ནང་པའི་ཕྱག་དཔེ་བཙན་འཕྲོག་བྱས་ཏེ་དཔེ་ཁང་སྒོ་བརྒྱབ།

རྒྱ་ནག་གཞུང་གིས་རྒྱ་བརྒྱུད་ནང་བསྟན་གྱི་ཞིང་ཁམས་སྒྲུབ་སྦྱོང་གི་གྲུབ་མཐའ་གཙུག་འཛིན་མཁན་སློབ་དཔོན་ཁྲིན་ཁོང་ལགས་ཀྱི་ཕྱག་དཔེ་གཙོ་བོར་བའི་ནང་བསྟན་གྱི་དཔེ་ཆ་མང་པོ་བཙན་འཕྲོག་བྱས་ཏེ་ནང་པའི་དཔེ་ཁང་ཞིག་སྒོ་བརྒྱབ་ཡོད་འདུགའདས་པའི་ལོ་མང་རིང་ནས་བཟུང་རྒྱ་ནག་གཞུང་གིས་ཆོས་ལུགས་ཁག་དང་དེའི་རྗེས་འབྲང་བ་རྣམས་ལ་ཁྲིམས་འགལ་གྱི་ཉེས་མིང་སྣ་ཚོགས་གཡོགས་ཏེ་བཀག་སྡོམ་བཙན་གནོན་བྱེད་བཞིན་ཡོད་པ་ལྟར། ཁ་སང་ཕྱི་ཚེས་ ༢༢ ཉིན། རྒྱ་ནག་ནང་གི་འགྲོ་བ་མིའི་ཐོབ་ཐང་དང་ཆོས་དད་རང་དབང་སྐོར་གྱི་དྲ་རྒྱ་བྷི་ཊར་ཝིན་ཊར་(Bitter Winter)གྱིས་གནས་ཚུལ་སྤེལ་བ་ལྟར་ན། སྔར་ལོའི་ཕྱི་ཟླ་ ༡༠ པ་ནས་བཟུང་རྒྱ་ནག་ཆོས་དོན་ལས་ཁུངས་དང་གཞུང་འབྲེལ་ལས་ཁུངས་མང་པོ་ཞིག་མཉམ་འབྲེལ་ཐོག རྒྱ་ནག་གི་ནང་པའི་དགེ་སློང་ཆེན་མོ་དང་རྒྱ་བརྒྱུད་ནང་བསྟན་གྱི་ཞིང་ཁམས་སྒྲུབ་སྦྱོང་གི་གྲུབ་མཐའ་གཙུག་འཛིན་མཁན་སློབ་དཔོན་ཁྲིན་ཁོང་(Chin Kung)ལགས་ཀྱི་ཕྱག་དཔེ་གཙོ་བོར་བའི་ནང་བསྟན་གྱི་དཔེ་ཆ་མང་པོ་ཁྲིམས་འགལ་ཡིན་སྐོར་བརྗོད་དེ། ཕྱག་དཔེ་ཚང་མ་རླངས་འཁོར་ཞིག་གི་ནང་བླུགས་ཏེ་བཙན་འཁྱེར་བྱས་ཡོད་འདུག

དེ་འབྲེལ་གནས་ཚུལ་ནང་། འབྲེལ་ཡོད་ནང་པའི་དགེ་འདུན་པ་ཞིག་གིས་རྒྱ་ནག་གཞུང་གིས་ཧི་ནན་(Henan)ཞིང་ཆེན་ལེན་ཀྲུའུ(Linzhou)གྲོང་ཁྱེར་དུ་ཡོད་པའི་ནང་པའི་དཔེ་ཁང་ཞིག་ཏུ་ནང་བསྟན་གྱི་དཔེ་ཆ་ཚང་མ་ཁྲིམས་འགལ་ཡིན་སྐོར་བརྗོད་ནས་བཙན་འཕྲོག་བྱས་ཏེ་སྦས་སྐོང་བྱས་ཚར་ཡོད་པ་དང་། དཔེ་ཆ་དེ་དག་མང་ཆེ་བ་སློབ་དཔོན་ཁྲིན་ཁོང་གིས་བརྩམས་གནང་བ་ཡིན་ལ། ཁོང་གི་དཔེ་ཆ་མང་པོ་ཞིག་ཧོང་ཀོང་དང་ཐའེ་ཝན་སོགས་ནས་པར་སྐྲུན་བྱས་ཡོད་པས་རྒྱལ་ཁབ་ཀྱི་རྩ་ཁྲིམས་དང་མི་མཐུན་པ་མ་ཟད། ཕྱི་ལོག་གི་ངན་སྐུལ་སོགས་ཡོད་སྐོར་བརྗོད་ནས་བཙན་འཕྲོག་སྦས་སྐོང་བྱེད་དུ་བཅུག་ཡོད་པ་དང་། དེ་བཞིན་སློབ་དཔོན་ཁོང་གི་ཆོས་འཁྲིད་སོགས་ཀྱང་བཀག་འགོག་བྱས་ཡོད་སྐོར་བརྗོད་འདུག

ཡང་ཁོང་གིས། དཔེ་ཆ་ཚང་མ་གཞུང་བཞེས་བཏང་ནས་ཟླ་གཅིག་ཙམ་གྱི་རྗེས་སུ། ནང་པའི་དཔེ་ཁང་དེ་འཛུགས་སྐྲུན་བྱེད་པར་ཆོག་མཆན་ཐོབ་མེད་པས་ཁྲིམས་འགལ་ཡིན་ལུགས་བརྗོད་དེ། ཁང་པའི་སྒོ་དང་སྒེའུ་ཁུང་ཚང་མ་བཀག་ནས་གློག་དང་ཆུ་སོགས་བཅད་པ་མ་ཟད། ལས་མི་ཚང་མ་ཉེ་འཁོར་གྱི་གྲོང་སྡེ་ནས་ཕྱིར་འབུད་བཏང་ཡོད་སྐོར་བརྗོད་ཡོད་པ་དང་། ཡང་གྲོང་སྡེའི་ཡུལ་མི་ཚོས་དཔེ་ཁང་འཛུགས་སྐྲུན་བྱེད་ས་དེ་ཞིང་ས་སོགས་མིན་པ་དང་། དཔེ་ཁང་འཛུགས་སྐྲུན་གནང་མཁན་གྱིས་འདས་པའི་ལོ་ངོ་ ༡༠ ལྷག་རིང་ས་རིན་སྤྲད་ནས་བསྡད་ཡོད་པ་དང་། རྒྱལ་ཁབ་ཀྱི་རྩ་ཁྲིམས་ནང་ཆོས་ལུགས་དད་མོས་རང་དབང་ཡིན་སྐོར་བརྗོད་བཞིན་ཡོད་ཀྱང་། དོན་དངོས་ཐོག་གཞུང་གིས་ཁོ་ཚོ་ཆོས་ལུགས་དད་མོས་རང་དབང་དང་ཆོས་ཀྱི་ཆོ་ག་སོགས་བྱེད་དུ་འཇུག་གི་མེད་པ་མ་ཟད། གལ་ཏེ་གཞུང་གི་མགོ་འཁྲིད་ཚོར་གནས་ལུགས་བཤད་ན་ཉེས་ཆད་གཅོད་པ་སོགས་བྱེད་ཀྱི་ཡོད་པས་བྱ་ཐབས་གང་ཡང་མེད་སྐོར་བརྗོད་འདུག

རྒྱ་ནག་གཞུང་གིས་ཕྱི་ལོ་ ༢༠༡༩ ལོའི་ཧུའུ་པའེ་ཞིང་ཆེན་ཧེ་ནན་ལོའོ་ལེན་སོགས་ནས་སློབ་དཔོན་ཁྲིན་ཁོང་གི་ཕྱག་དཔེ་ཁག་ལ་པར་སྐྲུན་གྱི་གནད་དོན་ཡོད་སྐོར་བརྗོད་ནས་ཞིབ་བཤེར་དང་བཀག་སྡོམ་བྱེད་མགོ་བརྩམས་ཡོད་པ་མ་ཟད། དཔེ་ཆ་མང་པོ་ཞིག་སྦས་སྐུང་དང་གཞུང་བཞེས་བཏང་ཡོད་པ་དང་། ཧེ་ནན་སོགས་ནས་རྒྱ་ནག་གཞུང་གིས་མུ་མཐུད་སློབ་དཔོན་ཁོང་གི་ཆོད་ཁྲིད་ལ་ཉན་པ་དང་ཁོང་གི་རྗེས་འཇུག་བྱེད་མཁན་ཚོ་འཛིན་བཟུང་དང་ཉེས་ཆད་གཅོད་རྒྱུ་ཡིན་པའི་ཉེན་བརྡ་བཏང་ཡོད་པ་དང་། ཧེ་ནན་ནས་ཡིན་པའི་ནང་པའི་བུད་མེད་ཅིག་གིས་སློབ་དཔོན་ཁོང་གི་སློབ་འཁྲིད་དང་དཔེ་ཆ་དག་ནི་སྟོན་པ་བཅོམ་ལྡན་འདས་ཀྱི་བཀའ་ཆོས་དངོས་ཡིན་པ་དང་། དཔེ་ཆའི་ནང་མི་ག་འདྲ་ཡག་པོ་བྱེད་དགོས་པའི་སྐོར་རྐྱང་རྐྱང་གསུངས་ཡོད་སྐོར་བརྗོད་འདུག

རྒྱ་ནག་གི་བཙན་འཛུལ་བོད་ལ་བསླེབས་པ་ནས་བཟུང་དགོན་སྡེ་སྟོང་ཕྲག་འགའ་གཏོར་བཤིག་དང་ཆོས་དཔེ་གྲངས་ལས་འདས་པ་མེར་བསྲེགས་བཏང་བའི་ཡ་ང་བའི་ལོ་རྒྱུས་བྱུང་ཡོད་ལ། རྒྱ་ནག་གཞུང་གིས་མུ་མཐུད་བོད་བརྒྱུད་ནང་བསྟན་ལ་བཀག་སྡོམ་བྱེད་ཀྱི་ཡོད་པའི་གནས་ཚུལ་གསར་ཤོས་ཤིག་ནི། འདི་ལོའི་ལོ་མགོ་ནས་བཟུང་རྒྱ་ནག་གཞུང་གིས་བོད་ཀྱི་དགོན་ལུང་དགོན་ཚང་མ་བརྙན་མིག་གིས་བསྐོར་ནས་ལྟ་རྟོག་ནན་པོ་བྱེད་བཞིན་ཡོད་པ་མ་ཟད། མཚོ་ལྷོ་བོད་རིགས་རང་སྐྱོང་ཁུལ་ཁྲི་ཀ་རྫོང་ཁོངས་སུ་ཡོད་པའི་ཀྲིན་ཀྲུའུ (Zhenzhu)དགོན་པའི་འདུ་ཁང་དུའང་ལྟ་བཤེར་བརྙན་མིག་གིས་བསྐོར་ཏེ། དགོན་པའི་དགེ་འདུན་པ་ཚོར་ཉིན་རྒྱུན་རྒྱ་ནག་གཞུང་གི་ཆབ་སྲིད་དང་སྒྲིག་ཁྲིམས་ཟེར་བར་སློབ་སྦྱོང་བྱེད་བཅུག་བཞིན་ཡོད་པའི་གནས་ཚུལ་ཐོན་ཡོད་པ་རེད།

སྔར་ལོ་ནས་རྒྱ་ནག་གཞུང་གིས་ནང་བསྟན་དཔེ་ཆ་པར་སྐྲུན་ཐད་དམ་དྲག་ཤུགས་ཆེ་རུ་གཏོང་བཞིན་ཡོད་པ་མ་ཟད། བོད་ཀྱི་རིག་གནས་དང་ལོ་རྒྱུས་སོགས་ཀྱི་དཔེ་ཆ་པར་སྐྲུན་བྱེད་པའང་ཚད་བཀག་བཟོ་ཡི་ཡོད་པའི་གནས་ཚུལ་ཐོན་པ་ལྟར། འདི་ག་དུས་བབ་ཀྱི་གསར་འགོད་པས་བོད་ནང་གི་རྩོམ་པ་པོ་དང་ལོ་རྒྱུས་བ་ཞིག་ལ་རྒྱ་ནག་གི་དཔེ་སྐྲུན་བཀག་འགོག་གི་ལས་འགུལ་དེ་བདེན་པ་ཡིན་མིན་དྲིས་པར་ཁོང་གིས། གནས་སྐབས་བཤད་སྟབས་བདེ་བོ་མིན་པ་དང་གནས་ཚུལ་དེ་མི་རིང་བར་འབྱུང་རྒྱུ་ཡིན་ངེས་ཀྱང་། བོད་ཀྱི་ལོ་རྒྱུས་རིགས་ཀྱི་དཔེ་སྐྲུན་བཀག་འགོག་ལས་གཞན་གླིང་སྒྲུང་སོགས་པར་སྐྲུན་བྱེད་པར་བཀག་འགོག་མེད་སྐོར་བརྗོད་བྱུང་།

གསར་འགོད་པ། སངས་རྒྱས་དཀོན་མཆོག