ཀཱ་ཤི་མིར་ནང་ས་གནས་གཞན་གྱི་མི་མང་གཏན་སྡོད་བྱེད་ཆོག་པའི་ཁྲིམས་བཟོས།

རྒྱ་གར་དབུས་གཞུང་ནས་ཀཱ་ཤི་མིར་ཐད་སྐྱོང་ས་ཁུལ་དུ་ཕྱི་མིའི་གཏན་སྡོད་ཐོབ་ཐང་སོགས་ཚུད་པའི་ཁྲིམས་ཡིག་གསར་པ་ཞིག་གཏན་འབེབ་གནང་ཡོད་པ་གསལ་བསྒྲགས་གནང་འདུགཁ་སང་རྒྱ་གར་དབུས་གཞུང་གིས་ཁྲིམས་གསར་པ་ཞིག་ཡོངས་བསྒྲགས་བྱས་ཏེ། རྒྱ་གར་དབུས་ཐད་སྐྱོང་ཀཱ་ཤི་མིར་ཁུལ་དུ་ལོ་ ༧ རིང་སློབ་སྦྱོང་བྱས་པ་དང་ཁུལ་དེའི་འཛིན་རིམ་ ༡༠ བ་དང་ ༡༢ པའི་ཡིག་རྒྱུགས་ནང་ཞུགས་མྱོང་བ། དེ་བཞིན། ལོ་ ༡༥ རིང་ཁུལ་དེར་གནས་སྡོད་བྱས་པའི་མི་སུ་ཞིག་ཡིན་ཚེ། ས་གནས་དེར་གཏན་སྡོད་བྱས་ཆོག་པའི་ཐོབ་ཐང་ཡོད་པ་མ་ཟད། རྒྱ་གར་མི་སེར་གྱི་ཐོབ་ཐང་ཀྱང་རག་གི་ཡོད་སྐོར་བརྗོད་ཡོད་པ་རེད།

ཐེངས་འདིའི་ཁྲིམས་གསར་དེ་ནི་རྒྱ་གར་གཞུང་གིས་ཀཱ་ཤི་མིར་གྱི་དམིགས་བསལ་རང་སྐྱོང་གནས་བབ་ཕྱིར་བསྡུ་བྱས་ཏེ་ཟླ་ ༨ འགོར་རྗེས་བཟོས་པ་ཞིག་ཡིན་པ་དང་། ཁྲིམས་གསར་འདིའི་འོག་ལོ་ ༡༠ རིང་ཀཱ་ཤི་མིར་ཁུལ་དུ་སྲི་ཞུ་ཞུས་མྱོང་བའི་ཉེན་རྟོག་པ་དང་། དངུལ་ཁང་དང་གཙུག་ལག་སློབ་གྲྭ་ཆེན་མོའི་ལས་བྱེད་སོགས་དབུས་གཞུང་དང་འབྲེལ་ཡོད་ཀྱི་ལས་བྱེད་ཚོའི་བྱིས་པ་རྣམས་ལ་ཀྰ་ཤི་མིར་དུ་གཏན་སྡོད་ཀྱི་ཐོབ་ཐང་ཡོད་འདུག

ཐེངས་འདིའི་ཁྲིམས་གསར་འོག སྲིད་བློན་མུ་དྷི་གཞུང་གིས་ཀཱ་ཤི་མིར་ཁུལ་གྱི་གཞོན་སྐྱེས་གཙོས་པའི་ས་གནས་མི་མང་ལ་ལས་ཀའི་གོ་སྐབས་བསྐྲུན་གྱི་ཡོད་སྐོར་རྗོད་བཞིན་ཡོད་ཀྱང་། ཆབ་སྲིད་དཔྱད་བརྗོད་པ་དང་ས་གནས་མི་མང་གིས། ཁྲིམས་འདིའི་འོག་ཀཱ་ཤི་མིར་གྱི་ས་གནས་མི་མང་ལ་ལས་ཀའི་གོ་སྐབས་དཀོན་པོ་ཆགས་རྒྱུ་ཡིན་པ་མ་ཟད། ཀཱ་ཤི་མིར་མི་སེར་སྤེལ་ཡུལ་ཞིག་ཏུ་གྱུར་ཏེ་ས་གནས་ཀྱི་ཕྱོགས་ཡོངས་ཀྱི་འཚོ་གནས་ལ་འགྱུར་ལྡོག་འགྲོ་རྒྱུ་ཡིན་པའི་སེམས་འཚབ་སྐྱེ་བཞིན་ཡོད་པ་རེད།

རྒྱ་གར་འཛིན་སྐྱོང་འོག་ཡོད་པའི་ཀཱ་ཤི་མིར་ཁུལ་དུ་གནས་བཞུགས་ཆབ་སྲིད་དཔྱད་བརྗོད་པ་ཝ་ཧི་ཌི་(Siddiq Wahid)ལགས་ཀྱིས། ཁྲིམས་གསར་དེ་ནི་གཡོ་བྱུས་ཤིག་ཡིན་པ་དང་། ཏོག་དབྱིབས་ནད་དུག་གི་ཛ་དྲག་གནས་སྟངས་སྐབས་ཁག་ཅིག་གིས་ཆབ་སྲིད་ཀྱི་གཡོ་བྱུས་མཚམས་འཇོག་བྱེད་ཀྱི་མེད་པ་དེ་གསལ་སྟོན་བྱས་ཡོད། ཅེས་བརྗོད་འདུག

ཡང་ཀཱ་ཤི་མིར་དུ་ཁྲིམས་ཀྱི་སློབ་དཔོན་གནང་བཞིན་པའི་ཧོ་སིན་ལགས་ཀྱིས་(Sheikh Showkat Hussain)ལགས་ཀྱིས། དབུས་གཞུང་གིས་རྩ་ཁྲིམས་དོན་ཚན་ ༣༧༠ རྩིས་མེད་བཏང་བའི་དམིགས་ཡུལ་ནི་ཀཱ་ཤི་མིེར་ཁུལ་དུ་ཕྱི་མི་གཏན་སྡོད་དང་། མི་འབོར་གྱི་གྲངས་ཚད་འགྱུར་བ་གཏོང་འདོད་ཡོད་པ་རེད་ལ། ད་ལྟ་དབུས་གཞུང་གིས་ཐབས་ལམ་འདྲ་མིན་འཐེན་ཏེ་རྒྱ་གར་གྱི་མི་མང་པོ་ཞིག་ཀཱ་ཤི་མིར་ནང་ཁྲིམས་མཐུན་ངང་གནས་སྡོད་བྱས་ཆོག་པར་བཟོས་ཡོད། ཅེས་བརྗོད་འདུག

འདས་ལོའི་ཕྱི་ཟླ་ ༨ པ་ནས་རྒྱ་གར་གཞུང་གིས་རྩ་ཁྲིམས་དོན་ཚན་ ༣༧༠ པ་གཏན་འབེབ་དང་ལག་བསྟར་གྱིས། ཀཱ་ཤི་མིར་ནང་ལས་ཀ་དང་སློབ་ཡོན། ས་ཆའི་བདག་ཐོབ་སོགས་ཀྱི་ཐོག་དམ་དྲག་བྱེད་མགོ་བརྩམས་ཡོད་པ་དང་། ད་རེས་ཁྲིམས་འདིས་དམིགས་བསལ་ཕྱི་ཕྱོགས་ཀྱི་མི་མང་པོ་ཞིག་ལ་ས་གནས་མི་མང་དང་གཅིག་མཚུངས་ཀྱི་ཐོབ་ཐང་སྤྲོད་བཞིན་ཡོད་པས། ད་ནས་བཟུང་ཀཱ་ཤི་མིར་གྱི་ས་གནས་མི་མང་ལ་སོ་སོའི་མ་འོངས་པ་ཐག་གཅོད་བྱེད་པའི་དབང་ཆ་ཇེ་ཆུང་དུ་ཕྱིན་ཡོད་པ་རེད།

རྒྱ་གར་གཞུང་འཛིན་བྷི་ཇེ་ཕི་སྲིད་དོན་ཚོགས་པའི་སྤྱི་ཁྱབ་དྲུང་ཡིག་ཨ་ཤོག་གོལ་ལགས་ཀྱིས། ང་ཚོས་སྔོན་མ་ནས་འདི་འདྲ་ཞིག་ལ་སྒུག་ནས་བསྡད་ཡོད། ཀཱ་ཤི་མིར་གྱི་མི་མང་ཡོངས་དགའ་སྤྲོས་ཁེངས་འདུག་ལ། མི་སུ་ཞིག་ཀཱ་ཤི་མིར་ནང་ལོ་ ༡༥ བསྡད་ཚེ་ཐོབ་ཐང་རྣམས་རག་གི་ཡོད། ཕྱི་ཕྱོགས་ཀྱི་མི་གཞན་ལ་ཐོབ་ཐང་དེ་དག་འཐོབ་ཀྱི་མེད། ཅེས་བརྗོད་ཡོད་ཀྱང་། ཀཱ་ཤི་མིར་གྱི་སྤྱི་ཁྱབ་བློན་ཆེན་ཟུར་པ་ཨོ་མར་ཨབ་ཌོལ་ལ་(Omar Abdullah)ལགས་ཀྱིས། ད་ལྟ་ང་ཚོ་ཚང་མས་ནུས་ཤུགས་ཡོད་ཚད་ཏོག་དབྱིབས་ནད་དུག་སྔོན་འགོག་ཐོག་གཏོང་དགོས་པ་ལས་ཀཱ་ཤི་མིར་ནང་ཁྲིམས་གསར་བཟོའི་ཐོག་གཏོང་དགོས་ཀྱི་མེད་ལ། གལ་སྲིད་ཁྲིམས་ཀྱིས་དམ་བཅའ་གཞིར་བཟུང་མི་མང་སྲུང་སྐྱོབ་བྱེད་ཐུབ་ཀྱི་མེད་ཚེ། དེ་ནི་རྣག་ཐོག་ཁབ་རྩེག་བྱས་པ་དང་གཅིག་མཚུངས་ཡིན། ཞེས་དབུས་གཞུང་གི་ཏོག་དབྱིབས་ནད་དུག་གི་ཛ་དྲག་གནས་སྟངས་སྐབས་ཁྲིམས་དེ་འདྲ་ཡོངས་བསྒྲགས་བྱས་པར་སྐྱོན་བརྗོད་བྱས་ཡོད་པ་རེད།

འདས་ལོའི་ཕྱི་ཟླ་ ༨ ཚེས་ ༥ ཉིན་རྒྱ་གར་དབུས་ནང་སྲིད་བློན་ཆེན་ཨཱ་མིཊ་ཤཱ་(Amit Shah)ཡིས་གྲོས་ཚོགས་ར་བའི་ནང་། རྒྱ་གར་སྲིད་འཛིན་གྱི་བཀའ་འཁྲོལ་འོག རྩ་ཁྲིམས་དོན་ཚན་ ༣༧༠ རྩིས་མེད་གཏོང་རྒྱུ་ཡོངས་བསྒྲགས་བྱས་ཏེ། འདས་པའི་ལོ་ ༧༠ ལྷག་རིང་ཀཱ་ཤི་མིར་དེ་རང་སྐྱོང་ལྟ་བུར་གནས་ཐུབ་པའི་གཞི་རྩར་འགྱུར་བ་བཏང་ཡོད་པ་དང་ ། ཐག་གཅོད་དེ་གནང་རྗེས་མི་གྲངས་ས་ཡ་ ༧ ལས་གྲུབ་པའི་ཀཱ་ཤི་མིར་ནང་དཀའ་རྙོག་མང་པོ་ཞིག་ཡོང་ཡོད་པ་དང་།  ཁ་གཏད་པཱ་ཀི་སི་ཐན་ལ་ཡང་ཁོང་ཁྲོ་བསླངས་ཡོད་པ་རེད།

གསར་འགོད་པ། སྐལ་བཟང་སྦྱིན་པ།