རྒྱ་ནག་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལས་དོན་ལྷན་ཚོགས་ཀྱི་གྲོས་མོལ་ཚོགས་ཆུང་ནང་བསྐོས་པར་སྐྱོན་བརྗོད་ཤུགས་ཆེན་གནང་།
ཟླ་འདིའི་ཕྱི་ཚེས་ ༡ ཉིན་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལས་དོན་ལྷན་ཚོགས་ཀྱི་གྲོས་མོལ་ཚོགས་ཆུང་ནང་དུ། རྒྱ་ནག་ཨེ་ཤ་ཡའི་ཞི་བདེ་རྒྱ་མཚོའི་ཁུལ་གྱི་འཐུས་མིར་བསྐོས་ཡོད་པར་བརྟེན། ཨ་རིའི་གྲོས་ཚོགས་འཐུས་མི་དང་རྒྱལ་ཚོགས་གནད་དོན་ལྟ་ཞིབ་ཁང་སོགས་ནས་སྨྲ་བརྗོད་རང་དབང་དང་ཆོས་དད་རང་དབང་སོགས་རྡོག་རོལ་གཏོང་མཁན་སྡུག་ཤོས་ཤིག་རྒྱལ་ཚོགས་ཀྱི་ལས་དོན་ལྷན་ཚོགས་ཀྱི་གྲོས་མོལ་ཚོགས་ཆུང་ནང་བསྐོ་བཞག་བྱུང་བར་སྐྱོན་བརྗོད་གནང་གི་ཡོད་པ་མ་ཟད། འཛམ་གླིང་འཕྲོད་བསྟེན་སྒྲིག་འཛུགས་སོགས་རྒྱལ་ཚོགས་ཀྱི་སྒྲིག་འཛུགས་གཞན་གྱི་ནང་རྒྱ་ནག་གཞུང་གིས་ཤུགས་རྐྱེན་སྤྲོད་བཞིན་པར་ཞིབ་འཇུག་དགོས་པའི་འབོད་སྐུལ་གནང་འདུག
དེའི་ཐད་ཇི་ནི་ཝར་རྟེན་གཞི་བྱས་ཡོད་པའི་རྒྱལ་ཚོགས་ལྟ་ཞིབ་ཁང་གི་འགན་འཛིན་ (Hillel Neuer) ལགས་ཀྱིས། དྲག་གནོན་དང་མི་སྤྱོད་ལས་འདས་པའི་སྲིད་བྱུས་ཅན་གྱི་རྒྱ་ནག་གཞུང་ལ་འཛམ་གླིང་ནང་དོན་མེད་འཛིན་བཟུང་བྱས་པ་དང་། གར་སོང་ཆ་མེད་དུ་གྱུར་བ། དེ་བཞིན་སྨྲ་བརྗོད་རང་དབང་དང་ཆོས་དད་རང་དབང་གི་གནས་བབ་ལ་རྟོག་ཞིབ་བྱེད་པའི་དབང་ཚད་སྤྲད་པ་ནི་མེར་སྲེག་གཏོང་འདོད་ཡོད་མཁན་ཞིག་སྡེ་བའི་མེ་གསོད་རུ་ཁག་གི་འགན་འཛིན་ལ་བསྐོས་པ་དང་གཅིག་མཚུངས་ཡིན་པ་རེད། ཅེས་བརྗོད་དེ། རྒྱ་ནག་ནི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལས་འཛིན་ལྷན་ཚོགས་ནང་བསྐོས་པ་ནི་གནས་ལུགས་དང་འགལ་ཡོད་པ་མ་ཟད་མི་སྤྱོད་ལས་འདས་པའི་ཐག་གཅོད་ཞིག་ཡིན་སྐོར་བརྗོད་འདུག
དེ་བཞིན་རྒྱལ་ཚོགས་ལྟ་ཞིབ་ཁང་གིས། རྒྱལ་ཚོགས་ཀྱི་སྤྱི་ཁྱབ་དྲུང་ཆེ་ཨན་ཊོ་ནཱོ་གྷ་ཊིར་ (Antonio Guterres) དང་འགྲོ་བ་མིའི་ཐོབ་ཐང་གི་གཙོ་འཛིན་མཱེ་ཤལ་བྷ་ཆཱེ་ཊི་ (Michelle Bachelet) གཉིས་ཀྱིས། རྒྱ་ནག་དེ་འགྲོ་བ་མིའི་ཐོབ་ཐང་ལྷན་ཚོགས་ཀྱི་ལས་འཛིན་པའི་ནང་བསྐོས་པར་ཡོངས་གྲགས་ཐོག་སྐྱོན་བརྗོད་གནང་དགོས་པར་མ་ཟད། རྒྱ་ནག་གི་གཙོས་འཛམ་གླིང་གི་འགྲོ་བ་མིའི་ཐོབ་ཐང་དང་འབྲེལ་དཀའ་སྡུག་མྱོང་བཞིན་པའི་གནོད་འཚེ་ཕོག་ཡུལ་གྱི་གང་ཟག་རྣམས་ལ་རྒྱབ་སྐྱོར་གནང་དགོས་པའི་འབོད་སྐུལ་ཞུས་འདུག་པ་མ་ཟད། འགྲོ་བ་མིའི་ཐོབ་ཐང་ལྷན་ཚོགས་ནས་ཐག་གཅོད་དེར་མོས་མཐུན་གནང་བ་དེ་ནི་ཁྲིམས་ཀྱི་རང་བཞིན་ལ་སྣང་ཆུང་བྱས་ཡོད་སྐོར་བརྗོད་དེ་སྐྱོན་བརྗོད་གནང་འདུག
ཁ་སང་ཨ་རིའི་གྲོས་ཚོགས་ཀྱི་འགྲོ་བ་མིའི་ཐོབ་ཐང་ཚན་པའི་འཐུས་མི་(Chris Smith)ལགས་ཀྱིས། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལས་དོན་ལྷན་ཚོགས་ཀྱི་གྲོས་མོལ་ཚོགས་ཆུང་གིས་གསར་འགོད་རང་དབང་དང་མནར་གཅོད། ཁྲིམས་ལས་བརྒལ་བའི་ཐག་གཅོད་དང་གར་སོང་ཆ་མེད་སོགས་ཀྱི་གནད་དོན་ཐོག་ཞིབ་འཇུག་གི་ནུས་པ་གང་ལེགས་ཐོན་ཡོད་སྐོར་བརྗོད་ཡོད་པ་དང་འབྲེལ། རྒྱ་ནག་གཞུང་གི་འགྲོ་བ་མིའི་ཐོབ་ཐང་གི་ལོ་རྒྱུས་ཟིན་ཐོའི་ནང་བོད་བརྒྱུད་ནང་བསྟན་དང་ཆོས་འཁོར་རྩ་རླུང་སོགས་ཆོས་ལུགས་ཁག་དང་། ཡུ་གུར་བ་སོགས་གྲངས་ཉུང་མི་རིགས་ལ་བཙན་གནོན་གདུག་རྩུབ་ཅན་གྱི་སྲིད་བྱུས་ལག་བསྟར་བྱས་ཡོད་པ་གསལ་པོ་མངོན་ཡོད་ལ། དོན་དངོས་ཀྱི་ཐོག་ནས་རྒྱ་ནག་གཞུང་གིས་ཆབ་སྲིད་བཙོན་པའི་ནང་ཁྲོལ་བཏོན་ཏེ་ནག་ཚོང་རྒྱག་གི་ཡོད་པའི་བདེན་དཔང་ཇེ་མང་ནས་ཇེ་མང་དུ་འགྲོ་བཞིན་ཡོད་སྟབས། རྒྱ་ནག་རང་ཉིད་ཀྱི་ཟིན་ཐོ་གཙང་མ་མ་ཆགས་བར་དུ་རྒྱ་ནག་གཞུང་གི་མི་སྣ་ཞིག་གིས་རྒྱལ་ཁབ་གཞན་གྱི་འགྲོ་བ་མིའི་ཐོབ་ཐང་ལ་རྡོག་རོལ་བཏང་བའི་གནད་དོན་ལ་ཞིབ་འཇུག་བྱེད་པའི་འོས་བབ་རྩ་བ་ནས་མེད་ཅེས་བརྗོད་འདུག་པ་མ་ཟད། རྒྱ་ནག་གཞུང་གིས་འཛམ་གླིང་འཕྲོད་བསྟེན་སྒྲིག་འཛུགས་སོགས་རྒྱལ་ཚོགས་ཀྱི་སྒྲིག་འཛུགས་གཞན་ལ་ཤུགས་རྐྱེན་སྤྲོད་བཞིན་ཡོད་པ་དེར་ཞིབ་འཇུག་དགོས་པའི་འབོད་སྐུལ་གནང་འདུག
གྲོས་མོལ་ཚོགས་ཆུང་དེའི་ཚོགས་ཞུགས་པ་ཚོས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་བྱེད་ཕྱོགས་དང་འབྲེལ་ནས་ཨེ་ཤ་ཡའི་ནང་གི་ཆོས་དད་རང་དབང་དང་སྨྲ་བརྗོད་རང་དབང་སོགས་འགྲོ་བ་མིའི་ཐོབ་ཐང་ཐད་རྟོག་ཞིབ་བྱེད་ཀྱི་ཡོད་པ་དང་། སྙན་ཐོ་འདོན་པ་སོགས་ཀྱི་ཐག་གཅོད་བྱེད་ཕྱོགས་ལ་ཤུགས་རྐྱེན་ཆེན་པོ་སྤྲོད་ཐུབ་ཀྱི་ཡོད་འདུག་ལ། འགྲོ་བ་མིའི་གཞི་རྩའི་ཐོབ་ཐང་ཁག་གི་གནས་སྟངས་ཐད་རྟོག་ཞིབ་གནང་མཁན་ཚོགས་ཆུང་གི་མི་སྣ་ ༡༧ ལྷག་འདེམས་སྒྲུག་བྱེད་རྒྱུའི་ཐོག་ཤུགས་རྐྱེན་སྤྲོད་ཐུབ་ཀྱི་ཡོད་འདུག
ཕྱི་ལོ་ ༢༠༡༨ ཟླ་ ༦ པའི་ནང་ཨ་རི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་ནས་ཕྱིར་བུད་ཡོད་པ་དང་། སྐབས་དེར་ཨ་རིའི་རྒྱལ་ཚོགས་ཀྱི་སྐུ་ཚབ་ལྕམ་ནི་ཁི་ཧ་ལེ (Nikki Haley) ཡིས། འགྲོ་བ་མིའི་ཐོབ་ཐང་ལྷན་ཚོགས་དེ་ནི་འགྲོ་བ་མིའི་ཐོབ་ཐང་རྡོག་རོལ་གཏོང་མཁན་འགེབས་སྲུང་བྱེད་མཁན་ཞིག་དང་། ཆབ་སྲིད་ཀྱི་ཕྱོགས་རིས་ཆེ་བའི་རྫབ་དོང་ཞིག་ཡིན་སྐོར་བརྗོད་ཡོད་པ་རེད་ལ། ཨ་རིའི་རྒྱལ་སྲིད་དྲུང་ཆེ་མེག་ཕོམ་པེ་ (Mike Pompeo) ཡིས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱིས་འཛམ་གླིང་ནང་འགྲོ་བ་མིའི་ཐོབ་ཐང་རྡོག་རོལ་འགྲོ་བཞིན་པར་འཐུས་ཤོར་བཏང་ཡོད་པ་དང་། འགྲོ་བ་མིའི་ཐོབ་ཐང་རྡོག་རོལ་གཏོང་མཁན་སྡུག་ཤོས་ཚོ་ལྷན་ཚོགས་ནང་ཡོད་པ་རེད། ཅེས་གསུངས་ཡོད་པ་རེད།
གསར་འགོད་པ། ཀླུ་མགོན་ཐར།
O ho ! ? UN ?? is Corona Virus ? ☠️ ❗️? ? ? Thooo Thooo….. ?♂️