ཨང་རྩིས་སློབ་ཚན་བོད་ཡིག་ཐོག་ཁྲིད་པ་དེས་སློབ་ཚན་གཏིང་ཟབ་ཤེས་པར་ཕན་ཐོགས་ཆེན་པོ་བྱུང་།

བོད་ཁྱིམ་སློབ་གྲྭའི་དམའ་རིམ་འཛིན་གྲྭའི་ཨང་རྩིས་སློབ་ཁྲིད་རྒྱུས་སྟོན་པ་དང་། བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་དམའ་རིམ་ཨང་རྩིས་སློབ་དེབ་བསྐྱར་ཞིབ་ཚོགས་པའི་ཚོགས་མི། འདས་པའི་ལོ་ངོ་ ༣༤ རིང་བོད་ཁྱིམ་སློབ་གྲྭ་ཁག་ཏུ་ཨང་རྩིས་དགེ་རྒན་ཀྱི་ཕྱག་ལས་གནང་མྱོང་མཁན་དགེན་དཔལ་མོ་ལགས་སུ། བཙན་བྱོལ་བོད་མིའི་སློབ་གྲྭ་ཁག་གི་ཨང་རྩིས་སློབ་ཚན་གྱི་ཤེས་ཚད་དང་གནས་བབ། ཨང་རྩིས་སློབ་ཚན་གྱི་འགྱུར་བ་དང་འདས་པའི་ལོ་ངོ་ ༦༠ རིང་བོད་མིའི་སྤྱི་ཚོགས་ཁྲོད་ཨང་རྩིས་དང་འབྲེལ་བའི་ཐོག་ཆེད་མཁས་པ་ཧ་ཅང་དཀོན་པོ་ཡིན་པའི་རྒྱུ་རྐྱེན་སོགས་ཀྱི་སྐོར་ལ་བཅར་འདྲི་བྱས་ཡོད།

དྲི་བ། ཐོག་མར་སྐུ་ཉིད་ཨང་རྩིས་དགེ་རྒན་ཆགས་པའི་བརྒྱུད་རིམ་དང་སྐབས་དེར་བཙན་བྱོལ་བོད་མིའི་སློབ་གྲྭ་ཁག་གི་སློབ་ཕྲུག་ཚོའི་ཨང་རྩིས་གནས་ཚད་ག་འདྲ་ཡིན་སོགས་ངོ་སྤྲོད་ཅིག་གནང་རོགས།

ལན། ང་རང་གིས་ཐོག་མར་མོན་གྷོ་ཊི་གཞིས་ཆགས་ནས་འཛིན་གྲྭ་བཅུ་པ་བར་དུ་སློབ་སྦྱོང་བྱས་པ་དང་། དེ་ནས་འཛིན་གྲྭ་བཅུ་གཅིག་དང་བཅུ་གཉིས་དྷ་ལ་ཧོ་སི་ནས་ཐོན། དེ་ནས་སིམ་ལ་(St. Bede’s College)མཐོ་སློབ་ནས་ལོ་གཉིས་རིང་དགེ་རྒན་འོས་སྦྱོང་བྱས་པ་ཡིན། གཞི་རིམ་སློབ་གྲྭའི་སྐབས་དགེ་རྒན་དང་ཕ་མ་ཚོས་གཞན་ལ་ཕན་སེམས་དགོས་པའི་སློབ་གསོ་ཡང་ཡང་རྒྱག་གི་ཡོད་པ་དང་། དེ་ནས་དགེ་རྒན་ཚོས་སློབ་ཕྲུག་ཚོར་སློབ་ཚན་མི་ཤེས་པ་སོགས་ཧ་ཅང་ཡག་པོ་བྱས་ཏེ་བསླབ་ཡོང་དུས་སོ་སོའི་སེམས་ལ་དགའ་བ་ཆེན་པོ་ཞིག་སྐྱེས་ཡོང་གི་འདུག་ལ། ང་རང་གི་སེམས་སུ་མ་འོངས་པར་དགེ་རྒན་ཞིག་བྱ་དགོས་པ་དང་དགེ་རྒན་ནི་གཞན་ལ་ཕན་སེམས་ཆེ་ཤོས་ཤིག་དང་རང་གི་འདོད་བློ་དང་མཐུན་པ་ཞིག་རེད་དྲན་པ་ཡིན། ཡིན་ན་ཡང་། དེ་དུས་ཨང་རྩིས་དགེ་རྒན་ཞིག་བྱ་དགོས་བསམ་པ་དྲན་མ་བྱུང་། མཐོ་སློབ་ཚར་མ་ཐག་བོད་ཕྲུག་ཁྱིམ་སྡེར་ཡོང་ནས་དྷ་སྟེང་བོད་ཁྱིམ་རང་དུ་དགེ་རྒན་བྱས་པ་ཡིན། སྐབས་དེར་གཞི་རིམ་འཛིན་གྲྭ་ཁག་ལ་སློབ་ཚན་འདྲ་མིན་ཐོག་སློབ་ཁྲིད་བྱས་པ་ཡིན་ལ། ཕྱི་ལོ་ ༡༩༩༠ གོ་གྲངས་ནས་ཨང་རྩིས་སློབ་ཚན་འཁྲིད་དེ་ཨང་རྩིས་དགེ་རྒན་བྱེད་མགོ་ཚུགས་པ་ཡིན། དེ་དུས་འཛིན་གྲྭ་རེར་སློབ་ཕྲུག་ ༣༠ ནས་ ༤༠ བར་ཡོད་པ་དང་། སློབ་ཕྲུག་ཚོའི་ཨང་རྩིས་གནས་སྟངས་ད་ལྟ་དང་གཅིག་པ་ལྟ་བུ་རེད་ལ། བོད་ནས་ཡོང་མཁན་སློབ་ཕྲུག་མང་པོ་ཡོད་པས་སློབ་ཕྲུག་ཚོ་ཧ་ཅང་བརྩོན་འགྲུས་ཆེན་པོ་ཡོད་པ་རེད།

དྲི་བ། བཙན་བྱོལ་བོད་མིའི་སློབ་གྲྭ་ཁག་དང་ལྷག་པར་དུ་བོད་ཕྲུག་ཁྱིམ་སྡེའི་ནང་ཨང་རྩིས་སློབ་ཚན་ཁྲིད་སྟངས་དེ་རྒྱ་གར་གཞུང་གི་(CBS)སློབ་ཁྲིད་འཆར་འགོད་ལྟར་འགྲོ་བཞིན་ཡོད་པ་དང་། ཁྱེད་ཀྱིས་འདས་པའི་ལོ་ངོ་ ༣༠ ཙམ་གྱི་ཉམས་མྱོང་ལ་གཞིགས་ན། ཨང་རྩིས་ཁྲིད་སྟངས་དེ་བོད་པའི་སློབ་ཕྲུག་ཚོར་འོས་འཚམ་ཞིག་ཏུ་གཟིགས་ཀྱི་ཡོད་དམ།

ལན། སི་བྷི་ཨེ་སི་(CBS)སློབ་ཁྲིད་འཆར་འགོད་གཏན་འབེབ་སློབ་ཚན་དེ་བསམ་བློ་ཡག་པོ་ཞིག་བཏང་བ་ཡིན་ན་ཧ་ཅང་ཡག་པོ་ཡོད་པ་དང་། སློབ་དེབ་དེ་དག་རྒྱ་གར་གྱི་མཁས་པ་ཧ་ཅང་མང་པོས་བསམ་བློ་ཞིབ་ཚགས་བཏང་སྟེ་གཏན་འབེབ་གནང་བ་ཡིན་དུས། སློབ་དེབ་དེ་དག་བོད་པའི་སློབ་ཕྲུག་ལ་འཚམ་པོ་དང་རན་པོ་ཡོད་པ་རེད།སྔོན་མ་ཡིན་ན་སི་བྷི་ཨེ་སི་སློབ་ཚན་དེ་དག་དམའ་རིམ་འཛིན་གྲྭ་ཁག་ལ་གནས་ཚད་ཅུང་ཙམ་མཐོ་བོ་ཡོད་ན་ཡང་། རྗེས་སུ་རིམ་པས་སློབ་དེབ་ཁག་ལ་རྒྱ་གར་ནང་བསམ་ཚུལ་མང་པོ་སླེབས་པར་བརྟེན། སི་བྷི་ཨེ་སི་ངོས་ནས་བསྒྱུར་བཅོས་མང་པོ་བཏང་ཡོད་པ་དང་། ལོ་རེ་ནས་ལོ་རེ་བཞིན་སློབ་ཚན་ཁག་གི་གནས་ཚད་དམའ་རུ་གཏོང་བ་སོགས་བྱས་ཏེ་ད་ལྟའི་ཆར་དེ་སྔོན་དང་བསྡུར་ན་སློབ་ཚན་ཁག་གི་གནས་ཚད་ཧ་ཅང་དམའ་རུ་ཕྱིན་ཡོད་པ་རེད་དེ། ང་ཚོའི་སློབ་གྲྭ་ཁག་ལ་མཚོན་ན་སྔར་བཞིན་ཨང་རྩིས་ཐད་དཀའ་ངལ་ཡོད་པ་དེ་རང་འཇགས་ཡིན་པ་རེད། སྤྱིར་ན་སློབ་ཚན་ཁག་གི་གནས་ཚད་དམའ་རུ་ཕྱིན་པ་དེས་དེ་ལ་དཔག་པའི་གྲུབ་འབྲས་ཤིག་ཐོན་དགོས་ན་ཡང་། ཨང་རྩིས་སློབ་ཚན་ལ་ལྟ་ཕྱོགས་དང་ནམ་རྒྱུན་ནས་ཨང་རྩིས་དེ་དཀའ་ངལ་ཅན་ཞིག་ཡིན་པར་བསམ་པའི་བསམ་བློ་དེ་སྔར་བཞིན་རེད་འདུག

ཡིན་ཡང་། སྐྱབས་མགོན་རིན་པོ་ཆེའི་ཐུགས་རྗེ་བཀའ་དྲིན་ལ་བརྟེན་ནས་ཕྱི་ལོ་ ༡༩༧༠ དོན་གྲངས་ནས་ང་རང་ཚོའི་སློབ་གྲྭ་ཁག་གི་སློབ་ཚན་དེ་རང་སྐད་ནང་བསླབ་ཐུབ་ན་ཞེས་བཀའ་སློབ་ཡང་ཡང་ཕེབས་ཡོད་སྟབས། བཀའ་སློབ་ཕེབས་པ་གཞིར་བཟུང་ཕྱི་ལོ་ ༡༩༨༤ དང་༡༩༨༥ ནས་བོད་ཁྱིམ་གྱི་དམའ་རིམ་འཛིན་གྲྭའི་སློབ་ཚན་དབྱིན་ཡིག་དང་ཧིན་རྡུ་མ་གཏོགས་སློབ་ཚན་ཆ་ཚང་བོད་ཡིག་ནང་སློབ་འཁྲིད་བྱེད་རྒྱུ་མགོ་འཛུགས་གནང་བ་དང་། དེ་ལ་བརྟེན་ནས་དམའ་རིམ་འཛིན་གྲྭ་ཁག་ལ་ཡག་པོ་གཅིག་ག་རེ་བྱུང་ཡོད་པ་རེད་ཅེས་ན། དེ་སྔོན་དབྱིན་ཡིག་སློབ་དེབ་ནང་སློབ་ཁྲིད་སྐབས་དང་བསྡུར་ན་སློབ་ཕྲུག་ཚོས་སློབ་ཚན་ཤེས་པའི་ནུས་པ་དང་དགེ་རྒན་མཉམ་དུ་བློ་བདེ་བོ་དང་ཁ་སངས་པོས་ངང་སློབ་ཚན་གྲོས་བསྡུར་དང་དྲི་བ་གཏོང་རྒྱུ་ཡག་རུ་ཕྱིན་ཡོད་པ་རེད། དེ་སྔོན་སློབ་ཚན་ཤེས་བཞིན་ཡོད་ན་ཡང་སྐད་ཡིག་དེ་དབྱིན་ཇི་ཡིན་པས་དགེ་རྒན་མཉམ་དུ་དེ་ཙམ་བློ་འདྲེས་པོ་དང་སློབ་ཚན་ཐོག་དགེ་རྒན་མཉམ་དུ་གྲོས་བསྡུར་ལྷུག་པོ་དེ་འདྲ་ཡོང་ཐུབ་ཀྱི་མེད་ན་ཡང་། ཕྱིས་སུ་སློབ་ཚན་བོད་ཡིག་ཐོག་ཁྲིད་པ་དང་སོ་སོའི་རང་སྐད་ཡིན་པས་སློབ་ཕྲུག་ཚོས་མ་ཤེས་པ་དང་དོགས་འདྲི་ཡོད་པ་ཁག་ཁ་ཐུག་གིས་འདྲི་བཞིན་ཡོད་པས། ཨང་རྩིས་སློབ་དེབ་དེ་བོད་ཡིག་ཐོག་སློབ་ཁྲིད་གནང་བ་དེས་སློབ་ཕྲུག་གིས་ཨང་རྩིས་ཤེས་སླ་བ་སོགས་ཕན་ཐོགས་ཆེན་པོ་ཞིག་བྱུང་སོང་ལ། དགེ་རྒན་ཚོ་ཡིན་ན་ཡག་པོ་ཁྲིད་ཐུབ་པ་དང་སློབ་ཕྲུག་ལ་དོགས་པ་ག་རེ་ཡོད་ནའང་ཧ་གོ་ཐུབ་པ་སོགས་མངོན་གསལ་དོད་པོས་ཕན་ཐོགས་ཆེན་པོ་བྱུང་སོང་། དེ་སྔོན་སློབ་ཚན་ཁག་དབྱིན་ཡིག་ནང་ཁྲིད་སྐབས་སློབ་ཕྲུག་རེ་ཟུང་མ་གཏོགས་དོགས་འདྲི་གནང་མཁན་མེད་པ་དང་། འཛིན་གྲྭ་གཅིག་ཏུ་སློབ་མ་མང་ཆེ་བས་མི་ཤེས་པའི་སྐོར་ལ་དོགས་འདྲི་དང་སློབ་ཁྲིད་སྐབས་ལན་འདེབས་མཁན་ཧ་ཅང་དཀོན་པོ་ཡིན་པ་རེད། ཕྱོགས་གཅིག་ནས་ཨང་རྩིས་སློབ་ཚན་དེ་བོད་ཡིག་ཐོག་སློབ་ཁྲིད་བྱེད་བཞིན་པས་སློབ་ཕྲུག་ཚོར་བོད་ཀྱི་སྐད་ཡིག་ཤེས་རྒྱུ་གཙོའི་ཕན་ཐོགས་མང་པོ་ཞིག་ཡོད་ན་ཡང་། ཁ་ཡོད་ལག་ཡོད་ཀྱི་ཕན་ཐོགས་བྱུང་བ་དེ་སློབ་ཕྲུག་ཚོས་སློབ་ཚན་དེ་སྔོན་དང་བསྡུར་ན་ཡག་པོ་ཤེས་ཐུབ་པ་བྱུང་སོང་།

དྲི་བ། དགེ་རྒན་གྱི་ཤེས་ཡོན་གནས་ཚད་ཧ་ཅང་གལ་ཆེན་པོ་ཡིན་ཡང་དེ་ལས་ཀྱང་སློབ་ཁྲིད་ཀྱི་ཐབས་རྩལ་ནི་ཤིན་ཏུ་གལ་ཆེན་པོ་ཡིན་སྟབས། ཁྱེད་ཀྱིས་འདས་པའི་ལོ་ངོ་ ༣༠ ལྷག་རིང་ཨང་རྩིས་སློབ་ཁྲིད་གནང་བའི་ཉམས་མྱོང་བརྒྱུད་ཐབས་རྩལ་གཙོ་བོ་ག་རེ་འདོན་གྱི་ཡོད་པ་དང་། དགེ་རྒན་ཚོར་ཁྲིད་ཐབས་ག་འདྲ་ཞིག་བེད་སྤྱོད་དགོས་པའི་རྒྱུས་སྟོན་གནང་གི་ཡོད།

ལན། སྤྱིར་ང་རང་ལ་མཚོན་ན་ཐོག་མར་དགེ་རྒན་བྱས་པ་ནས་ཉམས་མྱོང་ཆེན་པོ་དེ་ཙམ་མེད་ན་ཡང་། དངོས་སུ་དགེ་རྒན་གྱི་ལས་གནས་ལ་ཞུགས་ནས་སློབ་ཁྲིད་བྱས་ཡོང་སྐབས་སློབ་ཁྲིད་ཀྱི་ཐབས་ལམ་མང་པོ་ཞིག་ཤེས་ཡོང་གི་འདུག་ལ། དེ་བཞིན་ཟབ་སྦྱོང་མང་པོ་ཞིག་ལ་ཞུགས་པ་སོགས་ཀྱིས་སློབ་ཁྲིད་ཐབས་ལམ་དང་ཁྲིད་སྟངས་ཐད་ཕན་ཐོགས་ཆེན་པོ་དང་། རང་ཉིད་ཀྱིས་དེ་སྔོན་ཁྲིད་ཐབས་མང་པོ་ཞིག་ནོར་འཁྲུལ་ཡིན་པ་ཡང་ཤེས་རྟོགས་ཡོང་གི་འདུག སྤྱིར་ཨང་རྩིས་སློབ་ཚན་ཁྲིད་ཐབས་ལ་ཐབས་ལམ་གཉིས་ཤིག་བེད་སྤྱོད་གཏོང་གི་ཡོད་པ་ལས། ཐབས་ལམ་དང་པོ་དེ་དགེ་རྒན་འཛིན་གྲྭའི་ནང་དུ་སོང་ནས་ཐད་ཀར་ཨང་རྩིས་སློབ་ཚན་གྱི་རྩིས་གཞི་ཁག་གི་འགྲོ་སྟངས་དང་སྒྲིག་གཞི་གཞིར་བཟུང་ནས་ནག་པང་ངོས་སུ་སློབ་ཁྲིད་བྱེད་བཞིན་ཡོད་པ་དང་། ཁྲིད་སྟངས་གཉིས་པ་དེ་ཨང་རྩིས་སློབ་ཚན་ཁྲིད་ཆས་བེད་སྤྱོད་ཀྱི་བྱེད་སྒོའི་ལམ་ནས་འཁྲིད་རྒྱུ་དེ་རེད། སློབ་ཁྲིད་ཐབས་ལམ་དང་པོ་དེ་དེ་སྔའི་ཁྲིད་སྟངས་རྙིང་པ་ཡིན་པ་དང་། ཁྲིད་སྟངས་དེས་སློབ་ཕྲུག་ཚོས་དགེ་རྒན་གྱིས་སྒྲིག་གཞི་གང་བསླབ་པ་གཞིར་བཟུང་རྩིས་གཞི་དེ་རྩིས་པ་ཡིན་ན་རྩིས་གཞི་དེའི་ལན་ཇི་བཞིན་སླེབ་བཞིན་ཡོད་པས། སློབ་ཕྲུག་གིས་ཨང་རྩིས་ཤེས་ཀྱི་འདུག་བསམ་བཞིན་ཡོད་ན་ཡང་། དོན་དངོས་སུ་སློབ་ཁྲིད་ཐབས་ལམ་དེས་སློབ་ཕྲུག་ལ་ཨང་རྩིས་ཀྱི་འགྲོ་སྟངས་དེ་དག་ག་རེ་བྱས་ཏེ་འདི་ལྟར་འགྲོ་བཞིན་ཡོད་པ་སོགས་རྒྱུ་མཚན་དང་ལྡན་པའི་རྒྱབ་ལྗོངས་ལ་བསམ་བློ་གཏོང་མི་ཐུབ་པར། སྒྲིག་གཞི་དང་བང་རིམ་འགྲོ་སྟངས་ལྟ་བུ་ཞིག་བྱས་ཏེ་སྦྱོང་བཞིན་ཡོད་པས་སློབ་ཕྲུག་ཚོས་ཨང་རྩིས་དངོས་དེ་སྦྱོང་ཐུབ་ཀྱི་མི་འདུག་བསམ་ཡོད། ང་རང་གིས་ནམ་རྒྱུན་ཨང་རྩིས་སློབ་ཚན་དེ་ཁྲིད་ཆས་བེད་སྤྱོད་ཀྱིས་ཁྲིད་ཐབས་བྱེད་ཀྱི་ཡོད་ལ། ལྷག་པར་དུ་དམའ་རིམ་འཛིན་གྲྭ་ལྟ་བུ་ཞིག་ལ་མཚོན་ན། སློབ་ཕྲུག་ཚོར་ཁྲིད་ཆས་བེད་སྤྱོད་ཀྱི་ཁྲིད་ཐབས་དེ་ཧ་ཅང་གལ་ཆེན་པོ་དང་། སློབ་ཕྲུག་ལ་ཨང་རྩིས་སློབ་ཚན་ལ་དོ་སྣང་དང་སེམས་ལ་འཇུག་ཐབས་ཡག་ཤོས་ཤིག་རེད།

དྲི་བ། འཕྲུལ་རིག་ཚན་རྩལ་ཤུགས་ཆེན་དར་བཞིན་པའི་དུས་འདིར་ཨང་རྩིས་དགེན་ལགས་རྣམ་པས་ཨང་རྩིས་སློབ་ཚན་ཁྲིད་སྟངས་ཐད་བསྒྱུར་བཅོས་དང་། རྣམ་པ་ག་འདྲ་ཞིག་གི་ཐོག་ནས་སློབ་ཁྲིད་གནང་དགོས་ཀྱི་འདུག

ལན། ང་རང་གིས་དམའ་རིམ་དགེ་རྒན་ཚོར་དང་པོ་སློབ་ཚན་དེ་ཁྲིད་ཆས་ཀྱི་ངོས་ནས་སློབ་ཁྲིད་བྱེད་པ་དང་། དེ་ནས་ཁྲིད་ཆས་དེ་དཔེ་རིས་ཀྱི་རྣམ་པར་བསྒྱུར་ནས་ཁྲིད་པ། མཇུག་ཏུ་དཔེ་རིས་སློབ་ཁྲིད་དེ་ཨང་གྲངས་ཀྱི་རྣམ་པར་བསྒྱུར་ནས་ཁྲིད་དགོས་པའི་ལམ་སྟོན་བྱེད་བཞིན་ཡོད་ལ། རིམ་པས་འཛིན་གྲྭ་མཐོ་རུ་ཕྱིན་པ་དང་སློབ་ཚན་དེ་དག་ཨང་གྲངས་ཐོག་ནས་འཁྲིད་དགོས་སྟབས་སློབ་ཕྲུག་ལ་སློབ་ཚན་དེ་ལྐོག་གྱུར་ལྟ་བུ་ཆགས་ཀྱི་ཡོད་པས། དེ་ལས་དང་པོ་དམའ་རིམ་འཛིན་གྲྭ་ནས་ཁྲིད་ཆས་དང་དཔེ་རིས་ལམ་ནས་འཁྲིད་པ་ཡིན་ན་སློབ་ཕྲུག་གིས་སློབ་ཚན་ལ་གོ་བ་ལེན་ཐུབ་པ་མ་ཟད། སློབ་ཚན་ཁྲིད་སྟངས་དེས་སློབ་ཕྲུག་གི་སློབ་ཚན་ལ་གོ་བ་བརྟན་པོ་ཡོང་ཡོད་པ་རེད། ལྷག་པར་དུ་དམའ་རིམ་དགེ་རྒན་ཚོས་ཨང་རྩིས་སློབ་ཚན་འཁྲིད་སྐབས་ཁྲིད་ཆས་སྣ་ཚོགས་སྒྲིག་བཟོ་དགོས་པ་གལ་ཆེན་པོ་ཡིན་པ་དང་། ཨང་རྩིས་སློབ་ཚན་ལ་ཁྲིད་ཆས་ཉོས་དགོས་ན་གོང་ཆེན་པོ་དང་སློབ་ཕྲུག་གིས་བསམ་བློ་གཏོང་མི་ཤེས་པས། ཁྲིད་ཆས་རིགས་འཁྱེར་བ་དང་བོར་གཏོར་སོགས་ཡོང་གི་ཡོད་སྟབས། དེ་ལས་དགེ་རྒན་ཚོས་ཁྲིད་ཆས་རང་ངོས་ནས་བཟོས་པ་ཡིན་ན་ག་ཚོད་དགོས་པ་ཡིན་ནའང་བཟོ་ཐུབ་པ་དང་། ལྷག་པར་དུ་དམའ་རིམ་སློབ་ཕྲུག་ཚོར་གཙོ་བོ་སྡོམ་འཐེན་བསྒྱུར་བགོད་ཀྱི་རྩིས་ཕྲེང་བཞི་དེ་ཡིན་སྟབས། དགེ་རྒན་ཚོས་རྡོ་དང་ཅ་དངོས་རིགས་གཞན་སྒྲུག་ནས་བཟོས་པ་ཡིན་ན་ཧ་ཅང་སྟབས་བདེ་པོ་ཡོད་པ་རེད། ང་རང་གི་ངོས་ནས་དགེ་རྒན་ཚོར་ནམ་རྒྱུན་ཁྲིད་ཆས་དང་དཔེ་རིས་རིགས་བེད་སྤྱོད་གཏོང་དགོས་པ་དང་། རང་ངོས་ནས་སློབ་གྲྭ་ཁག་ལ་སྐོར་སྐྱོད་སྐབས་ཁྲིད་ཆས་རིགས་བཟོ་སྒྲུག་བྱེད་བཞིན་ཡོད་ལ། དེང་སང་གི་སློབ་ཕྲུག་དང་སྔོན་མའི་སློབ་ཕྲུག་བར་ལ་ཁྱད་པར་ཆེན་པོ་ཡོད་པ་དང་། སྔོན་མའི་སློབ་ཕྲུག་ཡིན་ན་སློབ་ཚན་ཁྲིད་སྐབས་སྐར་མ་ ༡༠ ནས་ ༡༥ བར་ཉན་ཐུབ་པའི་ནུས་པ་ཡོད་ན་ཡང་། དེང་སང་ཁོར་ཡུག་སོགས་ཀྱིས་ཡིན་ནམ་སློབ་ཁྲིད་ལ་ཉན་པའི་ནུས་པ་དེ་ཧ་ཅང་ཐུང་ཐུང་ཡིན་སྟབས། དགེ་རྒན་ཚོས་སློབ་ཁྲིད་བྱེད་དགོས་པ་དང་སློབ་ཚན་དེ་ཡང་སློབ་ཕྲུག་ཚོས་གསལ་བོ་ཤེས་ཐུབ་པ་ཞིག་ཡོང་དགོས་དུས། སློབ་ཕྲུག་གི་ཁམས་དང་བསྟུན་ནས་སློབ་ཁྲིད་བྱེད་དགོས་པ་དང་ལྷག་པར་དུ་བྱིས་པ་ཚོར་མཚོན་ན་ས་ཆ་གཅིག་ལ་བསྡད་དེ་དུས་ཚོད་ཡུན་རིང་པོར་ཉན་པའི་གཟོད་སྲན་མེད་སྟབས། དགེ་རྒན་ཚོས་ངེས་པར་དུ་རྩེད་མོ་དང་བྱེད་སྒོའི་ལམ་ནས་ཁྲིད་ཆས་དང་དཔེ་རིས་བེད་སྤྱོད་ཀྱིས་སློབ་མའི་སེམས་ཁམས་ལ་སློབ་ཚན་དེའི་གོ་དོན་གསལ་རྟོགས་ཐུབ་པ་བྱ་རྒྱུ་དགོས་པ་གལ་ཆེན་པོ་ཡིན་པ་དང་། བྱེད་སྒོ་འདྲ་མིན་སྤེལ་བ་ཡིན་ན་སློབ་ཕྲུག་ཚོས་རྩེད་མོ་རྩེ་ཡི་ཡོད་པའི་རྣམ་པའི་ཐོག་ནས་སློབ་ཚན་སྦྱོང་ཡོང་གི་ཡོད་པ་རེད། དམའ་རིམ་སློབ་གྲྭའི་སློབ་ཕྲུག་དེ་དག་ལ་ཚོར་ཤེས་ཧ་ཅང་རྣོ་བོ་ཡིན་སྟབས། ཁོ་ཚོར་རྩེད་མོ་དང་ཁྲིད་ཆས་དཔེ་རིས་སོགས་ཀྱི་ལམ་ནས་འཁྲིད་པ་ཡིན་ན། སློབ་ཕྲུག་ཚོས་ཅ་དངོས་དེ་དག་ལ་ལག་པ་འཆང་བ་ནས་ཚོར་ཤེས་ཀྱི་ལམ་ནས་སློབ་ཚན་གྱི་གོ་དོན་ལ་རྒྱུ་མཚན་ལྡན་པའི་བསམ་བློ་གཏོང་ཐུབ་པ་ཞིག་ཆགས་འགྲོ་བཞིན་ཡོད་པ་རེད།

དྲི་བ། ཨང་རྩིས་སློབ་ཚན་དེ་རིག་ཚན་ཧ་ཅང་གལ་ཆེན་པོ་ཞིག་ཡིན་ན་ཡང་། བོད་ཕྱི་ནང་གཉིས་ཀྱི་སྤྱི་ཚོགས་ནང་བོད་རིགས་ཨང་རྩིས་མཁས་པ་ཧ་ཅང་དཀོན་པོ་ཡིན་པའི་སྐད་ཆ་དེ་ཡོངས་གྲགས་ལྟ་བུ་ཆགས་ཡོད་པ་རེད། དགེན་ལགས་ཀྱིས་དེའི་རྐྱེན་རྩ་དེ་ག་བར་ཐུག་ཡོད་པ་རེད་དགོངས་ཀྱི་འདུག

ལན། སྤྱིར་ན་ཨང་རྩིས་ཟེར་བ་དེ་ང་ཚོའི་སྤྱི་ཚོགས་ཙམ་མ་ཟད་རྒྱ་གར་སྤྱི་ཚོགས་དང་། འཛམ་གླིང་ཡོངས་སུ་ཧ་ཅང་དཀའ་ངལ་ཡོད་པ་ཞིག་ཏུ་ལྟ་བའི་བསམ་བློ་ཡོད་པ་དང་། ང་རང་གི་བསམ་ཚུལ་ལ་ང་ཚོའི་སྤྱི་ཚོགས་ནང་ཨང་རྩིས་ཆེད་མཁས་པ་དང་ཨང་རྩིས་ཐོག་མཐར་ཕྱིན་པ་དེ་འདྲ་མེད་པ་དེ་སྤྱིར་ན་ཨང་རྩིས་སློབ་ཚན་དེ་ལས་སླ་བོ་མེད་པ་དང་། ཨང་རྩིས་སློབ་ཚན་དེ་སློབ་ཚན་གཞན་ལྟར་ཀློག་ནས་གོ་བ་ལེན་ཐུབ་པ་ཙམ་གྱིས་མི་འགྲིག་པར་རྒྱུན་མཐུད་རྩིས་བཤེར་གྱིས་འགྲོ་དགོས་པ་ཞིག་ཡིན་སྟབས། བོད་པའི་སློབ་ཕྲུག་མང་པོར་ཨང་རྩིས་སློབ་ཚན་ལ་དགའ་ཞེན་དང་རྒྱུན་ལྡན་ཨང་རྩིས་སློབ་ཚན་རྩིས་བཤེར་གྱིས་འབད་བརྩོན་བྱེད་མཁན་ཧ་ཅང་དཀོན་པོ་འདུག གཉིས་ནས་དམའ་རིམ་སློབ་གྲྭ་ནས་ཨང་རྩིས་སློབ་ཚན་ལ་རྨང་གཞི་ཡག་པོ་མེད་པ་ཞིག་གིས་དེ་འདྲའི་གནས་སྟངས་ཡོང་གི་ཡོད་པ་དང་། གཞན་ང་ཚོའི་སྤྱི་ཚོགས་ནང་ཨང་རྩིས་ཟེར་དུས་དཀའ་ལས་ཁག་པོ་ཞིག་ཡིན་བསམ་པའི་ཀུན་སློང་དེས་ཨང་རྩིས་སློབ་ཚན་ལ་རང་བཞིན་གྱིས་མི་དགའ་བ་དང་ཨང་རྩིས་ལ་སྦྱོང་བ་བྱེད་མཁན་ཉུང་ཉུང་ཆགས་འགྲོ་ཡི་ཡོད་པ་རེད། ཕྱོགས་གཞན་ཞིག་ནས་ང་ཚོའི་སྤྱི་ཚོགས་ནང་གཞི་རིམ་སློབ་གྲྭ་ཐོན་སྐབས་ཨང་རྩིས་སློབ་ཚན་ཡག་པོ་ཡོད་པའི་སློབ་ཕྲུག་ཡོད་ན་ཡང་། མཐོ་སློབ་དུ་བསླེབས་པ་དང་རང་བཞིན་གྱིས་ཁ་ཕྱོགས་གཞན་ཞིག་ལ་འཁོར་འགྲོ་བ་ཞིག་ཡོང་གི་ཡོད་པ་དང་། གཅིག་ནས་ཨང་རྩིས་སློབ་ཚན་སྦྱོང་བར་སློབ་ཡོན་ཆེན་པོ་ཡིན་པ་དང་སློབ་གྲྭ་ཡང་ཡག་པོ་དགོས་སྟབས་ཆ་རྐྱེན་སོགས་ཀྱིས་དཀའ་ངལ་འཕྲད་ཀྱི་མེད་དམ་བསམ་གྱི་འདུག གཞན་ཞིག་ནས་ཨང་རྩིས་སློབ་ཚན་སྦྱང་བ་ཡིན་ན་མ་འོངས་པར་བོད་པའི་སྤྱི་ཚོགས་ནང་ཨང་རྩིས་སྦྱངས་ནས་ལས་ཀ་འདི་ལྟ་བུ་ཞིག་བྱ་རྒྱུ་ཡིན་བསམ་པའི་དམིགས་ཡུལ་ཡོད་ན་ཡང་། བོད་པའི་སྤྱི་ཚོགས་ལ་ཨང་རྩིས་ཐད་ཕྱག་ལས་རྒྱ་ཆེན་པོ་དེ་འདྲ་གནང་ས་མེད་པ་ཡིས་ཨེ་ཡིན་ནམ་བསམ་པའི་དོགས་པ་ཡོང་གི་འདུག

དྲི་བ། དེང་སང་ང་ཚོའི་སྤྱི་ཚོགས་ནང་ཨང་རྩིས་སློབ་ཚན་ལ་དགའ་བོ་ཡོད་ཟེར་མཁན་སློབ་ཕྲུག་གང་འཚམ་ཡོད་པར་བརྟེན། ཨང་རྩིས་ལ་དགའ་བའི་སློབ་ཕྲུག་ཅིག་གིས་སོ་སོའི་དགའ་མོས་བྱེད་སའི་སློབ་ཚན་དེ་དཔྱིས་ཕྱིན་པ་ཞིག་སྦྱོང་ཐུབ་པར་ཐབས་ལམ་ག་རེ་འདོན་གལ་ཆེན་པོ་གཟིགས་ཀྱི་འདུག

ལན། སྤྱིར་ཨང་རྩིས་སློབ་ཚན་ཐོག་ཡག་པོ་ཡོད་པ་དང་སློབ་ཕྲུག་རིག་པ་དང་སྤྱང་གྲུང་ལྡན་པ་དེ་འདྲ་ཡོང་གི་ཡོད་པ་རེད་དེ། སློབ་གྲྭའི་སྐབས་ཡག་པོ་ཡོད་ན་ཡང་གནས་སྐབས་ནས་བརླག་འགྲོ་བ་ཞིག་ཡོང་གི་ཡོད་སྟབས། དེ་དག་གིས་མུ་མཐུད་ཨང་རྩིས་ཐོག་སྦྱོང་བ་བྱེད་ཐབས་སུ་དགེ་རྒན་དང་མདུན་ལམ་ཚན་པ་སོགས་ཀྱིས་སློབ་སྟོན་གནང་རྒྱུ་གལ་ཆེན་པོ་རེད་ལ། གནད་དོན་གཙོ་བོ་སློབ་ཕྲུག་ཨང་རྩིས་ལ་དགའ་མོས་ཡོད་མཁན་ཚོ་རྒྱུན་མཐུད་ཨང་རྩིས་སློབ་ཚན་ལ་དགའ་མོས་ཡོད་པར་སློབ་སྟོན་དང་བདག་སྐྱོང་དགོས་རྒྱུ་གལ་ཆེན་པོ་རེད། གོང་དུ་བཤད་པ་ལྟར་ཨང་རྩིས་ཟེར་བ་དེ་དུས་ནས་དུས་སུ་སྦྱང་བ་བྱས་ཏེ་མ་ཡོང་ན་རྩིས་གཞི་ཙམ་རྩིས་ནས་ཤེས་སོང་བསམ་པ་ཙམ་གྱིས་ཡོང་གི་མེད་པ་རེད། དེ་བཞིན་བོད་པའི་སྤྱི་ཚོགས་ནང་དངོས་ནས་ཨང་རྩིས་ཆེད་མཁས་པ་དེ་འདྲ་གསོ་སྐྱོང་བྱ་དགོས་ན། སློབ་ཕྲུག་ཚོ་མཐོ་སློབ་ཡག་པོ་ལ་གཏོང་བ་དང་ཨང་རྩིས་ཆེད་མཁས་མི་སྣ་དེ་འདྲ་ངོ་སྤྲོད་དང་། མ་འོངས་པའི་ཕུགས་རྒྱང་རིང་པོར་བསམ་བློ་བཏང་ནས་སློབ་ཕྲུག་ཚོར་མཐོ་སློབ་ཡག་པོ་ལ་འགྲོ་ཐབས་སུ་སློབ་ཡོན་ཡག་པོ་སྤྲོད་པ་སོགས། ཕུགས་རྒྱང་རིང་བོའི་བསམ་བློ་བཏང་སྟེ་ཨང་རྩིས་ཆེད་མཁས་པ་གསོ་སྐྱོང་དགོས་རྒྱུ་ཧ་ཅང་གལ་ཆེན་པོ་རེད།

དྲི་བ། ཁྱེད་ཀྱིས་འདས་པའི་ཉམས་མྱོང་གཞིར་བཟུང་མ་འོངས་པར་བཙན་བྱོལ་བོད་མིའི་སློབ་གྲྭ་ཁག་ནང་ཨང་རྩིས་གཙོ་བོར་གྱུར་བའི་སློབ་ཁྲིད་ཐབས་ལམ་སྤྱི་ལ་བསྐྱར་ཞིབ་དང་བསྒྱུར་བཅོས་དགོས་པ་ཞིག་གཟིགས་ཀྱི་ཡོད་འདུག་གམ།

ལན།  སྤྱིར་ན་ང་ཚོའི་ཤེས་ཡོན་སྡེ་ཁག་གིས་ད་ལྟ་བར་ཞིབ་འཇུག་སོགས་གང་ཡང་མེད་པའི་ཐོག་ནས་སློབ་ཁྲིད་ཅིག་བྱས་ཏེ་འགྲོ་བསྡད་ཡོད་དུས། འཐུས་ཤོར་ག་ནས་འགྲོ་བཞིན་ཡོད་པ་དང་སློབ་ཁྲིད་སོགས་ལ་བསྐྱར་ཞིབ་དགོས་པ་ག་རེ་འདུག་ཤེས་ཀྱི་མེད་སྟབས། འབྲེལ་ཡོད་ཚན་པ་ཚོས་ཞིབ་འཇུག་ཡག་པོ་ཞིག་བྱས་ཏེ་སྐྱོན་ཆ་དང་ནོར་འཁྲུལ་གང་དུ་འདུག་ཤེས་པའི་ཐོག་ནས་དགེ་རྒན་ཚོས་སློབ་ཁྲིད་ཐུབ་ན་བསམ་གྱི་འདུག དཔེར་ན་སློབ་ཚན་ཁྲིད་སྟངས་དེ་འགྱུར་བ་འགྲོ་བཞིན་ཡོད་དུས་སྔོན་མའི་སློབ་ཚན་ཁྲིད་སྟངས་སོགས་ནོར་འཁྲུལ་ཡིན་པ་མཐོང་བ་དང་།དགེ་རྒན་ཚོས་ཧུར་ཐག་གིས་སློབ་ཁྲིད་བྱེད་བཞིན་ཡོད་ན་ཡང་། སློབ་ཁྲིད་བྱེད་སྟངས་དེས་སློབ་ཕྲུག་ལ་ཕན་ཐོགས་མ་བྱུང་བ་དང་སློབ་མའི་སེམས་ཁམས་དང་བསྟུན་པའི་སློབ་ཚན་ལ་གོ་བ་གསལ་བོ་ཅན་ཞིག་འཁྲིད་མ་ཐུབ་པ་ཡིན་ན། དགེ་རྒན་དང་སློབ་མ་ཚང་མའི་དུས་ཚོད་འཕྲོ་བརླག་ལྟ་བུ་ཡིན་པ་དང་། ང་རང་གིས་འདས་པའི་ལོ་ངོ་ ༣༤ རིང་བོད་ཁྱིམ་སློབ་གྲྭའི་དམའ་རིམ་འཛིན་གྲྭའི་དགེ་རྒན་བྱས་པའི་ཉམས་མྱོང་གཞིར་བཞག་ནས་ང་རང་གི་བསམ་ཚུལ་ཙམ་བརྗོད་ན། བོད་པའི་སློབ་ཕྲུག་དེ་ཚོ་སྤྱི་ཡོངས་ནས་རིག་པ་མེད་པ་དང་། སློབ་སྦྱོང་ལ་མི་དགའ་བ་དེ་འདྲ་གཏན་ནས་རེད་མི་འདུག དེ་བས་ཨང་རྩིས་སློབ་ཚན་ལ་མི་དགའ་བའི་ནོར་འཁྲུལ་དེ་གང་ནས་ཤོར་བཞིན་འདུག་དེ་དག་ཚང་མའི་ཐད་ཞིབ་འཇུག་ཡག་པོ་ཞིག་བྱེད་ཐུབ་ན་བྱ་རྒྱུ་ཡོད་པ་རེད་བསམ་གྱི་འདུག

གསར་འགོད་པ། སངས་རྒྱས་དཀོན་མཆོག