དེ་རིང་བོད་ནང་གི་ཉིན་གུང་༡༢་ཡོལ་ཙམ་ལ་བོད་ཀྱི་གཏམ་བརྗོད་སྒྱུ་རྩལ་བ་གྲགས་ཅན་རྒན་ཐུབ་བསྟན་ལགས་སྙུང་གཞིའི་རྐྱེན་གྱིས་དགུང་གྲངས་ ༨༥་ཐོག་འདས་གྲོངས་སུ་གྱུར་ཡོད་འདུག
བོད་ལྗོངས་ཆ་འཕྲིན་གྱིས་གནས་ཚུལ་སྤེལ་བ་ལྟར་ན། རྒན་ཐུབ་བསྟན་ལགས་ནི་ཕྱི་ལོ་༡༩༣༤ལོར་ལྷ་སའི་མི་ཁྱིམ་དཀྱུས་མ་ཞིག་ཏུ་སྐྱེས་ཤིང་། ཡབ་ཡུམ་གཉིས་ནས་ཁོང་ཁྲལ་འུ་ལག་རྒྱུག་མི་དགོས་པའི་ཆེད། དགུང་ལོ་དྲུག་སོན་དུས་ལྷ་ས་ཀུན་བདེ་གླིང་དགོན་པར་བཅུག དགོན་པ་དེའི་བླ་མ་སྟག་ཚག་རིན་པོ་ཆེ་ནི་ཆོས་དང་འབྲེལ་བའི་གླུ་གར་གྱི་རིགས་སྣ་ཚོགས་ལ་ཤིན་ཏུ་མཉེས་པས། མཚམས་རེར་ལྷ་སའི་དམངས་ཁྲོད་བླ་མ་མ་ནི་བ་གྲགས་ཅན་ཚེ་རིང་ཆོས་འཛོམས་དང་། ཀོང་པོའི་གེ་སར་སྒྲུང་པ་གྲགས་ཅན་གྲགས་པ། སྐྱོར་མོ་ལུང་གི་ལྷ་མོ་བ་གྲགས་ཅན་ནོར་བུ་ཚེ་རིང་སོགས་འཁྲབ་སྟོན་ལ་གདན་དྲངས་པ་དང་། ངོ་མཚར་ཆེ་བའི་དམངས་ཁྲོད་སྒྱུ་རྩལ་དེ་དག་གིས་རྒན་ཐུབ་བསྟན་ལགས་ཀྱི་ཡིད་དབང་བཀུག་ཅིང་། ཆོས་ཞོར་དུ་གར་འཆམ་དང་། ལྷ་མོ། བླ་མ་མ་ནི། གླིང་སྒྲུང་སོགས་སྦྱོང་རྒྱུ་ནི་ཁོང་གི་སྤྲོ་བ་ཆེ་ཤོས་སུ་གྱུར། དེ་ནས་ཕྱིས་སུ་ཀུན་བདེ་གླིང་དགོན་པས་ལྷ་མོ་ཚོགས་པ་ཞིག་བཙུགས་པས། ཐུབ་བསྟན་ལགས་རུ་ཁག་དེའི་འཁྲབ་སྟོན་པ་གཙོ་བོར་གྱུར་ཞིང་། ཁོང་ནས་ལྷ་མོའི་འཁྲབ་གཞུང་འགྲོ་བ་བཟང་མོ་དང་། གཟུགས་ཀྱི་ཉི་མ་གཉིས་ཀྱི་མི་སྣ་གཙོ་བོ་འགྲོ་བ་བཟང་མོ་དང་གཟུགས་ཀྱི་ཉི་མ་གཉིས་འཁྲབ་སྟོན་གནང་བར། མི་རྣམས་ཀྱིས་དགའ་མོས་ཆེན་པོ་ཐོབ།
དེའི་རྗེས་ཁོང་གིས་རྩེ་ཕོ་བྲང་གི་གར་དཔོན་པ་སངས་དོན་གྲུབ་དང་། དམངས་ཁྲོད་སྒྱུ་རྩལ་པ་ཨ་ནན། ཆུ་ཤུར་ཡེ་ཤེས་སྒྲོལ་མ། ཨ་མན་རི་སོགས་ཀྱི་མདུན་ནས་ནང་མ་སྟོད་གཞས་དང་། ས་སྐྱ་བ་རྡོ་རྗེ་དང་། ཧུའུ་རིགས་སྒྱུ་རྩལ་པ་ཧ་པི་པུ་སོགས་ཀྱིས་ནས་རོལ་ཆ་ཡང་ཆིན་དང་འཕྲེད་གླིང་། ཀོང་པོའི་གེ་སར་སྒྲུང་མཁན་གྲགས་པའི་མདུན་ནས་གླིང་སྒྲུང་སོགས་སློབ་སྦྱོང་གནང་།
ཁོང་གིས་གར་སྟེགས་དེ་བས་རྒྱ་ཆེ་བ་ཞིག་གི་ཐོག་ཏུ་རང་མོས་འཁྲབ་སྟོན་བྱེད་པའི་སྐལ་བ་ཐོབ་ཆེད། ༡༩༥༣ལོར་ཐུབ་བསྟན་ལགས་དགོན་པ་ནས་ཐོན། དེའི་རྗེས་སྔ་ཕྱིར་རྒྱལ་གཅེས་གཞོན་ནུ་ཤེས་རིག་མཐུན་ཚོགས་དང་། བོད་ལྗོངས་སྡེ་ཚོགས་ལས་དོན་ཨུ་ཡོན་ལྷན་ཁང་། གྲོང་ཁྱེར་ལྷ་སའི་གཞོན་ནུ་དང་བུད་མེད་མཉམ་འབྲེལ་ཚོགས་པ་སོགས་སུ་ཞུགས་ནས་དྲིལ་བསྒྲགས་འཁྲབ་སྟོན་གྱི་ཕྱག་ལས་གནང་།
ཕྱི་ལོ་༡༩༦༠ལོར་ལྷ་ས་གྲོང་ཁྱེར་མི་རིགས་སྒྱུ་རྩལ་ཚོགས་པ་དངོས་སུ་དབུ་བརྙེས་པ་དང་། ཐུབ་བསྟན་ལགས་ཀྱང་ཚོགས་པ་དེ་ཐོག་མར་འཛུགས་མཁན་གྱི་གྲས་ཤིག་ཡིན་པའི་ངོས་ནས་ལས་ཁུངས་དེར་ཞུགས། དུས་སྐབས་དེར་ལྷ་ས་ཤར་ཕྱོགས་ཟློས་གར་ཚོགས་པའི་རྒན་བློ་བཟང་རྡོ་རྗེ་ལགས་ནས་རྒྱ་རིགས་ཀྱི་དགོད་བྲོའི་གཏམ་གླེང་མཁས་པ་ཧོ་པོ་ལིན་གྱི་བརྩམས་འབྲས་ཆང་བཟི་ཞེས་པ་དེ་བོད་སྐད་དུ་བསྒྱུར་བ་དང་། དེ་ཐུབ་བསྟན་ལགས་དང་འཁྲབ་སྟོན་པ་གཞན་ཞིག་གིས་འཁྲབ་སྟོན་ལེགས་པར་གནང་བས། མང་ཚོགས་ཀྱི་དགའ་མོས་ཆེན་པོ་ཐོབ་ཅིང་། འཁྲབ་ཚན་དེ་བོད་སྐད་ཐོག་ནས་འཁྲབ་སྟོན་བྱས་པའི་དགོད་བྲོའི་གཏམ་གླེང་ཆེས་ཐོག་མར་གྱུར། ད་དུང་འཁྲབ་གཞས་གྲགས་ཅན་གྲོང་གསར་བསྐོར་བ་ཞེས་པ་དེ་ཡང་ཕྱི་ལོ་༡༩༦༥ལོར་རྒན་ཐུབ་བསྟན་ལགས་དང་ཕུན་ཚོགས་སྒྲོལ་མ་ལགས་ནས་ཐེངས་དང་པོར་འཁྲབ་སྟོན་གནང་།
རྒན་ཐུབ་བསྟན་ལགས་ཀྱིས་འདས་པའི་ལོ་དྲུག་བཅུ་ལྷག་ཙམ་རིང་སྔ་ཕྱིར་ལྷ་ས་གྲོང་ཁྱེར་མི་རིགས་སྒྱུ་རྩལ་ཚོགས་པའི་འགོ་འཛིན་དང་། ལྷ་ས་གྲོང་ཁྱེར་སྲིད་གྲོས་ཀྱི་རྒྱུན་ལས་ཨུ་ཡོན། བོད་རང་སྐྱོངས་ལྗོངས་སྲིད་གྲོས་ཀྱི་རྒྱུན་ལས་ཨུ་ཡོན། བོད་ལྗོངས་གཞས་མ་གཏམ་མཐུན་ཚོགས་ཀྱི་དབུ་བཞུགས། ཀྲུང་གོའི་གཞས་མ་གཏམ་མཐུན་ཚོགས་ཀྱི་དབུ་བཞུགས་གཞོན་པ་སོགས་ཀྱི་འགན་ཏེ། ཁོང་དང་ཁོང་གི་ལས་རོགས་ཚོས་དབུལ་བཅོས་ཕྱུག་འགྱུར་དང་།གླུ་གར་གྱི་རྒྱ་མཚོ། སྐད་ར་མ་ལུག བོད་ཀྱི་ཨང་དང་པོ། རིག་དངོས་ཀྱི་རེ་འབོད། སྤྱི་སྤྱོད་དངོས་པོའི་གསང་གཏམ། བར་སྐོར་ནང་གི་གླེང་མོལ་ཞེས་པ་སོགས་ནི་དགོད་བྲོའི་གཏམ་གླེང་དཔེ་མཚོན་འོས་པ་དག་ཡིན་ཞིང་། དེ་དག་གི་དོན་ཟབ་པ་དང་། དགོད་བྲོ་བའི་ཁྱད་ཆོས་ཀྱིས་སྤྱི་ཚོགས་ཐོག་ཤུགས་རྐྱེན་ཆེན་པོ་ཐེབས་ཡོད་སོགས། ཁོང་གི་མི་ཚེ་ཧྲིལ་པོར་བོད་སྐད་ཀྱི་གཏམ་བརྗོད་སྒྱུ་རྩལ་ལ་བརྟེན་ནས་བོད་རིགས་མི་མང་ལ་བོད་ཀྱི་ཐུན་མོང་མ་ཡིན་པའི་ཡ་རབས་གོམས་སྲོལ་རྒྱུན་སྐྱོང་དར་སྤེལ་དང་། དུས་རབས་དང་མཐུན་པའི་སློབ་གསོའི་ཁ་ཕྱོགས་ལམ་སྟོན་སོགས་གནང་ཡོད་པ་རེད།
ཕྱི་ལོ་༢༠༠༦ཟླ་༥་པའི ནང་བོད་ལྗོངས་རིག་རྩལ་ལྷན་ཚོགས་ནས་རྒན་ཐུབ་བསྟན་ལགས་ནས་སྒྱུ་རྩལ་གྱི་ཕྱག་ལས་གནང་ནས་ལོ་དྲུག་བཅུ་འཁོར་བའི་ཞིབ་བསྡུར་གྲོས་ཚོགས་འཚོགས་པ་དང་། གྲོས་ཚོགས་དེའི་ཐོག་རྒན་ཐུབ་བསྟན་ལགས་ཀྱི་ལོ་ངོ་དྲུག་བཅུའི་སྒྱུ་རྩལ་ལ་གདེང འཇོག་མཐོན་པོ་གནང་ཞིང་། ཁོང་གི་བགྲང་བྱ་དྲུག་བཅུ་ལྷག་ཙམ་གྱི་སྒྱུ་རྩལ་གྱི་མི་ཚེའི་ནང་། གསར་རྩོམ་དང་། བཅོས་སྒྲིག གཙོ་འཁྲབ། མཉམ་འཁྲབ་བཅས་གནང་བའི་དགོད་བྲོའི་གཏམ་གླེང་དང་། གླིང་སྒྲུང་། འབྲས་བཤད། བླ་མ་མ་ནི། ལྷ་མོ་སོགས་ཀྱི་འཁྲབ་ཚན་ལྔ་བརྒྱ་ལྷག་ཟིན་ཞིང་། དེ་དག་ལ་སྔ་ཕྱིར་རྒྱལ་ཡོངས་རང་བཞིན་གྱི་བྱ་དགའ་རིམ་པ་དང་པོ་གསུམ་དང་། གཉིས་པ་བཞི། གསུམ་པ་གསུམ། ཕུལ་བྱུང་བྱ་དགའ་ལྔ་བཅས་དང་། ལྗོངས་རིམ་པའི་བྱ་དགའ་རིམ་པ་དང་པོ་ཐེངས་བཅུ་བཞི་ཙམ་ཐོབ། ད་དུང་ཁོང་མི་སྒེར་ལ་གཟེངས་བསྟོད་སྣ་ཚོགས་ཐོབ་ཡོད་པ་དང་། ལྷག་པར་དུ་ཁོང་ནས་བོད་ཀྱི་གཞས་མ་གཏམ་སྒྱུ་རྩལ་དར་རྒྱས་ཆེད་དུ་ཚེ་གང་རིང་འབད་འཐབ་གནང་བའི་རྐྱེན་གྱིས། སྤྱི་ལོ་༢༠༠༦ལོར་ཀྲུང་གོའི་རིག་རྩལ་ལྷན་ཚོགས་དང་ཀྲུང་གོའི་གཞས་མ་གཏམ་མཐུན་ཚོགས་ནས་ཁོང་ལ་ཀྲུང་གོའི་གཞས་མ་གཏམ་སྒྱུ་རྩལ་གྱི་བྱ་དགའ་མཐོ་ཤོས་ཏེ། ཚེ་གང་གྲུབ་འབྲས་བྱ་དགའ་ཞེས་པ་ཐོབ་ཡོད་པ་དང་། ཁོང་ནི་བྱ་དགའ་དེ་ཐོབ་མཁན་བོད་རིགས་སྒྱུ་རྩལ་མཁས་པ་དང་པོ་དེ་ཆགས་ཡོད་འདུག
རྒྱལ་ཁབ་ཀྱི་རིམ་པ་དང་པོའི་གཞས་མ་གཏམ་གྱི་སྒྱུ་སྩལ་བ་གྲགས་ཅན་དང་། སྤྱི་ཚོགས་ཀྱི་སློབ་གསོ་བ་དམ་པ་ཁོང་མགྱོགས་ནས་མྱུར་དུ་གང་ཉིད་ཀྱི་ཕ་ཡུལ་ལྷ་སར་ཡང་བསྐྱར་ཕེབས་སྒུག་ཞུ།