ལ་མོ་ཚུལ་ཁྲིམས།
ཕྱི་ཟླ་༡༠ཚེས་༡༤ཉིན་བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་ནས་ཁ་མཆུ་ཨང་༢༠པའི་བཅད་ཁྲ་བཏང་ཡོད། བཅད་ཁྲ་དེ་ནི་ཞུ་སྦྱོར་བ་སྤེན་པ་ཚེ་རིང་དང་། རྩོད་ལན་པ་བཀའ་ཤག་བློ་བཟང་སེང་གེ་བརྒྱུད་པའི་མིང་ཐོག་ལ་བཏང་ཡོད། བཅད་ཁྲའི་ནང་བཀའ་ཤག་ནས་བྱང་ཨ་རིའི་དོན་གཅོད་སྤེན་པ་ཚེ་རིང་ལགས་འཕོ་འགྱུར་དང་། དེའི་རྗེས་འབྲེལ་གསལ་བཤད་དོན་ཚན་༡༠གསལ་བསྒྲགས་བྱས་པ་དེ། སྤྱི་ཚོགས་ནང་དངོས་བདེན་མ་ཡིན་པའི་གནས་ཚུལ་ཁྱབ་འགྲེམས་སོང་པར་བརྟེན། རྩོད་ལན་པ་བཀའ་ཤག་དང་བློ་བཟང་སེང་གེས་ཞུ་སྦྱོར་བ་སྤེན་པ་ཚེ་རིང་ལ་དགོངས་སེལ་ཞུ་རྒྱུ་དང་། དགོངས་སེལ་ཞུ་ཡིག་དེའང་དབྱིན་བོད་སྐད་ཡིག་གཉིས་ཀའི་ཐོག་ཏུ། བོད་མིའི་སྒྲིག་འཛུགས་ཀྱི་གཞུང་འབྲེལ་བརྒྱུད་ལམ་ཁག་གི་ནང་གསལ་བསྒྲགས་བྱེད་དགོས་ལ། དེ་དང་ཆབས་ཅིག་རྩོད་ལན་པས་ཞུ་སྦྱོར་བའི་ཁྲིམས་རྩོད་པའི་གླ་ཡོན་ཧིན་སྒོར་༩༨༠༠༠འམ་ཨ་སྒོར་བཞི་བརྒྱ་སོ་བདུན་བཅས། ཕྱི་ལོ་༢༠༡༩་ལོའི་ཟླ་༡༡་པའི་ཚེས་༡༥་ནང་ཚུན་ཆེས་མཐོའི་ཁྲིམས་ཞིབ་ཁང་དུ་འབུལ་དགོས་པའི་བཅད་ཁྲ་བཏང་ཡོད།
ཟླ་འདིའི་ཚེས་༡༤ཉིན་བཀའ་ཤག་གིས་བཅད་ཁྲ་དེར་འགན་ལེན་ཆ་ཚང་མེད་པའི་གསལ་བསྒྲགས་ཡིག་ཆུང་ཞིག་བཀྲམས། ཡིག་ཆུང་དེའི་ནང་། ཆེས་མཐོ་ཁྲིམས་ཞིབ་ཁང་གི་བཅའ་ཁྲ་ལ་རྩོད་ལན་པས་འདོད་བློ་མ་ཁེངས་པ་དང་། མི་མང་ཡང་བཅད་ཁྲ་དེ་ལ་བློ་ཕམ་ཡོད་རིགས་འཁོད་འདུག དེ་དང་མཉམ་དུ་སྒྲིག་འཛུགས་སྲ་བརྟན་དང་སྤྱི་ཚོགས་གཅིག་སྒྲིལ་གྱི་ཆེད་དུ་འདོད་བློ་མེད་པའི་བཅད་ཁྲ་ལ་བརྩི་འཇོག་བྱས་ཡོད་ལུགས་དང་། མཐའ་མར་ད་དུང་སྤྱི་ཚོགས་ལྷིང་འཇགས་ཡོང་ཆེད་ཚང་མས་ཐུགས་སྣང་དང་། འགན་འཁུར་གཟབ་ནན་དགོས་པའི་འབོད་བསྐུལ་གྱི་ཉེན་བརྡ་ཞིག་ལས་བཅད་ཁྲའི་འགན་བླངས་པའི་རྣམ་པ་ཞིག་མཚོན་མི་ཐུབ། བཅད་ཁྲའི་དགོས་འདུན་ལྟར་དུས་ཐོག་ཏུ་ཞུ་སྦྱོར་བ་ལ་དགོངས་སེལ་ཞུས་མེད་ལ། རྩོད་ལན་པས་བཅད་ཁྲ་ལ་བརྩི་འཇོག་བྱས་པ་ཡིན་ཞེས་དྲ་ལམ་གྱི་ཡིག་ཆུང་འདིར་འཁོད་པ་ཙམ་ལས་དོན་དངོས་སུ་བཅད་ཁྲ་ལ་བརྩི་འཇོག་བྱས་བ་ལས་བཅད་ཁྲ་ལ་ཁྱད་གསོད་བྱས་ཡོད།
སྤྱིར་བཏང་ཡིན་ན་རྩོད་ལན་པ་ཞིག་གིས་བཅའ་ཁྲ་ལ་འགན་ལེན་མ་བྱས་པར་ཁྱད་གསོད་བྱས་ན་དམངས་ཁྲིམས་དང་ཉེས་ཁྲིམས་གང་གི་ནང་དུའང་དངུལ་ཆད་དང་། ཐ་ན་བཙོན་འཇུག་གི་ཉེས་ཁྲིམས་ལྗིད་མོ་གཅོད་ལུགས་ཡོད། ང་ཚོ་བཙན་བྱོལ་བོད་མིའི་སྤྱི་མང་གཏུག་བཤེར་ཁྲིམས་ཡིག་ཏུ་བཙོན་འཇུག་གི་ཉེས་ཁྲིམས་གཅོད་ལུགས་མེད་ཀྱང་བཅད་ཁྲའི་ཉམས་ལེན་དང་ཁྲིམས་ཆད་སོགས་གསལ་བོ་ཞིག་འཁོད་ཡོད་པ་རེད། ཐེངས་འདིའི་རྩོད་ལན་པའི་བྱེད་སྟངས་འདི་ལ་བཙན་བྱོལ་བོད་མིའི་སྤྱི་མང་གཏུག་བཤེར་གྱི་ཁྲིམས་ཆད་ཁ་ཤས་བཀོལ་ཆོག་པར་རིགས།
དེ་ཡང་བཙན་བྱོལ་བོད་མིའི་ཁྲིམས་ཞིབ་ཁང་གི་སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་གི་ལེའུ་བརྒྱད་པའི་དོན་ཚན་ང་གཅིག་ཏུ་བཅད་ཁྲ་ཉམས་ལེན། (ཀ) བཅད་ཁྲའི་འབྲུ་དོན་ལག་བསྟར་བྱེད་དགོས་པའི་གཏན་འབེབས་དུས་ཚེས་ནང་བཀའ་དཔྱད་སྒྲུབ་དགོས་མཁན་གྱོད་ཡ་སུ་རུང་ནས་ཉམས་ལེན་མ་བྱས་ན་ཉམས་ལེན་མི་བྱེད་མཁན་དེའི་ཁ་གཏད་གྱོད་ཡས་གཏན་འབེབས་དུས་ཚེས་རྫོགས་ནས་ཉིན་གྲངས་སུམ་ཅུ་ནང་ཚུད་ཁྲིམས་ཞིབ་ཁང་ལ་དེའི་སྐོར་ཡིག་ཐོག་སྙན་ཞུ་འབུལ་ཆོག་པ་ཡིན། (ཁ) བཅད་ཁྲའི་དགོངས་དོན་ཉམས་ལེན་དུས་ཐོག་ལག་བསྟར་མི་བྱེད་མཁན་དེར་ཁྲིམས་ཞིབ་ཁང་ནས་བཀོད་ཁྱབ་དང་འབྲེལ་ལག་བསྟར་བྱེད་དུ་འཇུག་རྒྱུའི་ལས་འགན་ལེན་དགོས། ལག་ལེན་དོན་འཁེལ་འབྱུང་སླད་དགོས་གལ་ཡོད་ན་འབྲེལ་ཆགས་བོད་གཞུང་གི་སྒྲིག་འཛུགས་མ་ལག་གང་རུང་ལ་དེའི་ཐོག་མཇུག་གནོན་བྱེད་དགོས་པ་ཁྲིམས་ཞིབ་ཁང་ནས་བཀའ་ཁྱབ་གཏོང་ཆོག་པ་ཡིན། ཞེས་དང་།
ཡང་བཙན་བྱོལ་བོད་མིའི་ཁྲིམས་ཞིབ་ཁང་གི་སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་གི་ལེའུ་བཅུ་གསུམ་པའི་དོན་ཚན་གྱ་བཞི་བའི་ནང་། ༢) ཁྲིམས་ཞིབ་ཁང་གི་ཁྲིམས་མཐུན་བཅད་ཁྲའམ་བཀའ་རྩ། བཀའ་ཁྱབ། བྱ་རིམ་གཞན་བཅས་གང་རུང་ལ་བརྩི་མེད་བྱས་ན། སྤྱི་མང་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག་གི་ལེའུ་བཅུ་གསུམ་པའི་དོན་ཚན་གྱ་ལྔ་དང་། དོན་ཚན་གྱ་དྲུག དོན་ཚན་གྱ་བདུན་བཅས་རིམ་པར་བཀོལ་ཏེ། ཉིན་རེར་ཆད་དངུལ་དང་། སྤྱི་ཚོགས་ཞབས་ཞུ། ཁ་བཏགས་འབུལ་སྤྲོད། ཁྲིམས་ཞིབ་ཁང་ནས་སྔོན་དུ་བཏང་བའི་བཀའ་དེར་བརྩི་བཀུར་ཉམས་ལེན་ཞུ་དགོས་འི་བཀའ་གཉིས་པ་ཞིག་ཀྱང་གཏོང་སྲོལ་ཡོད། ད་དུང་དོན་ཚན་གྱ་བདུན་པར་ཁྱད་གསོད་བྱེད་མཁན་ལ་ཁྲིམས་ཞིབ་ཁང་ནས་བཅོས་གསོའི་ཆད་འགེལ་བཀའ་ཁྱབ་བཏང་བའི་ནང་ཁྲིམས་ཞིབ་ཁང་ལ་ཁྱད་གསོད་ཇི་བྱས་སོགས་ཁྲིམས་ཞིབ་ཁང་གི་རྩ་འཛིན་ཁོངས་སུ་འཇོག་རྒྱུ་དང་། མཐའ་མའི་བཅད་ཁྲ་གཏོང་སྐབས་ལོ་རྒྱུས་འགོད་དགོས་པ་སོགས་གསལ་བོར་འཁོད་ཡོད་པ་རེད།
དེ་བཞིན་ཏུ་བཙན་བྱོལ་བོད་མིའི་བཅའ་ཁྲིམས་དོན་ཚན་བཅུ་གསུམ་པ། ཡུལ་མིའི་ལས་འགན་ཏུ། བོད་ཀྱི་ཡུལ་མི་ཚང་མས་སྒྲུབ་དགོས་པའི་ལས་འགན། ༢) བཅའ་ཁྲིམས་དང༌། ཁྲིམས་ལུགས་ཁག་ལ་སྙིང་ནས་བརྩི་བཀུར་དང༌། ཉམས་ལེན། ༥) བོད་མིའི་སྒྲིག་འཛུགས་དང༌། མང་ཚོགས་ལ་ཛ་དྲག་རྐྱེན་ངན་བྱུང་སྐབས་ཁྲིམས་ཐོག་ནས་བསྐུར་བའི་ལས་འགན་ཁག་བསྒྲུབ་རྒྱུ། ཞེས་དང་། བཙན་བྱོལ་བོད་མིའི་བཅའ་ཁྲིམས་དོན་ཚན་ཉེར་གཅིག་པ། སྲིད་སྐྱོང་དང༌། བཀའ་བློན་གྱི་འོས་ཆོས། སྲིད་སྐྱོང་དང༌། བཀའ་བློན་གྱི་འོས་གཞིར་རུང་བའི་སྐྱེ་བོ་ནི། ༣)ཁྲིམས་ཁང་ངམ། སྨན་པ་ཚད་ལྡན་གྱིས་རིག་འཚོ་མ་ཟིན་པར་གསལ་བསྒྲགས་བྱས་པ་མ་ཡིན་པ། ༥)ཁྲིམས་ཁང་ནས་ནག་ཉེས་ཕོག་ཟིན་པ་མ་ཡིན་པ། ཞེས་གསལ་བོར་འཁོད་ཡོད།
རྩོད་ལན་པས་ཐེངས་འདིར་ཆེས་མཐོ་ཁྲིམས་ཞིབ་ཁང་ནས་བཏང་བའི་བཀའ་ཁྱབ་ལ་དུས་ཐོག་ཏུ་བརྩི་བཀུར་དང་ལེན་མ་བྱས་ཤིང་། གཞུང་འབྲེལ་བརྒྱུད་ལམ་ཁག་ཏུ། དབྱིན་བོད་ཡིག་གཟུགས་གཉིས་ཀའི་ལམ་ནས་ཞུ་སྦྱོར་བ་ལ་དགོངས་སེལ་ཞུ་རྒྱུ་མ་བྱུང་བ། ཁྲིམས་རྩོད་པའི་གླ་ཡོན་ཨ་སྒོར་བཞི་རྒྱ་སོ་བདུན་ཡང་དུས་ཐོག་ཏུ་སྤྲོད་རྒྱུ་མ་བྱུང་བ། དེའི་ཁར་ད་དུང་རྩོད་ལན་པས་འདོད་བློ་མ་ཁེངས་པ་དང་། མི་མང་ཡང་བཅད་ཁྲ་དེ་ལ་བློ་ཕམ་ཡོད་རིགས་སོགས་བརྗོད་ཡོད་པ། དེ་བཞིན་ཏུ་བཅད་ཁྲའི་ལན་ཏུ་འདོད་བློ་མེད་བཞིན་ཏུ་བརྩི་འཇོག་བྱས་པའི་བཅད་ཁྲ་ལ། གསལ་བསྒྲགས་འདི་འདྲ་ཞིག་སྤེལ་པ་འདིས་འདོད་བློ་ཚིམས་པར་བྱོས་དང་། ད་དུང་ཅིག་བྱེད་དགོས་ཟེར་ན་སྤྱི་ཚོགས་ཞི་བདེ་ལྷིང་འཇགས་ལ་གནོད་སྐྱོན་ཡོང་རྒྱུ་ཡིན་པས་འགན་འཁུར་ཁྱེད་ཚོས་འཁུར་དགོས། ཞེས་བཅད་ཁྲ་བརྩི་བཀུར་བྱེད་རྒྱུའི་ཚབ་དུ་ཉེན་བརྡ་བཏང་ཡོད་པས། བྱེད་སྟངས་འདི་ནི་བཅད་ཁྲ་ལ་བརྩི་འཇོག་བྱས་པ་ཞིག་མ་ཡིན་པར་བཅའ་ཁྲ་ལ་ཁྱད་གསོད་བྱས་པ་ཞིག་ཡིན་པ་གསལ་བོ་རེད།
དངོས་ནས་བཤད་ན་བཅད་ཁྲ་འདི་ནི་ཞུ་སྦྱོར་བ་སྤེན་པ་ཚེ་རིང་དང་། རྩོད་ལན་པ་བློ་བཟང་སེང་གེའི་ཁྲིམས་གཏུག་ཞིག་ཡིན་པ་ལས་མི་མང་གི་ཁྲིམས་གཏུག་ཞིག་མིན་པས་ན། བཅད་ཁྲའི་འགན་འཁུར་རྩོད་ལེན་པ་བློ་བཟང་སེང་གེ་དང་བཀའ་ཤག་ནས་འཁུར་དགོས་པ་ལས་མི་མང་གིས་འཁུར་དགོས་དོན་གང་ཡང་མེད། དེ་བཞིན་ཏུ་བཅད་ཁྲ་འདིར་མི་མང་བློ་ཕམ་འབྱུང་དགོས་དོནའང་ཡོད་མི་སྲིད། རྒྱུ་མཚན་ནི་བཅད་ཁྲ་འདི་ནི་མི་མང་གིས་བསྐོས་བའི་ཆེས་མཐོའི་ཁྲིམས་ཞིབ་ཁང་གི་བཅད་ཁྲ་ཞིག་ཡིན་པས། མི་མང་གི་བཅད་ཁྲ་འདིར་མི་མང་གིས་བློ་ཕམ་འབྱུང་དགོས་དོན་གང་ཡང་ཡོད་མི་སྲིད། རྩོད་ལན་པས་འདི་ལྟར་རང་གི་འགན་འཁུར་རང་གིས་མི་འཁུར་བར་མི་མང་ལ་ཁག་དཀྲིས་བ་འདི་ནི་རང་གིས་བཏོན་པའི་སྲ་བརྟན་དང་གཅིག་བསྒྲིལ་ལ་ནང་འགལ་བཟོས་ཤིང་། བཅད་ཁྲ་ལ་ཁྱད་གསོད་དང་། ཆེས་མཐོ་ཁྲིམས་ཞིབ་ཁང་ལ་བརྩི་བཀུར་མ་བྱས་པའི་མཚོན་རྟགས་རེད།
བཙན་བྱོལ་བོད་མིའི་བཅའ་ཁྲིམས་སུ་བཀའ་ཤག་ནི་བཙན་བྱོལ་བོད་མིའི་སྒྲིག་འཛུགས་མང་གཙོའི་ཀ་བ་གསུམ་གྱི་ནང་ཚན། འཛིན་སྐྱོང་གི་ལས་ཁུངས་མཐོ་ཤོས་དེ་ཡིན་ཞིང་། བཙན་བྱོལ་བོད་མིའི་བཅའ་ཁྲིམས་ཀྱི་དགོངས་དོན་གཞིར་བཟུང་བོད་མིའི་སྒྲིག་འཛུགས་གི་ཆབ་སྲིད་དང་། འཛིན་སྐྱོང་གི་ལས་དོན་འགན་འཁུར་རྐང་ལེན་གནང་མཁན་གྱི་ལས་ཁུངས་དེ་ཡིན་པ་རེད། དེ་བཞིན་ཏུ་བཙན་བྱོལ་བོད་མིའི་བཅའ་ཁྲིམས་སུ་ཆེས་མཐོའི་ཁྲིམས་ཞིབ་ཁང་ནི་བཙན་བྱོལ་བོད་མིའི་སྒྲིག་འཛུགས་མང་གཙོའི་ཀ་བ་གསུམ་གྱི་ནང་ཚན། ཁྲིམས་འཛིན་ལས་ཁུངས་དེ་ཡིན་པ་དང་། ཁྲིམས་འཛིན་ལས་ཁུང་འདིས་བཙན་བྱོལ་བོད་མིའི་སྒྲིག་འཛུགས་དང་། བོད་ཀྱི་ཡུལ་མིའི་གཞི་རྩའི་རང་དབང་དང་ཐོབ་ཐང་ཁག་སྲུང་སྐྱོབ་བྱ་རྒྱུའི་དབང་ཆ་ཡོད་པའི་ཁྲིམས་འཛིན་གོང་ན་མེད་པ་དེ་ཡིན་པ་རེད།
ཁྲིམས་ཡིག་འདི་ལས་གསལ་བོར་བཀོད་པ་ནི་བཀའ་ཤག་ནི་བཅའ་ཁྲིམས་ཀྱི་དགོངས་དོན་གཞིར་བཟུང་བོད་མིའི་ཆབ་དཔལ་རིག་གསུམ་གྱི་འཛིན་སྐྱོང་གི་ལས་དོན་བྱེད་མཁན་ཡིན་པ་དང་། ཁྲིམས་ཞིབ་ཁང་ནི་བཀའ་ཤག་དང་བཀའ་བློན་ཚོའི་བྱ་སྤྱོད་ལ་ཁྲིམས་ལུགས་ལྟར་འགྲོ་གིན་ཡོད་མེད་སྟངས་འཛིན་བྱེད་མཁན་གྱི་ལས་ཁུངས་ཤིག་ཡིན་པ་གསལ་པོར་མཚོན་ཡོད། དེའི་ཕྱིར་ཆེས་མཐོ་ཁྲིམས་ཞིབ་ཁང་ནས་བཏང་པའི་བཀའ་ཁྱབ་ལ་བཀའ་ཤག་ལས་ཁུངས་ནས་ངེས་པར་དུ་བརྩི་བཀུར་བྱེད་དགོས་པ་ཡིན། འདི་ལྟ་བུའི་གཅིག་ལ་གཅིག་རྟེན་གྱི་དབང་ཚད་འདི་ནི་དམངས་གཙོའི་གཞུང་གི་ཁྱད་ཆོས་དང་རིན་ཐང་བླ་ན་མེད་པ་དེ་རེད།
དེ་བཞིན་ཏུ་བཀའ་བློན་ཚོས་ལས་འཁུར་དམ་བཅའ་འབུལ་སྐབས། སྲིད་སྐྱོང་དང་བཀའ་བློན་ཚོས་ལས་འཁུར་ཞུ་སྒོ་མཐའ་དག་བཅའ་ཁྲིམས་ཀྱི་དགོངས་དོན་འགལ་མེད་ཐོག་རང་དོན་ཕྱོགས་ལྷུང་དང༌། འཇིགས་ཞུམ་ཆགས་སྡང་མེད་པར། དྲང་བདེན་ལྷག་བསམ་ཟོལ་མེད་ཀྱི་སྒོ་ནས། རང་ནུས་གང་ཐེག་ཞུ་རྒྱུའི་མཆོག་གསུམ་དཔང་བཙུགས་ཀྱིས་དམ་བཅའ་ཕུལ་ཡོད། ད་དུང་ཁ་མཆུ་ཨང་༢༠པ་འགོ་འཛུགས་སྐབས་རྩོད་ལན་པས་བཙན་བྱོལ་བོད་མིའི་ཁྲིམས་ཞིབ་ཁང་གི་གྱོད་ཡའི་མོས་མཐུན་ཆོད་ཡིག་ཏུ་བཅད་ཁྲ་ལ་དང་ལེན་གྱིས་མོས་མཐུན་ཡོད་པའི་མིང་རྟགས་འཁོད་ཡོད།
ཐེངས་འདིའི་རྩོད་ལན་པ་བཀའ་ཤག་དང་བློ་བཟང་སེང་གེ་ཡིས་བཙན་བྱོལ་བོད་མིིའི་བཅའ་ཁྲིམས་རིན་པོ་ཆེ་རྡོག་རོལ་དུ་བཏང་བ་དང་། ཆེས་མཐོའི་ཁྲིམས་ཞིབ་ཁང་གི་བཅད་ཁྲ་ལ་མཐོང་ཆུང་དང་ཁྱད་གསོད་བྱས། རང་ཉིད་བཀའ་བློན་དང་སྲིད་སྐྱོང་ཤིག་གིས་བཅའ་ཁྲིམས་ཀྱི་དགོངས་དོན་བརྩི་བཀུར་བྱེད་རྒྱུ་ཡིན་པའི་མཆོག་གསུམ་དཔང་བཙུགས་ཀྱི་མནའ་བོ་ཆེའང་སྣང་མེད་དུ་བཏང་། ཐ་ན་བོད་ཀྱི་ཡུལ་མི་དཀྱུས་མ་ཞིག་ཡིན་པའི་ལས་འགན་འང་མ་སྒྲུབ། དེ་ལྟར་ཁྲིམས་ཀྱི་དགོངས་དོན་རྡོག་རོལ་དང་ཁྱད་གསོད་བྱས་པའི་ཁྲིམས་འགལ་གྱི་མི་སྣ་ཞིག་ང་ཚོ་བོད་མིའི་སྤྱི་ཆོགས་ནང་ཡོད་དགོས་དོན་མེད་ལ། ཁྲིམས་ཁང་ནས་ནག་ཉེས་ཕོག་ཟིན་པའི་མི་སྣ་ཞིག་བཀའ་བློན་དང་། སྲིད་སྐྱོང་གི་འོས་ཆོས་སུ་མ་འོངས་པར་ཡང་ཡོང་མི་ཆོག་པ་ཡིན།
