རྒྱལ་ཁབ་ཀྱི་གསང་བ་ཕྱིར་གྱར་བ་དང་འཇིགས་སྐུལ་རིང་ལུགས་པར་མཉམ་འབྲེལ་བྱས་པ་སོགས་ཀྱི་ཉེས་མིང་གཡོགས་པའི་ཨེ་ཇིབ་ཀྱི་སྲིད་འཛིན་ཟུར་པ་མོ་ཧཱ་མ་ཌི་མོར་སི་གློ་བུར་དུ་གྲོངས་བར་བརྟེན་ཡུལ་དེའི་དྲག་པོའི་དམག་གཞུང་ལ་དོགས་པ་ཆེན་པོ་བྱེད་ཀྱི་ཡོད་འདུག
དེ་རིང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་བཏོན་པ་ལྟར་ན། ཁ་སང་ཨེ་ཇིབ་ཀྱི་ཕྱི་དྲོའི་ཆུ་ཚོད་ ༤:༥༠ སྟེང་རྒྱལ་ས་ཁའེ་རོའི་(Cairo)ཁྲིམས་ཁང་དུ། ཡུལ་དེའི་དམངས་གཙོའི་ལམ་ནས་འོས་འདེམས་བྱུང་བའི་སྲིད་འཛིན་དང་པོ་མོ་ཧཱ་མ་ཌི་མོར་སི་( Mohamed Morsi )ལ་ཁྲིམས་བཤེར་བྱེད་སྐབས་གློ་བུར་དུ་ས་ལ་འགྱེལ་ཡོད་པ་དང་། དེ་ནས་སྨན་ཁང་དུ་བསྐྱལ་ཡོད་ཀྱང་འདས་གྲོངས་སུ་ཕྱིན་ཡོད་འདུག
གནད་དོན་དེའི་ཐད་་མོ་ཧཱ་མ་ཌི་མོར་སིའི་བུ་ཨབ་དྷོལ་མོར་སི་(Abdullah Mohamed Morsi)ཡིས་རོའོ་ཊིར་གསར་ཁང་གི་གསར་འགོད་པར། ད་ལྟའི་ཆར་ནང་མི་ཚོས་ཁོང་གི་ཕུང་པོ་གང་དུ་བཞག་ཡོད་མེད་ཤེས་ཀྱི་མེད་ལ། སྲིད་གཞུང་གིས་ནང་མི་ཚོ་དུར་མཆོད་བྱེད་དུའང་གཏོང་གི་མེད་སྐོར་བརྗོད་འདུག་ལ། ཨེ་ཇིབ་གཞུང་འབྲེལ་གསར་ཁང་(Egypt’s state TV)ཡིས། སྲིད་འཛིན་ཟུར་པ་མོར་སི་ཡི་་ནག་ཉེས་གཙང་མ་ཆགས་ཏེ་ཁྲིམས་ཞིབ་མཇུག་རྫོགས་རྗེས་ཁོང་རང་འདས་གྲོངས་སུ་ཕྱིན་ཡོད་པ་དང་། ཁོང་གི་ཕུང་པོ་སྨན་ཁང་དུ་འཁྱེར་ཡོད་སྐོར་བསྒྲགས་འདུག
ཨལ་རྗེ་ཛི་རཱ་(Aljazeera)གསར་ཁང་གིས་སྤེལ་བའི་གནས་ཚུལ་ནང་། སྲིད་འཛིན་ཟུར་པ་ཁོང་ལ་དེ་སྔོན་ནས་གློ་བ་དང་མཁལ་མ་སོགས་ལ་ན་ཚ་ཡོད་པ་དང་། ཁོང་བཙོན་འཇུག་བྱས་རྗེས་ནད་གཞི་རྣམས་ཇེ་སྡུག་ཏུ་སོང་སྐོར་བརྗོད་ཡོད་པ་དང་། ཁོང་གི་ཕུང་པོར་སྨན་ཁང་གིས་བརྟག་དཔྱད་བྱས་པའི་སྙན་ཐོ་ཞིག་བཏོན་པའི་ནང་རྨས་སྐྱོན་གསར་པ་རིགས་དང་ལུས་ལ་བརྡབ་སྐྱོན་སོགས་གང་ཡང་བྱུང་མེད་སྐོར་བསྒྲགས་ཡོད་ཀྱང་། ཁོང་གློ་བུར་དུ་འདས་གྲོངས་སུ་སོང་རྗེས་རྒྱལ་སྤྱིའི་ཐོག་ནས་ཨེ་ཇིབ་དམག་གཞུང་ལ་དོགས་གཞི་ཆེན་པོ་བྱེད་ཀྱི་ཡོད་པ་དང་། དེ་བཞིན་མཉམ་འབྲེལ་རྒྱལ་ཚོགས་ཀྱི་མགྲིན་ཚབ་པ་དང་ཨ་རབ་ཡུལ་གྲུ་ཁག་ཏུ་ཁོང་ལ་མྱ་ངན་བྱེད་ཀྱི་ཡོད་པ་དང་སྦྲགས་ཨེ་ཇིབ་གཞུང་ལ་སྐྱོན་བརྗོད་མང་པོ་བྱེད་ཀྱི་ཡོད་འདུག
མོར་སི་ཡི་ཁ་ཆེའི་སྤུན་ཟླ་ཚོགས་པས་སྲིད་གཞུང་གིས་ད་བར་དུ་ཁོང་ལ་སྨན་བཅོས་དང་སྨན་ཁང་དུ་སྨན་པར་བསྟེན་གཏུག་སོགས་གང་ཡང་བྱེད་བཅུག་མེད་པས་ཁོང་བསད་པ་ཡིན་སྟབས། གནད་དོན་དེའི་འགན་ཆ་ཚང་ཨེ་ཇིབ་གཞུང་ལ་ཡོད་པ་དང་ཁ་ཆེའི་མི་མང་ཚོས་རང་ཉིད་གང་ན་ཡོད་པའི་རྒྱལ་ཁབ་ཁག་གི་ཨེ་ཇིབ་གཞུང་ཚབ་ལ་ངོ་རྒོལ་བྱེད་དགོས་པའི་སྐུལ་མ་ཡང་བཏང་ཡོད་པ་དང་། གཞན་ཡང་རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་ཨེ་ཇིབ་གཞུང་ལ་སྲིད་འཛིན་ཟུར་པ་ཁོང་ལ་སྨན་བཅོས་སོགས་བྱེད་མ་བཅུག་པར་གློ་བུར་དུ་འདས་གྲོངས་སུ་སོང་བ་ནི་ཨེ་ཇིབ་སྲིད་གཞུང་གི་ངོ་ཚ་ཆེན་པོ་ཞིག་ཡིན་པ་དང་། གནས་སྟངས་དེ་ནི་འཇིགས་ཡེར་བ་ཞིག་ཡིན་སྐོར་སྐྱོན་བརྗོད་བྱས་པ་འདུག
ཕྱི་ལོ་ ༢༠༡༢ ལོར་ཨེ་ཇིབ་ཀྱི་དམངས་གཙོའི་འོས་འདེམས་ཁྲོད་ཡུལ་དེའི་མཁའ་དམག་གི་དམག་དཔོན། མཱུ་བྷ་རག་སྲིད་དབང་སྐབས་ཀྱི་སྲིད་བློན་ཤཱ་ཧྥེག་(Ahmed Shafiq) དང་། ཁ་ཆེ་སྤུན་ཟླ་ཚོགས་པའི་(Muslim Brotherhood )འོས་མི་མོར་སི་(Mohamed Morsi)གཉིས་ཀྱི་འོས་འགྲན་ཁྲོད། མོར་སི་ལ་འོས་བསྡུའི་རྒྱལ་ཁ་ཐོབ་སྟེ་ཨེ་ཇིབ་ཀྱི་དམངས་གཙོའི་ལམ་ནས་བདམས་པའི་སྲིད་འཛིན་ཐོག་མ་དེ་ཆགས་ཡོད་པ་དང་། སྐབས་དེར་རྒྱལ་སྤྱིའི་སྤྱི་ཚོགས་ཁྲོད་ཨ་རབ་གླིང་གི་རྒྱལ་ཁབ་ཆེ་ཤོས་ཤིག་དམངས་གཙོའི་ཕྱོགས་སུ་བསྐྱོད་པ་དེས་གླིང་དེར་ཤུགས་རྐྱེན་ཐེབས་ཐུབ་པའི་རེ་བ་དང་དོ་སྣང་ཤུགས་ཆེན་བྱུང་ཡོད་ཀྱང་། སྲིད་འཛིན་ཆགས་རྗེས་ཀྱི་ལོ་གཅིག་རིང་རྒྱལ་ཁབ་ནང་དཀའ་རྙོག་མང་པོ་ཞིག་བྱུང་ཡོད་པ་མ་ཟད། ཁོང་གིས་རྒྱལ་ཁབ་ཀྱི་རྩ་ཁྲིམས་ནང་སྲིད་འཛིན་ལ་དབང་ཆ་ཆེན་པོ་ཡོད་པ་བེད་སྤྱོད་ལོག་པར་བཏང་བའི་གླེང་རྙོག་འོག་མི་མང་གིས་ངོ་རྒོལ་ཤུགས་རྐྱེན་བྱུང་།
ཕྱི་ལོ་ ༢༠༡༣ ལོའི་ཟླ ༧ ཚེས་ ༤ ཉིན་ཨེ་ཇིབ་རྒྱལ་ཡོངས་དམག་གཞུང་གིས་འདས་པའི་ལོའི་ནང་ཨེ་ཇིབ་ནང་རྙོག་ཟིང་མང་པོ་བྱུང་སྟེ་རྒྱལ་ཁབ་དཀའ་ཉེན་ལ་ཐུག་ཡོད་པ་དང་། སྲིད་འཛིན་མོར་སི་ཡིས་མང་ཚོགས་ཀྱི་མངོན་འདོད་ལ་ཉན་འཇོག་མི་བྱེད་པར་ཟིང་འཁྲུག་སྔར་ལས་ཤུགས་ཆེ་རུ་འགྲོ་བཞིན་ཡོད་སྟབས། གནས་སྐབས་རིང་རྒྱལ་ཁབ་ཀྱི་རྩ་ཁྲིམས་ཕྱིར་བསྡུ་བྱས་ཏེ་ཨེ་ཇིབ་ཀྱི་སྲིད་འཛིན་མོར་སི་( Mohamed Morsi )ལས་གནས་ནས་ཕྱིར་འཕུད་མི་གཏོང་ཐབས་མེད་ཆགས་ཡོད་སྐོར་ཁྱབ་བསྒྲགས་བྱས་ཡོད་པ་མ་ཟད། སྲིིད་འཛིན་མོར་སི་དང་ཁོང་གི་ལས་རོགས་རྣམས་འཛིན་བཟུང་བཙོན་འཇུག་བྱས་ཏེ། ཨེ་ཇིབ་ཆེས་མཐོའི་ཁྲིམས་ཁང་གི་ཁྲིམས་དཔོན་མཱན་སོར་(Adli Mansour)ེབར་བརྒལ་སྲིད་འཛིན་དུ་བསྐོ་བཞག་བྱས་ཡོད་འདུག
འདས་པའི་ལོ་དྲུག་རིང་ཡུལ་དེའི་ཆེས་མཐོའི་ཁྲིམས་ཁང་གིས་ཁོང་ལ་འདྲི་ཞིབ་བྱས་པ་བརྒྱུད། ཁོང་གིས་རྒྱལ་ཁབ་ཀྱི་དམག་དོན་གསང་བ་ཕྱིར་གྱར་བ་དང་འཇིགས་སྐུལ་རིང་ལུགས་པ་དང་མཉམ་ལས་བྱས་པ། ཁོ་རང་ལ་ཁ་གཏད་གཅོག་མཁན་རྣམས་ལྐོག་གསོད་དང་། འབྲེལ་གཞུང་གིས་བཙོན་འཇུག་བྱས་པའི་བཙོན་པ་དག་ཀློད་གྲོལ་བཏང་སྟེ། ཨེ་ཇིབ་ནང་ཟིང་འཁྲུག་བརྒྱུད་སྐུལ་བྱས་ཡོད་པའི་ཉེས་མིང་གཡོགས་ཡོད་འདུག
ཕྱི་ལོ་༢༠༡༣ ལོར་མོར་སི་ཡི་སྲིད་དབང་མགོ་རྟིང་བསློགས་རྗེས། ཁོང་ལ་རྒྱབ་སྐྱོར་བྱེད་མཁན་ཁ་ཆེ་གྲོགས་པོ་ཚོགས་པའི་མགོ་འཁྲིད་ཁག་ཅིག་ཀྱང་འཛིན་བཟུང་བྱས་ཏེ་མང་པོ་ཞིག་ལ་ཚེ་བཙོན་གྱི་ཁྲིམས་ཐག་བཅད་ཡོད་སྟབས། གཞུང་འཛིན་ཤོག་ཁག་དང་ཁ་ཆེ་གྲོགས་པོ་ཚོགས་པར་རྒྱབ་སྐྱོར་བྱེད་མཁན་བར་ནང་འཁྲུག་ཤོར་ཏེ། ལོ་གཅིག་ནང་མི་ ༡༤༠༠ ལྷག་རྐྱེན་འདས་དང་གཞན་མི་ ༡༦༠༠ ཙམ་བཀག་ཉར་བྱས་ཡོད་པ་དང་། སྲིད་ཟུར་མོར་སི་བཙོན་འཇུག་བྱས་རྗེས་ད་བར་ཁོང་གི་ནང་མི་ཚོར་ཐེངས་གསུམ་ལ་ཐུག་ཏུ་བཅུག་པ་ལས་མི་སུ་གཅིག་ལའང་ཐུག་ཏུ་བཅུག་མེད་པ་རེད།
ཕྱི་ལོ་ ༢༠༡༠ ལོར་ཨེ་ཇིབ་མི་མང་གིས་གསར་བརྗེ་གྱེན་ལངས་བྱས་ཏེ་ལོ་ ༣༠ ལྷག་རིང་སྲིད་དབང་སྒེར་འཛིན་བྱེད་མཁན་མཱུ་བྷ་རག་(Hosni Mubarak) གནས་དབྱུང་བཏང་རྗེས་མི་དེ་ཚེ་བཙོན་དུ་བཅུག་ཡོད་པ་དང་། མཱུ་བྷ་རག་གི་སྲིད་དབང་ཤོར་རྗེས་སྐབས་དེའི་དམག་དོན་ལྷན་ཁང་གིས་བར་བརྒལ་གཞུང་བཟུང་སྟེ་དམངས་གཙོ་བཅོས་སྒྱུར་དང་རྩ་ཁྲིམས་གཏན་འབེབ། དམངས་གཙོའི་ལམ་ནས་མི་མང་ལ་འོས་བསྡུ་བྱེད་བཅུག་པར་བརྟེན། རྒྱལ་སྤྱིའི་སྤྱི་ཚོགས་ནས་ཨེ་ཇིབ་ནང་དཔྱིད་དུས་ཀྱི་གསར་བརྗེ་མཇུག་སྒྲིལ་རྗེས།ཨེ་ཇེབ་གཙོས་དཀྱིལ་ཤར་ཡུལ་གྲུ་ཁག་ནང་དམག་འཁྲུག་མེད་པར་ཕན་ཚུན་འཆམ་མཐུན་ཡོང་རྒྱུའི་རེ་བ་བཅངས་ཡོད་ཀྱང་། དེ་ལས་ལྡོག་སྟེ་དམག་འཁྲུག་དང་ཟིང་འཁྲུག་བསྟུད་མར་ལངས་ཡོད་པ་མ་ཟད། དཀྱིལ་ཤར་ཡུལ་གྲུ་དག་དྲག་སྤྱོད་པའི་འཐབ་ར་ཞིག་ཏུ་འགྱུར་བཞིན་ཡོད་པ་རེད།
གསར་འགོད་པ། སངས་རྒྱས་དཀོན་མཆོག
