བོད་མིའི་སྒྲིག་འཛུགས་ནས་ཀང་ར་རྫོང་ཏོག་དབྱིབས་ནད་ཡམས་ཀྱི་ངལ་སེལ་ཐེབས་རྩ་ལ་ཧིན་སྒོར་འབུམ་ ༣ ཞལ་འདེབས་སུ་གནང་འདུག
དེ་རིང་བོད་མིའི་སྒྲིག་འཛུགས་ཀྱི་གཞུང་འབྲེལ་དྲ་བའི་སྟེང་གནས་ཚུལ་སྤེལ་བ་ལྟར་ན། བོད་མིའི་སྒྲིག་འཛུགས་ནས་རྒྱབ་སྐྱོར་དང་གདུང་སེམས་མཉམ་སྐྱེད་མཚོན་བྱེད་དུ། བཞུགས་སྒར་དྷ་རམ་ས་ལའི་ཀང་ར་རྫོང་གི་ཏོག་དབྱིབས་ནད་ཡམས་ཀྱི་ངལ་སེལ་ཐེབས་རྩ་ལ་ཧིན་སྒོར་འབུམ་ ༣ གྱི་ཞལ་འདེབས་གནང་ཡོད་པ་མ་ཟད། ས་གནས་སུ་གནས་སྡོད་བོད་མི་ཚོས་རྫོང་དཔོན་ལས་ཁུངས་ཀྱི་ཏོག་དབྱིབས་རིམས་འགོག་ལས་འགུལ་ལ་རྒྱབ་སྐྱོར་ཞུ་དགོས་པའི་འབོད་སྐུལ་ཞུས་འདུག
སྲིད་སྐྱོང་མཆོག་གིས་ཀང་ར་རྫོང་དཔོན་སྐུ་ཞབས་རཱ་ཀེ་ཤི་ཀུ་མར་པ་རཱ་ཇ་པ་ཏི་ལ་ཕུལ་བའི་གསུང་འཕྲིན་ནང། ཁྱེད་ཀྱིས་རང་རྫོང་དུ་ཏོག་དབྱིབས་ནད་ཡམས་འགོས་ཁྱབ་འགྲོ་རྒྱུར་བཀག་འགོག་གནང་བ་ཙམ་དུ་མ་ཟད། ཕྱིར་བསྐྱོད་བཀག་སྡོམ་བཀའ་རྒྱ་ནན་པོའི་འོག་སྤྱི་དམངས་རྣམས་ལ་དགོས་ངེས་ཀྱི་ཁྱིམ་ཆས་དང་སྨན་ཆས་རིགས་མུ་མཐུད་ཐོབ་ཐབས་གནང་ཡོད། ཅེས་དང་། ང་ཚོའི་རྒྱབ་སྐྱོར་དང་གདུང་སེམས་མཉམ་སྐྱེད་མཚོད་བྱེད་དུ། བོད་མིའི་སྒྲིག་འཛུགས་ངོས་ནས་རྫོང་གི་ཏོག་དབྱིབས་ནད་ཡམས་ཀྱི་ངལ་སེལ་ཐེབས་རྩར་ཧིན་སྒོར་འབུམ་ ༣ འབུལ་འདོད་ཡོད་པ་དང་། ཁྱེད་ཀྱི་ད་ལྟ་སྤེལ་བཞིན་པའི་རིམས་འགོག་ཐབས་བྱུས་ལ་ང་ཚོས་མུ་མཐུད་རྒྱབ་སྐྱོར་ཞུ་རྒྱུ་ཡིན། ཞེས་བཀོད་འདུག
གསུང་འཕྲིན་དེའི་ནང་། དཀའ་རྙོག་ཅན་གྱི་དུས་སྐབས་འདིར་ཀང་ར་རྫོང་དཔོན་གྱིས་བོད་མིའི་སྤྱི་ཚོགས་ལ་དུས་དང་དུས་སུ་ཏོག་དབྱིབས་ནད་ཡམས་དང་འབྲེལ་བའི་ལམ་སྟོན་དང་རྒྱབ་སྐྱོར་གནང་བ་དེར། བཞུགས་སྒར་དྷ་སའི་བོད་མི་ཡོངས་ཀྱི་ཚབ་ཞུས་ཏེ་ཐུགས་རྗེ་ཆེ་ཞུས་འདུག་ལ། རྫོང་དཔོན་མཆོག་ནས་ས་གནས་སུ་གནས་སྡོད་བོད་མི་ཚོས་ད་བར་རྫོང་གི་ཏོག་དབྱིབས་རིམས་འགོག་ལས་འགུལ་ལ་རྒྱབ་སྐྱོར་ཤུགས་ཆེར་བྱས་ཡོད་པ་དང་། བོད་མིའི་སྒྲིག་འཛུགས་ནས་ཞལ་འདེབས་ཕུལ་བ་དེར་ཡི་རངས་གནང་ཡོད་འདུག
དེ་བཞིན་ཟླ་འདིའི་ཕྱི་ཚེས་ ༤ ཉིན་ཁམས་སྤྲུལ་བཤད་སྒྲུབ་ཉི་མ་རིན་པོ་ཆེ་མཆོག་གི་བླ་བྲང་དང་། ཁམས་སྒར་གྲྭ་ཚང་། བཤད་གྲྭ། བྱང་ཆུབ་ལྗོངས་རྡོ་རྫོང་དགོན། བཙུན་དགོན་དོན་བརྒྱུད་དགའ་ཚལ་གླིང་། བཀྲ་ཤིས་ལྗོངས་གཞིས་ལས་ཁང་བཅས་ནས་ཧི་མ་ཅལ་མངའ་སྡེའི་ཉམ་ཐག་ཚོར་ཉིན་རེའི་དགོས་ངེས་བཟའ་བཅའ་དང་སྨན་རིགས་ཆེད་དུ། མངའ་སྡེའི་སྤྱི་ཁྱབ་བློན་ཆེན་མཆོག་གི་ངལ་སེལ་ཐེབས་རྩེར་ཧིན་སྒོར་འབུམ་ ༦ གི་ཞལ་འདེབས་གནང་འདུག་པ་མ་ཟད། ས་གནས་ལས་ཁུངས་བརྒྱུད་ཟ་འབྲུ་རིགས་གནང་ཡོད་འདུག
པ་སངས་ཚེ་རིང་གིས་བོད་མིའི་སྒྲིག་འཛུགས་ཀྱི་དྲ་བ་སོགས་ནས་བཏུས།
