ཨ་རིའི་ནང་གནས་སྡོད་བོད་མི་འགར་ཏོག་དབྱིབས་ནད་ཡམས་འགོས།

ཨ་རིའི་ནང་ཏོག་དབྱིབས་ནད་ཡམས་ཀྱིས་བོད་མི་བགྲེས་སོང་ཞིག་འདས་གྲོངས་དང་སྨན་ཞབས་པ་སོགས་བོད་མི་ཁག་ཅིག་ལ་ནད་ཡམས་དེ་འགོས་ཡོད་འདུག འདས་པའི་བདུན་ཕྲག་གཉིས་ཙམ་གྱི་ནང་ཕྱི་རྒྱལ་ཁག་ཏུ་ཡོད་པའི་བོད་མི་ཁག་ཅིག་ལ་ཏོག་དབྱིབས་ནད་ཡམས་འགོས་ཡོད་པའི་གནས་ཚུལ་ཐོན་ཡོད་པ་དང་། ཁ་སང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ནས་བོད་ཀྱི་གཞུང་འབྲེལ་བརྙན་འཕྲིན་དྲ་ལམ་བརྒྱུད་ཏོག་དབྱིབས་ནད་ཡམས་དང་འབྲེལ་བའི་ལམ་སྟོན་གནང་སྐབས། ཟླ་འདིའི་ཕྱི་ཚེས་ ༥ ཉིན་ཨ་རིའི་ནང་དགུང་ལོ་ ༨༠ ཙམ་ཡིན་པའི་བོད་མི་ཞིག་ནད་ཡམས་ཀྱི་རྐྱེན་པས་འདས་གྲོངས་སུ་གྱུར་ཡོད་པ་དང་། སྨན་ཞབས་པ་སོགས་བོད་མི་ཁག་ཅིག་ལ་ནད་ཡམས་དེ་འགོས་ཡོད་སྟབས། སྲིད་སྐྱོང་མཆོག་ནས་བོད་རིགས་སྨན་པ་དང་སྨན་ཞབས་པ་རྣམ་པའི་ལྷག་བསམ་དང་སྙིང་སྟོབས་ལ་བསྔགས་བརྗོད་དང་སྦྲགས་ཚང་མས་ཁོང་ཚོར་ཐུགས་སྨོན་གནང་དགོས་སྐོར་གསུངས་སོང་།

དེ་ཡང་སྲིད་སྐྱོང་མཆོག་གིས། ཨ་རིའི་རྒྱལ་ཡོངས་ནང་ནད་ཡམས་འདི་ཤུགས་ཆེན་པོ་ཁྱབ་སྟེ་འདས་གྲོངས་སུ་འགྲོ་མཁན་མང་པོ་ཡོང་སྡོད་ཀྱི་འདུག གོ་ཐོས་ལ་ནེའུ་ཡོག་ནང་ཛ་དྲག་ཤོས་ཆགས་ཡོད། བོད་མིའི་ནང་ལ་ཡང་འདས་གྲོངས་སུ་གྱུར་བ་གཅིག་དང་སྙུང་མཁན་ཡང་འགའ་ཤས་ཤིག་ཡོང་གི་ཡོད་ས་རེད། དེ་དག་ཚང་མ་ལ་ཐུགས་སྨོན་གནང་རོགས་གནང་། དེ་བཞིན་སྨན་ཞབས་པ་ ༡༦ ཙམ་ཟུར་བཅད་བྱས་ནས་བཞུགས་འདུག སྨན་ཞབས་པ་ཡིན་སྟབས་སྨན་ཁང་ལ་ཡང་ཡང་ཕེབས་དགོས་ཀྱི་ཡོད་པ་དང་། སྨན་ཁང་ནང་ལ་ནད་པ་མང་པོ་སླེབས་ཀྱི་ཡོད་སྟབས་འགོས་ནད་འདི་འགོ་བའི་ཉེན་ཁ་ཆེན་པོ་ཡོང་གི་ཡོད་པ་རེད། འགའ་ཤས་ལ་འགོས་པ་དེ་འདྲ་བྱུང་འདུག འགོས་ནས་དྲག་པ་དེ་འདྲའང་བྱུང་འདུག ཡང་འགའ་ཤས་འགོས་ནས་གནས་བསྡད་པ་དེ་འདྲ་འདུག འོན་ཀྱང་སྨན་ཞབས་པ་ཚང་མ་སྙུང་འདུག་ཅེས་ཟེར་གྱི་མེད། ང་ཚོ་ཚང་མས་ཁོང་རྣམ་པར་ཐུགས་སྨོན་གནང་རྒྱུ་ཤིན་ཏུ་གལ་ཆེན་པོ་རེད། ཅེས་གསུངས་སོང་།

བོད་མི་སྨན་པ་དང་སྨན་ཞབས་པ་ཚོས་གཟབ་དགོས་པའི་གནད་དོན་སྐོར་ནས་སྲིད་སྐྱོང་མཆོག་གིས། སྨན་ཁང་ནང་ལས་ཀ་བྱེད་མཁན་གྱི་བོད་མི་སྨན་པ་དང་སྨན་ཞབས་པ་ཚང་མས་ཧ་ལས་པའི་འགན་འཁུར་ཆེན་པོ་བཞེས་ཀྱི་ཡོད་པ་རེད། ཆོས་ཕྱོགས་ཐོག་ནས་བརྩིས་པ་ཡིན་ན་ང་ཚོས་དུས་རྟག་ཏུ་བྱམས་སྙིང་རྗེ་ཟེར་བ་དེ་སྨན་པ་དང་སྨན་ཞབས་པ་ཚོས་ལག་བསྟར་རང་གནང་སྟེ། ད་ལན་ན་ཚ་འདི་འགོས་ནད་རེད་དེ། ཡིན་ན་ཡང་ཉེན་ཁ་ལ་མ་ལྟོས་པའི་ཐོག་ནས་སྨན་ཁང་ལ་སོ་སོས་འགན་འཁྱེར་པའི་ཐོག་ནས་ཕེབས་ཏེ། ནད་པ་ཚོར་ཞབས་ཕྱི་ཞུ་བཞིན་པ་དེ་བསྔགས་བརྗོད་བྱེད་འོས་པ་ཞིག་རེད། ཅེས་གསུངས་སོང་བ་མ་ཟད། ཨ་རིའི་ནེའུ་ཡོག་གཙོས་པའི་ཡུ་རོབ་དང་འཛམ་གླིང་གང་སར་བོད་མི་སྨན་པ་དང་སྨན་ཞབས་པ་ཚོས་ཉེན་ཁ་ལ་མ་འཛེམ་པར་སྨན་ཁང་དུ་བསྐྱོད་དེ་ཞབས་ཕྱི་ཞུ་བཞིན་པ་དེར་བོད་མིའི་སྒྲིག་འཛུགས་ཀྱི་ཚབ་བྱས་ཏེ་ཐུགས་རྗེ་ཆེ་ཞུ་ཡི་ཡོད་ཅེས་གསུངས་སོང་།

དེ་བཞིན་གཉན་འཕྲང་ཅན་གྱི་དུས་སྐབས་འདིར་བོད་མི་ནང་ཁུལ་ལ་གཅིག་ཕན་གཅིག་གྲོགས་གནང་གལ་ཆེ་བའི་སྐོར་ནས་སྲིད་སྐྱོང་མཆོག་གིས། བྱང་ཨ་རིས་གཙོས་པའི་ཡུ་རོབ་དང་བོད་མི་གནས་སྡོད་ཡོད་སར་བོད་རིགས་སྤྱི་མཐུན་ཚོགས་པ་ཚང་མས་གཅིག་ཕན་གཅིག་གྲོགས་བྱས་ཏེ། འགན་འཁུར་ཧ་ལས་པ་བཞེས་གནང་གི་འདུག མུ་མཐུད་བཞེས་རོགས་གནང་། གང་ཡིན་ཟེར་ན། ང་ཚོ་བོད་པའི་མི་འབོར་ཉུང་ཤས་ཤིག་ལས་མེད་སྟབས། ནང་ཁུལ་ལ་གཅིག་ཕན་གཅིག་གྲོགས་བྱེད་རྒྱུ་དེ་ཤིན་ཏུ་གལ་ཆེན་པོ་རེད། དུས་རྟག་ཏུ་༧གོང་ས་མཆོག་ནས་བོད་མི་ཚོ་མ་འདྲ་བ་ཞིག་ཡོད་ཅེས་གསུང་གི་ཡོད་པ་ནང་བཞིན། ད་ལན་འཛམ་གླིང་སྤྱི་ཡོངས་ལ་ཛ་དྲག་གནད་དོན་ཆགས་པའི་སྐབས་ལ། གཞན་ལ་ཡིན་དང་ཡིན། རང་ལས་གཞན་གཅེས་ཞེས་གསུང་གི་ཡོད་པ་བཞིན་སྤྱི་མཐུན་ཚོགས་པ་ཚོས་ཧུར་ཐག་གནང་རོགས། ད་བར་གནང་བ་དེར་བསྔགས་བརྗོད་ཞུ་ཡི་ཡོད། ཅེས་གསུངས་འདུག

ཡང་སྲིད་སྐྱོང་མཆོག་ནས་བླ་སྨན་པ་ཚེ་དབང་རྟ་མགྲིན་ལགས་ཀྱིས་གསུངས་པ་ལྟར། བོད་ཀྱི་གསོ་རིག་སྔོན་འགོག་གི་སྨན་བཞུགས་སྒར་རྡ་ས་དང་ས་གནས་ཁག་ལ་བགོ་འགྲེམས་གནང་བཞིན་ཡོད་སྐོར་དང་། གཞན་ཡང་ཕྱི་རྒྱལ་མི་སེར་གྱི་ལག་འཁྱེར་ཡོད་པའི་བོད་མི་རྒྱ་གར་ནང་ཡོད་པ་རྣམས་ཆུ་ཚོད་ ༤༨ ནང་ཚུད་མིང་ཐོ་འབུལ་དགོས་པའི་བཀའ་བཏང་བ་ལྟར་ཕལ་ཆེ་བའི་མིང་ཐོ་འབྱོར་ཡོད་པ་དང་། དེ་དག་གི་ཐོངས་མཆན་རྫོགས་ལ་ཉེ་བ་སོགས་ཡོད་ན། འབྲེལ་ཡོད་ས་གནས་འགོ་འཛིན་དང་གཞུང་ཚབ་ཁང་ལ་འབྲེལ་བ་གནང་དགོས་སྐོར་གྱི་ལམ་སྟོན་གནང་འདུག

གསར་འགོད་པ། པ་སངས་ཚེ་རིང་།