ཐའེ་ཝན་དང་འཛམ་གླིང་འཕྲོད་བསྟེན་སྒྲིག་འཛུགས་ཀྱི་གདོང་ཐུག་ཛ་དྲག་ཏུ་ཕྱིན།

ཐའེ་ཝན་གྱི་སྲིད་འཛིན་ཚའེ་ཡེ་ཝིན་མཆོག་གིས་རྒྱལ་ཚོགས་འཕྲོད་བསྟེན་སྒྲིག་འཛུགས་ཀྱི་འགན་འཛིན་ནས་རྒྱ་ནག་གི་གནོན་ཤུགས་ལ་མ་འཛེམ་པར་ཐའེ་ཝན་ནང་བསླེབ་པ་ཡིན་ན་སྒྲིག་འཛུགས་དེས་ཐའེ་ཝན་མི་མང་ལ་དྲང་བདེན་བྱས་མེད་པ་ཤེས་རྟོགས་ཐུབ་སྐོར་གསུངས།དེ་རིང་ཕྱི་ཚེས་ ༡༠ ཉིན་རོའུ་ཊར་གཙོས་པའི་རྒྱལ་སྤྱིའི་གསར་ལམ་ཁག་ཏུ་གནས་ཚུལ་ཐོན་པ་ལྟར་ན། འཛམ་གླིང་འཕྲོད་བསྟེན་ལྷན་ཚོགས་དང་ཐའེ་ཝན་བར་གྱི་ཏོག་དབྱིབས་ནད་ཡམས་དང་འབྲེལ་བའི་གདོང་ཐུག་ཆེན་པོ་འབྱུང་བཞིན་པ་དང་བསྟུན། རྒྱ་ནག་གི་ཐའེ་ཝན་ལས་དོན་ཁང་ཟེར་བས་བསྒྲགས་གཏམ་ཞིག་སྤེལ་ཏེ། ཐའེ་ཝན་གཞུང་གིས་ཏོག་དབྱིབས་ནད་ཡམས་བཀོལ་སྤྱོད་བྱས་ཏེ་རང་བཙན་རྩོད་ཀྱི་ཡོད་པ་མ་ཟད། འཛམ་གླིང་འཕྲོད་བསྟེན་ལྷན་ཚོགས་ལ་འཐབ་རྒོལ་དྲག་པོ་བྱེད་ཀྱི་ཡོད་ལུགས་བསྒྲགས།

ཁ་སང་རྒྱ་ནག་གི་ཐའེ་ཝན་ལས་དོན་ཁང་ཟེར་བས་བསྒྲགས་གཏམ་ཞིག་སྤེལ་བའི་ནང་། ཐའེ་ཝན་གྱི་གཞུང་འཛིན་དམངས་གཙོ་ཡར་རྒྱས་ཚོགས་པའི་ (Democratic Progressive Party) མགོ་འཁྲིད་ཚོས་ནད་ཡམས་འདི་བཀོལ་སྤྱོད་བྱས་ཏེ་རང་བཙན་རྩོད་ཀྱི་ཡོད་པ་མ་ཟད། འཛམ་གླིང་འཕྲོད་བསྟེན་ལྷན་ཚོགས་དང་དེའི་ཁྱབ་ཁོངས་ཀྱི་མི་མང་རྣམས་ལ་འཐབ་རྒོལ་དྲག་པོ་བྱེད་ཀྱི་ཡོད་པ། ད་དུང་དྲ་ལམ་འཇབ་རྒོལ་དམག་དཔུང་དང་ལག་རྡང་སྦྲེལ་ནས་མི་རིགས་དབྱེ་འབྱེད་ཀྱི་བྱ་སྤྱོད་སྤེལ་བཞིན་པ་དེར་མཐའ་གཅིག་ཏུ་ངོ་རྒོལ་ཡོད་སྐོར་བརྗོད་ཡོད་འདུག

རྒྱ་ནག་གི་གྲོང་ཁྱེར་ཝུ་ཧན་ནས་མཆེད་པའི་ཏོག་དབྱིབས་ནད་ཡམས་འདིའི་རྐྱེན་པས་འཛམ་གླིང་འཕྲོད་བསྟེན་ལྷན་ཚོགས་དང་ཐའེ་ཝན་གྱི་འགལ་ཟླ་དེ་སྔར་ལས་ཛ་དྲག་པོར་གྱུར་ཡོད་ཅིང་། ཐའེ་ཝན་གྱིས་དུས་ནས་དུས་སུ་རང་ཉིད་འཛམ་གླིང་འཕྲོད་བསྟེན་ལྷན་ཚོགས་ཀྱི་ཚོགས་མིའི་ཁོངས་སུ་མེད་པའི་རྐྱེན་གྱིས། ཏོག་དབྱིབས་ནད་ཡམས་དང་འབྲེལ་བའི་གནས་ཚུལ་དུས་ཐོག་སྤྲད་མེད་པ་མ་ཟད། ཐའེ་ཝན་གྱིས་འཕྲོད་བསྟེན་ལྷན་ཚོགས་ལ་མཁོ་སྤྲོད་བྱས་པའི་ནད་ཡམས་ཀྱི་གནས་ཚུལ་རིགས་ལ་ལྷན་ཚོགས་ཀྱིས་བདག་ཉར་བྱས་མེད་པའི་སྐྱོན་བརྗོད་བསྟུད་མར་བྱས་ཡོད་སྟབས། ཁ་སང་འཛམ་གླིང་འཕྲོད་བསྟེན་ལྷན་ཚོགས་ཀྱི་སྤྱི་ཁྱབ་འགན་འཛིན་ཊི་དྷི་རོ་སི་ཨ་དྷི་ནོམ་ (Tedros Adhanom Ghebreyesus) གྱིས་གསར་འགོད་གསལ་བསྒྲགས་ཤིག་གི་སྟེང་བདེན་དཔང་གང་ཡང་མེད་པའི་ཐོག་ནས། འདས་པའི་ཟླ་ཤས་རིང་ནས་ཁོ་པར་ཐའེ་ཝན་ནས་མི་རིགས་དབྱེ་འབྱེད་ཀྱི་ཚིག་ངན་དང་སྡིགས་ར་སྐུལ་མཁན་བྱུང་ཡོད་པ་མ་ཟད། ཐའེ་ཝན་གྱི་ཕྱི་སྲིད་ལྷན་ཁང་ངོས་ནས་ཀྱང་བྱ་སྤྱོད་དེའི་རིགས་ལ་ངོ་རྒོལ་སོགས་གང་ཡང་བྱས་མེད་སྐོར་བརྗོད།

ཐའེ་ཝན་གྱི་ཕྱི་སྲིད་ལྷན་ཁང་གི་མགྲིན་ཚབ་པ་ཇོན་ཨོའུ་ (Joanne Ou) ཡིས། འཛམ་གླིང་འཕྲོད་བསྟེན་ལྷན་ཚོགས་ཀྱི་འགན་འཛིན་ཊི་དྷི་རོ་སིས་ཐའེ་ཝན་ལ་ཉེས་འཛུགས་བྱས་པ་དེ་དག་ནི་འགན་འཁུར་མེད་ཅིང་འཆར་ཡན་ཙམ་ལས་མ་འདས་པ་དང་། ཊི་དྷི་རོ་སིས་ཐའེ་ཝན་ལ་དགོངས་སེལ་ཞུ་དགོས་སྐོར་བརྗོད་འདུག་ལ།  སྲིད་འཛིན་ཚའེ་ཡེ་ཝིན་མཆོག་གིས། གལ་ཏེ་འགན་འཛིན་ཊི་དྷི་རོ་སི་ཡིས་རྒྱ་ནག་གི་གནོན་ཤུགས་ལ་མ་འཛེམ་པར། ཐའེ་ཝན་གྱིས་ཏོག་ནད་ཡམས་འགོག་རྒོལ་ཐད་འབད་བརྩོན་གང་བྱེད་བཞིན་པར་རྟོག་ཞིབ་ཆེད་གླིང་ཕྲན་དེར་སླེབས་ཐུབ་ཚེ། ད་གཟོད་ལྷན་ཚོགས་ཀྱིས་ཐའེ་ཝན་མི་མང་རྣམས་ལ་དྲང་བདེན་བྱས་མེད་པ་རྟོགས་ཐུབ་སྐོར་བརྗོད་ཡོད་པ་རེད། དེ་སྔ་ཐའེ་ཝན་དེ་འཛམ་གླིང་འཕྲོད་བསྟེན་ལྷན་ཚོགས་ཀྱི་ཟུར་ཉན་ཁོངས་སུ་ཡོད་ཀྱང་། ཕྱི་ལོ་ ༢༠༡༦ ལོར་སྲིད་འཛིན་ལྕམ་ཚའེ་ཡེ་ཝིན་མཆོག་གིས་སྣེ་ཁྲིད་པའི་དམངས་གཙོ་ཡར་རྒྱས་སྲིད་དོན་ཚོགས་པར་རྒྱལ་ཡོངས་འོས་བསྡུའི་ནང་རྒྱལ་ཁ་ཆེན་པོ་ཐོབ་སྟེ་ཐའེ་ཝན་གྱི་གཞུང་འཛིན་ཚོགས་པར་གྱུར་བར་བརྟེན། རྒྱ་ནག་གིས་དགག་པ་ཤུགས་ཆེར་བྱས་པའི་རྐྱེན་གྱིས་ཟུར་ཉན་གྱི་གནས་བབ་དེ་ཡང་མེད་པར་ཆགས་ཡོད་ཅིང་། འདས་པའི་བདུན་ཕྲག་འགའ་ཤས་རིང་ནས་རྒྱལ་སྤྱིའི་སྤྱི་ཚོགས་ཀྱིས་ཐའེ་ཝན་གྱི་ཏོག་དབྱིབས་རིམས་འགོག་ལས་འགུལ་ལ་བསྔགས་བརྗོད་ཆེན་པོ་བྱེད་བཞིན་ཡོད་པ་དང་བསྟུན། འཛམ་གླིང་འཕྲོད་བསྟེན་ལྷན་ཚོགས་ལ་ཡང་དེ་འབྲེལ་གྱི་གནོན་ཤུགས་སླེབས་མགོ་བཙུགས་ཡོད། ལྷན་ཚོགས་ཀྱི་ཏོག་དབྱིབས་ནད་ཡམས་འགོག་སྲུང་ཐད་ཨ་རིས་ཀྱང་སྐྱོན་བརྗོད་བྱས་ཡོད་པ་རེད།

ཟླ་འདིའི་ཕྱི་ཚེས་ ༧ ཉིན་ཨ་རིའི་སྲིད་འཛིན་ཊོམ་ཕུ་མཆོག་ནས་ཏོག་དབྱིབས་ནད་ཡམས་འགོག་སྲུང་བྱེད་པའི་བརྒྱུད་རིམ་ཁྲོད། རྒྱལ་ཚོགས་ནི་རྒྱ་ནག་གི་ཕྱོགས་སུ་ལྷུང་ཡོད་པས། ཨ་རིའི་སྲིད་འཛིན་གྱིས་རྒྱལ་ཚོགས་འཕྲོད་བསྟེན་ལྷན་ཁང་ལ་རོགས་དངུལ་སྤྲོད་ཀྱི་ཡོད་པ་རྣམས་མཚམས་འཇོག་བྱེད་པར་བསམ་གཞིགས་བྱེད་ཀྱི་ཡོད་སྐོར་བརྗོད་དེ་རྒྱལ་ཚོགས་ཀྱི་ལས་དོན་ལ་སྐྱོན་བརྗོད་བྱས་ཡོད་པ་རེད། དེའི་ཐད་རྒྱལ་ཚོགས་ཀྱི་སྤྱི་ཁྱབ་འགན་འཛིན་ནས་ནད་ཡམས་དེའི་རང་བཞིན་ལ་རྒྱུས་ལོན་ཆེད་རྒྱ་ནག་དང་མཉམ་དུ་ཐག་ཉེ་བོའི་ཐོག་ལས་ཀ་བྱེད་རྒྱུ་ནི་ཧ་ཅང་མཁོ་ངེས་ཅན་ཞིག་ཡིན་པ། དེ་བཞིན་ནད་ཡམས་ཀྱི་གནད་དོན་དེ་ཆབ་སྲིད་ཀྱི་དགོས་མཁོར་མི་བསྒྱུར་བར། ནད་ཡམས་འགོག་སྲུང་ཐད་ཚང་མས་མཉམ་འབྲེལ་བྱ་དགོས་སྐོར་གསུངས་ཡོད་པ་རེད།

རྒྱལ་ཚོགས་འཕྲོད་བསྟེན་ལྷན་ཚོགས་ཀྱི་རོགས་དངུལ་གྱི་བརྒྱ་ཆའི་ ༢༢ ནི་ཨ་རི་ཡིས་སྤྲོད་ཀྱི་ཡོད་པས། འཛམ་གླིང་གི་རོགས་དངུལ་ཆེ་ཤོས་སྤྲོད་མཁན་ཨ་རི་ཆགས་ཡོད་འདུག་ལ། ཟླ་འདིའི་ཕྱི་ཚེས་ ༧ ཉིན་ཨ་རིའི་གྲོས་ཚོགས་འོག་མའི་ནང་གྲོས་ཚོགས་འཐུས་མི་ (Reschenthaler) ལགས་ཀྱིས། རྒྱལ་ཚོགས་ཀྱི་འཕྲོད་བསྟེན་ལྷན་ཚོགས་ཀྱི་སྤྱི་ཁྱབ་འགན་འཛིན་ཊི་དྷི་རོ་སི་ཨ་དྷི་ནོམ་ (Tedros Adhanom Ghebreyesus) གྱིས་འགན་འཛིན་ནས་དགོངས་ཞུ་མ་བྱས་བར་དུ་ཨ་རིས་རྒྱལ་ཚོགས་ལ་སྤྲོད་བཞིན་པའི་རོགས་དངུལ་རྣམས་གནས་སྐབས་སུ་མཚམས་འཇོག་དགོས་པ་དང་། རྒྱ་ནག་གིས་ཏོག་དབྱིབས་ནད་ཡམས་འགོག་སྲུང་བྱ་བ་ཕམ་ཉེས་བྱུང་བའི་གནས་སྟངས་རྒྱལ་ཚོགས་ཀྱིས་འགེབ་སྲུང་བྱས་པར་རྒྱལ་སྤྱིའི་ཚོགས་སྡེ་ཞིག་གིས་ཞིབ་འཇུག་བྱེད་དགོས་པའི་ཁྲིམས་འཆར་ཞིག་ངོ་སྤྲོད་བྱས་ཡོད་པ་རེད།

ཁོང་གིས་བཏོན་པའི་ཁྲིམས་འཆར་དེའི་ནང་། ཨ་རི་མི་མང་གིས་དཀའ་བ་ཁྱད་དུ་བསད་ནས་བསགས་པའི་ཁྲལ་དངུལ་རྣམས་རྒྱ་ནག་གི་རྫུན་གཏམ་དང་དྲིལ་བསྒྲགས་བྱེད་པ་དང་། མི་གྲངས་ཧ་ཅང་མང་པོའི་ཚེ་སྲོག་སྐྱོབ་ཐུབ་པའི་ཏོག་དབྱིབས་ནད་ཡམས་ཀྱི་གནས་ཚུལ་སྦ་གསང་བྱ་ཆེད་བཏང་ཚེ་ནོར་བ་རེད། ཅེས་བཀོད་འདུག་ལ། དེར་གྲོས་ཚོགས་འཐུས་མི་ ༢༡ གིས་རྒྱབ་སྐྱོ་མཚན་རྟགས་བརྒྱབ་ཡོད་པ་རེད།སྐབས་དེར་གྲོས་ཚོགས་འཐུས་མི་ (Reschenthaler) ལགས་ཀྱིས། འཛམ་གླིང་ཁྱོན་ཡོངས་ཀྱི་མིའི་ཚེ་སྲོག་སྐྱོབ་རྒྱུའི་ཚབ་དུ་རྒྱ་ནག་གི་མགོ་ཁྲིད་ཚོར་དོ་ཕོག་མི་འགྲོ་ཆེད། རྒྱ་ནག་གི་ཕྱོགས་སུ་ལངས་ཏེ་ཏོག་དབྱིབས་ནད་ཡམས་ཀྱི་ཛ་དྲག་རང་བཞིན་སྦ་གསང་བྱས་ཡོད་པ་རེད། འདས་ལོའི་ཕྱི་ཟླ་ ༡༢ ཙམ་གྱི་ནང་ཏོག་དབྱིབས་ནད་དུག་དེ་མི་ནས་མི་ལ་འགོས་ཀྱི་ཡོད་པའི་གནས་ཚུལ་དེ་རྒྱ་ནག་གཞུང་གིས་གསང་བ་བྱས་ཡོད་པ་གསལ་པོ་ཡིན་པ་དང་། འདི་ལོའི་ཕྱི་ཟླ་ ༡ ཚེས་ ༢༢ ཉིན་འཛམ་གླིང་གི་རྒྱལ་ཁབ་དུ་མའི་ནང་ཁྱབ་ཡོད་ནའང་། ཟླ་དེའི་ཕྱི་ཚེས་ ༣༠ ཉིན་བར་དུ་རྒྱལ་ཚོགས་ཀྱི་འཕྲོད་བསྟེན་ལྷན་ཚོགས་ནས་ནད་ཡམས་དེ་གོ་ལ་རང་བཞིན་གྱི་ཛ་དྲག་ཅན་གྱི་ནད་ཡམས་ཤིག་ཡིན་པར་བསྒྲགས་ཐུབ་མེད་པ་རེད། ཅེས་སྐྱོན་བརྗོད་བྱས་འདུག

སྤྱིར་ཐའེ་ཝན་དེ་རྒྱ་ནག་དང་ཉེ་འབྲེལ་ཡིན་པ་མ་ཟད། ཚོང་དོན་དང་ཡུལ་སྐོར་སྤྲོ་འཆམ་པའི་ཆ་ནས་ཀྱང་ཕན་ཚུལ་བར་འགྲོ་སྐྱོད་ཤུགས་ཆེན་ཡོད་ན་ཡང་། དེ་རིང་ཐའེ་ཝན་གྱི་ནད་འགོག་ཞིབ་འཇུག་ཁང་གི་གྲངས་ཐོ་ལྟར་ན། ད་བར་ཐའེ་ཝན་རྒྱལ་ཡོངས་ནང་ཏོག་དབྱིབས་ནད་པ་ ༣༨༢ ལས་བྱུང་མེད་ཅིང་། དེ་དག་ཁྲོད་ནས་ཀྱང་ནད་པ་ ༦ ལས་འདས་གྲོངས་སུ་གྱུར་མེད་པ་རེད། ཐའེ་ཝན་དང་ཅུང་འདྲ་བའི་ཨོ་གླིང་ལྟ་བུར་མཚོན་ན། དེ་རིང་བར་རྒྱལ་ཡོངས་ནང་ཁྱོན་ཏོག་དབྱིབས་ནད་པ་ ༦༢༠༤  ཐོན་པའི་ཁྲོད་ནས་ནད་པ་ ༥༤ རྐྱེན་འདས་སུ་སོང་ཡོད་པ་རེད།

གསར་འགོད་པ། པ་སངས་ཚེ་རིང་དང་ཀླུ་མགོན་ཐར།