱུ་མིན་ལུགས་བརྗོད་ཡོད་འདུག

གཞན་ཡང་། ཁ་སང་གཟའ་ཉི་མའི་ཉིན་ཁེ་ན་ཌའི་གྲོང་ཁྱེར་ཝན་ཁོ་ཝར་(Vancouver)གྱི་ནང་། རྒྱ་རིགས་བརྒྱ་ཕྲག་མང་པོས་རྒྱ་ནག་གཞུང་ཚབ་ཁང་གི་མདུན་དུ་ངོ་རྒོལ་སྐད་འབོད་བྱས་ཡོད་པ་དང་། སྐབས་དེར་ལས་འགུལ་བའི་ཁྲོད་དུ་ཁྲིམས་འཆར་དེ་ཕྱིར་འཐེན་ཡོང་རྒྱུའི་རེ་བ་བྱེད་མཁན་མང་པོ་མེད་ཀྱང་།

ཕལ་ཆེ་བས་སྨྲ་བརྗོད་རང་དབང་ལོངས་སུ་སྤྱོད་རྒྱུ་གཙིགས་ཆེར་བརྩིས་ཏེ་ལས་འགུལ་ནང་མཉམ་ཞུགས་བྱས་ཡོད་པ་མ་ཟད། འགའ་ཤས་ཀྱིས་རྒྱ་ནག་སྐམ་ས་ཆེན་མོའི་མི་མང་ལ་རང་གི་འབོད་སྒྲ་སྦྱིན་རྒྱུའི་བློ་སྟོབས་མེད་པ་དང་། རང་དབང་སྲུང་སྐྱོབ་བྱེད་རྒྱུ་དེ་ཧོང་ཀོང་བའི་ཟུངས་ཁྲག་ནང་ཡོད་སྐོར་སོགས་བརྗོད་ཡོད་འདུག

སྤྱིར་དོགས་ཡོད་ཉེས་ཅན་རྩིས་སྤྲོད་ཀྱི་ཁྲིམས་འཆར་དེ་འདི་ལོའི་ཕྱི་ཟླ་ ༢ པའི་ནང་ལྕམ་ཁེ་རི་ལེམ་གྱིས་སྣེ་འཁྲིད་པའི་སྲིད་གཞུང་ནས་ཁྲིམས་བཟོ་ལྷན་ཁང་ལ་བཏོན་པ་ཞིག་ཡིན་པ་དང་། ཁྲིམས་འཆར་དེའི་ནང་ཧོང་ཀོང་དུ་ཡོད་པའི་དོགས་ཡོད་ཉེས་ཅན་ཞིག་རྒྱ་ནག་སྐམ་ས་ཆེན་མོའི་ཁྲིམས་ཁང་ཞིག་གིས་རྩིས་སྤྲོད་དགོས་པའི་རེ་སྐུལ་ཞུ་ཆོག་ཀྱང་། རྩིས་སྤྲོད་བྱེད་མིན་གྱི་མཐའ་མའི་ཐག་གཅོད་དེ་ཧོང་ཀོང་ཁྲིམས་ཁང་གི་ལག་ན་ཡོད་པ་མ་ཟད། ཆབ་སྲིད་དང་ཆོས་ལུགས་ཀྱི་དོགས་ཡོད་ཉེས་ཅན་པ་དག་རྩིས་སྤྲོད་མི་ཆོག་པ་དང་། རྩིས་སྤྲོད་བྱས་རྗེས་རྒྱ་ནག་གི་ཁྲིམས་ཁང་དེས་ཁྲིམས་བཤེར་གྱི་བརྒྱུད་རིམ་ཆ་ཚང་བརྒྱུད་དགོས་ཀྱི་ཡོད་སྟབས།

ཆབ་སྲིད་དབྱེ་ཞིབ་པ་མང་པོས་ཁྲིམས་འཆར་དེ་གཏན་འབེབ་བྱུང་ན་ཧོང་ཀོང་ཁྲིམས་ཞིབ་ལྷན་ཁང་གི་རང་དབང་ལ་དོ་ཕོག་འགྲོ་ངེས་ཡིན་པ་མ་ཟད། ཧོང་ཀོང་གི་རྒྱལ་ཁབ་གཅིག་ལ་ལམ་ལུགས་གཉིས་ཀྱི་གནས་བབ་ལ་ཡང་དོ་ཕོག་སྔར་ལས་ཆེན་པོ་ཡོང་གི་ཡོད་པ་དང་། པེ་ཅིན་གཞུང་གིས་ཁྲིམས་ཡིག་དེ་ལོག་སྤྱོད་བྱས་ཏེ་ཧོང་ཀོང་ནང་དུ་རྟེན་གཞི་བྱས་པའི་གཞུང་གི་ཁ་གཏད་ཚོགས་པ་དང་མི་སྒེར་ལ་དམིགས་ཡོད་སྲིད་སྐོར་བརྗོད་ཀྱི་འདུག

སྤྱིར་ཧོང་ཀོང་གིས་ཨ་རི་དང་དབྱིན་ཡུལ་ཚུད་པའི་རྒྱལ་ཁབ་ ༢༠ དང་ལྷན་དུ་དོགས་ཡོད་ཉེས་ཅན་རྩིས་སྤྲོད་ཀྱི་གྲོས་ཆོད་བཞག་ཚར་ཡོད་ཀྱང་། ཧོང་ཀོང་དང་རྒྱ་ནག་བར་འདས་པའི་ལོ་ངོ་བཅུ་ཕྲག་གཉིས་རིང་ནས་དོགས་ཡོད་ཉེས་ཅན་རྩིས་སྤྲོད་ཀྱི་ཐད་ལ་གྲོས་མོལ་བྱེད་མུས་ཡིན་ཡང་ད་བར་གྲོས་ཆོད་འཇོག་ཐུབ་མེད་པ་དང་། དེའི་རྒྱུ་རྐྱེན་གཙོ་བོ་ནི་རྒྱ་ནག་ནང་དོགས་ཡོད་ཉེས་ཅན་ལ་ཁྲིམས་ཀྱི་སྲུང་སྐྱོབ་ཞན་པའི་རྐྱེན་གྱིས་གྲོས་ཆོད་འཇོག་ཐུབ་མེད་པར་ངོས་འཛིན་བྱེད་ཀྱི་ཡོད་པ་རེད།

གསར་འགོད་པ། པ་སངས་ཚེ་རིང་།