རིན་ཀྲི་ཆིང་ལ་འདྲི་ཞིབ་བྱེད་བཞིན་ཡོད་འདུག

ཞི་ཅིན་ཕིན་གཞུང་གིས་ཏོག་དབྱིབས་རིམས་ནད་སྔོན་འགོག་འཐུས་ཤོར་བཏང་ཡོད་པའི་སྐྱོན་བརྗོད་བྱེད་མཁན་ཕྱུག་བདག་རིན་ཀྲི་ཆིང་བཀག་ཉར་འོག་འདྲི་ཞིབ་བྱེད་ཀྱི་ཡོད་འདུགཁ་སང་ཕྱི་ཚེས་ ༨ ཉིན། རྒྱལ་སྤྱིའི་གསར་འགྱུར་ལམ་ཁག་ཏུ་སྤེལ་བའི་གནས་ཚུལ་ལྟར་ན། རྒྱ་ནག་ཝུ་ཧན་གྱི་ཏོག་དབྱིབས་རིམས་ནད་དང་འབྲེལ་རྒྱ་ནག་གི་མགོ་འཁྲིད་ཞི་ཅིན་ཕིན་ལ་སྐྱོན་བརྗོད་རྩོམ་ཡིག་འབྲི་མཁན་དང་། རྒྱ་ནག་དམར་ཤོག་ཚོགས་པའི་ཚོགས་མི་དང་པེ་ཅིན་གྱི་ས་ཁང་ཚོང་བསྒྱུར་བ་རིན་ཀྲི་ཆིང་(Ren Zhiqiang)གར་སོང་ཆ་མེད་དུ་གྱུར་ནས་ཟླ་གཅིག་མ་ཟིན་ཙམ་སོང་རྗེས། རྒྱ་ནག་གཞུང་གིས་ཁོས་ཁྲིམས་འགལ་སྒྲིག་འགལ་ཚབས་ཆེན་བྱས་ཡོད་པའི་ཉེས་མིང་འོག་འདྲི་ཞིབ་བྱེད་བཞིན་ཡོད་པའི་གནས་ཚུལ་ཐོན་འདུག

གནད་དོན་དེའི་ཐད་རྒྱ་ནག་དབུས་སྒྲིག་ཁྲིམས་ཞིབ་བཤེར་ཁང་གིས། རིན་ཀྲི་ཆིང་གིས་གཞུང་གི་བཅའ་ཁྲིམས་དང་རྩ་ཁྲིམས་ལ་ཚབས་ཆེན་འགལ་བའི་བྱ་སྤྱོད་སྤེལ་ཡོད་པས། ད་ལྟ་འདྲི་ཞིབ་ལྟ་རྟོག་འོག་ཡོད་སྐོར་བརྗོད་པ་ལས། གཞན་གནད་དོན་ག་འདྲ་ཞིག་གི་ཐོག་ནས་ཁྲིམས་སྒྲིག་དང་འགལ་ཡོད་པ་དང་། ཁྲིམས་ལུགས་ག་རེ་བརྩི་སྲུང་མ་བྱས་པ་སོགས་ཀྱི་ཞིབ་ཕྲའི་གནས་ཚུལ་གང་ཡང་བརྗོད་མེད་པ་མ་ཟད། ཁོང་གི་གནད་དོན་ཐད་གསར་ལམ་ཁག་ལ་ལན་འདེབས་གང་ཡང་བྱེད་ཀྱི་མེད་འདུག

རིན་ཀྲི་ཆིང་གི་གྲོགས་པོ་ཞིག་གིས་ཨལ་རྗེ་ཛེ་རཱ(ALJZEERA)གསར་ཁང་ལ། རིན་གྱིས་ཏོག་དབྱིབས་རིམས་ནད་ཀྱི་གནད་དོན་དང་འབྲེལ། རྒྱ་ནག་གཞུང་གིས་འཐུས་ཤོར་དང་ཞི་ཅིན་ཕིན་གྱི་ལས་དོན་བྱེད་ཕྱོགས་སྐོར་ནས་དགག་རྩོམ་ཞིག་བྲིས་པ་དང་འབྲེལ། ཕྱི་ཟླ་ ༣ པའི་ཟླ་དཀྱིལ་ཙམ་ནས་གར་སོང་ཆ་མེད་དུ་གྱུར་ཡོད་པ་དང་། ད་ལྟའི་ཆར་སྲིད་གཞུང་གིས་ཁོང་ལ་ཁྲིམས་སྒྲིག་དང་འགལ་ཡོད་པའི་ནག་ཉེས་བཙུགས་ཡོད་ཀྱང་། དེ་ནི་རྒྱ་ནག་གཞུང་གིས་ནམ་རྒྱུན་ནག་ཉེས་གཡོག་སྟངས་ཤིག་ཡིན་པ་ལས་དོན་དངོས་སུ་ཀྱི་གནད་དོན་རྩོམ་ཡིག་དེ་དང་འབྲེལ་བ་ཡོད་སྐོར་བརྗོད་འདུག

རིན་ཀྲི་ཆིང་གིས་ཕྱི་ཟླ་ ༣ ཚེས་ ༨ ཉིན། སྒེར་གྱི་སྤྱི་ཚོགས་དྲ་ལམ་པོད་འཕྲིན་སྟེང་། ཞི་ཅིན་ཕིན་ནི་དབང་ཆ་ལ་རྔམ་མཁན་ཞིག་ཡིན་པ་དང་། རྒྱ་ནག་ནང་ཏོག་དབྱིབས་ནད་ཡམས་བྱུང་སྐབས་དམར་ཤོག་ཚོགས་པས་སྨྲ་བརྗོད་རང་དབང་ཚོད་འཛིན་བྱས་པ་ལ་བརྟེན་ཁྱབ་བརྡལ་ཤུགས་ཆེ་རུ་ཕྱིན་ཏེ། ད་ལྟ་འཛམ་གླིང་ཡོངས་ཛ་དྲག་ཅན་ཏུ་བསྒྱུར་པ་སོགས་ཞི་ཅིན་ཕིན་དང་དམར་ཤོག་ཚོགས་པར་སྐྱོན་བརྗོད་བྱས་པའི་རྩོམ་ཡིག་ཅིག་བྲིས་པ་ནས་གར་སོང་ཆ་མེད་དུ་གྱུར་ཡོད་པ་དང་། ཁོང་གི་རྩོམ་ཡིག་དེ་རྒྱ་ནག་གི་སྤྱི་ཚོགས་དྲ་ལམ་ཁག་ཏུ་གླེང་སློང་ཆེན་པོ་བྱུང་བ་དང་འབྲེལ་དྲ་ལམ་ཁག་ནས་ནག་བསུབ་བཏང་ཡོད་པ་རེད།

ཁོང་གི་རྩོམ་ཡིག་དེ་དང་འབྲེལ། རྒྱ་ནག་ནང་སྔ་རྗེས་སུ་ཞི་ཅིན་ཕིན་གཞུང་ལ་སྐྱོན་བརྗོད་དང་ཞི་ཅིན་ཕིན་སྲིད་སྟེགས་ནས་མར་འབབ་དགོས་པའི་རྩོམ་ཡིག་དང་། དམར་ཤོག་ཚོགས་པའི་དབང་སྒྱུར་སྲིད་བྱུས་ཐད་མིང་རྟགས་བཀོད་པའི་ཞུ་ཡིག་སོགས་རིམ་པར་བསླེབས་ཡོད་པ་དང་། དེ་དག་གི་ཁྲོད་དུ་རྒྱ་ནག་དམར་ཤོག་ཚོགས་པའི་ཚོགས་མི་རྒན་གྲས་དང་། རྒྱ་ནག་ཕྱི་ནང་གཉིས་ཀྱི་དམངས་གཙོ་དོན་གཉེར་བ་དང་རང་དབང་འཐབ་རྩོད་པ། ལས་འགུལ་བ་སོགས་ཡོད་འདུག

རྒྱལ་སྤྱིའི་ཆབ་སྲིད་དཔྱད་བརྗོད་པ་ཚོས་ཏོག་དབྱིབས་རིམས་ནད་ཀྱི་གནད་དོན་དང་འབྲེལ། རྒྱ་ནག་གཞུང་གིས་རྒྱ་ནག་མི་མང་དང་རྒྱལ་སྤྱིའི་སྤྱི་ཚོགས་གཉིས་ལ་ཕྱི་གསལ་ནང་གསལ་བྱས་མེད་པ་མ་ཟད། ད་ལྟའི་ཆར་རྒྱ་ནག་གཞུང་གིས་ཏོག་དབྱིབས་རིམས་ནད་འགོག་རྒོལ་ལ་གྲུབ་འབྲས་ཐོན་ཡོད་པ་སོགས་དྲིལ་བསྒྲགས་སྣ་ཚོགས་བྱས་ཏེ། མི་མང་གི་ཀླད་པ་བཀྲུ་ཐབས་བྱེད་བཞིན་ཡོད་ཀྱང་། ཏོག་དབྱིབས་རིམས་ནད་དང་འབྲེལ་རྒྱ་ནག་མི་མང་དང་ལྷག་པར་དུ་ན་གཞོན་མང་པོ་ཞིག་གིས་དམར་ཤོག་ཚོགས་པའི་ངོ་གདོང་དངོས་སུ་མཐོང་ཐུབ་ཡོད་པ་མ་ཟད། དམར་ཤོག་ཚོགས་པའི་མཐོ་རིམ་མགོ་འཁྲིད་ནང་ཁུལ་ལ་ལྟ་ཚུལ་མི་མཐུན་པ་ཡོང་བཞིན་ཡོད་པས། ཏོག་དབྱིབས་རིམས་ནད་ཀྱིས་རྒྱ་ནག་དམར་ཤོག་ཚོགས་པའི་དབང་བསྒྱུར་གྱི་རྨི་ལམ་ལས་སླ་བོའི་ངང་རྨེག་མེད་དུ་བཏང་ཡོད་སྐོར་བརྗོད་བཞིན་ཡོད་པ་རེད།

རིན་ཀྲི་ཆིང་ནི་ཕྱི་ལོ་ ༡༩༥༡ ལོར་རྒྱ་ནག་ཧྲན་ཏུང་ཞིང་ཆེན་དུ་སྐྱེས་ཤིང་ད་ལོ་ལོ་ན་ ༦༩ ཡིན་པ་དང་། ཁོང་གི་ཨ་ཕ་རིན་ཆཱན་ཧྲིན(Ren Quansheng)ནི་དེ་སྔ་རྒྱ་ནག་དམར་ཤོག་ཚོགས་པའི་ཚོང་ལས་བློན་ཆེན་བྱས་མྱོང་ཡོད་འདུག ཕྱི་ལོ་ ༡༩༦༨ ལོར་རིན་ཀྲི་ཆིང་རྒྱ་ནག་དམར་ཤོག་ཚོགས་པའི་མི་མང་བཅིངས་གྲོལ་དམག་ཁུངས་སུ་འཛུལ་ཞུགས་བྱས་ཡོད་པ་དང་། ཕྱི་ལོ་ ༡༩༨༡ ལོ་ནས་དམག་ཁུངས་ནས་བུད་དེ་དམར་ཤོག་ཚོགས་པའི་ལས་གཉེར་ཁྲོད་ཞུགས་ཡོད་པ་དང་། ཕྱི་ལོ་ ༡༩༨༥ ཁོང་ལ་ནག་ཉེས་གང་ཡང་མེད་པར་ལས་ཁུངས་ཀྱི་སྒྲིག་ཁྲིམས་མ་རྩིས་སྐོར་བརྗོད་ནས་ཟླ་བ་ ༡༤ རིང་བཙོན་འཇུག་བྱས་ཡོད་འདུག ཁོང་ནི་ནམ་རྒྱུན་རྒྱ་ནག་གཞུང་གི་གསར་འགོད་རང་དབང་དང་དབང་སྒྱུར་སྲིད་བྱུས་ལ་སྐྱོན་བརྗོད་བྱེད་མཁན་ཞིག་ཡིན་པ་དང་། རྒྱ་ནག་གི་ཕྱུག་བདག་དང་ཚོང་གཉེར་བ་གྲགས་ཆེན་ཞིག་ཀྱང་ཡིན་འདུག ཁོང་གི་ཝེ་པོ་སྤྱི་ཚོགས་དྲ་རྒྱའི་ནང་རྗེས་འཇུག་མཁན་མི་གྲངས་ས་ཡ་ ༣༧ ལྷག་ཡོད་འདུག

གསར་འགོད་པ། སངས་རྒྱས་དཀོན་མཆོག