ཉི་མ་ལྷ་སར་རྐྱང་ཕྱག་འཚལ་ཏེ་རྗེ་རིན་པོ་ཆེར་རྗེས་དྲན་ཞུས།

བོད་མི་གནམ་ལྕགས་ཚེ་རིང་ཞེས་པ་ཞིག་གིས་ཕ་མ་ཚེ་འདས་གཉིས་ལ་དྲིན་གཟོའི་ཆེད་དང་ལྷག་པར་དུ་རྗེ་རིན་པོ་ཆེ་དགོངས་པ་རྫོགས་ནས་མི་ལོ་ ༦༠༠ འཁོར་བར་རྗེས་དྲན་ཞུ་ཆེད་མཚོ་སྔོན་ནས་ལྷ་སར་རྐྱང་ཕྱག་འཚལ།འདི་ལོར་རྗེ་ཙོང་ཁ་བ་ཆེན་མོ་སྐུ་མྱ་ངན་ལས་འདས་ཏེ་ལོ་ངོ་ ༦༠༠ འཁོར་བར་བོད་ཕྱི་ནང་གཉིས་ནས་རྣམ་པ་འདྲ་མིན་གྱི་ཐོག་ནས་རྗེས་དྲན་ཞུ་བཞིན་ཡོད་པ་ལྟར། མཚོ་སྔོན་ཞིང་ཆེན་མཚོ་བྱང་ཁུལ་མདའ་གཞི་རྫོང་ཁོངས་ནས་ཡིན་པའི་མིང་ལ་གནམ་ལྕགས་ཚེ་རིང་ཞེས་པའི་བོད་མི་ན་གཞོན་ཞིག་གིས། རྗེ་རིན་པོ་ཆེར་རྗེས་དྲན་ཆེད། སྨད་ཕྱོགས་ཀྱི་ཆོས་སྡེ་ཆེན་མོ་སྐུ་འབུམ་བྱམས་པ་གླིང་དགོན་པ་ནས་མགོ་བཙུགས་ཏེ། བོད་ཀྱི་རྒྱལ་ས་ལྷ་སར་ཁེར་རྐྱང་ངང་རྐྱང་ཕྱག་འཚལ་ཏེ་ཁ་སང་སྔ་དྲོར་ལྷ་ལྡན་དུ་བདེ་འབྱོར་བྱུང་ཡོད་པ་དང་། ལམ་བར་དུ་ངལ་གསོའི་དུས་ཡུན་ཟླ་ཤས་ཕུད་ལོ་གཅིག་དང་ཟླ་བ་ ༥ ཙམ་འགོར་ཡོད་འདུག

གནས་ཚུལ་མཁོ་སྤྲོད་པས་འདི་གའི་གསར་འགོད་པར། ཐེངས་འདིར་ཁོང་གིས་རྐྱང་ཕྱག་འཚལ་ནས་ལྷ་ས་བར་ཡོང་དགོས་པའི་དམིགས་ཡུལ་གཙོ་བོ་ནི་ཚེ་འདས་ཕ་མ་གཉིས་ལ་དྲིན་གཟོ་བའི་དང་། ལྷག་པར་དུ་རྗེ་རིན་པོ་ཆེ་དགོངས་པ་རྫོགས་ནས་ལོ་འཁོར་ ༦༠༠ ལོན་པའི་རྗེས་དྲན་ཞུ་ཆེད་དུ་ཡིན་འདུག་ལ། ཁོང་གིས་གོམ་ཆེན་ཤུད་འཚལ་ལྟར་མིན་པར་རང་ལུས་ཀྱི་ཚད་གཞི་ལྟར་འཇལ་ནས་རྐྱང་ཕྱག་འཚལ་ཡོད་པ་དང་། ལམ་བར་ནས་དཀའ་ངལ་འགོག་རྐྱེན་རིགས་གང་ཡང་བྱུང་མེད་འདུག  ཁ་སང་སྔ་དྲོར་ལྷ་སར་འབྱོར་རྗེས། ཇོ་བོ་རིན་པོ་ཆེའི་མདུན་བར་ཕྱག་འཚལ་ཏེ་ཕོ་བྲང་པོ་ཏ་ལ་དང་ཇོ་བོ་རིན་པོ་ཆེ་ལ་མཇལ་ཁ་ཞུས་ཡོད་པ་དང་། སང་ཉིན་ཕྱི་ཚེས་ ༧ ཉིན་ནས་ར་མོ་ཆེ་ནས་འབྲས་སྤུངས་དང་ཕོ་བྲང་པོ་ཏ་ལ་ནས་སེ་ར་དགོན་པ། དེ་བཞིན་དགའ་ལྡན་ལྔ་མཆོད་ཉིན་དགའ་ལྡན་དགོན་པ་ནས་རྐྱང་ཕྱག་མཇུག་བསྡུ་རྒྱུ་རེད་འདུག ཅེས་བརྗོད་བྱུང་།ངོ་སྤྲོད་གནང་བ་ལྟར་ན། གནམ་ལྕགས་ཚེ་རིང་ལགས་ཀྱིས་རང་གི་ལྷན་སྐྱེས་ཀྱི་སྐད་ངག་སྙན་མོར་བརྟེན་ནས་ཡོང་སྒོ་བསགས་ཏེ་ཕ་མ་གཉིས་ལྷ་སའི་ཇོ་བོ་རིན་པོ་ཆེའི་མདུན་དུ་འཁྲིད་རྒྱུ་བྱས་ཡོད་ཀྱང་། ཕྱི་ལོ་ ༢༠༠༥ ལོར་ལྷ་སར་འགྲོ་བར་ཟླ་ཤས་ལས་མེད་སྐབས་ཨ་མ་ལགས་འདས་གྲོངས་སུ་ཕྱིན་ཡོད་པ་དང་། ཕྱི་ལོ་ ༢༠༡༧ ལོར་པ་ལགས་ཀྱང་འདས་གྲོངས་སུ་ཕྱིན་ཡོད་འདུག ཁོང་གི་ཨ་མ་ལགས་འདས་གྲོངས་སུ་ཕྱིན་པའི་ཕྱིར་ལོ་དེར་ཁོང་གིས་ཕྱག་འཚལ་རྒྱུ་མགོ་བཙུགས་ཡོད་ཀྱང་། ཕྱི་ལོ་ ༢༠༠༦ ལོར་ཁོང་ལ་ན་ཚ་ཞིག་བྱུང་སྟེ་གཤག་བཅོས་བྱས་ནས་ཕྱག་འཚལ་རྒྱུ་མཚམས་འཇོག་དགོས་བྱུང་། ཡུན་རིང་སྨན་ཁང་དུ་བསྡད་ཀྱང་ན་ཚ་ཡག་པོ་ཞིག་དྲག་སྐྱེད་མ་ཡོང་བར་བརྟེན་སྨན་ཁང་ནས་སྒོར་བུད་དེ་ཕྱག་འཚལ་རྒྱུ་བསྐྱར་དུ་མགོ་བཙུགས་ཡོད་པ་དང་། དང་ཐོག་ཉིན་རེར་ཕྱག་ ༡༠ རེ་འཚལ་མི་ཐུབ་པར་མགོ་ཡུ་འཁོར་བ་སོགས་བྱུང་ཡོད་ཀྱང་། རྗེས་སུ་ཉིན་རེ་བཞིན་ན་ཚ་དྲག་སྐྱེད་བྱུང་སྟེ། ཕྱི་ལོ་ ༢༠༠༧ ལོ་དང་ ༢༠༠༨ ། ༢༠༠༩ བཅས་སུ་རྐྱང་ཕྱག་འཚལ་ནས་ལོ་གསུམ་རིང་མཚོ་སྔོན་པོར་མཚོ་སྐོར་ཐེངས་རེ་བྱས་ཡོད་པ་དང་། ཕྱི་ལོ་ ༢༠༡༠ ལོར་ཟླ་ ༧ དང་ཉིན་ ༡༥ རིང་རྐྱང་ཕྱག་འཚལ་ནས་ལྷ་ས་ཡོང་ཡོད་པ་དང་། སྐབས་དེར་ཁོང་གིས་ཕོ་བྲང་པོ་ཏ་ལར་རྐྱང་ཕྱག་གིས་སྐོར་བ་གསུམ་དང་གཙུག་ལག་ཁང་ལ་སྐོར་བ་གཅིག གཙུག་ལག་ཁང་གི་སྒོ་ཁ་ནས་རྐྱང་ཕྱག་ཁྲི་གཅིག་བཅས་འཚལ་ནས་ཕྱིར་ཕ་ཡུལ་དུ་ལོག་ཡོད་འདུག  དེའི་རྗེས་ཕྱི་ལོ་ ༢༠༡༨ ཟླ་ ༢ ཚེས་ ༡ ནས་རྐྱང་ཕྱག་འཚལ་དེ་ལྷ་སར་ཡོང་ཡོད་ཀྱང་། ན་གོར་མོར་བསླེབས་པ་དང་གནམ་གཤིས་ཧ་ཅང་འཁྱག་པའི་རྐྱེན་གྱིས་མཚམས་བཞག་སྟེ། འདི་ལོའི་ཕྱི་ཟླ་ ༤ ཚེས་ ༡ ནས་སྔར་གྱི་མཚམས་ནས་མུ་མཐུད་འཚལ་མགོ་བཙུགས་ཡོད་འདུགརང་ལོ་ ༣༦ ཡིན་པའི་གནམ་ལྕགས་ཚེ་རིང་ལགས་ནི་མཚོ་བྱང་ཁུལ་མདའ་བཞི་རྫོང་ཁོངས་དཔལ་འཛོམས་ཡུལ་ཚོའི་མཚོ་ཆུང་སྡེ་བ་ནས་ཡིན་པ་དང་། ཁོང་བཟའ་ཟླ་གཉིས་ལ་བྱིས་པ་གཉིས་ཡོད་འདུག ་། ཁོང་ལ་ཆུང་དུས་ནས་ལྷན་སྐྱེས་ཀྱི་སྐད་ངག་སྙན་མོ་ཞིག་ཡོད་པས་རྒྱུན་དུ་རྡུང་ལེན་བྱེད་པར་དགའ་བོ་ཡོད་འདུག

གསར་འགོད་པ། སངས་རྒྱས་དཀོན་མཆོག