བོད་སྒྱུར་བ། འཕྲིན་ལས་དབང་འདུས།
སྲིད་དོན་པ་དང་ཁྲིམས་རྩོད་པ། ཤེས་ཡོན་ཅན། གྲོས་ཚོགས་ཀྱི་འཐུས་མི་ཁག་གཅིག་ནས་རྒྱ་ནག་སྐམ་ས་དང་ཕྱི་ཕྱོགས་གཉིས་སུ་བཞུགས་པའི་རྒྱ་ནག་གི་མཐུན་གྲོགས་རྣམ་པ་དང་། རྒྱ་ཆེའི་རྒྱ་ནག་གི་མི་སེར་ཚང་མར་ཡོངས་གྲགས་གཏོང་ཡིག
མི་ལོ་བཅུ་ཕྲག་གཅིག་ཙམ་གྱི་རིང་ཁྱེད་རྣམ་པ་མང་པོ་ཞིག་ནས། དྲག་པོས་སྐྱོང་བའི་སྲིད་ལུགས་ལ་རྒྱབ་སྐྱོར་དང་བཟོད་སྲན་ཆེན་པོ་ཞུས་རྐྱེན། དེང་གོ་ལ་ཡོངས་གཉན་འཕྲང་ཅན་གྱི་དཀའ་ངལ་འདིའི་ནང་ལྷུང་བ་སྨྲོས་མི་དགོས། ཕྱི་ལོ་ ༢༠༢༠ ཟླ་བ་ ༤ པའི་ཚེས་ ༢ ཉིན་རྒྱ་ནག་གི་ཤེས་ཡོན་ཅན་བརྒྱ་སྐོར་ཞིག་གིས་རྒྱ་ནག་དམར་ཤོག་ཚོགས་པར་ཁ་བརྡུང་དྲག་པོ་བཏང་བའི་ཡོངས་གྲགས་གཏོང་ཡིག་ཞིག་སྤེལ་ཡོད་ཅིང་། ཡོངས་གྲགས་གཏོང་ཡིག་དེའི་ནང་ “གལ་གནད་ཆེ་བའི་མང་ཚོགས་ཀྱི་བསམ་ཚུལ་མང་དག་གཅིག་རྒྱ་ཁྱབ་ཅན་གྱི་ཏོག་དབྱིབས་ནད་དུག་ལ་ཁ་གཡར་ཏེ་ཆབ་སྲིད་ལ་སྒྱུར་ཐབས་བྱེད་པ།ˮ ཞེས་པ་དང་། ཡང་ “ནད་ཡམས་རྒྱ་ཁྱབ་ཏུ་ཕྱིན་པའི་གཉན་འཕྲང་ཅན་གྱི་དུས་སྐབས་འདིར། ཏོག་དབྱིབས་ནད་དུག་བཅུ་དགུ་པའི་འབྱུང་ཁུངས་དང་རྩ་བ་ད་དུང་ཐག་གཅོད་ཐུབ་མེད། འོན་ཀྱང་དྲི་བ་དེ་རྣམས་ནི་གལ་ཆེན་མིན་ལ། དེ་བས་ཕན་ཚུན་མཛུབ་མོ་བཀེར་རེས་ཀྱིས་དམའ་འབེབས་འདྲ་བྱས་ཚེ། དེས་མི་ཚང་མར་ཕན་པ་ལས་གནོད་པའི་གཞི་མར་འགྱུར་ངེས་ཡིན།ˮ ཞེས་བཀོད་འདུག ལྷག་པར་ཁོང་ཚོས་གླེང་སློང་ཤུགས་ཆེ་བསྒྲགས་དོན་གཞན་ཞིག་ནི་ནད་ཡམས་འདི་ཆབ་སྲིད་ཀྱི་ངོ་བོར་བསྒྱུར་བ་དེ་རེད།
ཡོངས་གྲགས་གཏོང་ཡིག་དེས་གང་མཚོན་གྱི་ཡོད་རེད་ཟེར་ན། རང་དབང་ཅན་གྱི་ཤེས་ལྡན་སློབ་དཔོན་ཤུའུ་ཀྲེང་རོན་གྱིས། “ཧ་ཅང་ཁྱད་མཚར་བའི་ 《དམར་པོའི་རིག་གཞུང་།》 དང་ཞེ་ལོག་པའི་ཟོལ་བསྟོད་ཁོ་ན་ཞིག་སྟེ། འདི་ལྟ་བུའི་སྒྲིག་འཛུགས་ཀྱི་ལམ་ལུགས་དེ་ཉིད་ནི། ངོ་ཚ་བྲལ་བའི་དམར་པོའི་མཐུན་ཕྱོགས་ཀྱི་ཁྱུ་ཚོགས་དག་གིས་དུས་ཀུན་བསྟོད་བསྔགས་ཀྱི་འབོད་དབྱངས་སྒྲགས་པའི་མུར་གནས་ཡོད། ˮ ཅེས་གསུངས་འདུག ད་ཆ་བཟང་བཙོན་འོག་གནས་པའི་སློབ་དཔོན་ཤུའུ་ཡིས། རྒྱ་ནག་དམར་ཤོག་ཚོགས་པར་རྒྱབ་སྐྱོར་དཔུང་འདེགས་བྱེད་རྒྱུ་མཚམས་འཇོག་དགོས་སྐོར། རྒྱལ་གཅེས་བློ་མཐུན་ཚོར་འབོད་བསྐུལ་གནང་འདུག་པའི་ནང་ “དྲང་བདེན་མ་ཡིན་པའི་གནས་དོན་དེར་ཁོང་ཁྲོ་ལང་རྒྱུའི་ཚབ་ལ། ཁྱེད་ཀྱི་མི་ཚེ་འདི་ཡ་རབས་བཟང་སྤྱོད་ཀྱི་མེ་ལྕེ་ཞིག་ཏུ་སྤྲུལ་ཏེ། མུན་ནག་གི་འཆིང་ཐག་དུམ་བུར་གཏོར་ཏེ་སྐྱ་རེངས་བསུ་མ་ཞུ་དགོས།ˮ ཞེས་འཁོད་འདུག གོ་ལ་ཡོངས་ལ་རྒྱ་ཁྱབ་ཏུ་ཕྱིན་པའི་རྐྱེན་ངན་ནད་ཡམས་འདིི་འབྱུང་འགྱུར་གཏན་འགོག་ཐུབ་ཕྱིར། ནད་འབུ་འདིའི་ཐོག་མའི་འབྱུང་ཁུངས་ཤེས་རྟོགས་ཐུབ་རྒྱུ་གལ་གནད་དུ་གྲུབ་ཅིང་། ད་ལྟའི་ཆར་ཁ་ཚོན་གཅོད་ཐུབ་པའི་འབྱུང་ཁུངས་ཞིག་རྙེད་མེད་ཀྱང་། དེའི་འབྱུང་ཁུངས་ཤེས་རྟོགས་ཐུབ་རྒྱུ་ནི་རྒྱ་ནག་ཙམ་མིན་པར་འགྲོ་བ་མི་སྤྱིའི་བདེ་རྩར་ཐུག་ཡོད།
ཧུའུ་པེཡི་ཞིང་ཆེན་གྱི་རྒྱལ་ས་ཝུ་ཧན་དམར་ཤོག་ཚོགས་པའི་དབང་འཛིན་པ་ཚོས། ནད་ཡམས་རྒྱ་ཁྱབ་ཏུ་ཕྱིན་པའི་རྩ་བ་སྦས་གསང་བྱས་ཡོད་ཅིང་། རྒྱ་ནག་དམར་ཤོག་ཚོགས་པའི་ཤུགས་རྐྱེན་འོག་འཛམ་གླིང་འཕྲོད་བསྟེན་ལྷན་ཚོགས་ཀྱིས་ཀྱང་ཐོག་མའི་ཆར། ནད་ཡམས་ཁྱབ་བརྡལ་ཕྱིན་མེད་ལུགས་འགྲེལ་བརྗོད་གནང་། ལྷག་པར་ཕྱི་ཟླ་ ༡༢ པའི་ཟླ་མཇུག་ཙམ་ལ་ཐེ་ཝན་འཕྲོད་བསྟེན་ལས་སྣེ་བ་ཚོས། ན་ཚ་འདི་མི་དང་མིའི་དབར་ཁྱབ་གདལ་འགྲོ་ལུགས་ཉེན་བརྡ་བཏང་ཡོད་ཀྱང་། ཁོང་ཚོས་སྣང་མེད་བསྐྱུར་འཇོག་བྱས་སྟབས་སྐྱོན་བརྗོད་གནང་མཁན་མི་ཉུང་བ་ཞིག་བྱུང་བ་རེད། རྒྱ་ཁྱབ་ཏུ་ཕྱིན་པའི་ཏོག་དབྱིབས་ནད་དུག་ལ་དམིགས་དཔེ་འོས་པའི་གདོང་ལེན་གནང་མཁན་ཐེ་ཝན་དམངས་གཙོའི་རྒྱལ་ཁབ་འདི། རྒྱ་ནག་དམར་ཤོག་ཚོགས་པའི་གནོན་ཤུགས་འོག་འཛམ་གླིང་འཕྲོད་བསྟེན་ལྷན་ཚོགས་ཀྱི་སྒྲིག་ཁོངས་ནས་ཟུར་འབུད་གནང་།
དེ་ཡང་རྒྱ་ནག་གི་མུན་ནག་དུས་སྐབས་འདི། རང་ངོས་ནས་བཟོས་པའི་རྨ་ཁ་ཞིག་ཡིན་པ་ང་ཚོས་ནམ་ཡང་བརྗེད་མི་ཉན། ནད་གཞི་འདི་ཐོག་མར་ཁྱབ་འགོ་ཚུགས་དུས། རྒྱ་ནག་གི་སྨན་པ་ཚོས་ཆེད་ལས་སྨན་པ་གཞན་ཚོར་ཉེན་བརྡ་གཏོང་ཐབས་ཞུས་ཀྱང་། རྒྱ་ནག་དམར་ཤོག་ཚོགས་པས་ཁ་གྲག་ཏུ་བཅུག་མེད། སྨན་པ་ཨའི་ཧྥན་ལྟ་བུར་མཚོན་ན། རྒྱལ་ནང་གི་གསར་འགོད་པ་ཞིག་གི་བཅར་འདྲི་དང་ལེན་ཞུས་པའི་ཉེར་ལན་ལ་བརྟེན། དམངས་ཁྲོད་དུ་ནམ་ཡང་འགྲོ་སྐྱོད་མི་ཆོག་པ་བཟོས་པ་དང་། ཁོ་མོའི་ལས་རོགས་སྨན་པ་ལཱི་ཝན་ལི་ལྟ་བུར་མཚོན་ན། ཏོགས་དབྱིབས་ནད་དུག་གི་ཁ་གཏད་གཅོག་གིན་ཝུ་ཧན་དུ་འདས་གྲོངས་གྱུར་པ་རེད། འཆི་མཁར་ཉལ་ཁྲིའི་སྟེང་ནས་ “སྤྱི་ཚོགས་བདེ་ཐང་སྐྲུན་པར་བསམ་ཚུལ་གཅིག་ཁོ་ནས་འགྲིགས་ཐབས་རྩ་བ་ནས་མེད།ˮ ཅེས་སྐད་གྲགས་ཆོད་པའི་གསུང་དུམ་འདི་བཤད་ཡོད།
རྒྱ་ནག་གི་ཁེ་ལས་པ་རན་ཏྲི་ཆང་གིས་ “རྒྱ་ཆེའི་མི་དམངས་ཀྱི་མངོན་དོད་ཚབ་མཚོན་ཐུབ་པའི་གསར་ལམ་མེད་པའི་རྐྱེན་གྱིས། དངོས་ཡོད་གནས་ཚུལ་ཁྱབ་སྤེལ་ཐུབ་མིན་གྱི་གནས་སྟངས་ཆགས་ཚེ། རྒྱ་ཆེའི་མང་ཚོགས་ཀྱི་མི་ཚེ་དག་ནད་འབུ་དང་ཆབ་སྲིད་ཀྱི་ལམ་ལུགས་ལོག་པ་ཅན་གཉིས་ཀས་ཕམ་ཉེས་གཏོང་ངེས་ཡིན།ˮ ཞེས་བྲིས་རྐྱེན་ཕྱི་ཟླ་ ༣ པའི་ཚེས་ ༡༢ ཉིན་ཁོང་གར་སོང་ཆ་མེད་དུ་འགྱུར་ཡོད། དེ་བཞིན་ཝུ་ཧན་གྲོང་ཁྱེར་གྱི་དངོས་ཡོད་གནས་སྟངས་ཇི་ཆགས་རང་དབང་གི་སྒོ་ནས་བརྗོད་ཐབས་བྱ་མཁན། སྙིང་སྟོབས་ཅན་གྱི་མང་ཚོགས་གསར་འགོད་ལས་རིགས་པ་ (Citizen Journalists) ཁྲན་ཆུ་ཧྲི་དང་ཧྥེང་པིན། ལཱི་ཙི་ཧུའ་བཅས་གསུམ་ད་ཆ་གར་སོང་ཆ་མེད་དུ་གྱུར་ཟིན།
སྲིད་འཛིན་ཞི་ཅིན་ཕིང་གི་འགོ་འཁྲིད་ཀྱི་ནུས་སྟོབས་ཉམས་ཉེས་ཕྱིན་པ་ལས་ལྷག་ཅིག འཁྲུག་ཆ་དོད་པའི་རྒྱ་ནག་སྐམ་ས་ཆེན་པོའི་ཆབ་སྲིད་ཀྱི་གཡོ་འགུལ་དེ་རེད། ན་གཞོན་སློབ་ཕྲུག་ཀྲང་ཝན་པིན་གྱིས་རང་ཉིད་དེ་སྔ་རྒྱ་ནག་དམར་ཤོག་ཚོགས་པའི་མཐུན་ཕྱོགས་དང་བཅོས་མིན་གྱི་རྒྱབ་སྐྱོར་བ་ཞིག་ནས་ཇི་ལྟར་དཔྱད་ཤེས་ལྡན་པའི་མི་སེར་ཞིག་ཏུ་གྱུར་ཚུལ་གྱི་བརྙན་ཐུང་ཁ་བརྡ་ (Video Message) ཞིག་ཉེ་ཆར་སྤེལ་གནང་འདུག་པའི་ནང་ “ངས་རྒྱ་ནག་གི་མེ་འགོག་གྱང་ཆེན་ (Great Fire Wall) འདི་ཚད་འཇལ་སྐབས། རྒྱ་ནག་དམར་ཤོག་ཚོགས་པས་འབྲུག་གི་སྡེར་མོ་དེ་འཛམ་གླིང་ས་ཕྱོགས་ཀུན་ལ་བརྐྱངས་བ་རིམ་པས་ཤེས་རྟོགས་བྱུང་། དེ་ཡང་བོད་མི་དང་ཧོང་ཀོང་། ཤིང་ཅང་གིས་གཙོས་མཉམ་སྦྲེལ་ཞིང་ལས།༼༡༩༥༠༽ (Collective Farming, 1950s) རིག་གནས་གསར་བརྗེ་ཆེན་མོ།༼༡༩༦༦༌༌༡༩༧༦༽ (The Cultural Revolution) གནམ་སྡེ་སྒོ་མོ་ཆེའི་དམར་གསོད་དོན་རྐྱེན།༼༡༩༨༩༽ (The Tiananmen massacre) དེ་བཞིན་ཆོས་འཁོར་རྩ་རླུང་སྒོམ་སྒྲུབ་པ། 《ཆོས་ཕྱོགས་ཀྱི་ལས་འགུལ།》 (Falun Gong, Spiritual Movement) བཅས་པར་སྡུག་སྦྱོང་མནར་གཅོད་ཚད་མེད་བཏང་ཡོད། འོན་ཀྱང་ཚང་མས་ལོང་བའི་རྟུལ་ཞུགས་འཛིན་ཏེ་མུ་མཐུད་རྒྱ་ནག་དམར་ཤོག་ཚོགས་པར་ཆེ་བསྟོད་ཀྱི་གླུ་དབྱངས་ལེན་པའི་གནས་བབས་དག་མཐོང་དུས། ངའི་སེམས་པ་བཟོད་གླགས་བྲལ་བའི་གནས་སུ་ལྷུང་སོང་།ˮ ཞེས་གསུངས་འདུག རྙན་ཐུང་དེ་བཟོས་རྗེས་ཡུན་རིང་མ་འགོར་བར་ཀྲང་གར་སོང་ཆ་མེད་དུ་གྱུར་ཅིང་། ཁོང་གི་སེམས་མཐུན་གྲོགས་པོ་ཚོའི་སེམས་ཚབ་བྱེད་གཞི་གཙོ་བོ་ནི་རྒྱ་ནག་གི་གསང་བའི་སྤྱི་བདེ་མི་སྣས་ཁོང་ལ་བཅར་རྡུང་དང་དྲི་ཞིབ་བྱ་ངེས་པ་དེ་ཡིན་འདུག
ང་ཚོ་ཚང་མ་གཡོལ་བར་དཀའ་བའི་དངོས་ཡོད་གནས་བབས་གོ་ལ་རྒྱ་ཁྱབ་ཀྱི་ནད་ཡམས་འདིར་གདོང་ལེན་མི་བྱེད་དཀའ་མེད་ཀྱི་དུས་འདིར། གང་ཟག་གཅིག་གིས་མུ་མཐུད་སྲིད་དབང་གི་ཁ་ལོ་བསྒྱུར་བའི་རྒྱ་ནག་དམར་ཆོག་ཚོགས་པའི་དབང་འཛིན་འོག མི་དམངས་སྤྱིའི་འཕྲོད་བསྟེན་གྱི་གཙོས་ཕྱོགས་ཀུན་གྱི་འཚོ་བའི་གནས་བབས་ཆབ་སྲིད་ཀྱི་ངོ་བོར་བསྒྱུར་ཏེ་ཉེན་ཚབ་ཀྱི་གནས་སུ་གྱར། ལྷག་པར་ང་ཚོ་ཤེས་ཡོན་ཅན་ཚོས་རྒྱ་ནག་དམར་ཤོག་ཚོགས་པའི་ཕུགས་མདུན་ལ་ཡིད་ཆེས་བློ་གཏད་མི་བྱེད་རྒྱུ་དང་། ཁོང་ཚོའི་སྲིད་བྱུས་དེ་གཡོ་འགུལ་གཏོང་མི་ཐུབ་པ་རྒྱུ་མཚན་དུ་བྱས་ཏེ་ངོས་ལེན་རྩ་བ་ནས་བྱེད་མི་ཉན་ལ། དེ་བས་ང་ཚོས་གཞུང་འབྲེལ་མིན་པའི་རྒྱ་ནག་ (Unofficial China) གི་འབོད་སྒྲ་དེར་དམིགས་བསལ་དོ་སྣང་ཤུགས་ཆེ་གནང་དགོས་སྙམ།
འཇིགས་སྣང་གི་འོག་ཆབ་སྲིད་ཀྱི་ཁ་ལོ་བསྒྱུར་བའི་རྒྱ་ནག་དམར་ཤོག་ཚོགས་པ་འདི། རང་དབང་གི་བསམ་བློ་ལྡན་པའི་ཤེས་ཡོན་ཅན་རྣམ་པ་དང་། སྨན་པ་རྣམ་པ། ཁེ་ལས་པ་རྣམ་པ། མང་ཚོགས་གསར་འགོད་ལས་རིགས་པ་རྣམ་པ། སྤྱི་འབངས་ཀྱི་བདེ་སྡུག་ལ་དོ་འཁུར་བཞེས་མཁན་ཁྲིམས་རྩོད་པ་རྣམ་པ། གཞན་ཡང་ན་གཞོན་སློབ་ཕྲུག་རྣམ་པས་དུས་ནམ་ཡང་ངོས་ལེན་ཞུ་ཐབས་བྲལ་ལ། ཁྱེད་རྣམས་ཀྱང་དེ་ལྟར་ཡིན་ཤས་ཆེ།
ང་ཚོ་རྒྱལ་སྤྱིའི་ནང་དམངས་གྲགས་ (Public Figure) ཅན་གྱི་ཚོ་ཁག་དང་། བདེ་སྲུང་གི་སྲིད་བྱུས་དབྱེ་ཞིབ་པ། གཞན་ཡང་རྒྱ་ནག་ལྟ་ཞིབ་པ་ཞིག་ཡིན་པའི་ཆ་ནས། སྙིང་སྟོབས་དང་ཡང་དག་དཔྱོད་ཤེས་ལྡན་པའི་རྒྱ་ནག་གི་རྒྱ་ཆེའི་མི་དམངས་ཀྱིས་གཙོས་ཤུའུ་ཀྲང་རུན་དང་ཨེཡི་ཧྥན། ལཱི་ཝན་ལང་། རན་ཀྲི་ཆིང་། ཁྲན་ཆི་ཧྲི། ཧྥེང་པིན། ལཱི་ཙི་ཧུའ། ཤུའུ་ཀྲི་ཡོང་། ཀྲང་ཝན་པིན་ལ་སོགས། འདིར་ཉུང་ཤས་ཤིག་གི་མིང་སྨྲོས་པ་དང་མ་སྨྲོས་པ་ཚང་མས། རང་ཉིད་སྒེར་གྱི་བདེ་སྐྱིད་དང་རང་དབང་ལ་ཇི་མ་སྙམ་པར། ལུས་སྲོག་བློས་བཏང་གིས་རྒྱ་ནག་ནང་རང་དབང་སྒོ་འབྱེད་ཆེད། འབད་བརྩོད་གནང་མཁན་དོན་ནམ་གྱི་དཔའ་བོ་ཞེ་གཅིག་ཆགས་ཡོད་སྟབས་དུང་སེམས་མཉམ་སྐྱེད་ཞུ་རྒྱུ་ཡིན།
ཁོང་རྣམ་པ་སྒེར་གྱི་འབོད་སྒྲ་དེ། ད་ཆ་མགྲིན་དབྱངས་གཅིག་གྱུར་གྱི་འབོད་སྒྲ་ཞིག་ཏུ་འགྱུར་ཟིན། ཁོང་རྣམ་པའི་མངོན་འདོད་དང་དགོས་འདུན་ངོ་མ་ནི། དྲང་བདེན་གྱི་སྒོ་ནས་རྒྱ་ནག་དམར་ཤོག་ཚོགས་པའི་སྲིད་བྱུས་དེ་དག རྒྱ་ནག་དང་འཛམ་གླིང་མི་དམངས་ཐོག་བཟང་ངན་གྱི་ཤུགས་རྐྱེན་ཇི་ཆགས་ཡང་དག་དཔྱད་ཞིབ་མཐིལ་ཕྱིན་གནང་རེ་ཙམ་ལས་གཞན་གང་ཡང་མ་འདས། ང་ཚོའི་རེ་བར་ཁྱེད་རྣམས་ཀྱང་ཁོང་རྣམ་དང་ལྷན། མཉམ་ཞུགས་ཡོང་བའི་སྐུལ་འདེད་ཞུ་རྒྱུ་ཡིན།
མཆན། ཡོངས་གྲགས་ཀྱི་གཏོང་ཡིག་འདི་སྲིད་དོན་པ་དང་ཁྲིམས་རྩོད་པ། ཤེས་ཡོན་ཅན། གྲོས་ཚོགས་ཀྱི་འཐུས་མི་བརྒྱ་སྐོར་ཞིག་ནས་མཚན་རྟགས་བསྐྱོན་ཏེ་བསྐུར་ཡོད། མ་རྩོམ་གྱི་དྲ་ཐག https://hongkongfp.com/2020/04/14/open-letter-the-communist-partys-rule-by-fear-endangers-chinese-citizens-and-the-world/
