དེ་རིང་རྒྱ་ནག་ཝུ་ཧན་གྲོང་ཁྱེར་ཕུད་གྲོང་ཁྱེར་ཁག་གི་ནང་འགྲོ་སྐྱོད་སྒོ་ཕྱེས་རྗེས་ཧུ་པའེ་ཞིང་ཆེན་དང་ཅང་ཤིས་ཞིང་ཆེན་བར་གྱི་དགུ་ཆུའི་ཟམ་ཆེན་ཐོག་འཁྲུག་འཛིང་ཆེན་པོ་ཤོར་ཡོད་འདུག
ཧུ་པེ་ཞིང་ཆེན་གྱི་ས་འབྲེལ་ཡིན་པ་ཅང་ཤིས་ཞིང་ཆེན་ཕྱོགས་ནས་ཝུ་ཧན་ནས་ཡོང་མཁན་དང་ལས་གཉེར་བ་སོགས་ཡོང་མི་ཆོག་པའི་བཀག་འགོག་བྱས་པར་བརྟེན། ཕྱོགས་གཉིས་ཀྱི་ཉེན་རྟོག་པའི་བར་འཁྲུག་འཛིང་ཤོར་ཡོད་པ་དང་། དེ་ལ་རྐྱེན་བྱས་ནས་ཕྱི་དྲོ་ཙམ་ལ་ཝུ་ཧན་གྱི་མི་མང་པོ་འདུ་འཛོམས་ཀྱིས་ཞིང་ཆེན་གཉིས་ཀྱི་བར་མཚམས་དགུ་ཆུ་ཟམ་ཆེན་ནས་ཉེན་རྟོག་པར་ངོ་རྒོལ་དང་ཉེན་རྟོག་པའི་རླངས་འཁོར་ཁ་ལོ་བསྒྱུར་བ་སོགས་ངོ་རྒོལ་འཁྲུག་འཛིང་ཆེན་པོ་ཤོར་ཡོད་འདུག
འདི་ག་དུས་བབ་ཀྱི་གསར་འགོད་པས་རྒྱ་ནག་ཝུ་ཧན་ནང་གནས་སྡོད་རྒྱ་མི་ཞིག་ལ་གནས་ཚུལ་དེའི་སྐོར་དྲིས་པར་ཁོང་གིས། གནས་ཚུལ་དེ་འབྱུང་རྐྱེན་གཙོ་བོ་འདས་པའི་ནང་ཝུ་ཧན་ནང་ཏོག་དབྱིབས་འགོས་ནད་བྱུང་བར་བརྟེན། ཉེ་འབྲེལ་ཞིང་ཆེན་ཁག་གིས་ཧུ་པེ་དང་ཝུ་ཧན་གྲོང་ཁྱེར་གྱི་མི་ལ་བཙོག་བལྟས་བྱས་ཏེ། ཁོང་ཚོ་ཞིང་ཆེན་གཞན་ནང་ཡོང་བཅུག་གི་མེད་པ་དང་། ཐེངས་འདིར་ཝུ་ཧན་གྲོང་ཁྱེར་ནས་ཅང་ཤིས་ཞིང་ཆེན་ནང་ལས་གཉེར་ལ་འགྲོ་མཁན་ཚོ་ཅང་སུའུ་ཉེན་རྟོག་པས་བཀག་འགོག་བྱས་ཏེ་མ་བཏང་བར་བརྟེན། ཝུ་ཧན་ཉེན་རྟོག་པ་མི་མང་ལ་རོགས་རམ་བྱེད་དུ་འགྲོ་སྐབས། ཕྱོགས་གཉིས་ཀྱི་ཉེན་རྟོག་པའི་བར་འཁྲུག་འཛིང་ཤོར་བ་དང་མི་མང་གིས་ཀྱང་ཉེན་རྟོག་པར་རྒྱབ་རོགས་བྱས་ཏེ་འཁྲུག་འཛིང་ཤོར་ཡོད་སྐོར་བརྗོད་བྱུང་།
དེ་བཞིན་ཨེ་ཤ་ཡའི་རྒྱ་སྐད་སྡེ་ཚན་གྱིས་དེའི་སྐོར་གནས་ཚུལ་སྤེལ་བའི་ནང་། འདས་པའི་ཟླ་བ་གཉིས་ལྷག་རིང་། ཧུ་པེ་མི་མང་ལ་ཁྱིམ་མཚེས་ཅང་སུའུ་ཞིང་ཆེན་སོགས་ཀྱིས་དམའ་འབེབ་མཐོང་ཆུང་བྱས་རྐྱེན་འཁྲུག་འཛིང་ཤོར་ཡོད་པ་དང་། ཅང་སུའུ་ཞིང་ཆེན་གྱི་ཉེན་རྟོག་པ་བརྒྱ་ཕྲག་ལྷག་གིས་དགུ་ཆུ་ཟམ་ཆེན་སྟེང་ཐག་པ་འཐེན་ནས་ཧུ་པའེ་ཡི་མི་གཅིག་ཀྱང་ཅང་སུའུ་ནང་འགྲོ་སྐྱོད་བྱེད་མ་བཅུག་པ་མ་ཟད། ཧུ་པའེ་ཞིང་ཆེན་གྱི་ཉེན་རྟོག་པ་སོང་བར་ཁོང་ཚོར་ཉེས་རྡུང་སོགས་བཏང་བར་བརྟེན། ཕྱི་དྲོ་ཙམ་ལ་ཧུ་པེའི་མི་མང་སྟོང་ཕྲག་མང་པོ་འདུ་འཛོམས་ཀྱིས་ཟམ་པའི་སྟེང་གི་ཐག་པ་བཅད་པ་དང་། ཉེན་རྟོག་པའི་རླངས་འཁོར་ཨ་ལོག་བསྒྱུར་བ་དང་ཉེན་རྟོག་པ་ཚོར་གཅར་རྡུང་གཏོང་རྩིས་བྱས་ཡོད་སྐོར་བརྗོད་འདུག
སྤྱི་ཚོགས་དྲ་ལམ་དུ་རྒྱ་ནག་གཞུང་འབྲེལ་གྱིས་བཏང་བ་ཡིན་ལུགས་ཀྱི་གནས་ཚུལ་ཞིག་ཁྱབ་བཞིན་པའི་ནང་། ཝུ་ཧན་ནད་ཡམས་ཞི་ལྷོད་དུ་སོང་རྗེས་ཝུ་ཧན་གྲོང་ཁྱེར་ཕུད་པའི་ས་གནས་གཞན་གྱི་འགྲོ་སྐྱོད་བཀག་རྒྱ་ལྷོད་ཡོད་པ་དང་། ཧུ་པའེ་ཧོང་མེ་རྫོང་ཉེན་རྟོག་ཕྱོགས་དང་ཅང་ཤིས་ཞིང་ཆེན་ཅིའུ་ཅང་གྲོང་ཁྱེར་ཉེན་རྟོག་པའི་བར་འགྲོ་འོང་ཐད་ནས་གདོང་ཐུག་བྱུང་ཡོད་པ་དང་། དེ་ལ་རྐྱེན་བྱས་ཏེ་གཞི་ཁྱོན་ཆེ་བའི་སྤྱིའི་ཚོགས་རང་བཞིན་གྱི་དོན་རྐྱེན་བྱུང་ཡོད་སྐོར་བརྗོད་ཡོད་པ་ལས། ཐེངས་འདིའི་དོན་རྐྱེན་ཁྲོད་མི་ལ་རྨས་སྐྱོན་དང་གཞུང་ཕྱོགས་ནས་ག་རེ་བྱས་ཡོད་མེད་སོགས་གསལ་ཁ་གང་ཡང་མི་འདུག
རྒྱ་གར་ལྷོ་ཕྱོགས་ཀྱི་ས་གནས་གསར་འགོད་པ་དོན་འགྲུབ་བཀྲ་ཤིས་དང་སངས་རྒྱས་དཀོན་མཆོག
