བསོད་རྒྱལ་རིན་པོ་ཆེ་སྐུ་གྲོངས།

རིག་པ་ཆོས་ཚོགས་ཀྱི་དབུ་འཛིན་བསོད་རྒྱལ་རིན་པོ་ཆེ་སྙུང་གཞིའི་རྐྱེན་གྱིས་ཐའེ་ཝན་ཌའི་ནང་གློ་བུར་སྐུ་གྲོངས་ཡོད་འདུགདེ་རིང་ཐའེ་ལན་ཌིའི་ཉིན་གུང་ཆུ་ཚོད་ ༡ པོའི་སྟེང་། རིག་པ་ཆོས་ཚོགས་ཀྱི་དབུ་འཛིན་བསོད་རྒྱལ་རིན་པོ་ཆེ་གློ་བུར་སྐུ་གྲོངས་ཡོད་པ་དང་། རིན་པོ་ཆེའི་མདུན་འདུག་རྗག་ཁི་ལི་(Jacki Lee)ཞེས་པ་ཞིག་གིས་བསོད་རྒྱལ་རིན་པོ་ཆེ་སྐུ་སྒེར་གྱི་ངོ་དེབ་སྟེང་། ངས་ཁྱེད་ཚོར་ཧ་ཅང་ཡིད་སྐྱོ་བའི་གནས་ཚུལ་ཞིག་ཞུ་རྒྱུར། དེ་རིང་ཐའེ་ལན་ཌིའི་ཉིན་རྒྱབ་ཆུ་ཚོད་ ༡ ཙམ་ལ། བསོད་རྒྱལ་རིན་པོ་ཆེའི་འཕྲོད་བཞེས་ཇེ་སྡུག་ཏུ་སོང་སྟེ་གློ་རྩ་འགག་(Pulmonary embolism)ཏེ་ཞིང་དུ་གཤེགས་སོང་། སྨན་པས་ཐབས་བྱུས་ཡོད་ཚད་བྱས་ཀྱང་ཕན་འབྲས་མ་བྱུང་། ཞེས་དང་། ད་ལྟའི་ཆར་རིན་པོ་ཆེ་ཐུགས་དམ་དུ་བཞུགས་ཡོད་པ་དང་། དད་ལྡན་སློབ་འབངས་རྣམས་ཀྱིས་རྡོ་རྗེ་སེམས་དཔའ་དང་ཡིག་བརྒྱ་མ་སོགས་ལ་ཐུགས་གནང་དགོས་སྐོར་བརྗོད་འདུག

བསོད་རྒྱལ་རིན་པོ་ཆེ་ནི་ཕྱི་ལོ་ ༡༩༤༧ ལོར་བོད་དཀར་མཛེས་ཁུལ་གྱི་ཏྲེ་ཧོར་ལྭ་དཀར་ཞེས་པའི་ཁྱིམ་ཚང་དུ་སྐུ་འཁྲུངས་ཤིང་། འཇམ་དབྱངས་མཁྱེན་བརྩེ་བློ་གྲོས་རིན་པོ་ཆེ་མཆོག་གིས་གཏེར་སྟོན་བསོད་རྒྱལ་རིན་པོ་ཆེའི་ཡང་སྲིད་དུ་ངོས་འཛིན་གནང་ཡོད་པ་དང་། སྐུ་ན་ཆུང་དུས་ནས་སྡེ་དགེའི་རྫོང་སར་དགོན་དུ་ཞུགས་ཏེ་སྔོན་འགྲོའི་གསན་བསམ་གནང་ཡོད་པ་དང་། བདུད་འཇོམས་འཇིགས་བྲལ་ཡེ་ཤེས་རྡོ་རྗེ་རིན་པོ་ཆེ་དང་དིལ་མགོ་མཁྱེན་བརྩེའི་རིན་པོ་ཆེ། དེ་བཞིན། སྨྱོ་ཤུལ་མཁན་པོ་འཇམ་དབྱངས་རྡོ་རྗེ་མཆོག་སོགས་བོད་ཀྱི་བླ་ཆེན་དུ་མའི་དྲུང་ནས་་ཐོས་བསམ་སྒོམ་གསུམ་གྱི་བསླབ་པ་སློབ་གཉེར་གནང་། རྒྱ་གར་ནང་ཕེབས་རྗེས་ཀ་ལིམ་ཕུང་གི་ཡེ་ཤུའི་སློབ་གྲྭ་དང་ལྡི་ལི་གཙུག་ལག་སློབ་གཉེར་ཁང་ནང་སློབ་གཉེར་གནང་། ཕྱི་ལོ་ ༡༩༧༡ ལོར་དབྱིན་ཡུལ་གྱི་ཀེམ་པི་རི་ཇི་གཙུག་ལག་སློབ་གྲྭའི་ཊི་རིན་ནི་ཊེ་(Trinity)མཐོ་སློབ་ནང་སློབ་གཉེར་གནང་ཡོད་འདུག ཕྱི་ལོ་ ༡༩༧༣ ལོར་བསོད་རྒྱལ་རིན་པོ་ཆེས་༧གོང་ས་རྒྱལ་བ་རིན་པོ་ཆེ་མཆོག་ཨི་ཊ་ལིའི་ནང་ཆེས་ཐོག་མར་ཆིབས་བསྒྱུར་གོ་སྒྲིག་ཞུས་ཏེ། སྐབས་དེའི་ཡེ་ཤུ་ཆོས་དཔོན་ཨན་ཊོ་ནེ་མ་རེ་ཡ་མོན་ཊི་ནེ་མཆོག་དང་མཇལ་འཕྲད་མཛད་ཡོད་འདུག

ཕྱི་ལོ་ ༡༩༧༤ ལོ་ནས་བསོད་རྒྱལ་རིན་པོ་ཆེས་་དབྱིན་ཡུལ་དུ་ནང་ཆོས་སློབ་ཁྲིད་དབུ་འཛུགས་གནང་སྟེ་ཨོ་རྒྱན་ཆོས་གླིང་བཙུགས་ཡོད་པ་དང་།   ཕྱི་ལོ་ ༡༩༧༨ ལོར་བདུད་འཇོམས་འཇིགས་བྲལ་ཡེ་ཤེས་རྡོ་རྗེ་རིན་པོ་ཆེ་ཡིས་ཁོང་གི་ནང་པའི་ཆོས་ཚོགས་ཁག་བསོད་རྒྱལ་རིན་པོ་ཆེར་རྩིས་སྤྲོད་གནང་། ད་ལྟའི་ཆར་རིག་པ་ཆོས་ཚོགས་ཀྱི་ཁོངས་སུ་འཛམ་གླིང་རྒྱལ་ཁབ་ ༢༣  ནང་ཆོས་ཚོགས་ ༡༠༠ ལྷག་ཡོད་འདུག་ལ། རིན་པོ་ཆེས་ནང་ཆོས་དང་འབྲེལ་བའི་དཔེ་དེབ་མང་པོ་འབྲི་རྩོམ་གནང་ཡོད་པའི་ཁྲོད་ནས་བོད་ཀྱི་སྐྱེ་འཆིའི་སྐོར་གྱི་དེབ་(The Tibetan Book of Living and Dying)ཞེས་པ་རྒྱལ་སྤྱིའི་ཐོག་སྐད་གྲགས་ཆེན་པོ་ཆགས་ཡོད་འདུག

གསར་འགོད་པ། སྐལ་བཟང་སྦྱིན་པ།