རྒྱལ་བ་ཀརྨ་པ་མཆོག་གི་བཀའ་དགོངས་བཞིན་རོགས་དངུལ་ཕོན་ཆེན་གནང་།

༸དཔལ་རྒྱལ་བ་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་གི་བཀའ་དགོངས་བཞིན་རྒྱ་གར་དབུས་ས་གཉིས་ལ་རོགས་དངུལ་ཧིན་སྒོར་འབུམ་༢༨་གནང་འདུགཁ་སང་༸དཔལ་རྒྱལ་བ་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་གི་བཀའ་དགོངས་བཞིན། རྒྱ་གར་དུ་རྟེན་གཞི་བྱས་པའི་མཚུར་ཕུ་བླ་བྲང་དང་། ཀུན་སྐྱོང་དགེ་རྩ་ཚོགས་པ། བཀའ་བརྒྱུད་སྨོན་ལམ་བཅས་ནས་རྒྱ་གར་དབུས་དང་མངའ་སྡེའི་ཏོག་དབྱིབས་རིམས་འགོག་བྱ་འགུལ་ལ་རྒྱབ་སྐྱོར་ཆེད་ཁྱོན་ཧིན་སྒོར་འབུམ་ ༢༨ ཀྱི་ཞལ་འདེབས་གནང་ཡོད་འདུག

དེ་ཡང་ཁ་སང་ཕྱི་ཚེས་ ༡༠ ཉིན་ཀུན་སྐྱོང་དགེ་རྩ་ཚོགས་པས་རྒྱ་གར་གྱི་སྲིད་བློན་མུ་དྷི་མཆོག་གི་མཚན་ཐོག་ལ་ཕུལ་བའི་ཕྱག་ཡིག་ནང་། སྲིད་བློན་མུ་དྷི་མཆོག་ནས་སྣེ་ཁྲིད་པའི་རྒྱ་གར་དབུས་གཞུང་གིས་རྒྱ་གར་ནང་ཏོག་དབྱིབས་ནད་ཡམས་འགོས་ཁྱབ་མི་འགྲོ་བའི་ཆེད། དེར་དུས་བསྟུན་འགོག་རྒོལ་དང་སྟངས་འཛིན་གང་ལེགས་གནང་ཡོད་པ་དེར་ཡི་རངས་བསྔགས་བརྗོད་ཞུ་བཞིན་ཡོད་སྐོར་དང་། ༸རྒྱལ་དབང་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་གི་བཀའ་དགོངས་བཞིན། ཀུན་སྐྱོང་དགེ་རྩ་ཚོགས་པའི་ཁྱབ་ཁོངས་དགོན་སྡེ་ཁག་ཏུ་རྒྱ་གར་དང་འཛམ་གླིང་ཡོངས་སུ་འགོས་ཁྱབ་ཕྱིན་པའི་ཏོག་དབྱིབས་ནད་ཡམས་འདི་ཞི་བའི་ཞལ་འདོན་སྨོན་ལམ་འདེབས་མུས་ཡིན་པ་མ་ཟད། རྒྱ་གར་གཞུང་གི་ཏོག་དབྱིབས་རིམས་འགོག་ལས་འགུལ་ལ་རྒྱབ་སྐྱོར་དང་། གདུང་སེམས་མཉམ་སྐྱེད་མཚོན་ཆེད་ཀུན་སྐྱོང་དགེ་རྩ་ཚོགས་པ་བརྒྱུད་སྲིད་བློན་གྱི་གཟིགས་སྐྱོང་ཐེབས་རྩར་(PM Cares fund) ཧིན་སྒོར་འབུམ་ ༡༢ ཀྱི་ཞལ་འདེབས་འབུལ་རྒྱུ་ཡིན་སྐོར་་གསུངས་འདུག

དེ་བཞིན་ཁ་སང་ཀུན་སྐྱོང་དགེ་རྩ་ཚོགས་པས་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་ཇེ་རཱམ་ཋ་ཀོར་མཆོག་ལ་ཕུལ་བའི་ཕྱག་བྲིས་ནང་། ད་ལྟའི་ཆར་ཧི་མ་ཅལ་གཞུང་གི་ཐབས་བྱུས་བཟང་པོ་ལ་བརྟེན་ནས་མངའ་སྡེའི་ནང་ཏོག་དབྱིབས་ནད་ཡམས་སྟངས་འཛིན་གང་འཚམ་གནང་ཐུབ་ཡོད་པ་དང་། སྤྱི་ཁྱབ་བློན་ཆེན་མཆོག་ནས་མངའ་སྡེའི་ཏོག་དབྱིབས་རིམས་འགོག་ལས་འགུལ་ཚགས་ཚུད་སྤེལ་བཞིན་པར་ཡི་རངས་བསྔགས་བརྗོད་ཞུ་བཞིན་ཡོད་སྐོར་དང་། ༸རྒྱལ་བ་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་གི་བཀའ་དགོངས་ལྟར། མངའ་སྡེའི་རིམས་འགོག་ལས་འགུལ་ལ་རྒྱབ་སྐྱོར་དང་གདུང་སེམས་མཉམ་སྐྱེད་མཚོན་ཆེད། སྤྱི་ཁྱབ་བློན་ཆེན་མཆོག་གི་ངལ་སེལ་ཐེབས་རྩར་ཧིན་སྒོར་འབུམ་ ༣ གྱི་ཞལ་འདེབས་གནང་རྒྱུ་ཡིན་སྐོར་བཀོད་འདུག་ལ། ཅི་སྟེ་མངའ་སྡེ་གཞུང་ལ་རིམས་འགོག་ལས་འགུལ་ཐད་ཕྱག་རོགས་དགོས་ཚེ། དགེ་རྩ་ཚོགས་པས་ནམ་ཡིན་ཡང་དང་ལེན་བྱ་རྒྱུ་ཡིན་སྐོར་ཡང་གསུངས འདུག

ཀུན་སྐྱོང་དགེ་རྩ་ཚོགས་པས་འབྲས་ལྗོངས་མངའ་སྡེ་གཞུང་ལ་ཡང་རིམས་འགོག་ལས་འགུལ་ཆེད་ཧིན་སྒོར་འབུམ་ ༣ གྱི་ཞལ་འདེབས་ཕུལ་འདུག་ཅིང་། ༸རྒྱལ་བ་ཀརྨ་པ་ཨོ་རྒྱན་འཕྲིན་རྡོ་རྗེ་མཆོག་ནས་བཀའ་ཕེབས་པ་ལྟར། བཀའ་བརྒྱུད་སྨོན་ལམ་ངོས་ནས་སྲིད་བློན་གྱི་གཟིགས་སྐྱོང་ཐེབས་རྩ་དང་། བྷི་ཧར་མང་སྡེ་གཞུང་གཉིས་ལ་ཧིན་སྒོར་འབུམ་ ༥ རེའི་ཞལ་འདེབས་ཕུལ་འདུག་པ་མ་ཟད། གནས་མཆོག་རྡོ་རྗེ་གདན་གྱི་གྷ་ཡ་རྫོང་ཁོངས་ཀྱི་ས་གནས་ཡུལ་མི་དགོས་ངེས་ཅན་རྣམས་ལ་བཟའ་ཆས་ཀྱིས་མཚོན་པའི་དགོས་མཁོ་རིགས་སྦྱིན་གཏོང་གནང་འདུག

གཞན་ཡང་། ཟླ་འདིའི་ཕྱི་ཚེས་༨ཉིན་ཧི་མཱ་ཅལ་ཀང་ར་རྫོང་ཁོངས་སྦིར་རྙིང་དགོན་དཔལ་ཡུལ་ཆོས་འཁོར་གླིང་འདུས་སྤྱི་ནས་རྒྱ་གར་དབུས་གཞུང་དང་། མངའ་སྡེ་གཞུང་དམངས་གཉིས་ལ་གདུང་སེམས་མཉམ་སྐྱེད་ཀྱིས་སྔོན་འགོག་གི་ངལ་སེལ་དང་། དེ་བཞིན་གཉན་རིམས་འདིས་མནར་བའི་ཉམ་ཐག་གི་ནད་པ་རྣམས་ཀྱི་ཆེད་དུ་དམིགས་ཏེ། Prime Minister Cares Fund རྒྱ་གར་སྲིད་བློན་མཆོག་གི་ངལ་སེལ་ཐེབས་རྩ་རུ་ཧིན་སྒོར་འབུམ་གསུམ་དང༌། ཧི་མཱ་ཅལ་མངའ་སྡེའི་བློན་ཆེན་གྱི་ངལ་སེལ་ཐེབས་རྩ་རུ་ཧིན་སྒོར་འབུམ་གཉིས་བཅས་བསྡོམས་པའི་ཧིན་སྒོར་ལྔ་འབུམ་ཐམ་པ་ཕུལ་ཡོད་པ་དང་བསྟུན། ནད་ཡམས་འདི་ཉིད་མྱུར་དུ་ཞི་ནས་འཛམ་གླིང་གི་འགྲོ་བ་རྣམས་ཞི་བདེའི་འཚོ་བ་ལ་རོལ་ཐུབ་པའི་བདེན་ཚིག་གསོལ་སྨོན་གནང་འདུག

གསར་འགོད་པ། པ་སངས་ཚེ་རིང་།