ང་ལ་བདེན་པ་འདི་ཙམ་ཡོད།

དྷཱི་ལྷ་ལྡན།

བདག་གིས་ཡང་བསྐྱར་(བསྟུན་རྒོལ་ཁྲིམས་གཏུགས)ཞེས་པའི་རྩོམ་དེབ་ཅིག་གི་བགྱི་བ་དང་དུ་བླངས་པ་ཡིན།  མ་གཞི་བདག་གི་མི་ཚེའི་ཆེད་སྦྱོང་ནི་རིག་གཞུང་ཡིན་པ་ལས་ཆབ་སྲིད་མ་ཡིན་ཞིང་།   སྲིད་ཀྱི་བྱུང་གནས་འགྲོ་གསུམ་ལ་སྦྱང་པ་སྔོན་དུ་སོང་བའི་ཆབ་སྲིད་ཆེད་མཁས་པ་ཞིག་ཀྱང་ལར་ནས་མིན་པས་ཁོ་བོས་ཆབ་སྲིད་ཕྱོགས་ནས་ཅི་ཡང་མི་ཤེས་ལ།  གང་ཡང་ཤོད་ཀྱིན་མེད།  འོན་ཀྱང་ཁོ་བོ་འདྲ་མཉམ་དང་།  རང་དབང་།   དྲང་བདེན་བཅས་ལ་དགའ་མཁན་གྱི་སྙུག་ཐོག་པ་ཞིག་ཡིན་པའི་ངོས་ནས་དེ་དག་གི་དོན་དུ་བརྩོན་གྱིན་ཡོད་ལ།   མི་རིགས་དང་རྒྱལ་ཁོངས་སུ་དེ་དག་འཛུགས་སླད་རང་ལ་ཤིག་ཙམ་སྒུལ་བའི་ནུས་པ་མེད་ནའང་ཡོད་ཚད་དེ་ལ་འབུལ་སྙིང་འདོད།   འདི་ནི་ང་ལ་མཚོན་ན་རླབས་ཆེ་བའི་དགེ་རྩ་ཞིག་ཏུའང་བརྩིས་ཏེ་ཡོད།

སྤྱིར་བདག་གིས་བཤད་པའི་སྐད་ཆ་དང་བྲིས་པའི་དཔེ་དེབ་ཡོད་དགུ་གཞུང་དམངས་གཉིས་ཀ་ཞི་འགྲིག་མཉམ་གནས་དང་།   འདྲ་མཉམ་གཉིས་སྨན།   རང་བདེ་གཞན་སྐྱིད་ཞིག་ཡོང་ཕྱིར་ལས་གཞན་གང་ཡང་མིན་མོད།   སྒེར་གཅོད་པ་ཞིག་ལ་མཚོན་ན་དེ་དག་ནི་ཁོངས་ནས་འཁྲུག་བྱེད་ཀྱི་ཉེ་རྒྱུ་ཞིག་ཏུ་གྱུར་ཡོད་པ་རེད།  དེ་བས་དུས་ཚོད་དང་ཁོར་ཡུག་གི་གནས་སྟངས་ལ་གཞིགས་ན་ཁོ་བོའི་སྐད་ཆ་དང་བྲིས་རྩོམ་དག་གི་ཉེ་རྒྱུ་ལས་ཁྲིམས་ལ་ལན་གཅིག་འགྲོ་དགོས་པ་གཏན་འཁེལ་ཡིན་པ་འདྲ།   འོན་ཏེ་བདག་གབ་སྦས་བྱོལ་གསུམ་གང་ཡང་མེད་པར་འཐད་པ་དང་བཅས་འབོད་པ་དང་ལེན་བྱེད་པའི་གྲ་སྒྲིག་ཡོད་དེ།   གབ་སྦས་བྱོལ་གསུམ་བགྱི་བ་དེ་ནི་རང་འགན་རང་འཁུར་མ་བྱས་པའི་བྱས་ཉེས་ཤིག་རེད།   བྱ་བ་གང་ཞིག་བསྒྲུབས་ཀྱང་རང་འགན་རང་འཁུར་དང་།   ཕྱི་གསལ་ནང་གསལ།  བདེན་པ་བདེན་དྲང་ཞིག་ཨེ་འཁྱོང་ལྟ་རྒྱུ་ནི་བདག་གི་མི་ཚེ་འདིའི་དམ་བཅའ་དང་པོ་དེ་ཡིན།

ཁྲིམས་ལ་འགྲོ་བའི་ཉིན་མོ་དེར་བདག་ལ་བདེན་པ་ཞིག་ཡོད་པ་ནི་བདག་གིས་ཁྲིམས་འགལ་ལུགས་མེད་ཀྱི་བྱ་སྤྱོད་གང་ཡང་བསྒྲུབས་མེད་པ་དེ་ཡིན།   ཁོ་བོས་འགྲོ་མིའི་ཐོབ་ཐང་དང་ཞི་བདེ་སོགས་ཀྱི་དོན་དུ་རང་ཉིད་ཀྱིས་བསམ་ཚུལ་དང་མི་རིགས་ཀྱི་མངོན་འདོད་འགའ་སྦ་གསང་མེད་པར་གཏམ་བརྗོད་དང་དེབ་བསྐྲུན་ཙམ་བྱས་པ་ཡིན་ཞིང་།   དེ་ནི་ཡོངས་ཁྱབ་འགྲོ་བ་མིའི་ཐོབ་ཐང་དང་།   རྒྱལ་སྤྱིའི་ཁྲིམས་ལུགས།   བདེན་པའི་ཆོས་ཉིད།   ཆོས་ཀྱི་དགོངས་དོན་སོགས་དང་མཐུན་པར་མ་ཟད་རྒྱལ་ཁབ་འདི་ཡི་ཡིག་ཐོག་གི་རྩ་ཁྲིམས་དང་ཡང་མཐུན་པ་ཞིག་སྟེ།    རྩ་ཁྲིམས་ཀྱི་དོན་ཚན་སོ་ལྔ་པར།    ‘‘ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་སྤྱི་དམངས་ལ་གཏམ་བརྗོད་དང་།  དཔེ་སྐྲུན།  འདུ་ཚོགས།  ཚོགས་འཛུགས།   ཁྲོམ་སྐོར།    རྔམ་སྟོན་ཁྲོམ་སྐོར་བཅས་བྱེད་པའི་རང་དབང་ཡོད།’’ ཅེས་དང་།  དོན་ཚན་ཞེ་གཅིག་པའི་ནང་དུ། ‘‘ ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་སྤྱི་དམངས་ལ་རྒྱལ་ཁབ་ཀྱི་ལས་ཁུངས་གང་ཞིག་དང་རྒྱལ་ཁབ་ཀྱི་ལས་བྱེད་སུ་ཞིག་ཡིན་ནའང་དེར་སྐྱོན་བརྗོད་དང་བསམ་འཆར་འདོན་པའི་དབང་ཆ་ཡོད་པ་དང་།    རྒྱལ་ཁབ་ཀྱི་ལས་ཁུངས་གང་ཞིག་དང་རྒྱལ་ཁབ་ཀྱི་ལས་བྱེད་སུ་ཞིག་ཡིན་རུང་ཁྲིམས་འགལ་འགན་འཛོལ་གྱི་བྱ་སྦྱོད་བྱུང་ན།  རྒྱལ་ཁབ་ཀྱི་འབྲེལ་ཡོད་ལས་ཁུངས་ལ་དེའི་གནས་ལུགས་ཞུ་བ་དང་ཞུ་གཏུག་བྱེད་པའམ་ཉེས་སྐྱོན་འདོན་པའི་ཁེ་དབང་ཡོད།’’ ཅེས་སོགས་ལས་ཕྱི་རོལ་དུ་གྱུར་བ་ཞིག་གང་ཡང་བསྒྲུབས་མེད།

འོན་ཏེ་དོན་དངོས་སུ་རྩ་ཁྲིམས་འདི་དག་གི་གོ་ཅི་ཙམ་ཆོད་མིན་ནི་མར་ཊིན་ལའོ་ཐིར་ཁེན་གྱིས་བཤད་པ་ལྟར།   ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱིས་ང་ཚོར་སྤྲད་པའི་དངུལ་བྱང་དེ་དངུལ་བྱང་སྟོང་པ་ཞིག་ཡིན་མིན་ལ་ཐུག་ཡོད།   གང་ལྟར་དངུལ་བྱང་དེ་ད་ལྟ་ང་ཚོས་བཀོལ་བའི་དུས་ལ་ཐོན་སོང་བ་རེད་ལ།  གལ་ཏེ་དངུལ་བྱང་སྟོང་པ་ཞིག་ཡིན་ན་ང་ཚོས་རང་ཉིད་ཀྱི་ཐོབ་སྐལ་དུ་གྱུར་བའི་བུ་ལོན་ལ་རྗེས་འདེད་མི་བྱེད་རང་བྱེད་རེད།

ཡང་གཅིག་བཤད་ན་བདག་གི་བདམས་པའི་ལམ་བུ་འདི་ནི་དེབ་སྔ་ཕྱི་གཉིས་ཀར་བཤད་ཟིན་པ་ལྟར་གཞུང་དམངས་གཉིས་ཀའི་བདེ་དོན་དུ་ཡིན་པས།   མི་རིགས་དགྲར་འཛིན་དང་རྒྱལ་ཁབ་ལོགས་འབྱེད་ཀྱི་བསམ་སྦྱོར་ཞིག་མེད་པས་ཀྱང་བདག་ལ་ལྷག་བསམ་རྣམ་དག་གི་བདེན་པ་ཞིག་ཡོད།   མི་སེར་དཀྱུས་མ་ཞིག་ཡིན་པའི་ངོས་ནས་རྒྱལ་ཁབ་ཀྱི་དཔལ་འབྱོར་དང་།   ལུས་རྩལ་སོགས་ཀྱི་ཐད་ནས་འཛམ་གླིང་གི་ཡར་རྒྱས་ཅན་གྱི་རྒྱལ་ཁབ་ཏུ་གྱུར་དང་འགྱུར་བཞིན་ཡོད་པར་རྗེས་སུ་ཡི་རངས་ཡོད་མོད།   དེ་དང་དུས་མཚུངས་སུ་འགྲོ་བ་མིའི་རིགས་ལ་དེ་དག་ལས་ཀྱང་གལ་ཆེ་ཞིང་མེད་དུ་མི་རུང་བའི་འགྲོ་མིའི་ཐོབ་ཐང་འགན་སྲུང་གིས་འཛམ་གླིང་གི་རྗེས་ཟིན་པར་འགྱུར་བའི་རེ་བ་བྱེད་ཀྱིན་ཡོད།

མི་སེར་རྣམས་ཀྱི་མངོན་འདོད་ནི་དཔལ་འབྱོར་དང་། དམག་དོན། ལུས་རྩལ་སོགས་ཀྱིས་ཐག་གཅོད་ཐུབ་པ་ཞིག་མིན་པར།   དེ་ནི་ཁོ་ཚོའི་ཐོབ་ཐང་གཙང་མ་འགན་སྲུང་བྱེད་ནུས་ཀྱི་སྲིད་ལུགས་ཤིག་ཡོད་མིན་ལ་རག་ལས་ཡོད།    མི་རིགས་མང་བའི་རྒྱལ་ཁབ་གང་འདིས་ཡང་དག་པའི་སྲིད་ལུགས་ཤིག་འཛུགས་ནུས་མིན་ནི་བོད་ཙམ་མིན་པར་རྒྱལ་ཁོངས་འདིའི་མི་རིགས་ཡོད་ཚད་ཀྱི་འཚོ་གནས་དང་འབྲེལ་བ་ཡོད་པར་མ་ཟད།   རྒྱལ་ཁབ་རང་ཉིད་ཀྱང་ཡུན་ནས་ཡུན་ཏུ་བརྟན་བརླིང་གིས་གནས་ཐུབ་མིན་གྱི་སྲོག་རྩར་ཡང་འབྲེལ་བ་དམ་ཟབ་ཡོད།   དབུ་མའི་ལམ་གྱི་དགོངས་དོན་གྱི་བདེན་པར་ཡང་འདི་དག་འདུས་ནས་ཡོད།    གལ་ཏེ་སྲིད་གཞུང་གིས་འདི་དག་ལ་བསམ་གཞིག་མི་གཏོང་བར་གནས་སྐབས་ཀྱི་དུས་ཚོད་ནར་འགྱངས་སུ་གཏོང་ཐབས་ཙམ་དང་།   མིག་སྔུན་ཉི་མ་འཁྱོལ་ཐབས་ཙམ་ལ་མིག་ཟུང་གཏད་ཚེ།   གནས་ཚུལ་གྱི་ངོ་བོ་ཇེ་ངན་ནས་ཇེ་སྡུག་ཏུ་ཕྱིན་ཏེ་ནམ་ཞིག་ཡ་ང་བའི་མཇུག་འབྲས་འཇིགས་སུ་རུང་བ་མང་པོ་ཞིག་འབྱུང་སྲིད་དེ།   དེ་ཡི་ཚུལ་ནི་བདག་གི་དེབ་ཏུ་ཡང་བཀོད་ཡོད།

བདེན་པ་དེ་དག་ལ་བལྟས་ན་ང་ཚོའི་བདམས་པའི་ལམ་ཁ་འདི་གནས་སྐབས་སུ་ནག་ཉེས་ཤིག་ཏུ་མཐོང་སྲིད་ནའང་།  མ་འོངས་པར་གཞུང་དམངས་གཉིས་ཀར་ཕན་འབྲས་ཤིག་ཐོན་ནུས་པའི་ཡིད་ཆེས་ཡོད་ལ།   ནམ་ཞིག་རྒྱ་ནག་གཞུང་གིས་རང་ཉིད་ལོག་ལམ་ནས་དྲངས་པའི་དྲིན་ངོ་ཚོར་ཏེ་ང་ཚོར་བཀའ་དྲིན་ཞུ་བའི་དུས་ཚོད་ཅིག་ཀྱང་འབྱུང་སྲིད།   སྔོན་ཆད་ཧྥ་རན་སུའི་རྩོམ་པ་པོ་ཟཱོ་ལ་ལ་གདུག་སྤྱོད་ཀྱིས་ཉེས་ཁྲིམས་གཅོད་སྐབས་ཟཱོ་ལ་ཁོང་གིས་འདི་ལྟར།  ‘‘ཉིན་ཞིག་ཧྥ་རན་སུས་དྲིན་ངོ་ཟིན་ནས་ང་ལ་བཀའ་དྲིན་ཞུ་ངེས་ཡིན།  རྒྱུ་མཚན་བདག་གི་བྱ་སྤྱོད་འདིས་ཧྥ་རན་སུའི་མཚན་སྙན་སྲུང་སྐྱོབ་བྱས་ཡོད’’ཅེས་གསུངས་མྱོང་།  ཏག་ཏག་མི་ལོ་འགའ་ཡི་རྗེས་སུ་དེ་ལྟར་བྱུང་སྟེ།   ཧྥ་རན་སུས་རང་གི་ནོར་འཛོལ་གྱི་བྱ་སྤྱོད་ཁས་ལེན་བྱེད་དགོས་བྱུང་བར་མ་ཟད།   ཟཱོ་ལ་ཡི་བདེན་དོན་གྱི་སྐད་ཆ་དང་ཟོལ་མེད་ཀྱི་བྱ་སྤྱོད་དེས་ཧྥ་རན་སུར་ཡང་དག་པའི་ལམ་སྟོན་ཐེངས་གཅིག་བྱས་པ་ཚོར་ཏེ་བཀའ་དྲིན་ཞུ་དགོས་བྱུང་ཡོད།   བདེན་པ་དེ་དག་ང་ཚོ་འཚོ་གཞིས་ཀྱི་སྐབས་སུ་མངོན་དུ་འགྱུར་ནུས་མིན་ནི་ཅི་ཆ་མོད།  བདེན་དོན་ནི་ནམ་ཡང་བདེན་དོན་ཡིན་པས་དེ་ཡི་རང་བཞིན་མངོན་དུ་འའགྱུར་བའི་དུས་སྐབས་ཤིག་ནི་ཡོད་པར་བདག་ལ་ཡིད་ཆེས་ཡོད།

ཁྲིམས་ལ་འགྲོ་བའི་ཉིན་མོ་དེར་བདག་གིས་བོད་མི་ཚོར་སྐད་ཆ་ཞིག་འཇོག་པ་ནི།   འུ་ཚོའི་གཅེས་སུ་འོས་པའི་སྤུན་ཟླ་གང་མང་ཞིག་གིས་རང་ལུས་མེ་རུ་བསྒྲོན་ཏེ་འཛམ་གླིང་ལ་གསལ་བཤད་སྟོབས་ཆེན་ཞིག་བྱས་ཟིན་པས།   ད་ནི་འཆི་སྤོབས་པའི་བླ་མེད་ཀྱི་སྙིང་སྟོབས་དེ་ཉིད་གསོན་ལམ་གྱི་སྙིང་སྟོབས་གཞན་ཞིག་ལ་བསྒྱུར་ཏེ།   གཞན་གྱི་ལུས་སྲོག་ལོངས་སྤྱོད་ལ་གནོད་འཚེ་མི་བྱེད་པའི་སྟེང་དུ་རང་སྲུང་གི་འདུ་ཤེས་བརྟན་པོ་ཞིག་བསྟེན་རྒྱུ་དེ་ཡིན།

གཞན་ལ་གནོད་འཚེ་གཏོང་བ་ལས་རང་ཉིད་ཀྱི་ཚེ་སྲོག་འདོར་བར་བདམས་པའི་ལམ་ཚུལ་འདི་ནི་འཚེ་མེད་ཞི་བའི་ལམ་ཚུལ་གྱི་སྙིང་སྟོབས་གཞན་ཞིག་ཡིན་པར་ངེས་ནའང་།  སྤུན་ཟླ་རེ་རེའི་ཚེ་སྲོག་དང་།    རིགས་ཀྱི་ཚེ་སྲོག་ཏུ་གྱུར་བའི་དཔའ་བོ་དཔའ་མོ་རྣམས་འཇིག་རྟེན་འདིར་ཡུན་ནས་ཡུན་ཏུ་འཚོ་སླད་གསོན་པའི་སླད་དུ་གསོན་པའི་ཨུ་ཚུགས་ཀྱི་ལམ་ཁ་ཞིག་འཚོལ་རྒྱུའི་རེ་བ་བྱེད་ཀྱིན་ཡོད་ལ།   གཞན་གྱིས་གསོད་གཏུབ་རྨས་གསུམ་བྱེད་མིན་ནི་ཁོ་ཚོའི་ལག་རེད་མོད།   ང་ཚོས་གཤེགས་ཟིན་པའི་དཔའ་བོ་དཔའ་མོ་དེ་དག་གི་སེམས་ཀྱི་རེ་འདུན་སྒྲུབ་ཕྱིར།  གསོན་པའི་སླད་དུ་གསོན་པའི་ཨུ་ཚུགས་བརྒྱབ་སྟེ་སེམས་ཀྱི་རེ་འབྲས་ལ་བརྩོན་ལེན་བྱེད་རྒྱུ་ནི་ཐབས་ལམ་ཡག་ཤོས་དེ་ཡིན་པར་འདོད།

ཕྲན་གྱི་དེབ་སྔ་ཕྱི་གཉིས་ཆར་ནས་ཞུས་ཟིན་ལྟར་སྐྱབས་མགོན་རྒྱལ་བའི་དབང་པོའི་དགོངས་བཞེད་བཞིན་ཐབས་ཚུལ་འཚེ་མེད་ཞི་ལམ་དང་།   ལྟ་གྲུབ་དབུ་མའི་ལམ་ཚུལ་དེ་ང་ཚོས་རྒྱུན་སྐྱོང་བྱེད་པ་དེ་ནི་རང་རེའི་མི་རིགས་ཀྱི་འཐབ་རྩོད་ལ་ཤིན་ཏུ་འཚམས་པ་ཡིན་ཏེ།   དེ་ཡི་རྒྱུ་མཚན་དག་ཁོ་བོས་མིའི་རིགས་ཀྱི་ལམ་འབྲས་སུ་ཅུང་ཟད་བཤད་ཟིན།   ང་ཚོར་དགོས་པ་ནི་འགྲོ་བ་མིའི་ཐོབ་ཐང་གཙང་མ་ཚུར་ལེན་རྒྱུ་དེ་ཡིན་པ་ལས་འགལ་ཟླ་སུ་ཞིག་ཕར་ཚར་གཅོད་རྒྱུ་ཡིན་མི་སྲིད།   གལ་ཏེ་དེང་གི་ཁ་ཆེའི་འཇིགས་སྐུལ་པ་དག་དང་མཚུངས་པར་འཇིགས་སུ་རུང་བའི་གསོད་གཏུབ་རྨས་གསུམ་གྱི་ལམ་ཁར་ཞུགས་ཚེ་ལམ་ལོག་ཏུ་ཞུགས་ཟིན་པ་ཡིན་ཏེ།  དེ་ནི་རྒྱུ་འབྲས་དང་བདེན་དོན་ལ་བརྩི་བཀུར་བླ་ལྷག་ཏུ་ཆེ་བའི་མི་རིགས་ཤིག་གི་གཤིས་སྤྱོད་ཀུན་ལས་འདས་པར་མ་ཟད།  དུས་དེར་མཐུན་ཕྱོགས་མཉམ་རུབ་དང་།  བདེན་པར་རྒྱབ་སྐྱོར་བྱེད་མཁན་དག་ཀྱང་རིང་དུ་གྱེས་ཏེ་གྲོགས་མེད་ཁེར་རྐྱང་དུ་ལུས་ངེས་པས་སོ།   དེ་བས་ང་ཚོ་གཡུལ་དུ་ཞུགས་པའི་མཚོན་ཆ་སྟོབས་ལྡན་ཞིག་ཡོད་པ་ནི་རྒྱུ་འབྲས་དང་བདེན་དོན་གྱི་རལ་གྲི་ཡིན་པ་ལས།   དྲག་སྤྱོད་དང་འཇིགས་སྐུལ་གྱི་མཚོན་ཆ་མ་ཡིན་པ་ངེས་གལ་ཆེ་བར་སྙམ།

འདི་ནས་བདག་གིས་འཚེ་མེད་ཞི་བའི་ལམ་གྱི་དགོངས་གནད་ཅིག་སྟེ། སྐུ་ཞབས་མར་ཊིན་ལའོ་ཐིར་ཁེན་གྱི་སྐད་ཆ་ཞིག་རྗེས་སུ་ཟློ་བར་འདོད་དེ‘‘ང་ཚོས་རང་གི་བླ་མེད་ཐོབ་ཐང་རྩོད་པའི་གོ་རིམ་ཁྲོད་ཁྲིམས་མེད་ལུགས་མེད་ཀྱི་བྱ་སྤྱོད་གང་ཡང་སྒྲུབ་མི་རུང་།  ང་ཚོས་རང་དབང་ལ་སྲེད་པའི་འདོད་གདུང་ཞི་ཕྱིར་ཆགས་སྡང་གི་སྨྱོ་ཆུ་གཏན་ནས་རྔམ་འཐུང་བྱེད་མི་རུང་།   ང་ཚོའི་བདེན་དོན་གྱི་འཐབ་རྩོད་གཙང་མ་འདི་གདུག་སྤྱོད་དང་དྲག་རྩུབ་ཀྱིས་དྲི་མ་ཅན་དུ་ནམ་ཡང་གཏོང་མི་རུང་།   ཇི་སྲིད་བདེན་མཐའ་མ་གསལ་བ་དེ་སྲིད་དུ་ང་ཚོའི་འཐབ་རྩོད་འདི་ཀུན་སྤྱོད་གཙང་མ་དང་ཀུན་སློང་རྣམ་དག་ཡིན་དགོས།   ང་ཚོའི་བདེན་པ་དང་བཟོད་སྲན་གྱི་སྙིང་སྟོབས་གོ་ཆ་འདི་འཁྱེར་ནས་རང་དབང་རྩོད་ལེན་གྱི་ཞི་རྒོལ་སྟོབས་དང་ལྡན་པར་བྱ། ’’ འདི་ནི་འཚེ་མེད་ཀྱི་ལམ་སྟོན་པ་སྐྱབས་མགོན་རྒྱལ་བའི་དབང་པོ་དང་།   མ་ཧ་གྷན་དྷི།    མར་ཊིན་ལའོ་ཐིར་ཁེན་གསུམ་ཀའི་གདམས་ངག་ཕྱོགས་བསྡུས་ཀྱི་ལེགས་བཤད་ཅིག་ཡིན་ངེས།

མཇུག་མཐར་བོད་མི་རིགས་ཀྱི་བདེན་མཐའ་མྱུར་དུ་གསལ་ནས་སྐྱབས་མགོན་རིན་པོ་ཆེ་ཡིས་མཚོན་པའི་སྤུན་ཟླ་ཡོངས་ཀྱི་ཞབས་སོར་གངས་རིའི་ལྗོངས་སུ་འཁོད་དེ་གཞིས་བྱེས་མཉམ་འཛོམས་ཡོང་ཞིང་།   བོད་དོན་གྲོས་མོལ་གྱི་ལམ་ནས་ཐག་བཅད་དེ་རྒྱ་ནག་གཞུང་དང་བོད་དམངས་གཉིས་ཞི་འགྲིག་མཉམ་གནས་ཡོང་བ་དང་།   རྒྱལ་ཁབ་འདི་ཡང་འགྲོ་མི་ཡོངས་ཁྱབ་ཀྱི་ཐོབ་ཐང་ལ་འགན་སྲུང་བྱེད་པའི་རྫོགས་ལྡན་གྱི་རྒྱལ་ཁབ་ཅིག་ཏུ་གྱུར་ཞིང་།   མི་དམངས་ཀུན་ཀྱང་གཞན་དབང་གི་སྒྲོག་ལས་གྲོལ་ཏེ་རང་དབང་བདེ་སྐྱིད་ཀྱི་འཚོ་བས་མི་ཚེ་སྐྱེལ་ཐུབ་པར་སྨོན་ལམ་འདེབས་ཀྱིན་ཡོད་ལ།    དེ་ལྟར་འགྲུབ་པར་མཆོག་གསུམ་བསླུ་མེད་པའི་བདེན་མཐུ་ཡོད་པར་སྨོན།