དམར་གསོད་ཀྱི་གཏེ་བོ་ལི་ཕོང་འདས་གྲོངས་སུ་ཕྱིན།

མདང་དགོང་པེ་ཅིན་གཞུང་གི་དབང་བསྒྱུར་སྲིད་བྱུས་ཀྱི་སློབ་སྟོན་པར་ངོས་འཛིན་བྱེད་བཞིན་པའི་སྲིད་བློན་ཟུར་པ་ལི་ཕོང་ནད་གཞིའི་རྐྱེན་གྱིས་འདས་གྲོངས་སུ་ཕྱིན་ཡོད་འདུག
རང་ལོ་ ༩༠ ཡིན་པའི་ལི་ཕོང་ནི་རྒྱ་ནག་གི་མགོ་འཁྲིད་ཏུན་ཞའོ་ཕིན་སྐབས་ཀྱི་སྲིད་བློན་ཡིན་པ་དང་། ཕྱི་ལོ་ ༡༩༨༩ ལོའི་སློབ་མའི་ཡར་ལངས་སྐབས་སྡེབ་གསོད་ལ་སྐུལ་མ་གཏོང་མཁན་གཙོ་བོ་ཞིག་ཡིན་པ་མ་ཟད། དྲུག་བཞིའི་དོན་རྐྱེན་བྱུང་ནས་བདུན་ཕྲག་གཅིག་གི་རྗེས་རྒྱ་ནག་གཞུང་འབྲེལ་གྱི་གསར་ལམ་དུ། ལི་ཕོང་གིས་ཡར་ལངས་ཞི་འཇགས་སུ་གཏོང་བར་བཅིངས་གྲོལ་དམག་ལ་བཀོད་མངགས་བྱས་ཡོད་པའི་གནས་ཚུལ་ཐོན་རྗེས། ཕྱིའི་རྒྱལ་ཁབ་ཁག་ནས་ཁོང་ལ་པེ་ཅིན་གྱི་ཤན་པ་ཞེས་པའི་མིང་བཏགས་ཡོད་པ་ལྟར། དེ་རིང་རྒྱལ་སྤྱིའི་གསར་ལམ་བྷི་བྷི་སི་དང་རོའུ་ཊིར་སོགས་ཀྱི་གསར་འགྱུར་ཁ་བྱང་དུའང་པེ་ཅིན་གྱི་ཤན་པ་འདས་གྲོངས་སུ་ཕྱིན་ཞེས་བྲིས་འདུག

དམར་གསོད་བཀོད་མངགས་བྱས་པའི་གནས་ཚུལ་དེ་བསྒྲགས་སྐབས། རྒྱ་ནག་གཞུང་འབྲེལ་གསར་ལམ་ནས་དོན་རྐྱེན་དེའི་ཁྲོད་མི་གྲངས་ ༣༠༠ ཙམ་ལས་བསད་མེད་པ་དང་། དེ་དག་ལས་མང་ཆེ་བ་དམག་མི་ཡིན་པ་དང་སློབ་ཕྲུག་ ༢༣ ལས་བསད་མེད་སྐོར་བརྗོད་ཡོད་པ་དང་། ཕྱིས་སུ་རྒྱ་ནག་གཞུང་ཕྱོགས་ནས་ཏུན་ཞའོ་ཕིན་གྱི་ཤུགས་ཆེའི་རྒྱབ་སྐྱོར་འོག་ལི་ཕིང་གི་བཀོད་མངགས་ལྟར་རྒྱལ་ནང་གི་ཟིང་འཁྲུག་ཞི་འཇགས་སུ་བཏང་ཐུབ་ཡོད་པ་སོགས་ཀྱི་བསྟོད་བསྔགས་བྱས་ཡོད་འདུག

ལི་ཕོང་ནི་བོད་ཀྱི་དབང་བསྒྱུར་གནད་དོན་ཐད་མཁྲེགས་བཟུང་ཆེ་ཤོས་ཀྱི་དཔོན་རིགས་ཤིག་ཡིན་པ་དང་།  ཁོས་སྲིད་དབང་འཛིན་སྐབས་བོད་ནང་གི་འགྲོ་བ་མིའི་ཐོབ་ཐང་ལ་བཙན་གནོན་རྡོག་རོལ་དང་། ཉེས་མེད་བོད་མི་མང་པོ་བཙོན་འཇུག་དང་དམར་གསོད་ཡ་ང་བ་བྱས་ཡོད་སྟབས།  ཕྱི་ལོ་ ༢༠༡༣ ལོར་བོད་ཀྱི་ཆབ་སྲིད་བཙོན་ཟུར་འདས་པོ་དཔལ་ལྡན་རྒྱ་མཚོ་ལགས་དང་། སྟག་སྣ་འཇིགས་མེད་བཟང་པོ་ལགས། དགའ་ལྡན་གྲྭ་བག་བྲོ་ལགས་སོགས་བོད་མི་ཁག་ཅིག་གིས། སི་པིན་རྒྱལ་སྤྱིའི་ཁྲིམས་ཁང་ལ་རྒྱ་ནག་གི་སྲིད་འཛིན་དང་སྲིད་བློན་སོགས་མགོ་འཁྲིད་ལྔ་སྟེ། རྒྱ་ནག་གི་སྲིད་འཛིན་ཟུར་པ་ཅང་ཙེ་མིན་དང་སྲིད་བློན་ཟུར་པ་ལི་ཕོང་ (li peng)། ཆོད་ཧྲི་ (Qiao shi)། ཁྲིན་ཁའེ་ཡན་ (chen kuiyuan)། ཕིང་ཕེ་ཡུན་ (Peng peiyun)བཅས་ཀྱིས། བོད་ནང་གི་འགྲོ་བ་མིའི་ཐོབ་ཐང་ལ་རྡོག་རོལ་དང་མི་རིགས་རྩ་མེད་གཏོང་ཐབས་ཀྱི་སྲིད་བྱུས་ལག་བསྟར་བྱས་པའི་ནག་ཉེས་འོག་འཛིན་བཟུང་བྱེད་དགོས་པའི་ཁྲིམས་གཏུག་བྱས་ཡོད་པ་ལྟར་ཁྲིམས་ཀྱི་བཅད་ཁྲའང་བཏང་བའི་གནས་ཚུལ་བྱུང་ཡོད་པ་རེད།

ལི་ཕོང་ནི་ཕྱི་ལོ་ ༡༩༢༨ ལོར་རྒྱ་ནག་སི་ཁྲོན་དུ་སྐྱེས་པ་དང་། ཕྱི་ལོ་ ༡༩༨༧་ལོ་ནས་རྒྱ་ནག་དམར་ཤོག་ཚོགས་པའི་ནང་ལས་ཀ་བྱེད་མགོ་ཚུགས་ཡོད་པ་དང་། ཁོ་ཐེངས་ ༤ ལ་རྒྱ་ནག་གི་སྲིད་བློན་དུ་བསྐོས་ཡོད་པ་དང་། ཁོའི་བུ་གཉིས་དང་བུ་མོ་གཅིག་དེའང་དེང་སང་རྒྱ་ནག་དམར་ཤོག་ཚོགས་པའི་མཐོ་རིམ་མགོ་འཁྲིད་རེ་ཡིན་འདུག  ཕྱི་ལོ་༡༩༩༤ ལོར་ལི་ཕོང་གིས་རྒྱ་ནག་གི་མ་འོངས་པའི་དཔལ་འབྱོར་འཕེལ་རྒྱས་སོགས་ལ་དམིགས་ཏེ་ཡར་ཀླུང་གཙང་བོའི་བརྒྱུད་དུ་རྒྱ་ནག་གི་ཆུ་མཛོད་ཁང་ཆེས་ཤོས་བརྒྱབས་ཡོད་པ་དེ་ཁོའི་བྱས་རྗེས་ཆེ་ཤོས་ཤིག་ཏུ་ངོས་འཛིན་བྱེད་ཀྱི་ཡོད་འདུག

གསར་འགོད་པ། སངས་རྒྱས་དཀོན་མཆོག