ཁྲིམས་རྩོད་པ་བཙོན་གྲོལ་ཐོབ་ཡང་རང་ཁྱིམ་དུ་མ་བཏང་།

རྒྱ་ནག་ནང་ལོགས་ཀྱི་འགྲོ་བ་མིའི་ཐོབ་ཐང་འཐབ་རྩོད་པ་དང་ཁྲིམས་རྩོད་པ་ཝང་ཆན་ཀྲང་གི་བཙོན་འཇུག་དུས་ཡུན་རྫོགས་ཡོད་ཀྱང་རང་ཁྱིམ་དུ་མ་བཏང་བར་ཧྲན་ཏུང་ཞིང་ཆེན་དུ་འཁྲིད་ཡོད་འདུག ཁ་སང་ཕྱི་ཚེས་ ༥ ཉིན། རྒྱ་ནག་གཞུང་གིས་རྒྱལ་ཁབ་ཀྱི་སྲིད་དབང་མགོ་རྟིང་སློག་རྩིས་ཀྱི་ཇུས་ངན་འཐེན་པའི་ནག་ཉེས་གཡོགས་ཏེ། མི་ལོ་ལྔ་མ་ཟིན་ཙམ་རིང་བཙོན་འཇུག་ཁྲིམས་ཐག་བཅད་པའི་རྒྱ་ནག་གི་ཁྲིམས་རྩོད་པ་དང་སྤྱི་དམངས་འགྲོ་བ་མིའི་ཐོབ་ཐང་དོན་གཉེར་བ་སྐུ་ཞབས་ཝང་ཆན་ཀྲང་(Wang Quanzhang)ཀློད་གྲོལ་བཏང་ཡོད་ན་ཡང་། ཏོག་དབྱིབས་ནད་དུག་ལ་ཁ་གཡར་ནས་པེ་ཅིན་གྱི་རང་ཁྱིམ་ལ་མ་བཏང་བར་ཧྲན་ཏུང་ཞིང་ཆེན་ལ་འཁྲིད་ཡོད་འདུག

གནས་ཚུལ་དེའི་སྐོར་ལ་ཝང་གི་བཟའ་ཟླ་ལའེ་(Li Wenzu)ཡིས། ཝང་ཆན་ཀྲང་བཙོན་ཁང་ནས་ཀློད་གྲོལ་བཏང་ཡོད་ན་ཡང་། ཏོག་དབྱིབས་ནད་དུག་ལ་ཁ་གཡར་ནས་པེ་ཅིན་གྲོང་ཁྱེར་གྱི་ནང་ལ་མ་བཏང་བར། རྒྱ་ནག་ཧྲན་ཏུང་ཞིང་ཆེན་དུ་ཉིན་གྲངས་ ༡༤ རིང་ཟུར་བཀག་བྱེད་དགོས་སྐོར་བརྗོད་དེ་འཁྲིད་ཡོད་པ་དང་། ཁ་སང་ཁོང་གིས་ཁ་པར་བརྒྱུད་འབྲེལ་བ་བྱས་ཏེ་ཧྲན་ཏུང་ཅི་ནན( Jinan)དུ་འགྲོ་དགོས་སྐོར་བརྗོད་མོད། ད་ལྟའི་ཆར་ཁོང་གི་འགྲོ་འདུག་དང་སྐད་ཆ་བཤད་པ་སོགས་ལ་དམ་དྲགས་དང་ཚོད་འཛིན་བྱེད་བཞིན་ཡོད་པས། ཀློད་གྲོལ་གྱི་རྣམ་པ་ཙམ་ལས་རང་དབང་གང་ཡང་མེད་སྐོར་བརྗོད་འདུག

ཡང་ཁོང་མོས་མུ་མཐུད་ཁོང་ད་ཐེངས་ཧྲན་ཏུང་ལ་འཁྲིད་པ་དེ་ཏོག་དབྱིབས་འགོས་ནད་ལ་ཁ་གཡར་ནས་འཁྲིད་པ་ལས་ཁོ་རང་གི་དྭང་དུ་བླངས་ནས་སོང་བ་མིན་པ་དང་། ཁོང་པེ་ཅིན་གྲོང་ཁྱེར་གྱི་ནང་ལ་ལོག་ཐུབ་མིན་ཐད་དོགས་གཞི་དང་སེམས་འཚབ་ཡོང་གི་ཡོད་པ་དང་། ཝང་ལགས་ཡུན་རིང་བཙོན་འཇུག་མནར་གཅོད་བྱས་རྐྱེན་ཁོང་གི་འཕྲོད་བསྟེན་སྐྱོ་རུ་སོང་ཡོད་པ་མ་ཟད། གཟུགས་པོའི་ལྗིད་ཚད་ཤུགས་ཆེན་པོ་ཆག་ཡོད་སྐོར་བརྗོད་ཡོད་པ་དང་། ཧོང་ཀོང་རང་དབང་ཚགས་པར་གྱིས་རྒྱ་ནག་གཞུང་གི་ཁྲིམས་ཁང་ལ་འབྲེལ་བ་བྱས་ཏེ་ཝང་གི་ཀློད་གྲོལ་སྐོར་དྲིས་པར་ལན་སྤྲད་མ་སོང་ཞེས་བཀོད་འདུག

ཝང་ཆན་ཀྲང་ནི་ཕྱི་ལོ་ ༢༠༡༥ ལོར་རྒྱ་ནག་གི་མགོ་འཁྲིད་ཞི་ཅིན་ཕིན་གྱིས་ ༧༠༩ ཞེས་པའི་ཁྲིམས་རྩོད་པ་ཚོར་རྡུང་རྡེག་སྐབས་འཛིན་བཟུང་བྱས་པའི་ཁྲིམས་རྩོད་པ་ཐོག་མའི་གྲས་ཡིན་པ་དང་། ཁོ་དང་མཉམ་དུ་རྒྱ་ནག་གི་འགྲོ་བ་མིའི་ཐོབ་ཐང་ཁྲིམས་རྩོད་པ་ལེ་ཧི་ཕིན་(Li Heping) དང་འགྲོ་བ་མིའི་ཐོང་ཐང་དོན་གཉེར་བ་ཀོ་ཧོང་ཀོ་(Gou Hongguo)། ཀྲེ་ཡན་མིན་(Zhai Yanmin)བཅས་ཡོད་པ་དང་། རྗེས་སུ་ཁྲིམས་རྩོད་པ་ཚོའི་བཟའ་ཟླ་ཚོ་དང་རྒྱལ་སྤྱིའི་འགྲོ་བ་མིའི་ཐོབ་ཐང་འཐབ་རྩོད་པ་མང་པོས་ཁོ་ཚོར་ཉེས་མེད་ཉེས་འགེལ་ཡིན་པས་ཀློད་གྲོལ་དགོས་པའི་ཞུ་གཏུག་དང་རེ་ཞུ་ཐེངས་མང་ལ་ཞུས་ཀྱང་རྒྱ་ནག་གཞུང་གིས་ངོས་ལེན་བྱས་མེད་པ་རེད།

རྒྱ་ནག་གཞུང་གིས་ཁྲིམས་རྩོད་པ་ཁོང་ཚོར་རྒྱལ་ཁབ་ཀྱི་སྲིད་དབང་མགོ་རྟིང་སློག་རྩིས་ཀྱི་ཇུས་ངན་འཐེན་པའི་ནག་ཉེས་གཡོགས་ཏེ་བཙོན་འཇུག་བྱས་ཡོད་པ་དང་། ཕྱི་ལོ་ ༢༠༡༨ ལོར་ཁྲིམས་རྩོད་པ་བཞིའི་བཟའ་ཟླ་ཚོས་སོ་སོའི་སྐྲ་བཞར་ཏེ་རྒྱ་གཞུང་ལ་ཁྲིམས་རྩོད་པ་ཚོ་ཀློད་གྲོལ་དགོས་པའི་ངོ་རྒོལ་བྱས་ཡོད་པ་མ་ཟད། སྐབས་དེར་ཝང་གི་བཟའ་ཟླ་ལའེ་ཡིས་ཁོང་མོས་ཁྱོ་གའི་ཆེད་དུ་རྒྱ་ནག་གཞུང་གི་ཆེས་མཐོའི་ཁྲིམས་ཁང་དུ་ཐེངས་ ༣༡ ཕྱིན་ནས་ཞུ་གཏུག་བྱས་ཀྱང་། གཞུང་གི་གནོན་ཤུགས་འོག་ཞུ་གཏུག་ཚང་མ་ཕྱིར་སློག་བཏང་བ་མ་ཟད། ཁྲིམས་རྩོད་པ་འཚོལ་བར་བཀག་འགོག་ཤུགས་ཆེན་ཡོད་སྐོར་བརྗོད་ཡོད་པ་རེད།

གསར་འགོད་པ། སངས་རྒྱས་དཀོན་མཆོག