དེ་རིང་ཉིན་གུང་བར་འཛམ་གླིང་ཁྱོན་ཡོངས་སུ་ཏོག་དབྱིབས་ནད་པའི་གྲངས་འབོར་ ༡༢,༧༦,༣༠༢ ལ་འཕར་ཡོད་པའི་ཁྲོད་ནས་ཁྱོན་ནད་པ་ ༦༩,༥༢༧ རྐྱེན་འདུས་སུ་སོང་ཡོད་འདུག
དེ་རིང་རྒྱ་གར་བང་ཆེན་གསར་ཁང་གིས་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༣ ཉིན་རྒྱ་གར་གཞུང་གིས་ཏོག་དབྱིབས་ནད་ཡམས་སྔོན་འགོག་དང་འབྲེལ་བའི་སྒེར་གཉེར་བཟོ་ཚོང་ཁང་གི་འཐུས་ཚབ་རྣམ་པའི་ཚོགས་འདུ་ཞིག་གི་ཐོག རྒྱ་གར་ལ་འདི་ལོའི་ཕྱི་ཟླ་ ༧ བར་ N95 རྟགས་ཅན་གྱི་ཁ་རས་ས་ཡ་ ༢༧ དང་། ལུས་ལ་གྱོན་པའི་རང་སྲུང་ཡོ་བྱད་(Personal Protective Equipment) ས་ཡ་ ༡༥། བརྟག་དཔྱད་ཡོ་ཆས་ས་ཡ་ ༡།༦ དེ་བཞིན་དབུགས་སྐྱོར་འཕྲུལ་ཆས་(Ventilator)ཁྲི་ ༥ དགོས་སྐོར་བཤད་ཡོད་འདུག
རྒྱ་གར་ནང་གི་གནད་ཡོད་སྒེར་གཉེར་བཟོ་ཚོང་ཁང་ཆེ་ཁག་དང་། གཞུང་འབྲེལ་མ་ཡིན་པའི་ཚོགས་པ། རྒྱལ་སྤྱིའི་ཚོགས་སྡེ་ཁག་གིས་གཞུང་གི་ཏོག་དབྱིབས་རིམས་འགོག་ལས་འགུལ་ལ་གཞོགས་འདེགས་བྱེད་ཐབས་གང་ཡོད་ཀྱི་ཚོགས་འདུ་དེ། རྒྱ་གར་གཞུང་གི་སྲིད་བྱུས་ཉམས་ཞིབ་ཁང་ NITI Aayog གི་སྤྱི་ཁྱབ་འགན་འཛིན་ཨ་མི་ཏབ་ཀེན་ཏི་ (Amitavh Kant) ཡིས་གཙོ་སྐྱོང་འོག རྒྱ་གར་གྱི་ཚོང་དོན་དང་བཟོ་གྲྭའི་ལྷན་ཚོགས་ཀྱི་སྐུ་ཚབ་རྣམས་ཀྱིས་མཉམ་ཞུགས་བྱས་ཡོད་ཅིང་། ཚོགས་ཐོག་ཏུ་སྒེར་གཉེར་བཟོ་ཚོང་ཁང་གི་སྐུ་ཚབ་རྣམ་པས་རྒྱ་གར་གཞུང་ལ་ཏོག་དབྱིབས་ནད་ཡམས་དང་འབྲེལ། སྒེར་གཉེར་བཟོ་ཚོང་ཁང་དག་གིས་སྨན་བཅོས་ཀྱི་དགོས་ངེས་ཅ་དངོས་ཅི་ཙམ་མཁོ་སྐྲུན་བྱ་དགོས་མིན་དྲིས་པའི་ལན་དུ། རྒྱ་གར་གཞུང་གིས་འབྱུང་འགྱུར་ཟླ་གཉིས་ནང་ཚུད་ལ་ཁྱོན་དབུགས་སྐྱོར་འཕྲུལ་ཆས་ ༥༠༠༠༠ དགོས་པའི་ཚོད་དཔག་བྱས་ཡོད་པའི་ཁྲོད་ནས། ད་ལྟའི་ཆར་ ༡༦༠༠༠ ཡོད་པ་དང་། ད་དུང་ ༣༤༠༠༠ དགོས་ཀྱི་ཡོད་སྐོར་དང་། རྒྱ་གར་ཕྱི་སྲིད་ལྷན་ཁང་ངོས་ནས་རྒྱལ་ཕྱི་ནས་དབུགས་སྐྱོར་དང་རང་སྲུང་ཡོ་བྱད་རག་ཐབས་བྱེད་བཞིན་ཡོད་སྐོར་བརྗོད་ཡོད་འདུག
དེ་ཡང་རྒྱ་གར་ལྷོ་ཕྱོགས་ཀེ་ར་ལ་མངའ་སྡེའི་ནང་ཏོག་དབྱིབས་ནད་པ་དང་པོ་ཐོན་པ་དང་བསྟུན། འདི་ལོའི་ཕྱི་ཟླ་ ༡ ཚེས་ ༣༡ ཉིན་རྒྱ་གར་དབུས་གཞུང་གིས་རང་སྲུང་ཡོ་བྱད་དང་ཁ་རས་ཕྱིར་འདྲེན་མི་ཆོག་པའི་བཀའ་རྒྱ་བཏང་ཡོད་ལ། འདས་པའི་བདུན་ཕྲག་འགའ་ཤས་ནང་རྒྱ་གར་རྒྱལ་ཡོངས་ནང་ཏོག་དབྱིབས་ནད་པའི་གྲངས་འབོར་ཤུགས་ཆེར་འཕར་བ་དང་། མ་གཞི་ནས་རྒྱ་གར་གྱི་མི་འབོར་ལ་དཔག་པའི་སྨན་བཅོས་མཐུན་རྐྱེན་ཞན་པོ་ཡོད་སྟབས། ཕྱི་ཟླ་ ༣ ཚེས་ ༢༤ ཉིན་དབུགས་སྐྱོར་འཕྲུལ་ཆས་དང་དུག་སེལ་སྨན་ཆུ་གཅིག་ཀྱང་ཕྱིར་འདྲེན་མི་ཆོག་བཟོས་ཡོད་པ་མ་ཟད། ཟླ་འདིའི་ཕྱི་ཚེས་ ༤ ཉིན་བརྟག་དཔྱད་ཡོ་ཆས་ཕྱིར་འདྲེན་མི་ཆོག་རྒྱུའི་བཀའ་རྒྱ་བཏང་ཡོད་པ་རེད།
རྒྱ་གར་དབུས་གཞུང་གི་འཕྲོད་བསྟེན་དང་ཁྱིམ་ཚང་བདེ་དོན་ལྷན་ཁང་གི་གྲངས་ཐོ་ལྟར་ན། དེ་རིང་སྔ་དྲོའི་ཆུ་ཚོད་ ༩ པའི་བར་རྒྱ་གར་ནང་ཁྱོན་མངའ་སྡེ་དང་ཐད་སྐྱོང་ཁུལ་ ༣༠ ནང་ཏོག་དབྱིབས་ནད་པ་ ༤༠༦༧ ཐོན་ཡོད་པའི་ཁྲོད་ནས། ནད་པ་ ༡༠༩ རྐྱེན་འདས་སུ་སོང་ཡོད་པ་དང་། ནད་པ་ ༢༩༢ དྲག་སྐྱེད་བྱུང་ཡོད་འདུག མངའ་སྡེ་དང་ཐད་སྐྱོང་ཁྲོད་ནས་མང་ཤོས་དེ་མཱ་ཧ་ར་ཤི་ཏྲ་(༦༩༠)་དང་། དེ་ནས་ཏ་མིལ་ན་དྷུ་ (༥༧༡)། ལྡི་ལི་ (༥༠༣) བཅས་ཡིན་འདུག དེ་རིང་རྒྱ་གར་རྒྱལ་ཡོངས་ཉིན་གྲངས་ ༢༡ རིང་གི་ཁྱིམ་སྡོད་བཀའ་རྒྱའི་ནང་ཞུགས་ཏེ་ཉིན་གྲངས་ ༡༢ འགྲོ་ཡི་ཡོད་ཀྱང་། རྒྱ་གར་དབུས་དང་ལྷོ་བརྒྱུད་ཀྱི་ས་ཁུལ་ཁག་ཏུ་ཏོག་དབྱིབས་ནད་པའི་གྲངས་འབོར་ཉིན་རེ་བཞིན་འཕར་བཞིན་ཡོད་པ་མ་ཟད། རྒྱ་གར་གྱི་ཁྱོན་རྫོང་ཁག་ ༧༣༢ ཁྲོད་ནས་རྫོང་ཁག་ ༦༢ ཀྱིས་རྒྱ་གར་རྒྱལ་ཡོངས་ཀྱི་ཏོག་དབྱིབས་ནད་པའི་གྲངས་འབོར་བརྒྱ་ཆ་ ༨༠ ཟིན་གྱི་ཡོད་སྟབས། རྫོང་ཁག་ ༦༢ དེ་དག་ཉིན་གྲངས་ ༢༡ རྗེས་སུ་ཡང་མུ་མཐུད་ཁྱིམ་སྡོད་བཀའ་རྒྱའི་འོག་གནས་དགོས་པ་ཆགས་སྲིད་སྐོར་རྗོད་བཞིན་འདུག
ཨ་རིའི་ཇོན་ཧོབ་སི་ཀིན་གཙུག་ལག་སློབ་གྲྭའི་ཏོག་དབྱིབས་ནད་ཡམས་ཞིབ་འཇུག་ལྟེ་གནས་ཁང་གི་གྲངས་ཐོ་ལྟར་ན། དེ་རིང་ཉིན་གུང་བར་འཛམ་གླིང་ཁྱོན་ཡོངས་སུ་ཏོག་དབྱིབས་ནད་པའི་གྲངས་འབོར་ ༡༢,༧༦,༣༠༢ ལ་འཕར་ཡོད་པའི་ཁྲོད་ནས། ཁྱོན་ནད་པ་ ༦༩,༥༢༧ རྐྱེན་འདུས་སུ་སོང་ཡོད་འདུག རྒྱལ་ཁབ་ཀྱི་ཆ་ནས་ཨ་རི་(༣,༣༧,༦༤༦)དེ་འཛམ་གླིང་ནང་གི་ཏོག་དབྱིབས་ནད་པའི་གྲངས་འབོར་མང་ཤོས་དེ་ཡིན་ཞིང་། འདས་གྲངས་ཀྱི་ཆ་ནས་ཨི་ཊ་ལི་(༡༥,༨༨༧)དེ་མང་ཤོས་ཆགས་ཡོད་འདུག
གསར་འགོད་པ། པ་སངས་ཚེ་རིང་།
