ས་ཁྲའི་ནང་བོད་དང་ཐའེ་ཝན་སོགས་ཚུད་མེད་པར་བསྙད་དེ་སྐྱོན་བརྗོད་བྱས།

རྒྱ་ནག་གཞུང་གིས་མུ་འབྲེལ་བརྩེ་དུང་གློག་བརྙན་ཞིག་གི་ས་ཁྲའི་ནང་བོད་ཀྱི་ས་མཚམས་ཁུལ་དང་ཐའེ་ཝན། ཧེ་ནན་ཞིང་ཆེན་སོགས་ཚུད་མེད་པར་བརྗོད་དེ་ཁྲིམས་ལྟར་ཐག་གཅོད་བྱ་རྒྱུ་ཡིན་ལུགས་བརྗོད་འདུག

ཁ་སང་ཕྱི་ཚེས་ ༡ ཉིན། རྒྱ་ནག་གི་རང་བྱུང་ཐོན་ཁུངས་ལྷན་ཁང་ (Ministry of Natural Resources) གིས་གནས་ཚུལ་སྤེལ་བ་ལྟར་ན། མུ་འབྲེལ་བརྩེ་དུང་གློག་བརྙན་(Go Go Squid!)ཞེས་པ་ཞིག་གི་ནང་བོད་ཀྱི་ས་མཚམས་ཁུལ་དང་ཐའེ་ཝན། དེ་བཞིན་ཧེ་ནན་ཞིང་ཆེན་ (Hainan) སོགས་ཚུད་མེད་པའི་ས་ཁྲ་ཞིག་བེད་སྤྱོད་བཏང་ཡོད་པར་བརྟེན། རྒྱ་ནག་གཞུང་གིས་ས་ཁྲ་དེ་ཡོད་སའི་མུ་འབྲེལ་ལེའུ་གཅོད་དུ་བཅུག་པ་དང་། ཐའེ་ཝན་ནས་ཡིན་པའི་གློག་བརྙན་དེའི་བཟོ་སྐྲུན་མི་སྣ་ཞིག་གི་མིང་ནག་གསུབ་བཏང་ཡོད་པ་མ་ཟད། གནད་དོན་དེ་ཁྲིམས་ལྟར་ཐག་གཅོད་བྱ་རྒྱུ་ཡིན་སྐོར་བརྗོད་འདུག

རྒྱ་ནག་གཞུང་འབྲེལ་གོ་ལའི་དུས་བབ་ཀྱིས། མུ་འབྲེལ་གློག་བརྙན་དེ་བཟོ་བསྐྲུན་བྱེད་མཁན་ནང་ཐའེ་ཝན་གྱི་གློག་བརྙན་འཁྲབ་འཁྲིད་པ་ཆི་ཡུས་ནིན་ (Qu Youning)ཞེས་པ་ཞིག་ཡོད་པ་དང་། ཁོང་ནི་གློག་བརྙན་ནང་ས་ཁྲ་དེ་འཇོག་མཁན་ཡིན་སྐོར་དང་། གློག་བརྙན་དེ་ཕབ་བསྐྲུན་མ་ཚར་གོང་ནས་ཁོས་ངོ་དེབ་ཐོག་ཐའེ་ཝན་དང་རྒྱ་ནག་གཉིས་ལ་སོ་སོར་རང་དབང་གཙང་མའི་བདག་དབང་ཡོད་པའི་བསམ་ཚུལ་བཏོན་པར་དགའ་མོས་བྱས་ཡོད་པས། ཐའེ་ཝན་ཁ་བྲལ་ལ་རྒྱབ་སྐྱོར་ཡོད་པའི་དོགས་པ་ཡོད་ཚུལ་བཀོད་འདུག

གློག་བརྙན་འཁྲབ་འཁྲིད་པ་ཆི་ཡུས་ནིན་(Qu Youning) གྱིས། ཁོས་རྒྱ་ནག་གཅིག་གི་སྲིད་བྱུས་ལ་རྒྱབ་སྐྱོར་བྱེད་ཀྱི་ཡོད་པ་ལས་ཐའེ་ཝན་ཁ་བྲལ་ལ་རྒྱབ་སྐྱོར་བྱེད་ཀྱི་མེད་ལུགས་དང་། རྒྱ་ནག་སྐམ་ས་དང་ཐའེ་ཝན་གཉིས་ཀྱིས་མཐུན་པའི་ལམ་ནས་སྐད་ཆ་བཤད་པའི་རེ་བ་ཡོད་སྐོར་བརྗོད་ཡོད་ནའང་། རྒྱ་ནག་གཞུང་གི་ཉེས་འཛུགས་འོག་གློག་བརྙན་བཟོ་སྐྲུན་ཁང་གིས་ཁོང་གི་མིང་གློག་བརྙན་དེའི་ནང་ནས་བསུབས་ཡོད་པ་མ་ཟད། གློག་བརྙན་དེའི་ལེའུ་ ༣༩ པའི་ནང་ཡོད་པའི་ས་ཁྲ་དེ་རྒྱ་ནག་གི་(Tencent Video) ནང་བསུབས་ཡོད་པ་དང་།  དེ་བཞིན་ཡུ་ཊུབ་ (YouTube) ནང་ལེའུ་ ༣༩ པའི་ནང་གི་ས་ཁྲ་དེ་ཡང་བསུབས་ཡོད་པ་རེད།

ཐེངས་འདིའི་གནས་ཚུལ་བྱུང་རྗེས། རྒྱ་ནག་གཞུང་འབྲེལ་གསར་ཁང་མི་མང་ཉིན་རེའི་ཚགས་པར་སོགས་ཀྱིས་ཝེ་པའོ་ (Weibo) སྤྱི་ཚོགས་དྲ་ལམ་དུ། མི་མང་ནས་རྒྱ་ནག་གི་ས་ཁྲ་ཡང་དག་པར་སྦྱོང་དགོས་པ་དང་། རང་གི་ཕ་ཡུལ་མ་ནོར། རྒྱ་ནག་རྩ་བ་ནས་ཉུང་དུ་འགྲོ་རུང་ཟེར་བ་སོགས་སྤེལ་ཏེ། ཐའེ་ཝན་དང་རྒྱ་གར་གྱི་ཨ་རུ་ན་ཅལ་མངའ་སྡེ་སོགས་ཚུད་པའི་ས་ཁྲ་དེ་བཀོལ་སྤྱོད་བྱེད་སྐུལ་འདེད་གཏོང་གི་ཡོད་འདུགརྒྱ་སྐད་ཀྱི་མུ་འབྲེལ་བརྩེ་དུང་གློག་བརྙན་ (Go Go Squid!) ཟེར་བ་དེ་འདི་ལོའི་ཕྱི་ཟླ་ ༧ ཚེས་ ༩ ཉིན་ཐོག་མར་རྒྱ་ནག་གི་ (Dragon TV) དང་ (Zhejiang TV) བརྙན་འཕྲིན་ཁང་གཉིས་བརྒྱུད་བསྟན་ཡོད་པ་དང་། ཉིན་གཉིས་ཀྱི་སྔོན་ཏེ་ཕྱི་ཚེས་ ༣༡ ཉིན་ལེའུ་ ༣༩ པ་བསྟན་ཡོད་པ་དང་། ལེའུ་དེའི་དྲ་ཐོག་གི་རྩེད་མོ་འགྲན་བསྡུར་ནང་ཨེ་ཤ་ཡའི་རྒྱལ་ཁབ་ཁག་ཅིག་གི་ས་ཁྲ་མངོན་ཡོད་པ་དང་། ས་ཁྲའི་ནང་རྒྱ་ནག་གིས་ལྷོ་བོད་དུ་འབོད་བཞིན་པའི་བོད་ཧིན་ས་མཚམས་སུ་ཁེལ་བའི་ཨ་རུ་ན་ཅལ་མངའ་སྡེ་དང་(Aksai Chin)། དེ་བཞིན་ཐའེ་ཝན་དང་ཧེ་ནན་ཞིང་ཆེན་བཅས་ཚུད་མེད་རྐྱེན་སྐྱོན་འཛུགས་བྱས་ཡོད་པ་རེད།

ས་ཁྲའི་ནང་བོད་དང་ཐའེ་ཝན་སོགས་ཚུད་མེད་པའམ་ཡང་ན། མཁའ་འགྲུལ་ལས་ཁུངས་དང་ཚོང་གཉེར་ཁང་སོགས་ཀྱིས་བོད་དང་ཐའེ་ཝན་རྒྱལ་ཁབ་ཀྱི་ངོ་བོར་ལོགས་སུ་བཞག་པའི་རྐྱེན་གྱིས་རྒྱ་ནག་གཞུང་ཕྱོགས་ནས་སྐྱོན་བརྗོད་བྱས་པ་དང་། སྤྱི་ཚོགས་དྲ་ལམ་ནས་རྩོད་གླེང་བྱུང་ཤུགས་ཆེན་བྱུང་བ། དེ་བཞིན་འབྲེལ་ཡོད་ལ་ཚོང་ལས་མཉམ་འབྲེལ་བཀག་སྡོམ་བྱས་པ་སོགས་ཀྱི་གནད་དོན་ཉེ་བའི་ལོ་ཤས་ནང་ཐེངས་འགར་བྱུང་ཡོད་པ་རེད།

གསར་འགོད་པ། ཀླུ་མགོན་ཐར།