བོད་རིཊ་སློབ་མ་ཞིག་ལ་རྒྱ་གར་གྱི་ན་གཞོན་གཟེངས་རྟགས་ཐོབ།

བོད་རིགས་གཞོན་སྐྱེས་དཀོན་མཆོག་དར་རྒྱས་ལགས་སུ་རྒྱ་གར་རྒྱལ་སྤྱི་དང་རྒྱལ་ཡོངས་གཟེངས་རྟགས་མཐུན་ཚོགས་ཀྱི་ཕྱི་ལོ་ ༢༠༡༩ ལོའི་ན་གཞོན་གཟེངས་རྟགས་ཐོབ་འདུགཁ་སང་རྒྱ་གར་རྒྱལ་ས་ལྡི་ལིའི་ནེ་རོ་ཚོགས་ཁང་དུ། རྒྱ་གར་རྒྱལ་སྤྱི་དང་རྒྱལ་ཡོངས་ན་གཞོན་གཟེངས་རྟགས་མཐུན་ཚོགས་ཀྱིས་ (International and National Youth Awardees Federation of India) ཕྱི་ལོ་ ༢༠༡༩ ལོའི་ན་གཞོན་གཟེངས་རྟགས་འབུལ་བའི་མཛད་སྒོ་ཚོགས་ཡོད་པ་དང། འདི་ལོའི་ན་གཞོན་གཟེངས་རྟགས་ཁྲོད་རྒྱ་གར་ནང་ན་གཞོན་གྲངས་ ༥༠ ལྷག་མཉམ་ཞུགས་བྱས་ཡོད་པའི་ཁྲོད་ནས། རྒྱ་གར་རྒྱལ་ས་ལྡི་ལི་གཙུག་ལག་སློབ་གཉེར་ཁང་དུ་གཙུག་ལག་རབ་འབྱམས་པའི་སློབ་གཉེར་གནང་བཞིན་པའི་བོད་རིགས་སློབ་མ་དཀོན་མཆོག་དར་རྒྱས་ལགས་སུ་འདི་ལོའི་ན་གཞོན་གཟེངས་རྟགས་ཐོབ་ཡོད་འདུག

འདི་གའི་གསར་འགོད་པས་དཀོན་མཆོག་དར་རྒྱས་ལགས་སུ་གཟེངས་རྟགས་དེ་ག་འདྲ་ཐོབ་པའི་སྐོར་དྲིས་པར་ཁོང་གིས། སྤྱིར་གཟེངས་རྟགས་དེ་རྒྱ་གར་དང་རྒྱལ་སྤྱིའི་ན་གཞོན་དཀའ་ངལ་མང་པོ་མྱོང་མཁན་དང་དམིགས་བསལ་ཆབ་སྲིད་ཐོག་ནས་དཀའ་སྡུག་མྱོང་མཁན་ཚོར་སེམས་ཤུགས་སྤར་ཆེད་འབུལ་བཞིན་ཡོད་པ་དང་། ཐེངས་འདིར་གཟེངས་རྟགས་དེའི་ནང་མཉམ་ཞུགས་བྱེད་མཁན་ ༥༠ ལྷག་ཅིག་ཡོད་པ་ལས། རྒྱ་གར་བ་ན་གཞོན་ཁག་ཅིག་ལ་ཁོ་རང་ཚོའི་ལས་རིགས་ཐད་ནས་གཟེངས་རྟགས་དེ་སྤྲད་ཡོད་པ་དང་། ང་ལ་མཚོན་ན་རྒྱལ་སྤྱིའི་རང་བཞིན་ངོས་ནས་མཉམ་ཞུགས་བྱས་ཡོད་སྟབས་གོ་སྐབས་ཤིག་ཐོབ་ཡོད་པ་དང་། གཞན་གཟེངས་རྟགས་དེ་གནང་དགོས་དོན་གཙོ་བོ་བོད་དོན་དང་འབྲེལ་བའི་གཏམ་བཤད་དང་། མི་སྒེར་གྱི་ལོ་རྒྱུས་ཐད་ནས་སྐྱབས་བཅོལ་བ་ཡིན་སྟབས་ཤེས་ཡོན་དང་འབྲེལ་ནས་ཕྱིའི་རྒྱལ་ཁབ་ཁག་ལ་འགྲོ་སྐྱོད་མེད་པ་དང་། དེ་བཞིན་བོད་དོན་ལས་འགུལ་ནང་མཉམ་ཞུགས་བྱས་པ་སོགས་ཀྱི་ངོས་ནས་སྤྲད་པ་ཡིན་སྐོར་བརྗོད་བྱུང་།ཡང་ཁོང་ལ་གཟེངས་རྟགས་དེ་ཐོབ་སྐབས་དམིགས་བསལ་སེམས་ཚོར་ག་རེ་བྱུང་སྐོར་དྲིས་པར་ཁོང་གིས། གཟེངས་རྟགས་དེ་ཐོབ་པར་དགའ་ཚོར་ཆེན་པོ་བྱུང་ལ། ང་རང་ལ་མཚོན་ན་འདི་ལོར་རྒྱ་གར་གྱི་སློབ་གྲོགས་མང་པོ་ཞིག་གི་རོགས་རམ་འོག མཱལ་དྷེ་ཝི་སི་(Maldives)རྒྱལ་ཁབ་ཏུ་ཚོགས་པའི་རྒྱལ་སྤྱིའི་ན་གཞོན་ཞི་བདེའི་ཚོགས་འདུར་བཅར་ཐུབ་པ་བྱུང་བ་དང་། སྐབས་དེར་མི་སྒེར་གྱི་ལོ་རྒྱུས་ཤིག་འབྲི་དགོས་པ་ལྟར། ང་རང་གིས་བོད་ནང་ཡོད་སྐབས་དང་རྒྱ་གར་ལ་ཡོང་སྐབས་སོགས་སུ་དཀའ་ངལ་འཕྲད་པའི་སྐོར་གྱི་མི་ཚེའི་ལོ་རྒྱུས་མདོར་བསྡུས་ཤིག་བྲིས་པར། ཚོགས་འདུ་གོ་སྒྲིག་པ་ཚོ་སེམས་འགུལ་ཆེན་པོ་ཐེབས་ཡོད་པ་དང་། སྐབས་དེར་ཚོགས་འདུའི་སྟེང་བོད་དོན་དང་༧གོང་ས་རྒྱལ་བ་རིན་པོ་ཆེ་མཆོག་གི་དགོངས་གཞི་སོགས་ཀྱི་སྐོར་ལ་གཏམ་བཤད་བྱེད་རྒྱུ་བྱུང་། གཟེངས་རྟགས་དེ་ཐོབ་པས་སྔར་ལས་བོད་དོན་དང་ཁོར་ཡུག་གནད་དོན། བོད་ཀྱི་རིག་གཞུང་སོགས་ཀྱི་སྐོར་ལ་མུ་མཐུད་རྒྱལ་སྤྱིའི་སྡིངས་ཆའི་སྟེང་ཤུགས་སྣོན་རྒྱག་དགོས་བསམ་པའི་སེམས་ཤུགས་ཆེན་པོ་བྱུང་སྐོར་བརྗོད་བྱུང་།མཇུག་ཏུ་ཁོང་གིས། སྤྱིར་ན་ཐེངས་འདིར་གཟེངས་རྟགས་དེ་ང་ལ་ཐོབ་ཡོད་ན་ཡང་། བོད་པའི་སྤྱི་ཚོགས་ནང་ང་ལས་ལྷག་པའི་བོད་དོན་སྐོར་ལ་ལས་ཀ་བྱེད་མཁན་དང་སེམས་ཤུགས་ཅན་མང་པོ་ཡོད་པ་རེད། དེ་བཞིན་བོད་རིགས་ན་གཞོན་ཚོས་རང་གི་མི་ཚེའི་རྒྱབ་ལྗོངས་དང་གནས་སྟངས་ལ་མ་ལྟོས་པར་སེམས་ཤུགས་དང་ཧུར་ཐག་གིས་ལས་ཀ་བྱས་པ་ཡིན་ན་མི་འགྲུབ་པ་གང་ཡང་མེད་པ་དང་། ལྷག་པར་དུ་ན་གཞོན་ཚོར་མཚོན་ན། བོད་དོན་དང་བོད་ཀྱི་རིག་གཞུང་དང་ཁོར་ཡུག་གང་ཐད་ནས་ལས་དོན་གཉེར་རྒྱུ་གལ་ཆེན་པོ་ཡིན་སྐོར་སོགས་བརྗོད་བྱུང་།

རྒྱ་གར་རྒྱལ་ཡོངས་ན་གཞོན་གཟེངས་རྟགས་ཚོགས་པ་ནི་ཕྱི་ལོ་ ༢༠༡༦ ལོར་བཙུགས་ཡོད་པ་དང་། ཚོགས་པ་དེ་ནི་རྒྱ་གར་གཞུང་ལ་དེབ་སྐྱེལ་བྱས་ཡོད་པའི་ཁེ་མེད་ཚོགས་པ་ཞིག་ཡིན་ལ། ཚོགས་པ་དེའི་དམིགས་ཡུལ་རྒྱལ་སྤྱི་དང་རྒྱལ་གར་རྒྱལ་ཡོངས་ཀྱི་ལས་རིགས་སྣ་ཚོགས་ཁྲོད་ཀྱི་གཟེངས་སུ་ཐོན་པའི་ན་གཞོན་ཚོར་སེམས་ཤུགས་སྤར་ཆེད། ན་གཞོན་ཚོའི་ནུས་སྟོབས་དང་ཆེད་ལས་ཡར་རྒྱས་དང་། ན་གཞོན་དེ་དག་བར་འབྲེལ་ལམ་ཡོང་བར་སྡིངས་ཆ་བསྐྲུན་རྒྱུ་དང་། ཁོ་ཚོའི་ཁྱད་འཕགས་ཀྱི་ལས་དོན་ཐད་གཟེངས་རྟགས་འབུལ་རྒྱུ་སོགས་ཀྱི་ཕྱག་ལས་གནང་བཞིན་ཡོད་འདུག

ན་གཞོན་གཟེངས་རྟགས་ཐོབ་མཁན་དཀོན་མཆོག་དར་རྒྱས་ལགས་ནི་བོད་སྨར་ཁམས་ནས་ཡིན་པ་དང་། ཕ་ཡུལ་དུ་འཛིན་རིམ་དགུ་པ་བར་རྒྱ་ནག་སློབ་གྲྭར་སོང་ཡོད་པ་དང་། རྗེས་སུ་བོད་ཀྱི་རྒྱལ་ས་ལྷ་ས་རུ་དུས་ཡུན་ཐུང་ཙམ་ཞིག་གི་རིང་བོད་ཡིག་དང་དབྱིན་ཡིག་སྟེང་སློབ་གཉེར་བྱས། ཕྱི་ལོ་ ༢༠༠༦ ལོར་རྐང་བ་བརྒྱབས་ནས་བལ་ཡུལ་བརྒྱུད་རྒྱ་གར་དུ་ཡོང་སྟེ། སུ་ཇཱ་བོད་ཁྱིམ་སློབ་གྲྭའི་ནང་འཛིན་གྲྭ་བཅུ་གཉིས་བར་སློབ་སྦྱོང་བྱས་ཡོད་པ་དང་། ཕྱི་ལོ་ ༢༠༡༥ ལོ་ནས་རྒྱ་གར་ལྡི་ལི་གཙུག་ལག་སློབ་གཉེར་ཁང་གི་ཁོངས་གཏོགས་ཧཱན་སི་རཱ་ཇི(Hansraj College)མཐོ་སློབ་དུ་དབྱིན་ཇིའི་སྐད་ཡིག་ཐོག་ལོ་གསུམ་རིང་རབ་འབྱམས་པའི་སློབ་གཉེར་དང་། དེའི་རྗེས་མུ་མཐུད་ལྡི་ལི་གཙུག་ལག་སློབ་གཉེར་ཁང་དུ་གཙུག་ལག་རབ་འབྱམས་པའི་སློབ་གཉེར་བྱེད་བཞིན་ཡོད་འདུག

གསར་འགོད་པ། སངས་རྒྱས་དཀོན་མཆོག