དབྱིན་ཡུལ་གྱི་སྲིད་བློན་མཆོག་དང་འཕྲོད་བསྟེན་དྲུང་ཆེ་རྣམ་གཉིས་ལ་ཏོག་དབྱིབས་ནད་རྟགས་ཐོན་པར་བརྟེན་བདུན་ཕྲག་གཅིག་རིང་ཟུར་བཅད་དུ་བཞུགས་ཡོད་འདུག
དེ་རིང་དབྱིན་ཡུལ་གྱི་བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། ཡུལ་དེའི་སྲིད་བློན་བྷོ་རི་སི་ཇོན་སོན་(Boris Johonson)མཆོག་དང་། འཕྲོད་བསྟེན་དང་སྤྱི་ཚོགས་བདེ་དོན་དྲུང་ཆེ་མཱ་ཊི་ཧན་ཁོག་(Matt Hancock)ལགས་གཉིས་ལ་བརྟག་དཔྱད་བྱས་པ་བརྒྱུད། ཏོག་དབྱིབས་ནད་རྟགས་ཐོན་ཡོད་སྟབས། བདུན་ཕྲག་གཅིག་རིང་སྲིད་བློན་མཆོག་རང་ཤག་ལ་ཟུར་བཅད་དུ་བཞུགས་ཏེ་གཞུང་དོན་སྒྲུབ་རྒྱུ་ཡིན་འདུག
ད་ལྟ་དགུང་ལོ་ ༥༥ ཡིན་པའི་སྲིད་བློན་ཇོན་སོན་མཆོག་གིས། འདས་པའི་ཆུ་ཚོད་ཉེར་བཞིའི་རིང་ང་ལ་ཚ་བ་རྒྱས་པ་དང་གློ་བརྒྱབ་པ་སོགས་ནད་ཡམས་ཀྱི་རྟགས་མཚན་བྱུང་བས། ང་ཟུར་བཅད་དུ་འདུག་རྒྱུ་ཡིན། འོན་ཀྱང་། ངས་མུ་མཐུད་གཞུང་གི་སྣེ་འཁྲིད་དེ་བརྙན་ལམ་ནས་ཚོགས་འདུ་ཚོགས་པ་སོགས་བྱས་ཏེ། ནད་ཡམས་འདི་དང་འཐབ་འཛིང་བྱེད་རྒྱུ་ཡིན། ཞེས་གསུངས་ཡོད་པ་དང་། སྲིད་བློན་བྷོ་རི་སི་ཇོན་སོན་མཆོག་ནི་འཛམ་གླིང་གི་སྲིད་འཛིན་སྲིད་བློན་ཚོའི་ཁྲོད་ནས་རང་ཉིད་ལ་ཏོག་དབྱིབས་ནད་རྟགས་ཐོན་པ་ཡོངས་ཁྱབ་གསལ་བསྒྲགས་གནང་མཁན་ཐོག་མ་དེ་ཆགས་ཡོད་པ་རེད། 
འཕྲོད་བསྟེན་དང་སྤྱི་ཚོགས་བདེ་འཇགས་དྲུང་ཆེའི་མཱ་ཊི་ཧན་ཁོག་ལགས་ཀྱིས་ཀྱང་རང་ཉིད་ལ་ཏོག་དབྱིབས་ནད་རྟགས་ཐོན་ཡོད་པ་ཡོངས་བསྒྲགས་བྱས་ཡོད་པ་དང་བསྟུན་ངདྲུང་ཆེ་ཧན་ཁོ་ཁུ་ལགས་ཀྱིས། ང་ལ་ཏོག་དབྱིབས་ནད་རྟགས་བྱུང་སྟེ་ཉིན་འགའ་ཕྱིན་སོང་བས། དེ་རིང་ནས་གཞུང་གི་ལས་དོན་ཚང་མ་ཁྱིམ་དུ་བསྡད་ནས་བྱེད་ཀྱི་ཡིན། ཞེས་བརྗོད་ཡོད་པ་རེད།
གསར་ཁང་དེའི་གནས་ཚུལ་ནང་བཀོད་པ་ལྟར་ན། ཁོང་རྣམ་གཉིས་ནས་འདས་པའི་ཉིན་ཤས་ནང་ཡུལ་དེའི་བློན་ཆེན་དང་སློབ་སྟོན་པ་སོགས་ཆབ་སྲིད་གནད་ཡོད་མི་སྣ་མང་པོར་ཡང་ཡང་འབྲེལ་འདྲིས་བྱུང་ཡོད་ཀྱང་། བརྟག་དཔྱད་བྱེད་སྐབས་ཁོང་རྣམ་གཉིས་མ་གཏོགས་གཞན་གནད་ཡོད་མི་སྣ་གཅིག་ལའང་ཏོག་དབྱིབས་ནད་རྟགས་ཐོན་མེད་འདུག
གསར་འགོད་པ། སྐལ་བཟང་སྦྱིན་པ།
