རྒྱ་ནག་གཞུང་གིས་ད་ལྟ་འཛུགས་སྐྲུན་བྱེད་བཞིན་པའི་ཁྲོན་བོད་ལྕགས་ལམ་ནི་མ་འོངས་པར་ཡུན་ནན་དང་བོད་རང་སྐྱོང་ལྗོངས་ལྕགས་ལམ་གྱི་འབྲེལ་གནས་ཆགས་ཡོད་ཟེར།
ཁ་སང་ཕྱི་ཚེས་ ༧ ཉིན། རྒྱ་ནག་གཞུང་འབྲེལ་ལྕགས་ལམ་བཟོ་སྐྲུན་ཨང་ ༡༩ པས་བོད་ཤར་ཕྱོགས་ཀྱི་མདོ་སྟོད་སྨད་གཉིས་ཀྱི་ཕྱེད་ཀ་ཚུད་པའི་སི་ཁྲོན་ནས་བོད་ཀྱི་རྒྱལ་ས་ལྷ་ས་བར་མྱུར་བགྲོད་ལྕགས་ལམ་འཛུགས་སྐྲུན་ལས་གཞི་ལས། བོད་ཀྱི་རྒྱལ་ས་ལྷ་ས་དང་ཉིང་ཁྲིའི་བར་གྱི་སྤྱི་ལེ་ ༢༡༦༥ ལྷག་ཡོད་པའི་རི་བྲག་བརྐོས་པའི་ཕུག་ལམ་ ༤༧ བརྟོལ་ནས་ལམ་ཚང་མ་ཕན་ཚུན་མཐུད་ཚར་ཡོད་པ་དང་། དེ་ནི་རྒྱ་ནག་གིས་འབོད་བཞིན་པའི་ཁྲོན་བོད་ལྕགས་ལམ་འཛུགས་སྐྲུན་སྐབས་ཨར་ལས་ཐད་ཆེས་དཀའ་ངལ་ཡོད་པའི་ཕུག་ལམ་རིང་ཤོས་ཁག་ཅིག་གྲུབ་ཡོད་པར་བཤད།
གནད་དོན་དེའི་ཐད་ལྕགས་ལམ་བཟོ་སྐྲུན་བཀོད་འདོམས་ཁང་གི་འགན་འཛིན་ཧོ་ཞུས་ཟེར་བ་དེས། ཕུག་ལམ་ཨར་ལས་ཀྱིས་བྲག་རི་འབར་གས་དང་འཁྱགས་རོམ་གྱི་བང་རིམ་བརྒལ་བ། རླུང་བསགས་བྱེ་ཕུང་སོགས་འཛམ་གླིང་རིམ་པའི་ཕུག་ལམ་ཨར་ལས་ཀྱི་དཀའ་གནད་མང་པོ་ཞིག་དང་འཕྲད་པ་དང་། ལྷ་ཉིང་ལྕགས་ལམ་ནི་ད་ལྟ་འཛུགས་སྐྲུན་བྱེད་བཞིན་པའི་ཁྲོན་བོད་ལྕགས་ལམ་ཡིན་ཞིང་། དེ་ནི་མི་འགྱངས་པར་བསྐྲུན་རྒྱུའི་ཡུན་ནན་དང་བོད་རང་སྐྱོང་ལྗོངས་ལྕགས་ལམ་གྱི་འབྲེལ་གནས་ཆགས་ཡོད་པ་དང་། ལྕགས་ལམ་དེས་བོད་ལྗོངས་དེ་སི་ཁྲོན་དང་ཁྲུང་ཆིང་གི་དཔལ་འབྱོར་ཁུལ་དང་འབྲི་ཆུའི་དཔལ་འབྱོར་ཁུལ་དང་འབྲེལ་མཐུད་བྱུང་ནས་བོད་ལྗོངས་གསར་སྤེལ་འཛུགས་སྐྲུན་དང་དཔལ་འབྱོར་འཕེལ་རྒྱས་ཐད་དོན་སྙིང་གལ་ཆེན་ལྡན་སྐོར་བརྗོད།
རྒྱ་ནག་གཞུང་འབྲེལ་གསར་ལམ་ཁག་ཏུ་སྤེལ་བ་ལྟར་ན། ལྷ་ས་དང་ཉིང་ཁྲིའི་བར་གྱི་ལྕགས་ལམ་ནི་སི་ཁྲོན་དང་བོད་ཀྱི་རྒྱལ་ས་ལྷ་སའི་ལྕགས་ལམ་གྱི་མཐུད་མཚམས་ཆགས་ཀྱི་ཡོད་པ་དང་། ལྷ་ས་དང་ཉིང་ཁྲིའི་ལྕགས་ལམ་ནི་བོད་ལྗོངས་ཀྱི་ལྷོ་ཕྱོགས་སུ་གངས་ཏི་སེ་བརྒལ་ཏེ་ཡར་ཀླུང་གཙང་པོའི་ལུང་ཤུར་དུ་བསྐྱོད་ནས་གོང་དཀར་རྫོང་ནས་ཡར་ཀླུང་གཙང་པོ་བརྒལ་རྗེས་ལུང་ཤུར་བརྒྱུད་རྗེས། ཤར་ཕྱོགས་སུ་གྲ་ནང་དང་། སྣེ་གདོང་། ཟངས་རི། རྒྱ་ཚ། སྣང་རྫོང་། སྨན་གླིང་བཅས་བརྒྱུད་རྗེས་ཉང་ཆུ་བརྒྱུད་དེ་ཉིང་ཁྲིར་འགྲོ་བ་དང་། ལྕགས་ལམ་ཧྲིལ་པོར་སྤྱི་ལེ་ ༢༡༦༥ དང་ཕུག་ལམ་ ༤༧ ཡོད་པ་དང་། ཕུག་ལམ་དེ་དག་ནང་སྤྱི་ལེ་ ༡༠ ཡན་གྱི་ཕུག་ལམ་རིང་ཤོས་དྲུག་དང་། ཟམ་པ་ ༡༢༠ ཡོད་པ་ལས་ཟམ་པ་ ༡༡༩ འཛུགས་སྐྲུན་ཚར་ཡོད་པ་དང་། སྔོན་དཔག་བྱས་ན་ཕྱི་ལོ་ ༢༠༢༠ ལོ་མཇུག་ཏུ་ལྕགས་ལམ་ཧྲིལ་པོ་ཚར་རྒྱུ་ཡིན་སྐོར་བརྗོད་འདུག
ད་ལྟའི་ཆར་རྒྱ་གཞུང་གིས་བོད་ཀྱི་ས་ཁུལ་ཁག་ནས་ལྷ་སར་མཐུད་པའི་གཞུང་ལམ་དང་ལྕགས་ལམ་སོགས་ཀྱི་མིང་ལ་མཚོ་བོད་ལམ་དང་ཁྲོན་བོད་ལམ། དེ་བཞིན་ནུབ་བོད་ལམ་སོགས་མིང་འདྲ་མིན་འོག་ནས་ལྕགས་ལམ་དང་གཞུང་ལམ་སོགས་འཛུགས་སྐྲུན་བྱེད་ཀྱི་ཡོད་པ་དང་། དེ་དག་གི་དམིགས་ཡུལ་ནི་བོད་ཀྱི་དཔལ་འབྱོར་ཡར་རྒྱས་དང་མཐའ་མཚམས་བརྟན་སྲུང་ལ་དམིགས་ཡོད་སྐོར་བརྗོད་བཞིན་པ་ལས། གཙོ་བོ་བོད་ཡུལ་རྒྱ་བསྒྱུར་གྱི་སྲིད་བྱུས་ལག་བསྟར་ཡོང་ཐབས་དང་རྒྱ་ནག་གི་ཡུལ་སྐོར་སྤྲོ་འཆམ་པ་བོད་ཁུལ་དུ་རྒྱ་སྐྱེད་གཏོང་ཐབས། དེ་བཞིན་མྱུར་བགྲོད་ལྕགས་ལམ་དང་གཞུང་ལམ་ལས་གཞི་རྒྱ་བསྐྱེད་ཀྱིས་བོད་ནང་མཚོན་ཆ་དབོར་འདྲེན་དང་དྲག་དམག་གི་རྟེན་གཞི་ཚུགས་ཐབས་བྱེད་ཀྱི་ཡོད་པའི་གནས་ཚུལ་རིམ་པར་ཐོན་ཡོད་པ་རེད།
ཕྱི་ལོ་ ༢༠༡༦ ལོར་ཧོང་ཀོང་རང་དབང་གསར་ཁང་གིས་དབྱེ་ཞིབ་གསར་འགྱུར་ཞིག་སྤེལ་བའི་ནང་། རྒྱ་ནག་གཞུང་གིས་བོད་ཁུལ་དུ་ཡུལ་སྐོར་སྤྲོ་འཆམ་པའི་བསྟི་གནས་མང་པོ་འཛུགས་སྐྲུན་བྱས་ཏེ། ཕྱི་ལོ་ ༢༠༢༠ ལོར་བོད་ཁུལ་དུ་རྒྱ་རིགས་ཡུལ་སྐོར་སྤྲོ་འཆམ་པའི་གྲངས་འབོར་ལོ་རེར་ས་ཡ་ ༣༥ ཟིན་པའི་ཚོད་དཔག་བྱེད་ཀྱི་ཡོད་པ་དང་། ཕྱི་ལོ་ ༢༠༠༥ ལོར་བོད་ཁུལ་དུ་རྒྱ་རིགས་ཡུལ་སྐོར་སྤྲོ་འཆམ་པ་ས་ཡ་ ༤ ལས་འབྱོར་མེད་ན་ཡང་། ཕྱི་ལོ་ ༢༠༠༦ ལོར་བོད་ཁུལ་དུ་ལྕགས་ལམ་འཛུགས་སྐྲུན་བྱས་པ་ནས་བཟུང་། བོད་ཁུལ་དུ་ལོ་རེར་ཆ་སྙོམས་ཡུལ་སྐོར་སྤྲོ་འཆམ་པ་བརྒྱ་ཆ་ ༢༠ ཇེ་མང་དུ་སོང་ཡོད་པ་དང་། ཕྱི་ལོ་ ༢༠༡༦ ལོར་རྒྱ་རིགས་ཡུལ་སྐོར་སྤྲོ་འཆམ་པ་ས་ཡ་ ༢༤ ཟིན་ཡོད་འདུག
གསར་འགོད་པ། སངས་རྒྱས་དཀོན་མཆོག
